撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
25:1 Sa-mu-el Sí-.khì
Sa-mu-el sí ê sî, I-su-la-el jîn-bîn chū-chi̍p lâi ūi tio̍h i thî-khàu, kā i bâi-chòng tī i kakī ê chhù, to̍h-sī tī La̍h-má. Ta-bi̍t chhut-hoat lo̍h-khì tī Pa-lân ê khòng-iá.
25:2 Tī Ma-óng ū chi̍t-ê lâng, i ê sán-gia̍p tī Kal-mel, sī tōa hó-gia̍h lâng, ū mî-iûⁿ saⁿ chheng chiah, soaⁿ-iûⁿ chi̍t chheng chiah; i tī Kal-mel chián iûⁿ-mn̂g.
25:3 Hitê lâng sī Ka-le̍p cho̍k ê lâng, miâ kiò-chò Na-bal, i ê bó͘ miâ kiò-chò A-bi-ga-il, sī chhong-bêng koh súi ê chabó͘ lâng. Chóng-.sī, hit-ê lâng ê hêng-ûi sī ngē-sim koh hiong-ok.
25:4 Ta-bi̍t tī khòng-iá thiaⁿ tio̍h Na-bal teh chián iûⁿ-mn̂g,
25:5 chiū chhe-cha̍p-ê pō͘-hā, Ta-bi̍t hoan-hù hiahê pō͘-hā, kóng, " Lín tio̍h chiūⁿ-khì Kal-mel, kìⁿ Na-bal, ēng góa ê miâ kā i chhéng-an.
25:6 Tio̍h kā hit-ê hó-miā lâng kóng, ' Goān lí pêng-an, goān lí ê ke pêng-an, goān lí it-chhè só͘-ū ê lóng pêng-an.
25:7 Taⁿ góa thiaⁿ tio̍h lâng kóng, ū lâng tī lí hia teh kā lí chián iûⁿ-mn̂g, lí ê bo̍k-chiá bat kah goán tòa, goán bô kā i khi-hū, in tī Kal-mel ê sî, lóng m̄ bat sit-lo̍h siáⁿ-mi̍h.
25:8 Thang mn̄g lí ê pō͘-hā, in ē kā lí kóng. Só͘-í, goān góa ê pō͘-hā tī lí ê ba̍k-chiu chêng tit tio̍h un-tián, in-ūi goán lâi sī hó ji̍t-chí, kiû lí chiàu lí ê chhiú sûi-piān the̍h tām-po̍h hō͘ lí ê lô͘-po̍k kah lí ê kiáⁿ Ta-bi̍t. '"
25:9 Ta-bi̍t ê siàu-liân lâng lâi-kàu-ūi, chiū kā chiahê ōe ēng Ta-bi̍t ê miâ, lóng kā Na-bal kóng, i chiū tiām-tiām thèng-hāu.
25:10 Na-bal ìn Ta-bi̍t ê lô͘-po̍k kóng, " Ta-bi̍t sī siáⁿ lâng? I-é-sái ê kiáⁿ sī siáⁿ lâng? Kīn-lâi chin chē lô͘-po̍k pōe-ge̍k i ê chú-lâng.
25:11 Góa ê piáⁿ, góa ê chúi kah ūi tio̍h kā chián iûⁿ-mn̂g ê lâng góa só͘ thâi chengseⁿ ê bah, beh hō͘ chián iûⁿ-mn̂g ê lâng, góa kám thang hō͘ hiahê góa m̄-chai i sī tùi tó-ūi lâi ê lâng? "
25:12 Ta-bi̍t ê pō͘-hā chiū oa̍t tńg-sin, tùi goân-lō͘ tńg-.khì, chiàu chiahê ōe lóng kā Ta-bi̍t kóng.
25:13 Ta-bi̍t tùi tòe i ê lâng kóng, " Lín ta̍k lâng lóng tio̍h phāiⁿ to! " In chiū lóng phāiⁿ to, Ta-bi̍t mā phāiⁿ to. Kin-tòe Ta-bi̍t chiūⁿ-khì ê chha-put-to ū sì pah lâng, lâu nn̄g pah lâng tī hia kò͘-siú cha̍p-mi̍h.
25:14 Na-bal hiahê pō͘-hā tiong-kan ū chi̍t-ê lâi kā Na-bal ê bó͘ A-bi-ga-il kóng, " Ta-bi̍t tùi khòng-iá chhe sù-chiá lâi kā goán chú-lâng chhéng-an, chú-lâng tian-tò kā in thí-chhiò.
25:15 Chóng-.sī, hiahê lâng khoán-thāi goán chin hó, goán tī chhân-iá kah in óng-lâi ê sî, lóng bô siū siong-hāi, mā bô sit-lo̍h siáⁿ-mi̍h.
25:16 Goán tī in hia chhī iûⁿ ê sî, in mê-ji̍t chò goán ê chhiûⁿ-ûi.
