撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Sa-mu-el the̍h chi̍t pân iû, tó tī Sàu-lô ê thâu-khak téng, kā i chim, kóng, " Che kám m̄-sī Siōng-chú kā lí boah iû, lâi chò I ê sán-gia̍p ê thâu-lâng?
10:2 Kin-á-ji̍t lí lī-khui góa liáu-āu, tī Biān-iá-mín kau-kài ê Siat-sat, kīn La̍h-khel ê bōng, lí ē tú tio̍h nn̄g-ê lâng. In ē kā lí kóng, ' Lí teh chhōe ê hiahê lî-bó, í-keng chhōe-.tio̍h. Taⁿ lí ê lāu-pē bô teh chhau-hoân lî-á, sī teh hoân-ló lí, kóng, góa ūi tio̍h góa ê kiáⁿ beh án-chóaⁿ chiah hó? '
10:3 Lí ē tùi hia khì, kàu Tha-bo͘l ê siōng chhiū hia, ē ū saⁿ-ê lâng tú tio̍h lí, in sī beh khì Be-thel kàu Siōng-tè hia, chi̍t-ê tòa saⁿ chiah soaⁿ-iûⁿ-á, chi̍t-ê tòa saⁿ tè piáⁿ, chi̍t-ê tòa chi̍t phôe-tē ê chiú.
10:4 In ē kā lí chhéng-an, hō͘ lí nn̄g tè piáⁿ, lí chiū tùi in ê chhiú chiap-.lâi.
10:5 " Chit sî liáu-āu, lí ē khì-kàu Siōng-tè ê soaⁿ, tī hia ū Hui-lī-sū lâng hông-siú ê peng. Lí kàu siâⁿ ê sî, ē tú tio̍h chi̍t tīn sian-ti tùi koân ê só͘-chāi lo̍h-.lâi, tī in ê thâu-chêng ū sek, ū lin-long-kó͘, ū ta̍t-á, ū khîm, in lóng kóng sian-ti ōe.
10:6 Siōng-chú ê Sèng Sîn ē tōa-tōa lîm-kàu lí, lí mā ē kah in kóng sian-ti ōe, lí ē piàn-chò chi̍t-ê sin ê lâng.
10:7 Chiahê tiāu-thâu lîm-kàu lí, lí tio̍h thàn ki-hōe lâi chò, in-ūi Siōng-tè kah lí tông-chāi.
10:8 Lí tio̍h tāi-seng góa lo̍h-khì Gil-gal, góa mā ē lo̍h-khì lí hia hiàn sio-chè kah siā-un-chè. Lí tio̍h thèng-hāu chhit ji̍t, thèng-hāu góa kàu lí hia, chí-sī lí tio̍h kiâⁿ ê tāichì. "
10:9 Sàu-lô oa̍t tńg-sin beh lī-khui Sa-mu-el, Siōng-tè kā i ê sim ōaⁿ sin. Tng hit ji̍t, chiahê tiāu-thâu lóng èng-giām.
10:10 In lâi-kàu hit-ê soaⁿ liáu-āu, ū chi̍t tīn sian-ti lâng tú tio̍h i, Siōng-tè ê lêng tōa-tōa lîm-kàu Sàu-lô, i chiū tī in tiong-kan kóng sian-ti ōe.
10:11 Pêng-siông sî bat i ê lâng, khòaⁿ i tī sian-ti tiong teh kóng sian-ti ōe, chiū chò-hóe kóng, " Ki-si ê kiáⁿ tú tio̍h ánne sī án-chóaⁿ? Sàu-lô kám mā lia̍t tī sian-ti tiong? "
10:12 Hit só͘-chāi ū chi̍t-ê lâng ìn kóng, " Hiahê lâng ê lāu-pē sī siáⁿ lâng? " Chiū ánne, ū chi̍t kù sio̍k-gí kóng, " Sàu-lô kám mā lia̍t tī sian-ti tiong? "
10:13 Sàu-lô kóng sian-ti ōe liáu-āu, chiū tńg-khì koân ê só͘-chāi.
