撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
30:1 Ta-bi̍t kah A-má-le̍k Lâng Sio-thâi
Tē-saⁿ ji̍t, Ta-bi̍t kah tòe i ê lâng lâi-kàu Chik-lak. A-má-le̍k lâng í-keng chhim-hoān lâm-hong kah Chik-lak, mā phah Chik-lak, ēng hóe sio hit-ê siâⁿ.
30:2 Lia̍h siâⁿ lāi ê chabó͘ lâng, bô-lūn tōa-sè, bô thâi-sí kah pòaⁿ-ê, kantaⁿ kā in lia̍h-.khì.
30:3 Ta-bi̍t kah tòe i ê lâng lâi-kàu hit-ê siâⁿ, khòaⁿ tio̍h siâⁿ í-keng hō͘ hóe sio-.khì, in ê bó͘ kah kiáⁿ-jî lóng hō͘ in lia̍h-.khì.
30:4 Ta-bi̍t kah tòe i ê lâng chiū khui siaⁿ háu, háu kàu bô la̍t thang háu.
30:5 Ta-bi̍t ê nn̄g-ê bó͘, E-chu-le-el lâng A-hi-no-ám kah bat chò Kal-mel lâng Na-bal ê bó͘ A-bi-ga-il, mā hō͘ in lia̍h-.khì.
30:6 Ta-bi̍t chin tio̍h-kip, in-ūi chèng lâng kóng tio̍h ēng chio̍h-thâu kā Ta-bi̍t tìm-sí. Lâng-lâng ūi tio̍h in ê kiáⁿ-jî chin hoân-ló, chóng-.sī, Ta-bi̍t óa-khò Siōng-chú — i ê Siōng-tè, kakī kian-kò͘.
30:7 Ta-bi̍t kā A-hi-mé-le̍k ê kiáⁿ, chè-si A-bi-a-thal, kóng, " Chhiáⁿ lí kā góa tòa chè-si ho̍k lâi. " A-bi-a-thal chiū tòa chè-si ho̍k lâi-kàu Ta-bi̍t hia.
30:8 Ta-bi̍t mn̄g Siōng-chú kóng, " Góa jiok chit-ê kun-tūi, jiok ē tio̍h á-bē? " Siōng-chú kóng, " Lí tio̍h khì jiok in, in-ūi ún-tàng jiok ē tio̍h, mā ún-tàng ē kā in lóng kiù tńg-.lâi. "
30:9 Ta-bi̍t chiū kah tòe i ê la̍k pah lâng kàu Pí-so ê khe, lâu-.leh ê lâng hioh tī hia.
30:10 Chóng-.sī, Ta-bi̍t kah sì pah lâng khì jiok, ū nn̄g pah lâng ià-siān, bē tàng kòe Pí-so ê khe, chiū lâu tī hia.
30:11 In tī chhân-iá tú tio̍h chi̍t-ê Ai-gi̍p lâng, chiū kā i chhōa lâi-kàu Ta-bi̍t hia; the̍h piáⁿ hō͘ i, i chiū chia̍h, phâng chúi hō͘ i lim,
30:12 Koh hō͘ i chi̍t tè bû-hoa-kó piáⁿ, nn̄g pha phû-tô koaⁿ. I chia̍h liáu-āu, cheng-sîn hôe-ho̍k, in-ūi i saⁿ ji̍t saⁿ mê bô chia̍h piáⁿ koh bô lim chúi.
30:13 Ta-bi̍t mn̄g i kóng, " Lí sio̍k siáⁿ lâng? Tùi tó-ūi lâi? " I ìn kóng, " Góa sī Ai-gi̍p ê siàu-liân lâng, sī A-má-le̍k lâng ê lô͘-po̍k, in-ūi góa saⁿ ji̍t chêng phòa-pēⁿ, góa ê chú-lâng chiū kā góa pàng-sak.
30:14 Goán chhim-hoān Ke-le-thih ê lâm pêng, kah sio̍k Iô-tah ê tē, kah Ka-le̍p tē ê lâm pêng, koh ēng hóe sio Chik-lak. "
30:15 Ta-bi̍t mn̄g i kóng, " Lí ē chhōa góa kàu hit-ê kun-tūi hia á-bē? " I ìn kóng, " Lí tio̍h kā góa kí Siōng-chú lâi chiùchōa, bē kā góa thâi-sí, mā bē kā góa kau tī góa ê chú-lâng ê chhiú, góa chiū ē chhōa lí lo̍h-khì kàu hit-ê kun-tūi hia. "
30:16 I chhōa Ta-bi̍t lo̍h-.khì ê sî, khòaⁿ tio̍h in sì-sòaⁿ tī choân tē, lim-chia̍h koh thiàu-bú, in-ūi tùi Hui-lī-sū tē kah Iô-tah tē só͘ chhiúⁿ ê mi̍h chin chē.
