撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 Ta-bi̍t Koh-chài Bô Thâi Sàu-lô
Ji-hu lâng kàu Gi-be-at lâi kìⁿ Sàu-lô, kóng, " Ta-bi̍t kám m̄-sī kakī bih tī Iâ-sī-bûn thâu-chêng ê Hap-ki-la̍h soaⁿ? "
26:2 Sàu-lô chiū khí-.lâi, chhōa I-su-la-el tiong kéng-soán ê peng saⁿ chheng, lo̍h-khì kàu Ji-hu ê khòng-iá, beh tī Ji-hu ê khòng-iá chhōe Ta-bi̍t.
26:3 Sàu-lô tī Iâ-sī-bûn thâu-chêng ê Hap-ki-la̍h soaⁿ, chat iâⁿ tī lō͘-.ni̍h. Ta-bi̍t tòa tī khòng-iá, chai-iáⁿ Sàu-lô lâi khòng-iá beh jiok i.
26:4 Ta-bi̍t chiū chhe kúi-nā-ê cheng-thàm, chiah chai Sàu-lô chin-chiàⁿ lâi.
26:5 Ta-bi̍t chiū khí-.lâi, lâi-kàu Sàu-lô chat iâⁿ ê só͘-chāi, Ta-bi̍t khòaⁿ tio̍h Sàu-lô kah i ê kun-tiúⁿ Ne-l ê kiáⁿ Ap-nel khùn ê só͘-chāi, Sàu-lô khùn tī pâi-lia̍t chhia ê lāi-bīn, jîn-bîn chat iâⁿ tī i ê sì-kho͘-ûi.
26:6 Ta-bi̍t tùi Hiat lâng A-hi-mé-le̍k kah Che-lú-iah ê kiáⁿ Io-ap ê hiaⁿ-tī A-bi-sai kóng, " Siáⁿ lâng beh kah góa lo̍h-.khì, kàu iâⁿ-pâng, kàu Sàu-lô hia? " A-bi-sai kóng, " Góa kah lí lo̍h-.khì. "
26:7 Ta-bi̍t kah A-bi-sai thàu-mê lâi-kàu jîn-bîn hia, khòaⁿ tio̍h Sàu-lô tó tī pâi-lia̍t chhia ê lāi-bīn teh khùn; i ê chhiuⁿ tī thâu-khak piⁿ, chhah tī tē-.ni̍h. Ap-nel kah jîn-bîn khùn tī i ê sì-kho͘-ûi.
26:8 A-bi-sai kā Ta-bi̍t kóng, " Siōng-chú kin-á-ji̍t kā lí ê tùi-te̍k kau tī lí ê chhiú tiong, kiû lí chún góa ēng chhiuⁿ kā i chha̍k tī tē-.ni̍h, chha̍k chi̍t ē, m̄-bián nn̄g ē. "
26:9 Ta-bi̍t kā A-bi-sai kóng, " M̄-thang kā i hāi-sí, siáⁿ lâng khí chhiú hāi Siōng-chú só͘ boah iû ê ē bô chōe? "
26:10 Ta-bi̍t koh kóng, " Góa kí éng-oán oa̍h ê Siōng-chú lâi chiùchōa, Siōng-chú ē kā i phah, kiámchhái i ê sí ji̍t beh kàu, á-.sī i ē lo̍h chiàn-tīn lâi sí.
26:11 Góa tùi Siōng-chú choa̍t-tùi m̄-káⁿ khí chhiú phah Siōng-chú só͘ boah iû ê, taⁿ lí thang kā i chhú thâu-khak piⁿ ê chhiuⁿ kah chúi-pân, lán thang the̍h lâi-.khì. "
26:12 Ta-bi̍t tùi Sàu-lô ê thâu-khak piⁿ kā i chhú chhiuⁿ kah chúi-pân, nn̄g lâng chiū khì, bô lâng khòaⁿ-.tio̍h, bô lâng chai, mā bô lâng chhéⁿ, sī in lóng teh khùn, in-ūi Siōng-chú hō͘ in khùn tāng-bîn.
26:13 Ta-bi̍t kòe-khì-kàu hit pêng, hn̄g-hn̄g khiā tī soaⁿ téng kah in sio-lī put-chí hn̄g.
