撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Ta-bi̍t Chò Iô-tah Ông
Āu-lâi, Ta-bi̍t mn̄g Siōng-chú kóng, " Góa kám thang chiūⁿ-khì Iô-tah ê chi̍t-ê siâⁿ? " Siōng-chú kā i kóng, " Thang chiūⁿ-.khì. " Ta-bi̍t kóng, " Góa tio̍h chiūⁿ-khì tó-ūi? " I kóng, " Khì He-bú-lông. "
2:2 Ta-bi̍t chiū kah i nn̄g-ê bó͘, to̍h-sī E-chu-le-el lâng A-hi-no-ám kah Kal-mel lâng bat chò Na-bal ê bó͘ hit-ê miâ kiò A-bi-ga-il, lóng chiūⁿ-khì hia.
2:3 Ta-bi̍t mā hō͘ kin-tòe i ê lâng kah in ta̍k lâng ê ka-koàn lóng khì, in chiū tòa tī He-bú-lông hiahê siâⁿ.
2:4 Iô-tah lâng lâi-kàu, tī hia ēng iû boah Ta-bi̍t, hō͘ i chò Iô-tah ke ê ông. Ū lâng kā Ta-bi̍t kóng, " Bâi-chòng Sàu-lô ê sī Gi-lia̍t-ia-be-si ê lâng. "
2:5 Ta-bi̍t chiū chhe sù-chiá khì kìⁿ Gi-lia̍t-ia-be-si ê lâng, kā in kóng, " Goān Siōng-chú sù-hok hō͘ lín, in-ūi lín ēng chit-ê jîn-chû khoán-thāi lí ê chú Sàu-lô, kā i bâi-chòng.
2:6 Goān Siōng-chú ēng jîn-chû sêng-si̍t kā lín khoán-thāi, góa mā beh pò-tap lín chit-ê jîn-chû, in-ūi lín ū kiâⁿ chit-ê tāichì.
2:7 Lín ê chhiú tio̍h giám-ngē, lín tio̍h ióng-kám, in-ūi lín ê chú Sàu-lô í-keng sí, Iô-tah cho̍k mā ū ēng iû boah góa chò in ê ông. "
2:8 I-si-bo-siat Siū Siat-li̍p Chò I-su-la-el Ông
Sàu-lô ê kun-tiúⁿ Ne-l ê kiáⁿ Ap-nel bat kā Sàu-lô ê kiáⁿ I-si-bo-siat chhōa kòe-khì Ma-há-niam,
2:9 kā i siat-li̍p chò ông lâi tī-lí Gi-lia̍t, A-su-lī, E-chu-le-el, E-hu-laim, Biān-iá-mín kah I-su-la-el ê kûn-chiòng.
2:10 Sàu-lô ê kiáⁿ I-si-bo-siat khí-thâu chò I-su-la-el ông, hit sî sì cha̍p hòe, chē-ūi nn̄g nî, to̍k-to̍k Iô-tah cho̍k kin-tòe Ta-bi̍t.
2:11 Ta-bi̍t tī He-bú-lông chò Iô-tah cho̍k ê ông, keng-kòe chhit nî koh la̍k goe̍h-ji̍t.
2:12 I-su-la-el kah Iô-tah ê Kau-chiàn
Ne-l ê kiáⁿ Ap-nel kah Sàu-lô ê kiáⁿ I-si-bo-siat ê jîn-sîn, tùi Ma-há-niam chhut-.lâi khì Gi-bóng.
2:13 Che-lú-iah ê kiáⁿ Io-ap kah Ta-bi̍t ê jîn-sîn mā chhut-.lâi, tī Gi-bóng ê tî piⁿ sio tú-.tio̍h; in chiū chē lo̍h-.lâi, chi̍t tūi chē tī tî ê chit pêng, chi̍t tūi chē tī tî ê hit pêng.
2:14 Ap-nel tùi Io-ap kóng, " Chhiáⁿ lí hō͘ siàu-liân lâng khí-.lâi, tī lán ê bīn-chêng kún-chhiò. " Io-ap kóng, " Thang hō͘ i khí-.lâi. "
2:15 In chiū khí-lâi, chiàu siàu-gia̍h kòe-.khì: sio̍k Sàu-lô ê kiáⁿ I-si-bo-siat ê Biān-iá-mín lâng cha̍p jī miâ, Ta-bi̍t ê jîn-sîn mā ū cha̍p jī miâ.
