撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Han-nah ê Kî-tó
Han-nah kî-tó kóng, " Góa ê sim in-ūi Siōng-chú lâi khoài-lo̍k, góa ê kak in-ūi Siōng-chú lâi gia̍h koân. Góa ǹg tùi-te̍k káⁿ kóng tōa-ōe, in-ūi góa ūi tio̍h Lí ê chín-kiù lâi hoaⁿ-hí.
2:2 Bô ū pa̍t-ê sèng ê chhin-chhiūⁿ Siōng-chú; Lí í-gōa bô pa̍t-ê, mā bô chio̍h-pôaⁿ chhin-chhiūⁿ lán ê Siōng-chú.
2:3 Lín m̄ thang chū-khoa kóng kiau-ngō͘ ê ōe, mā m̄ thang hō͘ lāmsám ê ōe chhut lí ê chhùi; in-ūi Siōng-chú sī tì-sek ê Siōng-chú, lâng ê hêng-ûi hō͘ I phoe-phêng.
2:4 Ióng-sū ê kiong í-keng at-tn̄g; tio̍h-tak ê lâng ēng khùi-la̍t hâ io.
2:5 Pá-chiok ê, hō͘ lâng chhiàⁿ lâi thàn-chia̍h; iau ê, bô koh iau. Bē seng-io̍k ê, seⁿ chhit-ê kiáⁿ, ū chin chē kiáⁿ ê, tian-tò soe-jio̍k.
2:6 Siōng-chú hō͘ lâng sí, mā hō͘ lâng oa̍h; Hō͘ lâng lo̍h im-kan, mā hō͘ lâng khí-.lâi.
2:7 Siōng-chú hō͘ lâng sànchhiah, mā hō͘ lâng hó-gia̍h; hō͘ lâng kàng kē, mā hō͘ lâng seng koân.
2:8 I tùi tîn-ai seng koân sànchhiah lâng, tùi pùn-sò-tui ko-seng khiàm-khoeh ê lâng, hō͘ in kah siú-léng chò-hóe chē, sòa-chiap êng-kng ê chō-ūi. In-ūi tē ê thiāu sio̍k tī Siōng-chú; I kā sè-kài an-tì tī hit téng-bīn.
2:9 I ē pó-siú I sèng-ê ê kha, hō͘ pháiⁿ lâng tī o͘-àm tiong tiām chih-chih; in-ūi lâng óa-khò khùi-la̍t bē tàng khah iâⁿ.
2:10 Kah Siōng-chú sio-cheⁿ ê ē siū phah-chhùi; I ē tùi thiⁿ ēng lûi kā i kòng; Siōng-chú ē sím-phòaⁿ tē ê ke̍k-thâu; siúⁿ-sù khùi-la̍t hō͘ I siat-li̍p ê ông, kí-khí I siū boah-iû ê ê kak.
2:11 El-ká-nah tńg-khì La̍h-má kàu i ê ke. Hitê gín'á tī chè-si E-lī ê bīn-chêng ho̍k-sāi Siōng-chú.
2:12 E-lī ê Kiáⁿ
E-lī hiahê kiáⁿ sī húi-lūi, m̄ bat Siōng-chú.
2:13 Chè-si tī jîn-bîn ê lē, to̍h-sī kiàn-nā lâng hiàn chè teh chú bah ê sî, chè-si ê lô͘-po̍k chiū lâi, chhiú gia̍h saⁿ jiáu ê chhe,
2:14 ēng chhiám-á chhah ji̍p-khì poah, á-.sī tiáⁿ, á-.sī thih-tiō （ Chù, ū pé-chhiú ê sió-oe. ）, á-.sī oe, kiàn-nā só͘ chhiám chhut-.lâi ê bah, chè-si lóng the̍h-lâi chò kakī ê. In tī Sī-lô chhin-chhiūⁿ ánne khoán-thāi kiàn-nā lâi hia ê I-su-la-el lâng.
2:15 Koh tī iáu-bōe sio iû-lâ （ Chù, Ti, gû téng ê chí-hông ）ê chìn-chêng, chè-si ê lô͘-po̍k chiū lâi, kā hiàn chè ê lâng kóng, " Lí tio̍h ēng bah hō͘ chè-si thang piak, in-ūi i bô ài lí kòe-chú ê bah, sī ài chheⁿ ê. "
2:16 Hitê lâng nā tùi i kóng, " Tio̍h tāi-seng sio iû, jiân-āu thang chiàu lí ê sim só͘ ài ê the̍h-.khì. " I chiū kóng, " M̄ lah, chit sî tio̍h hō͘ góa; nā m̄, góa beh kiông-kiông the̍h-.khì. "
2:17 Án-ne, hiahê siàu-liân lâng ê chōe tī Siōng-chú ê bīn-chêng chin tāng, in-ūi lâng thó-ià Siōng-chú ê chè-sū.
2:18 Sa-mu-el tī Sī-lô
Hit sî, Sa-mu-el iáu sè-hàn, chhēng iù-tē pò͘ ê chè-si ho̍k （ Chù, chè-si ê sèng-ho̍k ）, tī Siōng-chú ê bīn-chêng ho̍k-sāi.
2:19 I ê lāu-bú koh ta̍k nî kā i chò chi̍t-niá sè-niá ê tn̂g-saⁿ kah i ê tiōng-hu lâi hiàn nî-chè ê sî, tòa-lâi hō͘ i.
2:20 E-lī kā El-ká-nah kah i ê bó͘ chiok-hok, kóng, " Goān Siōng-chú tùi chit-ê chabó͘ lâng koh siúⁿ-sù hō͘ lí kiáⁿ-sun, lâi thè só͘ hêng hō͘ Siōng-chú ê. " In chiū tńg-khì kò͘-hiong.
