撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
28:1 Hit sî, Hui-lī-sū lâng chū-chi̍p kun-peng chhut-tīn, beh kah I-su-la-el lâng kau-chiàn. A-ki-si tùi Ta-bi̍t kóng, " Lí tio̍h khak-si̍t chai, lí kah tòe lí ê lâng lóng tio̍h tòe góa chhut-tīn. "
28:2 Ta-bi̍t tùi A-ki-si kóng, " Sī, lô͘-po̍k só͘ ē chò ê tāichì, lí it-tēng ē chai. " A-ki-si kā Ta-bi̍t kóng, " Án-ne, góa siat-li̍p lí éng-oán chò góa ê sī-ōe-tiúⁿ. "
28:3 Sàu-lô Khì Mn̄g Âng-î
Hit sî, Sa-mu-el í-keng sí, I-su-la-el jîn-bîn ūi tio̍h i ai-khàu, kā i bâi-chòng tī La̍h-má, to̍h-sī tī i ê pún-siâⁿ. Sàu-lô bat kóaⁿ-tio̍k kúi hū-sin ê kah kiâⁿ siâ-su̍t ê lī-khui i ê kéng lāi.
28:4 Hui-lī-sū lâng chū-chi̍p, chat iâⁿ tī Siu-ném; Sàu-lô chū-chi̍p I-su-la-el jîn-bîn, chat iâⁿ tī Gil-boah.
28:5 Sàu-lô khòaⁿ tio̍h Hui-lī-sū ê kun-peng, chiū chin kiaⁿ, sim-koaⁿ pho̍k-pho̍k-chhéng kàu-ke̍k.
28:6 Sàu-lô mn̄g Siōng-chú, Siōng-chú lóng bô ēng bîn-bāng, á-.sī o͘-lêng, á-.sī sian-ti lâi kā i ìn-tap.
28:7 Sàu-lô hoan-hù i ê lô͘-po̍k kóng, " Lí tio̍h kā góa chhōe ang-î, hō͘ góa thang khì i hia mn̄g i. " Lô͘-po̍k kóng, " Tī Ian-tol ū chi̍t-ê ang-î. "
28:8 Sàu-lô chiū kái-ōaⁿ i ê iông-māu, chhēng pa̍t chióng ê saⁿ, ū nn̄g-ê lâng kah i khì, àm-sî khì hit-ê chabó͘ lâng hia. Sàu-lô kóng, " Chhiáⁿ lí ēng hù lí ê sin ê sîn, kā góa kiâⁿ hoat-su̍t, góa só͘ kā lí kóng ê lâng, lí kā góa khan i chhut-.lâi. "
28:9 Cha-bó͘ lâng tùi i kóng, " Lí khòaⁿ, lí chai Sàu-lô ê só͘ chò, i tùi kéng lāi chián-tû chiahê kúi hū-sin ê kah kiâⁿ siâ-su̍t ê. Lí ná ē siat-kè beh hāi-sí góa ê sèⁿ-miā? "
28:10 Sàu-lô kí Siōng-chú tùi i chiùchōa kóng, " Góa kí éng-oán oa̍h ê Siōng-chú lâi chiùchōa, lí bē in-ūi chit-ê tāichì siū hêng-hoa̍t. "
28:11 Cha-bó͘ lâng kóng, " Góa tio̍h kā lí khan siáⁿ lâng khí-.lâi? " Sàu-lô kóng, " Kā góa khan Sa-mu-el khí-.lâi. "
28:12 Cha-bó͘ lâng khòaⁿ tio̍h Sa-mu-el, chiū tōa-siaⁿ kiò, chabó͘ lâng kā Sàu-lô kóng, " Lí ná ē phiàn góa, in-ūi lí sī Sàu-lô. "
28:13 Ông tùi i kóng, " M̄-bián kiaⁿ, lí khòaⁿ tio̍h siáⁿ-mi̍h? " Cha-bó͘ lâng kā Sàu-lô kóng, " Góa khòaⁿ tio̍h sîn-bêng tùi tē-.ni̍h khí-.lâi. "
28:14 Sàu-lô kóng, " I ê hêng-chōng án-chóaⁿ? " I kóng, " Ū chi̍t-ê lāu lâng khí-.lâi, seng-khu moa tn̂g-saⁿ. " Sàu-lô chai sī Sa-mu-el, chiū phak tī thô͘-kha kā i pài.