25:17 Taⁿ lí tio̍h chai, mā tio̍h phah-sǹg, khòaⁿ lí beh án-chóaⁿ chò; in-ūi ū tiāⁿ tio̍h ì-sù beh hāi goán ê chú-lâng kah i ê choân ke. I ê sèng-chêng hiong-ok, bô lâng káⁿ kah i kóng-ōe. "
25:18 A-bi-ga-il chiū kóaⁿ-kín kā nn̄g pah tè piáⁿ, nn̄g phôe-tē ê chiú, gō͘ chiah chún-pī hó ê iûⁿ, gō͘ sè-a hang ê ngó͘-kok, chi̍t pah pha ê phû-tô koaⁿ, nn̄g pah tè ê bû-hoa-kó piáⁿ, hō͘ kúi-nā chiah lî-á phāiⁿ.
25:19 Kā i hiahê pō͘-hā kóng, " Lín chò thâu khì, góa beh tòe lín ê āu-bīn khì. " Chóng-.sī, bô kā i ê tiōng-hu Na-bal kóng.
25:20 I chiū khiâ lî chhut-hoat, tī tú-á lo̍h soaⁿ ê oat-kak, hut-jiân khòaⁿ tio̍h Ta-bi̍t kah tòe i ê lâng tī tùi-bīn teh lo̍h-.lâi, i chiū tú tio̍h in.
25:21 Ta-bi̍t bat kóng, " Chit-ê lâng tī khòng-iá it-chhè só͘-ū ê, góa kā i kò͘-siú, tì-sú sio̍k tī i ê bô sit-lo̍h chi̍t hāng, si̍t-chāi sī bô chhái-kang! I ēng pháiⁿ pò góa ê hó.
25:22 Hoān-nā sio̍k i ê, góa nā lâu i chi̍t-ê chapo͘ kiáⁿ kàu bîn-á-chài thiⁿ-kng, goān Siōng-chú chiàu ánne khoán-thāi Ta-bi̍t ê tùi-te̍k, mā pí ánne iáu khah tāng! "
25:23 A-bi-ga-il khòaⁿ tio̍h Ta-bi̍t, chiū kóaⁿ-kín tùi i ê lî-á lo̍h-.lâi, tī Ta-bi̍t ê bīn-chêng àⁿ thâu phak tī thô͘-kha kā i pài.
25:24 Phak tī Ta-bi̍t ê kha chêng, kóng, " Góa ê chú ah, goān chit-ê chōe kui tī góa, kiû lí chún lí ê lú-pī kóng hō͘ lí thiaⁿ, koh kiû lí thiaⁿ lí ê lú-pī ê ōe.
25:25 Kiû góa ê chú m̄ thang tì-ì chit-ê bô hē-lo̍h ê lâng Na-bal, in-ūi i ê miâ án-chóaⁿ, i ê lâng khoán mā sī ánne. I ê miâ kiò-chò Na-bal, i chò lâng kó-jiân gû-gōng. Chóng-.sī, góa ê chú só͘ chhe lâi ê siàu-liân lâng, lí ê lú-pī mā bô khòaⁿ-.tio̍h.
25:26 Góa ê chú ah, Siōng-chú kì-jiân kìm-chí lí hoān tio̍h thâi-sí-lâng ê chōe, ēng lí ê chhiú pò kakī ê siû-te̍k, só͘-í, góa kí éng-oán oa̍h ê Siōng-chú kah lí ê oa̍h-miā lâi chiùchōa kóng: Goān lí ê tùi-te̍k kah kè-bô͘ hāi góa ê chú ê, lóng chhin-chhiūⁿ Na-bal. '
25:27 Taⁿ lí ê lú-pī só͘ tòa-lâi hō͘ góa ê chú ê lé-mi̍h, thang hō͘ kin-tòe góa ê chú ê siàu-liân lâng.
25:28 Kiû lí liōng-chêng lí ê lú-pī ê chōe-kò, in-ūi Siōng-chú it-tēng kā góa ê chú kiàn-li̍p kian-kò͘ ê ke, in-ūi góa ê chú ūi tio̍h Siōng-chú kau-chiàn, koh tī lí it-seng ê ji̍t-chí, bô chhâ-chhut lí ū siáⁿ-mi̍h kòe-sit.
25:29 Sûi-jiân ū lâng khí-lâi kā lí jiok, siàu-siūⁿ lí ê sèⁿ-miā, chóng-.sī, góa ê chú ê sèⁿ-miā ē tī Siōng-chú — lí ê Siōng-tè hia, pau tī oa̍h-miā ê pau lāi; lí ê tùi-te̍k ê sèⁿ-miā, Siōng-chú ē kā i hìⁿ chhut-.lâi, chhin-chhiūⁿ tùi hìⁿ soh ê tiong-kan hìⁿ chhut-.khì.