30:17 Ta-bi̍t kā in phah, tùi hông-hun-àm kàu keh tńg kang ê-hng, chí ū sì-pah-ê khiâ lo̍k-tô ê siàu-liân lâng cháu-.khì, í-gōa bô kah chi̍t-ê lâng cháu lī-khui.
30:18 A-má-le̍k lâng só͘ chhiúⁿ-khì ê châi-bu̍t, Ta-bi̍t lóng kiù tò tńg-.lâi, Ta-bi̍t mā kiù i ê nn̄g-ê bó͘ tńg-.lâi.
30:19 Kiàn-nā A-má-le̍k lâng só͘ chhiúⁿ-khì ê, bô-lūn tōa-sè, kiáⁿ-jî, châi-bu̍t, Ta-bi̍t lóng tòa tò tńg-.lâi, bô sit-lo̍h kah chi̍t-ê.
30:20 Ta-bi̍t koh chhiúⁿ só͘-ū ê iûⁿ-kûn kah gû-kûn, kā in kóaⁿ tī chengseⁿ ê thâu-chêng, kóng, " Che sī Ta-bi̍t chhú-.lâi ê. "
30:21 Ta-bi̍t lâi-kàu hiahê ià-siān bē tàng kin-tòe Ta-bi̍t khì soah lâu tī Pí-so khe ê nn̄g pah lâng hia. In chhut-lâi gêng-chiap Ta-bi̍t kah tòe i ê jîn-bîn. Ta-bi̍t chìn-chêng kàu jîn-bîn hia, kā in chhéng-an.
30:22 Kah Ta-bi̍t khì ê lâng, kî-tiong ū pháiⁿ lâng kah húi-lūi kóng, " In-ūi in bô kah lán khì, lán só͘ kiù tò-tńg ê mi̍h, it-tēng bô beh pun hō͘ in, kantaⁿ kā in ta̍k lâng ê bó͘ kah kiáⁿ-jî hō͘ in, hō͘ in chhōa-.khì. "
30:23 Ta-bi̍t kóng, " Hiaⁿ-tī, m̄ thang kā Siōng-chú só͘ siúⁿ-sù hō͘ lán ê mi̍h ánne chò, in-ūi I pó-hō͘ lán, kā kong-kek lán ê kun-tūi kau tī lán ê chhiú tiong.
30:24 Chit-ê tāichì siáⁿ lâng ē chun-thàn lín? Kò͘-siú cha̍p-mi̍h ê lâng só͘ tit tio̍h ê hūn-gia̍h tio̍h chhin-chhiūⁿ chhut-tīn ê lâng ê hūn-gia̍h, tāi-ke tio̍h pêⁿ-pun. "
30:25 Tùi hit ji̍t í-āu, Ta-bi̍t siat-li̍p chit-ê chò I-su-la-el ê lu̍t-lē kah hoat-tō͘, it-ti̍t kàu kin-á-ji̍t.
30:26 Ta-bi̍t lâi-kàu Chik-lak ê sî, tùi só͘ chhiúⁿ ê mi̍h ê tiong-kan the̍h kóa khí-.lâi, kià khì sàng hō͘ i ê pêng-iú Iô-tah ê tiúⁿ-ló, kóng, " Lí khòaⁿ, chiahê sī tùi Siōng-chú ê tùi-te̍k chhiúⁿ-.lâi ê, sàng hō͘ lín chò lé-mi̍h. "
30:27 Chiū-sī sàng hō͘ tòa tī Be-thel ê, tòa tī lâm-hong ê La̍h-mot ê, tòa tī Ia-thel ê,
30:28 tòa tī A-ló-el ê, tòa tī Sek-boa̍t ê, tòa tī E-si-te-mo͘h ê,
30:29 tòa tī La-hat-le̍k ê, tòa tī E-la-mel lâng chiahê siâⁿ ê, tòa tī Ke-nî lâng hiahê siâⁿ ê,
30:30 tòa tī Hol-mah ê, tòa tī Ko-la̍h-san ê, tòa tī A-that ê,
30:31 tòa tī He-bú-lông ê, í-ki̍p Ta-bi̍t kah tòe i ê lâng pêng-sî só͘ óng-lâi ê só͘-chāi, lóng ū pun hō͘ in.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。