撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 Ná-than ê Sìn-sit kah Ta-bi̍t ê Hóe-kái
Siōng-chú chhe Ná-than khì kìⁿ Ta-bi̍t. I lâi-kàu Ta-bi̍t hia, kā i kóng, " Tī chi̍t-ê siâⁿ ū nn̄g-ê lâng, chi̍t-ê hó-gia̍h, chi̍t-ê sànchhiah.
12:2 Hó-gia̍h ê ū gû-iûⁿ chin chē,
12:3 sànchhiah lâng bô siáⁿ-mi̍h, chí ū chi̍t chiah iûⁿ-chéng-á, to̍h-sī i só͘ bé lâi chhī ê, i kah i tī hia kah i ê kiáⁿ chò-hóe tióng-tōa, chia̍h i só͘ chia̍h ê, lim i ê poe, khùn tī i ê heng chêng, khòaⁿ i chhin-chhiūⁿ kakī ê chabó͘ kiáⁿ.
12:4 Ū chi̍t-ê chhut-gōa lâng lâi-kàu hó-gia̍h lâng hia, hó-gia̍h lâng m̄-kam tùi i ê iûⁿ-kûn, gû-kûn chhú-lâi chún-pī hō͘ lâng-kheh chia̍h, tian-tò chhú sànchhiah lâng ê iûⁿ-á, chún-pī lâi hō͘ lâng-kheh chia̍h.
12:5 Ta-bi̍t tōa siū-khì hit-ê lâng, kā Ná-than kóng, " Góa kí éng-oán oa̍h ê Siōng-chú lâi chiùchōa, chò chit-ê tāichì ê lâng tio̍h sí!
12:6 Tio̍h pôe i ê iûⁿ-á sì pōe, in-ūi i chò chit-ê tāichì, mā in-ūi i bô liân-bín ê sim. "
12:7 Ná-than kā Ta-bi̍t kóng, " Lí to̍h-sī hit-ê lâng. Siōng-chú — I-su-la-el ê Siōng-tè ánne kóng, ' Góa ēng iû kā lí boah, hō͘ lí chò I-su-la-el ê ông, kiù lí thoat-lī Sàu-lô ê chhiú.
12:8 Góa koh ēng lí ê chú ê chhù-the̍h hō͘ lí, ēng lí ê chú hiahê bó͘ kau tī lí ê heng chêng, koh ēng I-su-la-el kah Iô-tah ke hō͘ lí; chiahê nā iáu lia̍h-chò sī sió-khóa, Góa ē ke-thiⁿ chit khoán hit khoán hō͘ lí.
12:9 Lí ná ē khòaⁿ-khin Siōng-chú ê bēng-lēng, kiâⁿ I só͘ khòaⁿ-chò sī pháiⁿ ê tāichì? Lí ēng to thâi-sí Hiat lâng U-lī-a, to̍h-sī chioh Am-móng lâng ê to thâi-sí i, koh chhōa i ê bó͘ chò lí ê bó͘.
12:10 Taⁿ to-kiàm ē éng-oán bô lī-khui lí ê ke, in-ūi lí khòaⁿ-khin Góa, chhōa Hiat lâng U-lī-a ê bó͘ chò lí ê bó͘. '
12:11 Siōng-chú koh ánne kóng, ' Lí khòaⁿ, Góa beh tùi lí ê ke heng-khí chai-hō kong-kek lí, Góa beh tī lí ê ba̍k-chiu chêng, kā lí hiahê bó͘ hō͘ lí ê chhù-piⁿ, i ē tī chheng-thian pe̍k-ji̍t kah lí hiahê bó͘ tâng-pâng.
12:12 In-ūi lí tī àm-tiong chiàu ánne kiâⁿ, chóng-.sī, Góa beh tī chheng-thian pe̍k-ji̍t, tī I-su-la-el jîn-bîn ê bīn-chêng, kiâⁿ chit-ê tāichì. '"
12:13 Ta-bi̍t kā Ná-than kóng, " Góa ū tek-chōe Siōng-chú. " Ná-than kā Ta-bi̍t kóng, " Siōng-chú í-keng tû-khì lí ê chōe, lí bē tì-kàu sí.
12:14 Chóng-.sī, in-ūi lí chò chit-ê tāichì, hō͘ Siōng-chú ê tùi-te̍k ū siat-to̍k ê lí-iû, só͘-í, I hō͘ lí só͘ seⁿ ê kiáⁿ it-tēng ē sí.
12:15 Ná-than chiū tńg-khì in chhù. Ta-bi̍t Kiáⁿ-jî ê Iáu-chiat
Siōng-chú phah U-lī-a ê bó͘ kā Ta-bi̍t seⁿ ê eⁿ-á, i chiū phòa-pēⁿ chin siong-tiōng.
12:16 Ta-bi̍t chiū ūi tio̍h hit-ê kiáⁿ tùi Siōng-chú kî-tó. Ta-bi̍t koh kìm-chia̍h, ji̍p-khì lāi-bīn, kui mê tó tī thô͘-kha.