10:14 Sàu-lô ê a-chek mn̄g Sàu-lô kah i ê lô͘-po̍k kóng, " Lín khì tó-ūi? " Sàu-lô ìn kóng, " Khì chhōe lî-bó. Chhōe bô, chiū khì Sa-mu-el hia. "
10:15 Sàu-lô ê a-chek kóng, " Chhiáⁿ lí kā góa kóng, Sa-mu-el kā lín kóng siáⁿ-mi̍h? "
10:16 Sàu-lô kā i ê a-chek kóng, " I bêng-bêng kā goán kóng, lî-bó í-keng chhōe tio̍h à. " Sa-mu-el só͘ kóng koan-hē kok ê tāichì, Sàu-lô bô kā i kóng.
10:17 Sàu-lô Siū Siat-li̍p Chò Ông
Sa-mu-el chio-chi̍p jîn-bîn lâi-kàu Mi-su-peh Siōng-chú hia,
10:18 kā I-su-la-el lâng kóng, " Siōng-chú — I-su-la-el ê Siōng-tè ánne kóng, ' Góa chhōa I-su-la-el lâng chhut Ai-gi̍p, kiù lín thoat-lī Ai-gi̍p lâng ê chhiú, mā thoat-lī só͘-ū hiahê chè-ap lín ê kok ê chhiú. '
10:19 Chóng-.sī, lín kin-á-ji̍t ū khì-sak lín ê Siōng-tè, to̍h-sī pún-sin kiù lín thoat-lī it-chhè hoān-lān kan-khó͘ ê, lín mā tùi I kóng, ' Tio̍h siat-li̍p ông lâi koán-lí goán. ' Taⁿ lín tio̍h chiàu lín ê chi-cho̍k, lín ê chong-cho̍k, lâi khiā tī Siōng-chú ê bīn-chêng. "
10:20 Chiū ánne, Sa-mu-el hō͘ I-su-la-el chèng chi-cho̍k kiâⁿ óa-.lâi, chiū chhú tio̍h Biān-iá-mín ê chi-cho̍k;
10:21 koh hō͘ Biān-iá-mín ê chi-cho̍k chiàu in ê chong-cho̍k kiâⁿ óa-.lâi, chiū chhú tio̍h Má-te̍k-lī cho̍k, tùi hit tiong-kan koh chhú tio̍h Ki-si ê kiáⁿ Sàu-lô. Lâng chhōe i mā chhōe bē tio̍h,
10:22 só͘-í, chiū koh mn̄g Siōng-chú kóng, " Hitê lâng ū lâi chia á-bô? " Siōng-chú kóng, " I bih tī cha̍p-mi̍h ê tiong-kan. "
10:23 In chiū cháu-.khì, tùi hia kā i chhōa chhut-.lâi. I khiā tī jîn-bîn ê tiong-kan, pí chèng lâng khah koân chi̍t lia̍p thâu-khak.
10:24 Sa-mu-el kā chèng lâng kóng, " Siōng-chú só͘ kéng ê lâng, tī jîn-bîn tiong bô chi̍t-ê ē pí-tit i, lín ū khòaⁿ tio̍h á-bô? " Jîn-bîn chiū tōa-siaⁿ hoah, " Goān ông bān-sòe! "
10:25 Sa-mu-el kā kok-hoat tùi jîn-bîn kóng bêng, koh kì tī chheh-.ni̍h, hē tī Siōng-chú ê bīn-chêng, jiân-āu Sa-mu-el kā kûn-chiòng sì-sòaⁿ-khui, ta̍k-ê tńg-khì in ê ke.
10:26 Sàu-lô mā tńg-khì Gi-be-at, kàu i ê chhù, ū chi̍t tīn lâng hō͘ Siōng-tè kám-tōng in ê sim ê, chiū tòe i khì.
10:27 Hiahê húi-lūi kóng, " Chit-ê lâng ná ē kiù lán? " Chiū biáu-sī Sàu-lô, bô sàng i lé-mi̍h; chóng-.sī, Sàu-lô tiām-tiām.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。