撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 Go-lī-at Hiòng I-su-la-el Lâng Thiau-chiàn
Hui-lī-sū lâng chū-chi̍p in ê kun-peng beh kau-chiàn, chū-chi̍p tī sio̍k Iô-tah ê So͘-koh, chat iâⁿ tī E-hui-tam-mím, tī So͘-koh kah A-che-kah ê tiong-kan.
17:2 Sàu-lô kah I-su-la-el lâng mā chū-chi̍p, chat iâⁿ tī E-la̍h ê soaⁿ-kok, pâi tūi-ngó͘ lâi tí-te̍k Hui-lī-sū lâng.
17:3 Hui-lī-sū lâng khiā tī chit pêng ê soaⁿ, I-su-la-el lâng khiā tī hit pêng ê soaⁿ, tiong-kan ū soaⁿ-kok.
17:4 Tùi Hui-lī-sū ê iâⁿ tiong ū chi̍t-ê chiàn-chiòng chhut-.lâi, miâ kiò-chò Go-lī-at, sī Gat lâng, seng-khu koân la̍k tiú koh chi̍t lia̍h;
17:5 thâu tì tâng-khoe, sin chhēng ū lân ê chiàn-kah, i ê chiàn-kah ê tâng, ū gō͘ chheng si-khel ê tāng;
17:6 tōa-thúi chhēng tâng-kûn, keng-kah-thâu phāiⁿ tâng ê kek;
17:7 chhiuⁿ-pèⁿ tōa kah chhin-chhiūⁿ pò͘-ki ê te̍k-sim, chhiuⁿ-bóe ê thih ū la̍k pah si-khel ê tāng. Ū chi̍t-ê gia̍h tîn-pâi ê kiâⁿ tī i ê thâu-chêng.
17:8 I khiā-teh tùi I-su-la-el ê kun-tūi hoah, kā in kóng, " Lín chhut-lâi pâi tūi-ngó͘ beh án-chóaⁿ? Góa kám m̄-sī Hui-lī-sū lâng, lín kám m̄-sī Sàu-lô ê lô͘-po̍k? Lín tiong-kan kéng chi̍t-ê lâng, hō͘ i lo̍h-lâi góa chia.
17:9 I nā ē kah góa sio-thâi, kā góa thâi-sí, goán chiū beh chò lín ê lô͘-lē; góa nā khah iâⁿ i, kā i thâi-sí, lín chiū tio̍h chò goán ê lô͘-lē, kā goán ho̍k-sāi. "
17:10 Hitê Hui-lī-sū lâng koh kóng, " Góa kin-á-ji̍t biáu-sī I-su-la-el chiahê kun-tūi, lín kiò chi̍t-ê lâng chhut-.lâi kah góa sio-thâi. "
17:11 Sàu-lô kah I-su-la-el jîn-bîn thiaⁿ tio̍h Hui-lī-sū lâng chiahê ōe, chiū chin lún, chin kiaⁿ.
17:12 Ta-bi̍t tī Sàu-lô ê Kun-iâⁿ
Ta-bi̍t sī Iô-tah Bia̍t-lé-hèm ê E-hoah-tha lâng I-é-sái ê kiáⁿ. I-é-sái ū peh-ê kiáⁿ. Tng Sàu-lô ê sî, I-é-sái nî-hòe chē, tī lâng ê tiong-kan sǹg sī lāu lâng.
17:13 I-é-sái hiahê kiáⁿ, saⁿ-ê khah sī-tōa ê tòe Sàu-lô khì chhut-cheng. Khì chhut-cheng hit saⁿ-ê kiáⁿ, tōa ê miâ kiò E-lí-ap, tē-jī ê kiò A-bi-na-tap, tē-saⁿ ê kiò Siaⁿ-mah.
17:14 Ta-bi̍t sī siōng sè ê, hit saⁿ-ê khah sī-tōa ê kin-tòe Sàu-lô.
17:15 Ta-bi̍t óng-lâi tī Sàu-lô ê só͘-chāi, tī Bia̍t-lé-hèm chhī in lāu-pē ê iûⁿ.
17:16 Hitê Hui-lī-sū lâng chá-àm chhut-lâi khiā-teh tián-ui, keng-kòe sì-cha̍p kang.