25:30 Kàu āu-ji̍t, Siōng-chú chiàu I só͘ èng-ín góa ê chú ê hok-khì, lâi choân-pō͘ kiâⁿ tī lí, siat-li̍p lí chò I-su-la-el ê thâu-lâng.
25:31 Hit tong-sî, góa ê chú m̄-bián ūi tio̍h lâu bô chōe ê lâng ê hoeh, sin kakī ê oan, tì-sú ū siáⁿ-mi̍h iu-būn á-.sī sim-lāi kakī chek-pī. Siōng-chú sù-hok hō͘ góa ê chú ê sî, kiû lí kì-liām lí ê lú-pī. "
25:32 Ta-bi̍t kā A-bi-ga-il kóng, " Siōng-chú — I-su-la-el ê Siōng-tè sī eng-kai oló ê, in-ūi I kin-á-ji̍t chhe lí lâi tú tio̍h góa.
25:33 Lí ê tì-hūi thang oló, lí pún-sin mā thang oló, in-ūi lí kin-á-ji̍t chó͘-tòng góa hoān tio̍h thâi-sí-lâng ê chōe, bô ēng kakī ê chhiú pò kakī ê siû-te̍k.
25:34 Kìm-chí góa siong-hāi lí ê Siōng-chú — I-su-la-el ê Siōng-tè, góa kí I ê éng-oán ê oa̍h-miā lâi chiùchōa, nā-sī lí bô kóaⁿ-kín lâi chiap góa, kàu bîn-á chá-khí, kiàn-nā sio̍k Na-bal ê, choa̍t-tùi bô lâu kah pòaⁿ-ê chapo͘ kiáⁿ. "
25:35 Ta-bi̍t siu A-bi-ga-il tòa-lâi hō͘ i ê mi̍h, chiū kā i kóng, " Lí thang pêng-an tńg-khì lí ê ke, lí khòaⁿ, góa ū thiaⁿ lí ê ōe, chiàu lí ê ōe khì chò. "
25:36 A-bi-ga-il lâi-kàu Na-bal hia, khòaⁿ tio̍h i tī chhù lāi pâi-siat iàn-se̍k, chhin-chhiūⁿ ông ê iàn-se̍k. Na-bal sim-lāi tōa hoaⁿ-hí, in-ūi i chin-chiàⁿ tōa chùi. Só͘-í, A-bi-ga-il bô-lūn tōa-sè ê tāichì, lóng bô kā i kóng, thèng-hāu kàu keh kang chá-khí.
25:37 Kàu keh kang chá-khí, Na-bal ê chiú thè, i ê bó͘ kā chiahê tāichì tùi i kóng, i ê sim tī lāi-bīn chhin-chhiūⁿ sí-.khì, i piàn kah ná chhin-chhiūⁿ chio̍h-thâu.
25:38 Chha-put-to kòe cha̍p kang, Siōng-chú phah Na-bal, i chiū sí.
25:39 Ta-bi̍t thiaⁿ tio̍h Na-bal í-keng sí-.khì, chiū kóng, " Eng-kai tio̍h oló Siōng-chú, in-ūi góa tùi Na-bal ê chhiú só͘ siū ê lêng-jio̍k, I ū kā góa sin-oan, koh chó͘-chí lô͘-po̍k kiâⁿ pháiⁿ; Siōng-chú mā hō͘ Na-bal ê pháiⁿ kui kàu Na-bal ê thâu-khak. " Án-ne, Ta-bi̍t chiū chhe lâng khì kā A-bi-ga-il kóng, beh chhōa i chò bó͘.
25:40 Ta-bi̍t ê lô͘-po̍k lâi-kàu Kal-mel kìⁿ A-bi-ga-il, kā i kóng, " Ta-bi̍t chhe goán lâi kìⁿ lí, siūⁿ beh chhōa lí chò bó͘. "
25:41 A-bi-ga-il chiū khí-.lâi, phak tī thô͘-kha, kóng, " Lí ê lú-pī tī chia, goān chò chhe-ēng, lâi sé góa ê chú hiahê lô͘-po̍k ê kha. "
25:42 A-bi-ga-il kóaⁿ-kín khí-.lâi, khiâ lî-á, ū i gō͘-ê lú-pī chò-hóe khì, i chiū tòe Ta-bi̍t ê sù-chiá khì chò Ta-bi̍t ê bó͘.
25:43 Ta-bi̍t mā chhōa E-chu-le-el lâng A-hi-no-ám, in nn̄g lâng lóng chò i ê bó͘.
25:44 Sàu-lô í-keng kā i ê chabó͘ kiáⁿ Mi-kal, to̍h-sī Ta-bi̍t ê bó͘, hō͘ Ka-lîm lâng La-i-si ê kiáⁿ Phàⁿ-thê chò bó͘.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。