撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Ná-than Thoân Siōng-chú ê Ōe Hō͘ Ta-bi̍t
( LTS 17:1-15)
Tng ông tiàm tī chhù lāi, Siōng-chú mā í-keng hō͘ i thoat-lī sì-kho͘-ûi ê tùi-te̍k, tit tio̍h an-chēng ê sî,
7:2 ông kā Ná-than sian-ti kóng, " Lí khòaⁿ, góa tiàm tī pek-hiuⁿ chhâ ê chhù lāi, chóng-.sī, Siōng-chú ê kūi tiàm tī tiùⁿ-lî lāi. "
7:3 Ná-than tùi ông kóng, " Kiàn-nā lí ê sim só͘ siūⁿ ê lóng thang khì chò, in-ūi Siōng-chú kah lí tông-chāi. "
7:4 Hit mê, Siōng-chú ê ōe lîm-kàu Ná-than kóng,
7:5 " Lí khì kā góa ê lô͘-po̍k — Ta-bi̍t kóng, Siōng-chú ánne kóng, ' Lí kám ē khí chhù hō͘ Góa tòa?
7:6 Tùi góa chhōa I-su-la-el lâng chhut Ai-gi̍p ê ji̍t kàu kin-á-ji̍t, Góa m̄ bat tiàm tī chhù-.ni̍h, tiāⁿtiāⁿ tī pò͘-pêⁿ kah hōe-bō͘ kiâⁿ.
7:7 Kiàn-nā Góa kah I-su-la-el lâng só͘ kiâⁿ kàu ê só͘-chāi, kám bat tùi I-su-la-el chi̍t chi-cho̍k ê sū-su, to̍h-sī Góa bēng-lēng chiàu-kò͘ Góa ê chú-bîn — I-su-la-el lâng ê, kóng: Lín ná ē bô kā Góa khí pek-hiuⁿ chhâ ê chhù? '
7:8 " Taⁿ lí tio̍h kā Góa ê lô͘-po̍k — Ta-bi̍t kóng, bān-kun ê Siōng-chú ánne kóng, ' Góa tùi iûⁿ-tiâu tiong, lí teh chhī ê iûⁿ-kûn tiong, kéng lí lâi chò Góa ê chú-bîn — I-su-la-el lâng ê kun-ông.
7:9 Lí bô-lūn khì tó-ūi, góa tiāⁿtiāⁿ kah lí tông-chāi, tī lí ê bīn-chêng chián-tû lí só͘-ū ê tùi-te̍k. Góa it-tēng hō͘ lí tit tio̍h tōa miâ, chhin-chhiūⁿ sè-chiūⁿ hiahê úi-jîn ê tōa miâ.
7:10 Góa beh ūi tio̍h Góa ê chú-bîn — I-su-la-el lâng tiāⁿ tio̍h chi̍t-ê só͘-chāi, kā in chai-pôe, hō͘ in tòa tī kakī ê só͘-chāi, bô koh chhian-sóa, hiong-ok ê húi-lūi bô koh chhin-chhiūⁿ chá-chêng kā in kiáu-jiáu,
7:11 mā bô chhin-chhiūⁿ tùi Góa bēng-lēng sū-su koán-lí Góa ê chú-bîn — I-su-la-el lâng ê ji̍t, Góa ē hō͘ lí thoat-lī só͘-ū ê tùi-te̍k, tit tio̍h an-chēng, jî-chhiáⁿ Siōng-chú kā lí kóng, Siōng-chú ē kā lí kiàn-li̍p lí ê ke.
7:12 Kàu lí ê ji̍t-chí í-keng móa, lí kah lí ê chó͘-sian chò-hóe khùn ê sî, Góa ē siat-li̍p lí só͘ chhut ê kiáⁿ-sun lâi sòa-chiap lí, Góa mā ē kian-kò͘ in ê kok.
7:13 I ē ūi Góa ê miâ khí tiān, Góa ē kian-kò͘ i ê kok-ūi, it-ti̍t kàu éng-oán.
7:14 Góa beh chò i ê pē, i ē chò Góa ê kiáⁿ; i nā hoān chōe, Góa ē ēng lâng ê koái kah sè-kan lâng ê piⁿ, kā i chek-tok.
7:15 Chóng-.sī, Góa ê chû-ài bô beh lī-khui i, chhin-chhiūⁿ Góa hō͘ i lī-khui Sàu-lô, to̍h-sī Góa só͘ khì-sak tī lí ê bīn-chêng ê.