12:17 Ta-bi̍t chhù lāi hiahê lāu lâng khí-.lâi, lâi-kàu i ê sin piⁿ, beh hû i tùi thô͘-kha khí-.lâi, chóng-.sī, i m̄-khéng, mā bô beh kah in chò-hóe chia̍h.
12:18 Kàu tē-chhit ji̍t, gín'á sí-.khì. Ta-bi̍t ê jîn-sîn m̄-káⁿ kā i kóng gín'á sí à, in-ūi in kóng, " Gín-á iáu oa̍h-.leh ê sî, lán khǹg i, i siōng-chhiáⁿ m̄-thiaⁿ lán ê ōe, nā kā i kóng gín'á sí-.khì, i ê siong-sim ē kàu án-chóaⁿ? "
12:19 Ta-bi̍t khòaⁿ tio̍h i ê jîn-sîn chī-bú-chī-chū teh kóng ōe, Ta-bi̍t chiū chai gín'á í-keng sí. Ta-bi̍t chiū mn̄g i ê jîn-sîn kóng, " Gín-á kám sí à? " In kóng, " Sí à. "
12:20 Ta-bi̍t chiū tùi tē-.ni̍h khí-.lâi, sé seng-khu, boah iû, ōaⁿ saⁿ, ji̍p-khì Siōng-chú ê tiān kèng-pài, jiân-āu tńg-khì i ê chhù. I hoan-hù lâng pâi mi̍h tī i ê bīn-chêng, i chiū chia̍h.
12:21 Jîn-sîn mn̄g i kóng, " Lí só͘ chò ê sī án-chóaⁿ? Gín-á oa̍h-.leh ê sî, lí kìm-chia̍h thî-khàu; gín'á sí, lí tian-tò khí-lâi chia̍h. "
12:22 Ta-bi̍t kóng, " Gín-á iáu oa̍h-.leh, góa kìm-chia̍h thî-khàu, in-ūi góa siūⁿ kóng, kiámchhái Siōng-chú ē liân-bín góa, hō͘ gín'á oa̍h-.leh, mā ū khó-lêng.
12:23 Gín-á í-keng sí à, góa kìm-chia̍h beh chhòng siáⁿ? Góa kám ē hō͘ i tò tńg-.lâi? Góa beh khì i hia, i bē tàng lâi góa chia. "
12:24 Só͘-lô-móng ê Chhut-sì
Ta-bi̍t an-ùi i ê bó͘ Bat-se-ba, ji̍p-khì kah i tâng-pâng, i chiū seⁿ kiáⁿ, chiū kā i hō-miâ kiò-chò Só͘-lô-móng, Siōng-chú mā thiàⁿ i,
12:25 chiū thok Ná-than sian-ti kā i hō-miâ kiò-chò Iâ-tí-tí-a（ Chù, Hi-bú-lâi bûn ê im-tha̍k, ì-sù sī " Siōng-chú só͘ thiàⁿ ê". ）, in-ūi Siōng-chú thiàⁿ i.
12:26 Ta-bi̍t Cheng-ho̍k Lap-bah Siâⁿ
( LTS 20: 1-3)
Io-ap kong Am-móng lâng ê Lap-bah, cheng-ho̍k in ê kiaⁿ-siâⁿ.
12:27 Io-ap chhe sù-chiá khì kìⁿ Ta-bi̍t kóng, " Góa kong Lap-bah, í-keng cheng-ho̍k i ê chúi siâⁿ.
12:28 Taⁿ lí tio̍h chū-chi̍p kî-tha ê jîn-bîn lâi, chat iâⁿ kong chit-ê siâⁿ lâi kā i cheng-ho̍k, khióng-kiaⁿ góa cheng-ho̍k chit-ê siâⁿ, lâng chiū ēng góa ê miâ lâi kiò chit-ê siâⁿ. "
12:29 Ta-bi̍t chiū chū-chi̍p chèng lâng, khì kong-kek Lap-bah, lâi kā i cheng-ho̍k.
12:30 I chhú in ê ông thâu-khak téng ê bián-liû, i ê kim tāng chi̍t tha-lan-t, koh ū siuⁿ pó-chio̍h, kā chit-ê lâi tì tī Ta-bi̍t ê thâu-khak. I koh tùi siâⁿ lāi chhú chin chē châi-bu̍t,
12:31 koh lia̍h hiahê siâⁿ ê jîn-bîn chhut-.lâi, hō͘ in ēng kì-á kah thih-pê, í-ki̍p thih ê pó͘-thâu chò khó͘-kang, á-.sī tī hiā-iô lô-khó͘; i khoán-thāi Am-móng lâng hiahê siâⁿ lóng sī ánne. Ta-bi̍t chiū kah chèng lâng tńg-khì Ê-lú-sa-lèm.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。