撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Ta-bi̍t ê Kun-sū Sèng-lī
( LTS 18: 1-17)
Chit sî liáu-āu, Ta-bi̍t phah Hui-lī-sū lâng, hō͘ in khut-ho̍k; Ta-bi̍t koh tùi Hui-lī-sū lâng ê chhiú cheng-ho̍k Bí-tek-an-má.
8:2 Ta-bi̍t koh khì phah Mô͘-ap, hō͘ in tó tī tē-.ni̍h, ēng soh-á lâi niû, niû nn̄g tiâu soh-á tn̂g ê hō͘ i sí, niû móa chi̍t tiâu soh-á tn̂g ê hō͘ i oa̍h. Mô͘-ap lâng chiū kui-ho̍k Ta-bi̍t, lâi chìn-kòng.
8:3 Ta-bi̍t phah Cho͘-ba ông Le-hap ê kiáⁿ Ha-ta-te-chel, hit sî, Le-hap khì tōa hô siūⁿ beh hoe-ho̍k i ê koân-sè.
8:4 Ta-bi̍t lia̍h i ê bé-peng chi̍t-chheng chhit-pah kah pō͘-peng nn̄g bān, Ta-bi̍t kā chiàn-chhia ê bé koah-tn̄g i ê kha-kin, chí ū lâu chi̍t pah tâi chhia ê bé.
8:5 Ta-má-su-ko ê A-lâm lâng lâi pang-chān Cho͘-ba ông Ha-ta-te-chel, Ta-bi̍t chiū thâi-sí A-lâm lâng nn̄g-bān nn̄g-chheng.
8:6 Chiū ánne, Ta-bi̍t tī Ta-má-su-ko ê A-lâm siat-li̍p kun-iâⁿ. A-lâm lâng chiū khut-ho̍k Ta-bi̍t, lâi chìn-kòng. Ta-bi̍t bô-lūn khì tó-ūi, Siōng-chú lóng hō͘ i khah iâⁿ.
8:7 Ta-bi̍t cheng-ho̍k Ha-ta-te-chel hiahê jîn-sîn só͘ kōaⁿ kim ê pîn-pâi, tòa kàu Ê-lú-sa-lèm.
8:8 Ta-bi̍t ông koh tùi sio̍k Ha-ta-te-chel ê Pí-tha kah Be-lō͘-thah ê siâⁿ, tit tio̍h chin chē tâng.
8:9 Han-nah ông Tô-í thiaⁿ tio̍h Ta-bi̍t phah-iâⁿ Ha-ta-te-chel ê kun-tūi,
8:10 Tô-í chiū chhe i ê kiáⁿ Io-lâm khì kìⁿ Ta-bi̍t ông, kā i chhéng-an, kā i chiok-hok, in-ūi i phah-iâⁿ Ha-ta-te-chel. In-ūi Ha-ta-te-chel kah Tô-í tiāⁿtiāⁿ kau-chiàn, Io-lâm ê chhiú mā ū tòa gîn-khì, kim-khì kah tâng-khì.
8:11 Ta-bi̍t ông chiū ēng chiahê mi̍h chò sèng, hiàn hō͘ Siōng-chú, chhin-chhiūⁿ chá-chêng ēng i só͘ khah iâⁿ lia̍t kok ê kim-gîn chò sèng lâi hiàn.
8:12 Chiū-sī tùi A-lâm, Mô͘-ap, Am-móng lâng, Hui-lī-sū lâng kah A-má-le̍k só͘ tit tio̍h ê, í-ki̍p tùi Cho͘-ba ông Le-hap ê kiáⁿ Ha-ta-te-chel só͘ chhiúⁿ-.lâi ê.
8:13 Ta-bi̍t tī iâm ê soaⁿ-kok phah-sí A-lâm chi̍t-bān peh-chheng lâng, tò tńg-.lâi ê sî, chiū tit tio̍h tōa miâ-siaⁿ.
8:14 I koh tī E-tóm siat kun-iâⁿ, to̍h-sī tī E-tóm choân tē siat kun-iâⁿ. E-tóm lâng chiū lóng kui-ho̍k Ta-bi̍t. Ta-bi̍t bô-lūn khì tó-ūi, Siōng-chú lóng hō͘ i khah iâⁿ.
8:15 (Ta-bi̍t ê Tāi-sîn
LTS 18:14-17)
Ta-bi̍t chò I-su-la-el jîn-bîn ê ông, Ta-bi̍t péng-kong kiâⁿ-gī tī i ê jîn-bîn.
8:16 Che-lú-iah ê kiáⁿ Io-ap chò kun-tiúⁿ, A-hi-lu̍t ê kiáⁿ Iô-sa-hoat chò sú-koaⁿ.
8:17 A-hi-top ê kiáⁿ Cha-tok kah A-bi-a-thal ê kiáⁿ A-hi-mé-le̍k chò chè-si, Se-la-iah chò su-kì.
8:18 Io-ho-iá-tah ê kiáⁿ Be-ná-iah thóng-hat Ke-le-thih lâng kah Pí-lí-thê lâng, Ta-bi̍t hiahê kiáⁿ chò léng-siù.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。