17:17 I-é-sái kā i ê kiáⁿ Ta-bi̍t kóng, " Lí tio̍h kā lí hiahê a-hiaⁿ tòa hang ê ngó͘-kok chi̍t e-hoat kah chit cha̍p tè piáⁿ, kóaⁿ-kín khì kun-iâⁿ, hō͘ lí hiahê a-hiaⁿ;
17:18 koh tòa chit cha̍p tè gû-leng-piáⁿ khì sàng hō͘ in ê iâⁿ-tiúⁿ, koh mn̄g khòaⁿ lí ê a-hiaⁿ ū pêng-an bô, tòa i ê chèng-kì lâi. "
17:19 Sàu-lô kah Ta-bi̍t saⁿ-ê a-hiaⁿ, í-ki̍p I-su-la-el jîn-bîn, tī E-la̍h ê soaⁿ-kok kah Hui-lī-sū lâng kau-chiàn.
17:20 Ta-bi̍t thàu-chá khí-.lâi, kā iûⁿ-kûn kau hō͘ chi̍t-ê kò͘-siú ê lâng, chiàu I-é-sái só͘ bēng-lēng i ê, tòa chia̍h-mi̍h khì-kàu pâi-lia̍t chhia ê só͘-chāi. Kun-peng tú-á chhut-khì kàu chiàn-tiûⁿ, hoah beh kau-chiàn.
17:21 I-su-la-el lâng kah Hui-lī-sū lâng lóng pâi-lia̍t tūi-ngó͘, nn̄g pêng ê kun-tūi sio-tùi.
17:22 Ta-bi̍t kā mi̍h-kiāⁿ kau-tài kò͘ mi̍h-kiāⁿ ê lâng ê chhiú, cháu kàu chiàn-tiûⁿ, kā i ê a-hiaⁿ chhéng-an.
17:23 Kah in kóng-ōe ê sî, lí khòaⁿ, hit-ê chiàn-chiòng, to̍h-sī Gat ê Hui-lī-sū lâng, miâ kiò Go-lī-at, tùi Hui-lī-sū ê tūi-ngó͘ chhut-.lâi, chiàu chêng só͘ kóng ê lâi kóng; Ta-bi̍t ū thiaⁿ-.tio̍h.
17:24 I-su-la-el jîn-bîn khòaⁿ tio̍h hit-ê lâng chiū cháu siám-khui, hui-siông kiaⁿ.
17:25 I-su-la-el lâng kóng, " Chit-ê khí-.lâi ê lâng, lí kám ū khòaⁿ-.tio̍h? I khí-lâi sī beh biáu-sī I-su-la-el. Nā ū lâng ē thâi-sí i, ông beh hō͘ i tōa hó-gia̍h, kā i ê chabó͘ kiáⁿ kè hō͘ i, koh hō͘ in lāu-pē chi̍t ke tī I-su-la-el tiong bián la̍p-sòe, tng-chhe. "
17:26 Ta-bi̍t mn̄g khiā tī i sin piⁿ hiahê lâng, " Nā ū lâng thâi-sí chit-ê Hui-lī-sū lâng, sé-tû I-su-la-el ê kiàn-siàu, beh án-chóaⁿ kā i khoán-thāi? Chit-ê bô siū kat-lé ê Hui-lī-sū lâng sī siáⁿ lâng, káⁿ biáu-sī éng-oán oa̍h ê Siōng-chú ê kun-tūi? "
17:27 Jîn-bîn chiàu chêng ê ōe kā i ìn, kóng, " Nā ū lâng ē thâi-sí chit-ê lâng, beh ánne kā i khoán-thāi. "
17:28 Ta-bi̍t ê tōa-hiaⁿ E-lí-ap thiaⁿ tio̍h i kah lâng teh kóng ōe, E-lí-ap tùi Ta-bi̍t siū-khì, kóng, " Lí ná ē lo̍h-lâi chia? Hit kúi chiah iûⁿ tī khòng-iá-.ni̍h, lí pàng kau hō͘ siáⁿ lâng? Góa chai lí kiau-ngō͘ kah lí sim-lāi ê pháiⁿ, lí lo̍h-lâi chí-put-kò sī beh khòaⁿ kau-chiàn! "
17:29 Ta-bi̍t kóng, " Góa ū chò siáⁿ-mi̍h? Kám sī bô goân-in? "
17:30 Ta-bi̍t chiū lī-khui i, khì ǹg pa̍t lâng, chiàu chêng ê ōe teh mn̄g; jîn-bîn chiàu chêng ê ōe lâi ìn i.
17:31 Ta-bi̍t só͘ kóng ê ōe í-keng hō͘ lâng thiaⁿ-.tio̍h, in chiū tī Sàu-lô ê bīn-chêng kóng; Sàu-lô chiū chhe lâng kiò i lâi.
