士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 Lē-bī Lâng kah I ê Sè-î
Tng I-su-la-el bô ông ê sî, ū kià-kha tī E-hu-laim soaⁿ-tē hit pêng ê chi̍t-ê Lē-bī lâng, chhōa chi̍t-ê Iô-tah Bia̍t-lé-hèm ê chabó͘ gín'á chò sè-î.
19:2 Sè-î kiâⁿ kan-îm lâi pōe-poān i ê tiōng-hu, lī-khui i tò tńg-khì Iô-tah Bia̍t-lé-hèm, kàu lāu-pē ê ke, tòa hia sì goe̍h-ji̍t.
19:3 I ê tiōng-hu khí-.lâi, chhōa chi̍t-ê lô͘-po̍k kah khan nn̄g chiah lî khì jiok i, beh ēng hó ōe kā i an-ùi, lâi chhōa i tńg-.lâi. I ji̍p-khì i ê lāu-pē ê chhù, chabó͘ lâng ê lāu-pē khòaⁿ-.tio̍h, chiū kā i hoan-gêng.
19:4 I ê tiūⁿ-lâng, to̍h-sī chabó͘ gín'á ê lāu-pē kā i lâu lo̍h-.lâi, i chiū kah tiūⁿ-lâng tòa saⁿ ji̍t, in chiū chò-hóe lim-chia̍h, tī hia tòa.
19:5 Kàu tē-sì ji̍t, in thàu-chá khí-.lâi, i beh chhut-hoat khì, chabó͘ gín'á ê lāu-pē kā kiáⁿ-sài kóng, " Chhiáⁿ lí chia̍h tām-po̍h piáⁿ chò tiám-sim, āu-lâi chiah thang chhut-hoat kiâⁿ. "
19:6 Nn̄g lâng chiū chē lo̍h-.khì, chò-hóe lim-chia̍h. Cha-bó͘ gín'á ê lāu-pē tùi hit-ê lâng kóng, " Chhiáⁿ lí hoaⁿ-hí koh tòa chi̍t mê, hō͘ lí ê sim khoài-lo̍k. "
19:7 Hitê lâng khí-lâi beh chhut-hoat, i ê tiūⁿ-lâng kiông-kiông kā i lâu, i chiū koh-chài hioh chi̍t mê.
19:8 Kàu tē-gō͘ ji̍t, i thàu-chá khí-lâi beh chhut-hoat, chabó͘ gín'á ê lāu-pē kā i kóng, " Chhiáⁿ lí koh chia̍h kóa tiám-sim, thèng-hāu kàu ji̍t lo̍h sai soaⁿ chiah chhut-hoat. " In nn̄g lâng chiū koh chò-hóe chia̍h.
19:9 Hitê lâng kah i ê sè-î í-ki̍p lô͘-po̍k khí-lâi beh khí-kiâⁿ, i ê tiūⁿ-lâng, to̍h-sī chabó͘ gín'á ê lāu-pē, kā i kóng, " Lí khòaⁿ, ji̍t beh àm à, chhiáⁿ lí koh hioh chi̍t mê, ji̍t-thâu beh lo̍h soaⁿ à, lí tio̍h hioh chia, hō͘ lí ê sim khoài-lo̍k, bîn-á-chài thàu-chá chiah chhut-hoat tò tńg-khì lín tau. "
19:10 Hitê lâng m̄-khéng koh hioh chi̍t mê, chiū khí sin chhut-hoat, lâi-kàu I-é-bú-suh ê tùi-bīn, I-é-bú-suh to̍h-sī Ê-lú-sa-lèm. Nn̄g chiah kòa-oaⁿ ê lî í-ki̍p i ê sè-î kah i chò-hóe khì.
19:11 Kiâⁿ kīn I-é-bú-suh ê sî, ji̍t í-keng beh lo̍h soaⁿ, lô͘-po̍k kā chú-lâng kóng, " Lâi, lán put-jû oat ji̍p-khì I-é-bú-suh lâng chit-ê siâⁿ, tī hia hioh mê. "
19:12 Chú-lâng kóng, " Lán bô beh oat ji̍p-khì gōa-pang lâng ê siâⁿ, to̍h-sī bô sio̍k I-su-la-el lâng ê, khah hó lán tio̍h kòe lâi-khì Gi-be-at. "
19:13 I koh kā lô͘-po̍k kóng, " Lâi, lán tio̍h lâi-khì chiahê só͘-chāi tiong-kan ê chi̍t-ê, lâi hioh tī Gi-be-at á-.sī La̍h-má. "
19:14 In chiū chìn-chêng khì, chiong-kīn Biān-iá-mín ê Gi-be-at ê sî, ji̍t-thâu í-keng lo̍h soaⁿ.
19:15 In chiū oat ji̍p-.khì, beh tī Gi-be-at hioh mê, chiū ji̍p-khì chē tī siâⁿ lāi ê ke-lō͘, in-ūi bô lâng chiap-la̍p in ji̍p-khì chhù lāi hioh mê.
