士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Ūi Biān-iá-mín Chi-cho̍k ê Lâng Chhōe Bó͘
I-su-la-el lâng tī Mi-su-peh bat chiùchōa kóng, " Goán tiong-kan bô kah chi̍t-ê lâng ē kā chabó͘ kiáⁿ kè hō͘ Biān-iá-mín lâng. "
21:2 Jîn-bîn lâi-kàu Be-thel, tī hia chē tī Siōng-chú ê bīn-chêng kàu ê-hng, chhut siaⁿ tōa thî-khàu, kóng,
21:3 " Siōng-chú — I-su-la-el ê Siōng-tè ah, kin-á-ji̍t, tī I-su-la-el tiong kiám chi̍t chi-cho̍k, I-su-la-el tiong ná ē ū chit khoán tāichì? "
21:4 Keh tńg kang thiⁿ-kng chá-khí, jîn-bîn khí-.lâi, tī hia khí chi̍t chō tôaⁿ, hiàn sio-chè kah pêng-an-chè.
21:5 I-su-la-el lâng kóng, " Tī I-su-la-el chèng chi-cho̍k tiong, siáⁿ lâng bô kah hōe-chiòng khì Siōng-chú hia? " In-ūi in tōa chiùchōa kóng, " Kiàn-nā bô chiūⁿ Mi-su-peh kàu Siōng-chú ê bīn-chêng ê, tio̍h hō͘ i sí. "
21:6 I-su-la-el lâng ūi tio̍h in ê hiaⁿ-tī Biān-iá-mín lâng hō͘-hóe, kóng, " Kin-á-ji̍t, I-su-la-el tiong toān-choa̍t chi̍t chi-cho̍k à.
21:7 Lán í-keng kí Siōng-chú lâi chiùchōa, bô beh kā chabó͘ kiáⁿ kè hō͘ in, taⁿ chiū in só͘ chhun lo̍h-.lâi ê lâng, lán beh tùi tó-ūi hō͘ in ū bó͘? "
21:8 Koh kóng, " I-su-la-el chiahê chi-cho̍k tiong, tó chi̍t-ê bô chiūⁿ Mi-su-peh kàu Siōng-chú hia? In chiū chhâ-chhut Gi-lia̍t-ia-be-si bô kah chi̍t-ê lâng lâi-kàu iâⁿ lāi hōe-chiòng hia,
21:9 in-ūi tiám-sǹg jîn-bîn ê sî, hiahê tòa tī Gi-lia̍t-ia-be-si ê lâng, bô kah chi̍t-ê tī hia.
21:10 Hōe-chiòng chiū chhe chi̍t-bān nn̄g-chheng-ê ū tōa la̍t ê ióng-sū, kā in hoan-hù kóng, " Lín khì ēng to thâi-sí tòa tī Gi-lia̍t-ia-be-si ê lâng, í-ki̍p chabó͘ lâng kah gín'á.
21:11 Lín só͘ tio̍h kiâⁿ ê to̍h-sī ánne: Tio̍h kā só͘-ū ê chapo͘ lâng, í-ki̍p hiahê bat kah chapo͘ lâng tâng-pâng ê chabó͘ lâng, choân-pō͘ thâi-sí. "
21:12 In tī Gi-lia̍t-ia-be-si lâng ê tiong-kan tú tio̍h sì-pah-ê iáu-bōe kah chapo͘ lâng tâng-pâng ê chāi-sek-lí, chiū kā in chhōa lâi-kàu Ka-nân tē Sī-lô ê kun-iâⁿ.
21:13 Choân hōe-chiòng chhe lâng kā Lim-móng chio̍h-pôaⁿ ê Biān-iá-mín lâng kóng, ēng hô-pêng ê ōe pò in.
21:14 Hit sî, Biān-iá-mín lâng tńg-.lâi, I-su-la-el lâng chiū kā só͘ lâu hō͘ i oa̍h ê Gi-lia̍t-ia-be-si ê chabó͘ gín'á kè hō͘ in, iáu koh bô kàu-gia̍h.
21:15 Jîn-bîn ūi tio̍h Biān-iá-mín lâng chiū hō͘-hóe, in-ūi Siōng-chú hō͘ I-su-la-el chi-cho̍k khih chi̍t kak.
21:16 Hōe tiong ê tiúⁿ-ló kóng, " Biān-iá-mín tiong-kan ê chabó͘ lâng í-keng châu-bia̍t, taⁿ chiū in só͘ chhun lo̍h-.lâi ê lâng, lán beh tùi tó-ūi lâi hō͘ in ū bó͘? "
21:17 Koh kóng, " Biān-iá-mín tô-cháu ê lâng iû-goân tio̍h ū gia̍p hō͘ in, bián-tit I-su-la-el tiong toān-choa̍t chi̍t chi-cho̍k.
21:18 Chóng-.sī, lán bē tàng kā kakī ê chabó͘ gín'á hō͘ in chò bó͘, in-ūi I-su-la-el lâng bat chiùchōa kóng, kā chabó͘ kiáⁿ kè hō͘ Biān-iá-mín lâng ê, tio̍h siū chiù-chó͘. "
21:19 In koh kóng, " Tī Lī-pho-ná ê lâm pêng, Be-thel ê pak pêng, to̍h-sī tùi Be-thel khì Sī-khiàm tōa lō͘ tang pêng ê Sī-lô, ta̍k nî ū Siōng-chú ê cheh-kî. "
21:20 Chiū hoan-hù Biān-iá-mín lâng kóng, " Lín tio̍h khì bih tī phû-tô hn̂g tiong,
21:21 nā khòaⁿ tio̍h Sī-lô ê chabó͘ gín'á chhut-lâi thiàu-bú, lín tio̍h tùi phû-tô hn̂g chhut-.lâi, tī Sī-lô ê lú-chú tiong ta̍k lâng chhiúⁿ chi̍t-ê chò bó͘, tò tńg-khì Biān-iá-mín tē.
21:22 In ê hū-ló hiaⁿ-tī nā lâi tùi goán kò-sò͘, goán ē tùi in kóng, ' Chhiáⁿ lín tài-liām tio̍h goán, lâi tùi in si un-tián, in-ūi chá-chêng kau-chiàn ê sî, bô lâu chabó͘ gín'á hō͘ in ta̍k lâng chò bó͘. Taⁿ mā m̄-sī lín hō͘ in; nā-sī, lín chiū ū chōe. '"
21:23 Biān-iá-mín lâng chiū chiàu ánne kiâⁿ, chiàu in ê lâng-gia̍h tùi thiàu-bú ê chabó͘ gín'á tiong-kan só͘ lia̍h ê lâi chhōa in chò bó͘, chiū tò tńg-khì in pún-tē, koh khí siâⁿ lâi tòa tī hia.
21:24 Hit sî, I-su-la-el lâng lī-khui hia, ta̍k lâng tò tńg-khì in ê chi-cho̍k, in ê chong-cho̍k; tùi hia chhut-.lâi ê ta̍k lâng lóng tńg-khì in pún-tē.
21:25 Hit tong-sî, I-su-la-el tiong bô ông, ta̍k lâng chiàu i só͘ khòaⁿ-chò tio̍h ê lâi kiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。