撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Jîn-bîn Iau-kiû Siat-li̍p Ông
Sa-mu-el í-keng lāu, chiū siat-li̍p i ê kiáⁿ lâi chò I-su-la-el ê sū-su.
8:2 I ê tōa-kiáⁿ miâ kiò-chò Iô-el, tē-jī kiáⁿ miâ kiò-chò A-bi-iah; in tī Bel-sí-bah chò sū-su.
8:3 Chóng-.sī, i ê kiáⁿ bô chiàu i ê lō͘ kiâⁿ, phian-su tham-châi, chiap-siū lâng ê o͘-se, bô chiàu chèng-ti̍t lâi phòaⁿ-toàn.
8:4 I-su-la-el ê tiúⁿ-ló lóng chū-chi̍p, lâi-kàu La̍h-má kìⁿ Sa-mu-el,
8:5 Kā i kóng, " Lí khòaⁿ, lí í-keng lāu ā, lí ê kiáⁿ koh bô kiâⁿ lí ê lō͘. Τaⁿ kiû lí kā goán siat-li̍p chi̍t-ê ông lâi phòaⁿ-toàn goán ê būn-tê, chhin-chhiūⁿ lia̍t kok ánne. "
8:6 In kóng, " Kiû lí kā goán siat-li̍p chi̍t-ê ông lâi phòaⁿ-toàn goán ê būn-tê. " Hitê tāichì Sa-mu-el bô hoaⁿ-hí, Sa-mu-el chiū tùi Siōng-chú kî-tó.
8:7 Siōng-chú tùi Sa-mu-el kóng, " Jîn-bîn tùi lí só͘ kóng it-chhè ê ōe, lí tio̍h chun-thàn, in-ūi in m̄-sī khì-sak lí, sī khì-sak Góa, bô hō͘ Góa chò in ê ông.
8:8 Tùi Góa chhōa in chhut Ai-gi̍p kàu kin-á-ji̍t, in it-chhè ê só͘ kiâⁿ lóng lī-khui góa, khì ho̍k-sāi pa̍t-ê sîn-bêng. Taⁿ in mā chiàu ánne teh tùi-thāi lí.
8:9 Só͘-í, lí tio̍h chun-thàn in ê ōe, chóng-.sī, tio̍h giâm-giâm kā in kéng-kài, hō͘ in chai chiong-lâi beh koán-lí in ê ông ê chè-tō͘ sī án-chóaⁿ. "
8:10 Sa-mu-el kā Siōng-chú ê ōe lóng tùi jîn-bîn kóng, to̍h-sī hiahê tùi i thó chi̍t-ê ông ê, kóng,
8:11 " Chiong-lâi koán-lí lín ê ông ê chè-tō͘ to̍h-sī ánne: i ē chhú lín ê kiáⁿ, ūi kakī siat-li̍p in lâi kā i koán chhia, chò i ê bé-peng, cháu tī chhia ê thâu-chêng;
8:12 koh ē ūi kakī siat-li̍p in lâi chò iâⁿ-tiúⁿ, pâi-tiúⁿ, mā ē siat-li̍p lâng lâi thè i choh hn̂g, siu ngó͘-kok, chè-chō kun-khì kah chhia-.ni̍h ê khì-kū;
8:13 ē chhú lín ê chabó͘ kiáⁿ thè i chè-chō phang-iû, chò chú-chia̍h ê, chò piak piáⁿ ê;
8:14 lín ê chhân-hn̂g, phû-tô hn̂g, kaⁿ-ná hn̂g, hit-ê siōng hó ê, i ē kā i the̍h-lâi hō͘ i ê lô͘-po̍k.
8:15 Lín só͘ chèng-choh ê kah lín ê phû-tô hn̂g, i ē chhú cha̍p-hūn chi-it hō͘ i ê thài-kàm kah lô͘-po̍k;
8:16 Jî-chhiáⁿ ē chhú lín ê lô͘-po̍k, lú-pī, ióng-kiāⁿ ê siàu-liân lâng kah lín ê lî-á, lâi chò i ê chhe-ēng;
8:17 lín ê iûⁿ-kûn, i ē chhú cha̍p-hūn chi-it, lín mā ē chò i ê lô͘-po̍k.
8:18 Hit sî, lín ē in-ūi só͘ kéng ê ông lâi âu-kiò, chóng-.sī, Siōng-chú tī hit sî m̄ kā lín thiaⁿ. "
8:19 Chóng-.sī, jîn-bîn m̄-khéng thiaⁿ Sa-mu-el ê ōe, kóng, " M̄-lah, goán it-tēng beh chi̍t-ê ông lâi kā goán tī-lí,
8:20 hō͘ goán chhin-chhiūⁿ lia̍t kok ánne, goán ê ông phòaⁿ-toàn goán tiong-kan ê būn-tê, chò thâu chhōa goán, thè goán kau-chiàn. "
8:21 Sa-mu-el thiaⁿ tio̍h jîn-bîn só͘-ū ê ōe liáu-āu, chiū kā hiahê ōe kóng hō͘ Siōng-chú thiaⁿ.
8:22 Siōng-chú tùi Sa-mu-el kóng, " Lí tio̍h chun-thàn in ê ōe, kā in siat-li̍p chi̍t-ê ông. " Sa-mu-el kā I-su-la-el lâng kóng, " Lín ta̍k-ê lóng tńg-khì kakī ê siâⁿ! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。