19:16 Ji̍t àm liáu-āu, ū chi̍t-ê lāu lâng tùi chhân-.ni̍h chò-kang tńg-.lâi. I pún sī E-hu-laim soaⁿ-tē ê lâng, kià-kha tī Gi-be-at; chóng-.sī, hit só͘-chāi ê lâng sī Biān-iá-mín lâng.
19:17 Lāu lâng gia̍h thâu khòaⁿ tio̍h lâng-kheh tī siâⁿ lāi ê ke-lō͘, chiū mn̄g i kóng, " Lí tùi tó-ūi lâi? Beh khì tó-ūi? "
19:18 I ìn kóng, " Goán tùi Iô-tah Bia̍t-lé-hèm lâi, beh khì E-hu-laim soaⁿ-tē hit pêng. Góa pún-lâi tī hia, to̍h-sī kòe-khì Iô-tah Bia̍t-lé-hèm, taⁿ góa beh khì Siōng-chú ê tiān, tī chia bô lâng chiap-la̍p góa ji̍p-khì i ê chhù.
19:19 Kî-si̍t góa ū chháu ū niû thang hō͘ lî-á, mā ū piáⁿ ū chiú thang hō͘ góa pún-sin kah lú-pī, í-ki̍p tòe góa lâi ê lô͘-po̍k ê siàu-liân lâng, lóng bô khiàm kah chi̍t hāng. "
19:20 Lāu lâng kóng, " Goān lí pêng-an, lí só͘ su-iàu ê iû góa lâi chhù-lí, chí-sī lí m̄ thang tī ke-lō͘-.ni̍h kòe-mê. "
19:21 Chiū ánne, lāu lâng chhōa in kàu i ê chhù, chhī i ê lî-á, in chiū sé kha lim-chia̍h.
19:22 In ê sim tú teh khoài-lo̍k ê sî, siâⁿ lāi hiahê húi-lūi lâi ûi i ê chhù, ti̍t-ti̍t phah mn̂g, tùi chhù-chú lāu lâng kóng, " Lí kā hit-ê ji̍p-khì lí ê chhù ê lâng chhōa chhut-.lâi, goán beh kah i kau-ha̍p. "
19:23 Hitê chhù-chú chhut-lâi in hia, kā in kóng, " Chhin-ài ê hiaⁿ-tī, chhian-bān m̄ thang chò chit-ê pháiⁿ tāichì. Chit-ê lâng kì-jiân ji̍p-lâi góa ê chhù, lín chiū m̄ thang chò chit-ê kiàn-siàu ê tāichì.
19:24 Góa ū chabó͘ kiáⁿ iáu-sī chāi-sek-lí, koh ū i ê sè-î, góa chhōa in chhut-.lâi, lín thang kā in lêng-jio̍k, chhut-chāi lín ê ì-sù lâi khoán-thāi in, to̍k-to̍k tùi chit-ê lâng lín m̄ thang kiâⁿ chit-ê kiàn-siàu sū. "
19:25 Chóng-.sī, hiahê lâng m̄-thiaⁿ i ê ōe, hit-ê lâng chiū kā i ê sè-î khan chhut-khì gōa-bīn kau in, in chiū kah i kau-ha̍p, kui mê kā i lêng-jio̍k, kàu chá-khí thiⁿ beh kng ê sî, chiah pàng i khì.
19:26 Thiⁿ-phú-kng ê sî, chabó͘ lâng lâi-kàu i ê chú-lâng só͘ hioh hit-ê chhù mn̂g-kháu, chiū tó tī hia, it-ti̍t kàu thiⁿ-kng.
19:27 Thiⁿ-kng chá-khí, i ê chú-lâng khí-lâi khui chhù ê mn̂g, chhut-khì beh chhut-hoat ê sî, khòaⁿ tio̍h hit-ê chabó͘ lâng, to̍h-sī i ê sè-î, tó tī chhù mn̂g-kháu, nn̄g ki chhiú khòa tī hō͘-tēng-.ni̍h.
19:28 Chiū kā chabó͘ lâng kóng, " Khí-.lâi, lán beh chhut-hoat! " Chóng-.sī, i bô ìn, i chiū kā i hû khí-lih lî ê téng-bīn, chhut-hoat khì i ê pún só͘-chāi.
19:29 Kàu i ê chhù, chiū ēng to kā i ê sè-î ê sin-si kah kut-thâu koah chò cha̍p-jī tè, chhe lâng the̍h-khì choân I-su-la-el ê choân kéng.
19:30 Kiàn-nā khòaⁿ-.tio̍h ê lâng lóng kóng, " Tùi I-su-la-el lâng chhut Ai-gi̍p ê ji̍t, it-ti̍t kàu kin-á-ji̍t, m̄ bat ánne kiâⁿ, mā bô khòaⁿ-.tio̍h. Τaⁿ lín tio̍h siūⁿ, tio̍h chham-siông, jiân-āu chiah kóng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。