28:15 Sa-mu-el kā Sàu-lô kóng, " Lí ná ē kā góa kiáu-jiáu, khan góa khí-.lâi? " Sàu-lô kóng, " Góa khùn-khó͘ kàu-ke̍k; in-ūi Hui-lī-sū lâng kah góa kau-chiàn, Siōng-tè mā lī-khui góa, bô koh ēng sian-ti á-.sī bîn-bāng lâi ìn-tap góa, só͘-í, góa chhiáⁿ lí lâi, thang chí-sī góa tio̍h án-chóaⁿ kiâⁿ. "
28:16 Sa-mu-el kóng, " Siōng-chú í-keng lī-khui lí, koh chò lí ê tùi-te̍k, lí ná ē lâi mn̄g góa?
28:17 Siōng-chú chiàu I thok góa só͘ kóng ê ōe kiâⁿ tī lí, Siōng-chú í-keng tùi lí ê chhiú chhiúⁿ-toa̍t kok-ūi, kau hō͘ lí ê tâng-phōaⁿ Ta-bi̍t.
28:18 In-ūi lí bô chun-thàn Siōng-chú ê ōe, I bat kiâⁿ I ê tōa siū-khì tī A-má-le̍k, só͘-í, Siōng-chú kin-á-ji̍t ánne kiâⁿ tī lí ê sin chiūⁿ.
28:19 Jî-chhiáⁿ Siōng-chú ē kā lí kah I-su-la-el kau tī Hui-lī-sū lâng ê chhiú tiong, bîn-á-chài lí kah lí hiahê kiáⁿ ē kah góa tông-chāi, Siōng-chú ē kā I-su-la-el ê kun-peng kau tī Hui-lī-sū lâng ê chhiú tiong. "
28:20 Sàu-lô hut-jiân seng-khu tó ti̍t-ti̍t tī tē-.ni̍h, in-ūi Sa-mu-el ê ōe, chiū chin kiaⁿ, tì-kàu lóng bô la̍t, in-ūi i chi̍t ji̍t chi̍t mê lóng bô chia̍h siáⁿ-mi̍h.
28:21 Cha-bó͘ lâng óa-kīn Sàu-lô, khòaⁿ tio̍h i chin sim-būn, tùi i kóng, " Lí ê lú-pī thiaⁿ lí ê ōe, bô kò͘ kakī ê sèⁿ-miā, thiaⁿ lí só͘ kā góa kóng ê ōe.
28:22 Taⁿ kiû lí thiaⁿ lú-pī ê ōe, iông-ín góa tī lí ê bīn-chêng pâi tām-po̍h chia̍h-mi̍h, hō͘ lí chia̍h, lí kiâⁿ lō͘ chiah ū khùi-la̍t. "
28:23 Sàu-lô the-sî kóng, " Góa m̄-chia̍h. " Chóng-.sī, i ê lô͘-po̍k kah chabó͘ lâng hó-chhùi khǹg i, i chiah thiaⁿ in ê chhùi tùi tē-.ni̍h khí-.lâi, chē tī chhn̂g-.ni̍h.
28:24 Cha-bó͘ lâng chhù lāi ū chi̍t chiah pûi ê gû-á, kóaⁿ-kín kā i thâi, koh the̍h mī-hún, chhiau chò bô-kàⁿ piáⁿ lâi piak,
28:25 Pâi tī Sàu-lô kah i ê lô͘-po̍k ê bīn-chêng, in chiū chia̍h. Hit mê in chiū chhut-hoat khì.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。