7:16 Lí ê ke kah lí ê kok ē éng-oán kiàn-li̍p tī lí ê bīn-chêng, lí ê kok-ūi mā ē kian-kò͘ kàu éng-oán. '"
7:17 Ná-than chiū chiàu chiahê ōe, chiàu che it-chhè ê khé-sī, ánne kā Ta-bi̍t kóng.
7:18 Ta-bi̍t Kám-un ê Kî-tó
( LTS 17: 16-27)
Ta-bi̍t ông chiū ji̍p-.khì, chē tī Siōng-chú ê bīn-chêng, kóng, " Chì-koân Siōng-chú ah, góa sī siáⁿ lâng, góa ê ke sǹg-chò siáⁿ-mi̍h, Lí kèng-jiân chhōa góa kàu chit-ê tē-ūi?
7:19 Chì-koân Siōng-chú ah, che Lí iáu khòaⁿ-chò sī sió-khóa, Lí koh kóng-khí Lí ê lô͘-po̍k ê ke ē kàu tī kú-tn̂g. Chì-koân Siōng-chú ah, che sī jîn-kan ê lē.
7:20 Ta-bi̍t iáu ū siáⁿ-mi̍h thang tùi Lí kóng? Chì-koân Siōng-chú ah, Lí chai Lí ê lô͘-po̍k.
7:21 Ūi tio̍h Lí ê ōe, koh chiàu Lí ê sim, Lí kiâⁿ che it-chhè ê tōa sū, hō͘ Lí ê lô͘-po̍k chai.
7:22 Siōng-chú — Siōng-tè ah, Lí sī chì-tōa, chiàu goán ê hīⁿ-khang só͘ thiaⁿ-.tio̍h ê, bô chi̍t-ê ē-tàng pí-tit Lí, Lí í-gōa bô ū Siōng-tè.
7:23 Tē-chiūⁿ ū siáⁿ-mi̍h kok chhin-chhiūⁿ Lí ê chú-bîn — I-su-la-el lâng? Chiū-sī Siōng-tè khì kā in kiù-sio̍k, kui tī kakī chò chú-bîn, hō͘ i ū miâ-siaⁿ, koh tī Lí ê chú-bîn ê bīn-chêng, to̍h-sī Lí tùi Ai-gi̍p kah lia̍t pang, í-ki̍p in hiahê sîn-bêng só͘ kiù-sio̍k chhut-.lâi ê, ūi tio̍h lín kiâⁿ tōa sū, ūi tio̍h lí ê tē chò thang kiaⁿ ê tāichì?
7:24 Lí bat ūi kakī kiàn-li̍p Lí ê chú-bîn — I-su-la-el éng-oán chò Lí ê chú-bîn; Siōng-chú ah, Lí mā chò in ê Siōng-tè.
7:25 " Siōng-chú — Siōng-tè ah, taⁿ Lí só͘ kóng-khí Lí ê lô͘-po̍k kah Lí ê lô͘-po̍k ê ke, goān Lí éng-oán kā i kian-kò͘, chiàu Lí só͘ kóng ê lâi kiâⁿ.
7:26 Goān lâng éng-oán chun Lí ê miâ chò tōa, kóng, ' Bān-kun ê Siōng-chú sī koán-lí I-su-la-el ê Siōng-tè. ' Jî-chhiáⁿ Lí ê lô͘-po̍k — Ta-bi̍t ê ke ē tī Lí ê bīn-chêng kian-kò͘.
7:27 Bān-kun ê Siōng-chú, I-su-la-el ê Siōng-tè ah, in-ūi Lí khé-sī Lí ê lô͘-po̍k, kóng, ' Góa ē kā lí kiàn-li̍p ke. ' Só͘-í, Lí ê lô͘-po̍k hó-táⁿ ēng chit-ê kî-tó lâi tùi Lí kî-tó.
7:28 " Taⁿ chì-koân Siōng-chú ah, chí ū Lí sī Siōng-tè, Lí ê ōe sī chin-si̍t; Lí mā ēng chit-ê hok-khì èng-ín Lí ê lô͘-po̍k.
7:29 Taⁿ kiû Lí sù-hok Lí ê lô͘-po̍k ê ke, hō͘ i éng-oán tī Lí ê bīn-chêng. Chì-koân Siōng-chú ah, in-ūi Lí ū kóng-khí, goān Lí ê lô͘-po̍k ê ke tùi Lí ê sù-hok lâi tit tio̍h hok-khì, ti̍t-kàu éng-oán! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。