17:32 Ta-bi̍t kā Sàu-lô kóng, " Lâng m̄-bián ūi tio̍h hit-ê lâng lâi sit táⁿ, lí ê lô͘-po̍k beh khì kah hit-ê Hui-lī-sū lâng kau-chiàn. "
17:33 Sàu-lô tùi Ta-bi̍t kóng, " Lí bē tàng khì tí-te̍k chit-ê Hui-lī-sū lâng, kah i kau-chiàn, in-ūi lí ê nî-hòe iáu koh chió, i tùi siàu-liân chiū ha̍k-si̍p chiàn-sū. "
17:34 Ta-bi̍t kā Sàu-lô kóng, " Lí ê lô͘-po̍k kā lāu-pē kò͘ iûⁿ ê sî, ū sai á-.sī hîm lâi, tùi iûⁿ-kûn tiong kā iûⁿ-á khì.
17:35 Góa chiū jiok i, kā i phah, kiù iûⁿ-á chhut i ê chhùi. I khí-lâi beh kāng góa, góa chiū khiú i ê chhùi-ē-táu, kā i phah-sí.
17:36 Lí ê lô͘-po̍k bat phah-sí sai kah hîm, chit-ê bô siū kat-lé ê Hui-lī-sū lâng, mā beh chhin-chhiūⁿ in tiong-kan ê chi̍t chiah, in-ūi i biáu-sī éng-oán oa̍h ê Siōng-chú ê kun-tūi. "
17:37 Ta-bi̍t koh kóng, " Siōng-chú kiù góa thoat-lī sai ê jiáu kah hîm ê jiáu, I mā ē kiù góa thoat-lī chit-ê Hui-lī-sū lâng ê chhiú. " Sàu-lô kā Ta-bi̍t kóng, " Lí khì, Siōng-chú ē kah lí tông-chāi. "
17:38 Sàu-lô chiū kā i ê kun-ho̍k hō͘ Ta-bi̍t chhēng, ēng tâng ê thâu-khoe hō͘ i tì, koh hō͘ i chhēng chiàn-kah.
17:39 Ta-bi̍t ēng to hâ tī kun-ho̍k, chhì-khòaⁿ kiâⁿ chi̍t ē, in-ūi m̄ bat chhēng tio̍h. Ta-bi̍t kā Sàu-lô kóng, " Chhēng chiahê góa kiâⁿ bē khì, in-ūi m̄ bat chhēng-kòe. "
17:40 Ta-bi̍t chiū thǹg khí-.lâi, i chhiú gia̍h koái-á, koh tī soaⁿ-kheⁿ-á kéng gō͘ tè kng-ku̍t ê nn̄g-chio̍h, hē tī tē-á lāi, to̍h-sī kò͘ iûⁿ ê lâng só͘ tòa ê lông; chhiú the̍h hìⁿ chio̍h ê soh-á; chiū kiâⁿ óa hit-ê Hui-lī-sū lâng.
17:41 Ta-bi̍t Phah-iâⁿ Go-lī-at
Hitê Hui-lī-sū lâng mā ná kiâⁿ óa Ta-bi̍t, kōaⁿ pâi ê kiâⁿ tī i ê thâu-chêng.
17:42 Hitê Hui-lī-sū lâng gia̍h thâu khí-lâi khòaⁿ, khòaⁿ tio̍h Ta-bi̍t, chiū khòaⁿ-khin i, in-ūi i chió hòe, sek-tì chhiah, bīn-māu hó khòaⁿ.
17:43 Hitê Hui-lī-sū lâng kā Ta-bi̍t kóng, " Góa kám sī káu, lí chiah gia̍h koái-á lâi góa chia? " Hui-lī-sū lâng chiū kí kakī ê sîn-bêng, kā Ta-bi̍t chiù-chó͘.
17:44 Hitê Hui-lī-sū lâng koh kā Ta-bi̍t kóng, " Lí lâi góa chia, góa beh kā lí ê bah hō͘ khong-tiong ê poe-chiáu kah chhân-iá ê iá-siù. "
17:45 Ta-bi̍t tùi hit-ê Hui-lī-sū lâng kóng, " Lí lâi óa-kīn góa, sī ēng to, ēng chhiuⁿ, ēng kek ; góa lâi óa-kīn lí, sī ēng bān-kun Siōng-chú ê miâ, I-su-la-el kun-tūi ê Siōng-chú, to̍h-sī lí só͘ biáu-sī ê.
