撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
29:1 Hui-lī-sū Lâng Bô Siong-sìn Ta-bi̍t
Hui-lī-sū lâng chū-chi̍p in ê kun-peng lâi-kàu A-hek; I-su-la-el lâng chat iâⁿ tī E-chu-le-el ê chúi-chôaⁿ piⁿ.
29:2 Hui-lī-sū lâng hiahê siú-léng chhōa peng, ū ê chi̍t pah, ū ê chi̍t chheng, chìn-chêng khì. Ta-bi̍t kah tòe i ê lâng, í-ki̍p A-ki-si tòe tī āu-bīn.
29:3 Hui-lī-sū lâng ê siú-léng kóng, " Chiahê Hi-bú-lâi lâng tī chia chò siáⁿ-mi̍h? " A-ki-si kā Hui-lī-sū lâng ê siú-léng kóng, " Chit-ê kám m̄-sī I-su-la-el ông Sàu-lô ê jîn-sîn Ta-bi̍t? I kah góa tòa í-keng ū chiahê ji̍t, chiahê nî. Tùi i tâu-hâng góa kàu kin-á-ji̍t, góa m̄ bat khòaⁿ tio̍h i ū kòe-sit. "
29:4 Hui-lī-sū lâng ê siú-léng tùi i siū-khì, Hui-lī-sū lâng ê siú-léng kā i kóng, " Tio̍h hō͘ chit-ê lâng tńg-.khì, tńg-khì lí só͘ an-tì i ê só͘-chāi, m̄ thang hō͘ i kah lán làu-tīn, khióng-kiaⁿ i tī tīn lāi chò lán ê tùi-te̍k. I ē kah i ê chú-lâng koh hô, beh ēng siáⁿ-mi̍h? Kám m̄-sī chiahê lâng ê thâu-khak?
29:5 Chá-chêng in ū lâng thiàu-bú, chhiùⁿ hô, kóng, ' Sàu-lô kā in thâi-sí ê chheng-chheng, Ta-bi̍t kā in thâi-sí ê bān-bān. ' Só͘ kóng ê, kám m̄-sī chit-ê Ta-bi̍t? "
29:6 A-ki-si kiò Ta-bi̍t lâi, kā i kóng, " Góa kí éng-oán oa̍h ê Siōng-chú lâi chiùchōa, lí sī chèng-ti̍t, lí kah góa chhut-ji̍p tī kun-tūi tiong, góa khòaⁿ sī hó. In-ūi tùi lí lâi góa chia ê sî kàu kin-á-ji̍t, góa m̄ bat khòaⁿ tio̍h lí ū siáⁿ-mi̍h kòe-sit, to̍k-to̍k chiahê siú-léng khòaⁿ lí chò m̄-hó.
29:7 Taⁿ lí tńg-.khì, an-jiân khì, khióng-kiaⁿ lí só͘ chò ê, Hui-lī-sū lâng ê siú-léng bô hoaⁿ-hí. "
29:8 Ta-bi̍t kā A-ki-si kóng, " Góa bat chò siáⁿ-mi̍h? Tùi góa khí-thâu lâi lí ê bīn-chêng ê sî kàu kin-á-ji̍t, lí tī lí ê lô͘-po̍k ū khòaⁿ-chhut siáⁿ-mi̍h tāichì, hō͘ góa bô thang kah ông — góa ê chú ê tùi-te̍k kau-chiàn? "
29:9 A-ki-si ùn Ta-bi̍t kóng, " Góa chai lí tī góa ê ba̍k-chiu chêng sī hó, ná chhin-chhiūⁿ Siōng-chú ê sù-chiá; chóng-.sī, Hui-lī-sū lâng ê siú-léng kóng, ' Chit-ê lâng m̄ thang kah lán khì kau-chiàn. '
29:10 Só͘-í, lí í-ki̍p lí ê chú ê lô͘-po̍k kah lí lâi ê, tio̍h chá-chá khí-.lâi, lí khí-lâi liáu-āu, kàu thiⁿ-kng chiū tio̍h chhut-.khì! "
29:11 Keh kang chá-khí, Ta-bi̍t kah tòe i ê lâng chá-chá khí-.lâi, chhut-hoat tńg-khì Hui-lī-sū ê tē. Hui-lī-sū lâng mā khì E-chu-le-el.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。