撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Chân-sat Chè-si
Ta-bi̍t chiū lī-khui hia, cháu kàu A-tu-lâm ê tōng. I ê hiaⁿ-tī kah i ê lāu-pē choân ke thiaⁿ-.tio̍h, chiū lóng lo̍h-khì kàu i hia.
22:2 Kiàn-nā pek-hāi ê, khiàm-chè ê, sim-lāi ut-chut ê, lóng chū-chi̍p kàu i hia; Ta-bi̍t chiū chò in ê thâu, óa i ê chha-put-to ū sì pah lâng.
22:3 Ta-bi̍t tùi hia khì Mô͘-ap ê Mi-su-peh, kā Mô͘-ap ông kóng, " Kiû lí iông-ín góa ê lāu-pē kah góa ê lāu-bú chhut-.lâi, tiàm lín chia tòa, thèng-hāu kàu góa bêng-pe̍k Siōng-chú ē kā góa án-chóaⁿ kiâⁿ. "
22:4 I chhōa in kàu Mô͘-ap ông ê bīn-chêng. Ta-bi̍t tòa tī soaⁿ-chē ê sî-chūn, i ê pē-bú mā tòa tī Mô͘-ap ông hia.
22:5 Sian-ti Ga̍t kā Ta-bi̍t kóng, " Lí m̄ thang tòa tī siâⁿ-pó, tio̍h khì Iô-tah tē. " Ta-bi̍t chiū lī-khui hia, khì-kàu Hap-lia̍t ê chhiū-nâ.
22:6 Sàu-lô Chân-sat Chè-si
Sàu-lô tī Gi-be-at ê La̍h-má, chē tī sûi-si-liú ê chhiū kha, chhiú-.ni̍h gia̍h chhiuⁿ, chèng jîn-sîn ûi tī i ê chó-iū. Sàu-lô thiaⁿ tio̍h kóng Ta-bi̍t kah tòe ê lâng hō͘ lâng tú-.tio̍h,
22:7 I chiū kā ûi i ê jîn-sîn kóng, " Biān-iá-mín lâng, lín tio̍h thiaⁿ, I-é-sái ê kiáⁿ kám ē kā chhân kah phû-tô hn̂g hō͘ lín ta̍k lâng? Kám ē siat-li̍p lín ta̍k lâng chò iâⁿ-tiúⁿ, liân-tiúⁿ?
22:8 Lín kèng-jiân chò-hóe kè-bô͘ kong-kek góa! Góa ê kiáⁿ bat kah I-é-sái ê kiáⁿ kiat iok, bô lâng pò góa chai; lín tiong-kan bô chi̍t-ê lâng khó-liân góa; góa ê kiáⁿ siàn-tōng góa ê jîn-sîn kong-kek góa, tng-tán góa, chhin-chhiūⁿ kin-á-ji̍t ê khoán, lín lóng bô pò góa chai. "
22:9 Hit sî, E-tóm lâng To-ek khiā tī Sàu-lô jîn-sîn ê tiong-kan, kā i kóng, " Góa bat khòaⁿ tio̍h I-é-sái ê kiáⁿ khì-kàu Νo͘p, lâi-kàu A-hi-top ê kiáⁿ A-hi-mé-le̍k hia.
22:10 A-hi-mé-le̍k thè i mn̄g Siōng-chú, koh hō͘ i chia̍h-mi̍h, mā ēng Hui-lī-sū lâng Go-lī-at ê to hō͘ i. "
22:11 Ông chiū chhe lâng khì tiàu A-hi-top ê kiáⁿ, chè-si A-hi-mé-le̍k kah i lāu-pē choân ke, to̍h-sī tòa tī Νo͘p hiahê chè-si, in chiū lóng lâi ông hia.
22:12 Sàu-lô kóng, " A-hi-top ê kiáⁿ, lí tio̍h thiaⁿ. " A-hi-mé-le̍k ìn kóng, " Góa ê chú, góa tī chia. "
22:13 Sàu-lô kā i kóng, " Lín án-chóaⁿ kah I-é-sái ê kiáⁿ kè-bô͘ beh lâi kong-kek góa? Lí kèng-jiân kā piáⁿ kah to hō͘ i, koh thè i mn̄g Siōng-chú, hō͘ i khí-lâi kong-kek góa, tng-tán góa, chhin-chhiūⁿ kin-á-ji̍t ê khoán? "
22:14 A-hi-mé-le̍k ìn ông kóng, " Lí ê jîn-sîn tiong-kan, siáⁿ lâng ē pí-tit Ta-bi̍t ê chīn-tiong? I sī ông ê kiáⁿ-sài, koh chò lí ê chham-bô͘, mā tī lí ê chhù lāi sī chun-kùi ê.
22:15 Góa kám sī tùi kin-á-ji̍t chiah thè i mn̄g Siōng-chú? Góa choa̍t-tùi bô hit khoán ì-sù, chhiáⁿ ông m̄ thang kā siáⁿ-mi̍h kui tī lô͘-po̍k kah góa ê lāu-pē choân ke, in-ūi chiahê só͘-ū ê tāichì, bô-lūn tōa-sè, lí ê lô͘-po̍k lóng m̄-chai. "
22:16 Ông kóng, " A-hi-mé-le̍k, lí kah lí ê lāu-pē choân ke lóng it-tēng tio̍h sí. "
22:17 Ông bēng-lēng chó-iū ê sī-ōe kóng, " Lín oa̍t tńg-khì thâi Siōng-chú ê chè-si, in-ūi in mā pang-chān Ta-bi̍t, koh in-ūi in chai Ta-bi̍t tô-cháu, kèng-jiân bô pò góa chai. " Chóng-.sī, ông ê jîn-sîn m̄-khéng chhun chhiú phah-sí Siōng-chú ê chè-si.
22:18 Ông kā To-ek kóng, " Lí oa̍t tńg-khì phah hiahê chè-si. " E-tóm lâng To-ek chiū oa̍t tńg-khì phah chè-si, hit ji̍t, thâi-sí chhēng iù-tē pò͘ ê chè-si peh-cha̍p-gō͘ lâng.
22:19 Koh ēng to phah chè-si ê siâⁿ — Νo͘p kî-tiong ê lâm-lí, gín'á, chia̍h leng ê eⁿ-á kah gû, lî, iûⁿ, lóng ēng to thâi-sí.
22:20 A-hi-top ê kiáⁿ A-hi-mé-le̍k ū chi̍t-ê kiáⁿ, miâ kiò-chò A-bi-a-thal, thoat-lī cháu-khì tòe Ta-bi̍t.
22:21 A-bi-a-thal kā Ta-bi̍t kóng, " Sàu-lô ū thâi-sí Siōng-chú ê chè-si. "
22:22 Ta-bi̍t kā A-bi-a-thal kóng, " Hit ji̍t, E-tóm lâng To-ek tī hia, góa chai i it-tēng ē kā Sàu-lô kóng. Lí ê lāu-pē choân ke sit-lo̍h sèⁿ-miā, lóng sī in-ūi góa ê iân-kò͘.
22:23 Lí tio̍h kah góa tòa, m̄-bián kiaⁿ, in-ūi siàu-siūⁿ góa ê sèⁿ-miā ê to̍h-sī siàu-siūⁿ lí ê sèⁿ-miā; lí kah góa tòa, ē tit tio̍h pó-choân. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。