2:16 Ta̍k-ê khiú i ê tùi-bīn hit-ê lâng ê thâu-khak, ēng to chha̍k i tùi-bīn hit-ê lâng ê hia̍p-ē, chò chi̍t-ē tó lo̍h-khì sí. Só͘-í, Gi-bóng hit só͘-chāi kiò-chò Hi-lī-kah-hap-sò͘-lîm（ Chù, Hi-bú-lâi bûn tha̍k-im, ì-sù sī " Kiàm tiûⁿ ". ）.
2:17 Hit ji̍t ê kau-chiàn chin hiông, Ap-nel kah I-su-la-el lâng tī Ta-bi̍t ê peng ê bīn-chêng khah su.
2:18 Tī hia ū Che-lú-iah saⁿ-ê kiáⁿ, Io-ap, A-bi-sai kah A-sa-hel. A-sa-hel ê kha gâu cháu, ná chhin-chhiūⁿ iá-lo̍k;
2:19 A-sa-hel jiok Ap-nel, bô phian chó-.bô phian iū, ti̍t-ti̍t jiok tio̍h Ap-nel.
2:20 Ap-nel oa̍t thâu khòaⁿ, kóng, " A-sa-hel, sī lí á m̄-sī? " A-sa-hel ìn kóng, " Sī góa. "
2:21 Ap-nel kā i kóng, " Lí tio̍h oa̍t-tńg chiàⁿ pêng á-.sī tò pêng, lia̍h chi̍t-ê siàu-liân lâng, ūi lí pún-sin pak i ê chiàn-saⁿ. " Chóng-.sī, A-sa-hel ti̍t-ti̍t jiok i, m̄-khéng oa̍t tńg-.lâi.
2:22 Ap-nel koh kā A-sa-hel kóng, " Lí oa̍t tńg-.khì, mài koh jiok góa! Góa ná tio̍h kā lí phah tó tē? Nā ánne, góa ū siáⁿ-mi̍h bīn-chú thang khì kìⁿ lí ê a-hiaⁿ Io-ap? "
2:23 I iû-goân m̄-khéng oa̍t tńg-.khì. Ap-nel chiah ēng chhiuⁿ-pèⁿ āu ê to chha̍k ji̍p-khì i ê pak-tó͘, chhiuⁿ chiū thàng-kòe i ê kha-chiah-āu, i chiū tó tī hia sí-.khì. Kiàn-nā lâi-kàu A-sa-hel tó-.leh sí ê só͘-chāi, chiū lóng thêng-kha.
2:24 Io-ap kah A-bi-sai jiok Ap-nel, in kàu Ki-a sio tùi-bīn ê A-má soaⁿ, tī Gi-bóng khòng-iá ê lō͘, ji̍t chiū lo̍h soaⁿ.
2:25 Biān-iá-mín lâng chū-chi̍p tòe Ap-nel chò chi̍t tīn, khiā tī soaⁿ téng.
2:26 Ap-nel kiò Io-ap kóng, " To-kiàm thâi lâng kám éng bô soah? Lí kám m̄-chai kàu bóe ē ū kan-khó͘? Lí beh kàu tang-sî chiah hō͘ jîn-bîn tńg-.khì, bô koh jiok in ê hiaⁿ-tī? "
2:27 Io-ap kóng, " Góa kí éng-oán oa̍h ê Siōng-chú lâi chiùchōa, nā m̄-sī lí kóng, chá-khí jîn-bîn chiū tńg-.khì, bô jiok i ê hiaⁿ-tī. "
2:28 Chiū ánne, Io-ap pûn sàu-kak, chèng lâng chiū khiā-.leh, bô koh jiok I-su-la-el lâng, mā bô koh kau-chiàn.
2:29 Ap-nel kah tòe i ê lâng kiâⁿ kui mê, keng-kòe A-la̍h-bah, kòe Iol-tàn hô, tùi Pit-lûn kòe-khì-kàu Ma-há-niam.
2:30 Io-ap bô koh jiok Ap-nel, chiū tńg-.lâi, chū-chi̍p chèng lâng. Ta-bi̍t ê peng kiám cha̍p-káu lâng kah A-sa-hel.
2:31 Chóng-.sī, Ta-bi̍t ê peng phah-sí Biān-iá-mín lâng kah tòe Ap-nel ê lâng, chóng-kiōng saⁿ-pah la̍k-cha̍p lâng.
2:32 In kng A-sa-hel khì Bia̍t-lé-hèm, kā i bâi-chòng tī in lāu-pē ê bōng. Io-ap kah tòe i ê lâng kiâⁿ kui mê, lâi-kàu He-bú-lông ê sî, thiⁿ tú-á kng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。