撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 Ta-bi̍t Bô beh Siong-hāi Sàu-lô
Sàu-lô jiok Hui-lī-sū lâng tńg-.lâi ê sî, ū lâng kā i kóng, " Lí khòaⁿ, Ta-bi̍t tòa tī Ian-ge-tih ê khòng-iá. "
24:2 Sàu-lô chiū chhōa tùi I-su-la-el tiong kéng-soán ê peng saⁿ chheng, khì chhōe Ta-bi̍t kah tòe i ê lâng, khì-kàu " Iá-soaⁿ-iûⁿ ê chio̍h-pôaⁿ ".
24:3 Lâi-kàu lō͘ piⁿ ê iûⁿ-tiâu, tī hia ū tōng, Sàu-lô ji̍p-khì beh tāi-piān. Ta-bi̍t kah tòe i ê lâng bih tī tōng lāi khah chhim ê só͘-chāi.
24:4 Kin-tòe Ta-bi̍t ê lâng kā i kóng, " Siōng-chú bat kā lí kóng, ' Góa beh kā lí ê tùi-te̍k kau tī lí ê chhiú tiong, chiàu lí só͘ khòaⁿ-chò hó ê kā i khoán-thāi. ' Lí khòaⁿ, hit-ê ji̍t kàu à! " Ta-bi̍t chiū khí-.lâi, thau-thau-á koah Sàu-lô gōa-ho̍k ê saⁿ-á-ki.
24:5 Āu-lâi, Ta-bi̍t sim-lāi kakī chek-pī, in-ūi i koah Sàu-lô ê saⁿ-á-ki.
24:6 Chiū tùi tòe i ê lâng kóng, " Goān Siōng-chú kìm-chí góa tùi góa ê chì-koân Siōng-chú só͘ boah iû ê kiâⁿ chit-ê tāichì, chhut-chhiú lâi kā i kong-kek, in-ūi i sī Siōng-chú só͘ boah iû ê. "
24:7 Ta-bi̍t ēng chiahê ōe chó͘-chí tòe i ê lâng, m̄-chún in khí-lâi kong-kek Sàu-lô. Sàu-lô khí-.lâi, tùi tōng lāi chhut-.khì, chiàu ánne kiâⁿ i ê lō͘.
24:8 Āu-lâi, Ta-bi̍t mā khí-.lâi, tùi tōng lāi chhut-.khì, tī Sàu-lô ê āu-bīn tōa-siaⁿ hoah, " Góa ê chú, góa ê ông. " Sàu-lô oa̍t thâu khòaⁿ, Ta-bi̍t chiū khut-sin phak tī thô͘-kha pài.
24:9 Ta-bi̍t tùi Sàu-lô kóng, " Lí ná ē thiaⁿ lâng ê ōe, kóng Ta-bi̍t siūⁿ beh hāi lí?
24:10 Kin-á-ji̍t, lí chhin-ba̍k khòaⁿ-.tio̍h, kin-á-ji̍t lí tī tōng lāi, Siōng-chú kā lí kau tī góa ê chhiú. Ū lâng kiò góa thâi lí, chóng-.sī, góa thiàⁿ-sioh lí, góa kóng, ' Góa bô beh chhun chhiú hāi-sí góa ê chú, in-ūi i sī Siōng-chú só͘ boah iû ê. '
24:11 Góa ê pē, lí khòaⁿ chi̍t-.ē, khòaⁿ lí gōa-ho̍k ê saⁿ-á-ki tī góa ê chhiú. Góa koah lí ê gōa-ho̍k saⁿ-á-ki, bô thâi lí; chiū ánne lí thang khòaⁿ-chhut, chiū chai góa ê chhiú bô chò siáⁿ-mi̍h pháiⁿ, bô pōe-ge̍k lí. Góa m̄ bat tek-chōe lí, chóng-.sī, lí chhin-chhiūⁿ phah-la̍h teh siàu-siūⁿ góa ê sèⁿ-miā.
24:12 Goān Siōng-chú tī lí kah góa ê tiong-kan phòaⁿ-toàn, Siōng-chú ē tī lí ê sin chiūⁿ kā góa sin-oan, chóng-.sī, góa ê chhiú bô beh hāi lí.
24:13 Chhin-chhiūⁿ kó͘-chá lâng ū chi̍t kù sio̍k-gí kóng, " Pháiⁿ sū tùi pháiⁿ lâng chhut." Chóng-.sī, góa ê chhiú bô kā lí kāng tio̍h.
24:14 I-su-la-el ông chhut-lâi beh chhōe siáⁿ lâng? Lí jiok siáⁿ lâng? Chí-put-kò sī teh chhōe chi̍t chiah sí-káu, chi̍t chiah ka-cháu.
24:15 Só͘-í, goān Siōng-chú chò sím-phòaⁿ-koaⁿ, tī lí kah góa ê tiong-kan chò phòaⁿ-toàn, koh kàm-chhat lâi piān-hō͘ góa ê àn-kiāⁿ, kiù góa thoat-chhut lí ê chhiú. "
24:16 Ta-bi̍t kā chiahê ōe tùi Sàu-lô kóng soah, Sàu-lô kóng, " Góa ê kiáⁿ Ta-bi̍t, che sī lí ê siaⁿ? " Sàu-lô chiū chhut siaⁿ thî-khàu,
24:17 kā Ta-bi̍t kóng, " Lí pí góa khah kong-gī, in-ūi lí ēng hó pò góa, chóng-.sī, góa ēng pháiⁿ pò lí.
24:18 Lí kin-á-ji̍t sī piáu-bêng ēng hó khoán-thāi góa, in-ūi Siōng-chú kā góa kau tī lí ê chhiú tiong, chóng-.sī, lí bô kā góa thâi-sí.
24:19 Lâng nā tú tio̍h i ê tùi-te̍k, kám ū pàng i pêng-an khì? Goān Siōng-chú in-ūi lí kin-á-ji̍t tùi góa só͘ kiâⁿ ê, ēng hó pò lí.
24:20 Lí khòaⁿ, taⁿ góa chai lí it-tēng ē chò ông, I-su-la-el kok ē tī lí ê chhiú tiong kian-kò͘ khí-.lâi.
24:21 Taⁿ lí tio̍h kí Siōng-chú tùi góa chiùchōa, góa kòe-sin liáu-āu, bô chián-tû góa ê kiáⁿ-sun, tī góa ê pē ê ke bô bia̍t-bông góa ê miâ. "
24:22 Ta-bi̍t chiū ǹg Sàu-lô chiùchōa. Sàu-lô chiū tńg-khì i ê chhù, Ta-bi̍t kah tòe i ê lâng chiūⁿ-khì siâⁿ-pó.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。