26:14 Ta-bi̍t kiò jîn-bîn kah Ne-l ê kiáⁿ Ap-nel, kóng, " Ap-nel, lí ná ē bô ìn? " Ap-nel kóng, " Lí sī siáⁿ lâng teh kiò ông? "
26:15 Ta-bi̍t tùi Ap-nel kóng, " Lí kám m̄-sī chi̍t-ê ióng-sū? I-su-la-el tiong siáⁿ lâng ē pí-tit lí? Lí ná ē bô pó-hō͘ lí ê chú — lí ê ông? In-ūi jîn-bîn tiong ū chi̍t-ê lâng ji̍p-khì beh hāi lí ê ông — lí ê chú.
26:16 Lí chit khoán ê só͘ chò sī m̄-hó! Góa kí éng-oán oa̍h ê Siōng-chú chiùchōa, lín lóng sī kai sí ê, in-ūi bô pó-hō͘ lín ê chú, to̍h-sī Siōng-chú só͘ boah iû ê. Taⁿ, lí khòaⁿ, ông ê thâu-khak piⁿ ê chhiuⁿ kah chúi-pân tī tó-ūi? "
26:17 Sàu-lô jīn-tit sī Ta-bi̍t ê siaⁿ, chiū kóng, " Góa ê kiáⁿ Ta-bi̍t, che sī lí ê siaⁿ? " Ta-bi̍t kóng, " Ông — góa ê chú, sī góa ê siaⁿ. "
26:18 Koh kóng, " Góa ê chú ná ē beh jiok lô͘-po̍k? Góa kám ū chò siáⁿ-mi̍h m̄ tio̍h? Góa ê chhiú ū siáⁿ-mi̍h pháiⁿ?
26:19 Góa ê ông, góa ê chú, taⁿ kiû lí thiaⁿ lô͘-po̍k ê ōe, nā-sī Siōng-chú kek-tōng lí kong-kek góa, goān I kàm-la̍p chè-mi̍h; nā-sī lâng kek-tōng lí, goān in tī Siōng-chú ê bīn-chêng siū chiù-chó͘, in-ūi in kin-á-ji̍t kóaⁿ góa chhut-.lâi, hō͘ góa tī Siōng-chú ê sán-gia̍p bô hūn, kóng, ' Lí khì ho̍k-sāi pa̍t-ê sîn-bêng! '
26:20 Taⁿ m̄ thang hō͘ góa ê hoeh lâu tī lī-khui Siōng-chú ê bīn-chêng ê tē, in-ūi I-su-la-el ông chhut-.lâi, sī teh chhōe chi̍t chiah ka-cháu, chhin-chhiūⁿ lâng tī soaⁿ-.ni̍h jiok chi̍t chiah chià-ko͘. "
26:21 Sàu-lô kóng, " Góa ū chōe à! Góa ê kiáⁿ Ta-bi̍t, lí thang tńg-.lâi, góa bô beh koh hāi lí, in-ūi lí kin-á-ji̍t khòaⁿ góa ê sèⁿ-miā chò pó-pòe. Lí khòaⁿ, góa só͘ chò ê sī chin gōng, chhò-gō͘ kàu-ke̍k. "
26:22 Ta-bi̍t ìn kóng, " Góa ê ông, lí ê chhiuⁿ tī chia, lí tio̍h kiò chi̍t-ê siàu-liân lâng kòe-lâi gia̍h.
26:23 Siōng-chú ē chiàu ta̍k lâng ê kong-gī kah tiong-sìn lâi kā i pò-tap, in-ūi kin-á-ji̍t Siōng-chú kā lí kau tī góa ê chhiú tiong. Chóng-.sī, góa m̄-khéng chhun chhiú lâi hāi Siōng-chú só͘ boah iû ê.
26:24 Góa kin-á-ji̍t khòaⁿ-tiōng lí ê sèⁿ-miā, goān Siōng-chú mā ánne khòaⁿ-tiōng góa ê sèⁿ-miā, koh kiù góa thoat-lī só͘-ū ê hoān-lān. "
26:25 Sàu-lô kā Ta-bi̍t kóng, " Góa ê kiáⁿ Ta-bi̍t, goān lí siū chiok-hok! Lí ē chò-chhut tōa ê tāichì, mā ún-tàng ē khah iâⁿ. " Ta-bi̍t chiū chò i kiâⁿ-.khì. Sàu-lô tńg-khì i ê pún só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。