2:21 Siōng-chú khòaⁿ-kò͘ Han-nah, i chiū koh hoâi-īn seⁿ saⁿ-ê kiáⁿ, nn̄g-ê chabó͘ kiáⁿ. Gín-á Sa-mu-el mā tī Siōng-chú ê bīn-chêng chiām-chiām tōa-hàn.
2:22 E-lī kah I ê Kiáⁿ
E-lī chin lāu, thiaⁿ tio̍h i ê kiáⁿ tùi I-su-la-el jîn-bîn só͘ kiâⁿ it-chhè ê tāichì, koh thiaⁿ tio̍h in kah hōe-bō͘ mn̂g chêng teh chò-kang ê chabó͘ lâng su-thong.
2:23 I chiū kā in kóng, " Lín ná ē kiâⁿ chiahê tāichì? Góa tùi chiahê chèng lâng ū thiaⁿ tio̍h lín ê pháiⁿ só͘ kiâⁿ.
2:24 Góa ê kiáⁿ, m̄ thang ánne, in-ūi góa só͘ thiaⁿ-.tio̍h ê hong-siaⁿ sī m̄-hó, lín hō͘ Siōng-chú ê chú-bîn hoān chōe.
2:25 Lâng nā tek-chōe lâng, Siōng-chú ē kā i sím-phòaⁿ; lâng nā tek-chōe Siōng-chú, siáⁿ lâng thè i kî-tó? " M̄ koh, in m̄-thiaⁿ lāu-pē ê ōe, in-ūi Siōng-chú chûn-sim beh kā in thâi.
2:26 Gín-á Sa-mu-el chiām-chiām tōa-hàn, tit tio̍h Siōng-chú kah lâng ná thiàⁿ i.
2:27 Ī-giân E-lī Chhù lāi ê Lâng Ē Tú tio̍h Chai-hō
Ū Siōng-tè ê lô͘-po̍k lâi kìⁿ E-lī, tùi i kóng, " Siōng-chú ánne kóng, ' Lí ê chó͘-sian ê ke, chá-chêng tī Ai-gi̍p Hôa-láu ê ke chò lô͘-po̍k ê sî, góa kám bô tùi i chhut-hiān?
2:28 Góa kám bô tùi I-su-la-el chèng chi-cho̍k, kéng i chò Góa ê chè-si, tī Góa ê tôaⁿ téng hiàn chè, sio hiuⁿ, tī Góa ê bīn-chêng chhēng chè-si ho̍k, I-su-la-el cho̍k só͘ hiàn ê hóe-chè Góa kám bô lóng hō͘ i ê chó͘-sian ê ke?
2:29 Góa só͘ bēng-lēng ê chè-sū lé-mi̍h tī Góa tòa ê só͘-chāi ê, lín án-chóaⁿ thún-ta̍h, chun-tiōng lí ê kiáⁿ khah kòe-thâu chun-tiōng Góa, ēng Góa ê chú-bîn — I-su-la-el lâng só͘ hiàn siōng hó ê lé-mi̍h, lâi kakī chū pûi? '
2:30 Só͘-í, Siōng-chú — I-su-la-el ê Siōng-tè kóng, ' Góa si̍t-chāi bat kóng, lí ê ke, lí ê lāu-pē ê ke ē éng-oán kiâⁿ tī Góa ê bīn-chêng; chóng-.sī, taⁿ Siōng-chú kóng, Góa choa̍t-tùi bô beh ánne, in-ūi chun-tiōng Góa ê, Góa ē kā i chun-tiōng; biáu-sī Góa ê, i ē siū khòaⁿ-khin.
2:31 Lí khòaⁿ, ji̍t-chí teh beh kàu, Góa beh chám-tn̄g lí ê chhiú-kut kah lí ê pē ê ke ê chhiú-kut, hō͘ lí ê chhù lāi bô chi̍t-ê lāu lâng.
2:32 Tī Siōng-tè hō͘ I-su-la-el lâng hióng-hok ê sî, lí ē khòaⁿ tio̍h Góa ê chhù ê soe-pāi, tī lí ê chhù lāi ē éng-oán bô chi̍t-ê lāu lâng.
2:33 Sio̍k tī lí ê lâng, Góa bô tùi Góa ê tôaⁿ kā i châu-bia̍t ê, ē phah-pháiⁿ lí ê ba̍k-chiu, hō͘ lí ê sim iu-siong. Lí chhù lāi só͘ koh seⁿ ê lâng, lóng ē tiong-liân chiū sí.
2:34 Lí nn̄g-ê kiáⁿ — Ho-hu-nî kah Hui-ne-hah só͘ tú-.tio̍h ê, beh chò lí ê tiāu-thâu, in nn̄g lâng ē kâng chi̍t ji̍t sí.
2:35 Góa beh ūi kakī li̍p chi̍t-ê chīn-tiong ê chè-si, i ē chiàu Góa ê sim kah Góa ê ì lâi kiâⁿ. Góa beh ūi i kiàn-li̍p kian-kò͘ ê ke, i ē éng-oán kiâⁿ tī Góa só͘ boah iû ê bīn-chêng.
2:36 Lí ê ke só͘ chhun lo̍h-.lâi ê lâng lóng ē lâi kā i kūi-pài, kiû chi̍t-ê gîn, chi̍t-ê piáⁿ, kóng: Kiû lí hō͘ góa tng chè-si-chit ê chi̍t-ê, hō͘ góa thang tit tio̍h tām-po̍h piáⁿ lâi chia̍h. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。