17:46 Kin-á-ji̍t Siōng-chú ē kā lí kau tī góa ê chhiú tiong, góa beh phah-sí lí, thâi lí ê thâu-khak, kin-á-ji̍t góa beh kā Hui-lī-sū kun-peng ê sin-si, hō͘ khong-tiong ê poe-chiáu kah tē-chiūⁿ ê iá-siù; hō͘ phó͘-thiⁿ-ē ê lâng lóng chai I-su-la-el ū Siōng-tè,
17:47 koh hō͘ chiahê kui tīn ê lâng chai, Siōng-chú kiù lâng m̄-sī ēng to, mā m̄-sī ēng chhiuⁿ, in-ūi kau-chiàn ê tāichì chāi tī Siōng-chú, I ē kā lín kau tī goán ê chhiú tiong. "
17:48 Hitê Hui-lī-sū lâng khí-.lâi, chìn-chêng kīn-óa beh hiòng Ta-bi̍t thiau-chiàn. Ta-bi̍t mā kóaⁿ-kín chàu óa-.khì, ǹg kun-tūi beh hiòng Hui-lī-sū lâng thiau-chiàn.
17:49 Ta-bi̍t chhun chhiú ji̍p-khì tē-á lāi, the̍h chi̍t tè chio̍h-thâu-á chhut-.lâi, ēng soh hìⁿ-.khì, siā tio̍h Hui-lī-sū lâng ê thâu-hia̍h, chio̍h-thâu-á tîm ji̍p-khì thâu-hia̍h, i chiū tó lo̍h-.khì, bīn phak tī thô͘-kha.
17:50 Án-ne, Ta-bi̍t ēng hìⁿ soh kah chio̍h-thâu-á khah iâⁿ Hui-lī-sū lâng, kā i phah-sí; chóng-.sī, Ta-bi̍t ê chhiú bô to.
17:51 Ta-bi̍t kóaⁿ-kín chàu khì khiā tī hit-ê Hui-lī-sū lâng ê téng-bīn, kā i ê to poe̍h chhut siù, ēng hit ki to kā i thâi-sí, chám i ê thâu-khak. Hui-lī-sū kûn-chiòng khòaⁿ tio̍h in ê ióng-sū í-keng sí, chiū kóaⁿ-kín chàu.
17:52 I-su-la-el lâng kah Iô-tah lâng chiū khí-.lâi, hoah-hiàm, jiok Hui-lī-sū lâng, kàu Ka-í kah Ek-lóng ê siâⁿ mn̂g. Tio̍h siong ê Hui-lī-sū lâng tó tī Sia-la̍h-im ê lō͘, it-ti̍t kàu Gat kah Ek-lóng.
17:53 I-su-la-el lâng kā Hui-lī-sū lâng jiok tò tńg-.lâi, chiū chhiúⁿ in ê iâⁿ-pâng.
17:54 Ta-bi̍t kā hit-ê Hui-lī-sū lâng ê thâu-khak, tòa kàu Ê-lú-sa-lèm, koh kā i ê kun-khì hē tī kakī ê pò͘-pêⁿ.
17:55 Sàu-lô khòaⁿ tio̍h Ta-bi̍t khì phah Hui-lī-sū lâng ê sî, chiū mn̄g kun-tiúⁿ Ap-nel kóng, " Ap-nel, hit-ê siàu-liân lâng sī siáⁿ lâng ê kiáⁿ? " Ap-nel kóng, " Góa kí ông ê oa̍h-miā lâi chiùchōa, góa m̄-chai. "
17:56 Ta-bi̍t Tiâu-kìⁿ Sàu-lô
Ông kóng, " Lí khì mn̄g khòaⁿ hit-ê gín'á sī siáⁿ lâng ê kiáⁿ. "
17:57 Ta-bi̍t phah-sí Hui-lī-sū lâng liáu-āu tńg-.lâi, Ap-nel chhōa i lâi-kàu Sàu-lô ê bīn-chêng, i ê chhiú-.ni̍h ū Hui-lī-sū lâng ê thâu-khak.
17:58 Sàu-lô mn̄g i kóng, " Siàu-liân lâng, lí sī siáⁿ lâng ê kiáⁿ? " Ta-bi̍t kóng, " Góa sī lí ê lô͘-po̍k Bia̍t-lé-hèm lâng I-é-sái ê kiáⁿ. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。