士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 Mi-ka ê Ngó͘-siōng
E-hu-laim soaⁿ-tē ū chi̍t-ê lâng, miâ kiò-chò Mi-ka.
17:2 I kā lāu-bú kóng, " Lí hit chi̍t-chheng chi̍t-pah gîn hō͘ lâng the̍h-.khì, lí in-ūi ánne chiù-chó͘, koh kóng hō͘ góa thiaⁿ, lí khòaⁿ, chit-ê gîn tī góa chia, sī góa the̍h-.khì. " I ê lāu-bú kóng, " Goān Siōng-chú kā góa ê kiáⁿ sù-hok. "
17:3 I chiū kā chheng-it gîn hêng i ê lāu-bú, i ê lāu-bú kóng, " Góa í-keng tùi góa ê chhiú ēng chit-ê gîn, ūi góa ê kiáⁿ hiàn hō͘ Siōng-chú, thang tiau-khek chi̍t sian siōng, chù chi̍t sian siōng. Τaⁿ góa iû-goân koh kau lí. "
17:4 Mi-ka kā gîn hêng i ê lāu-bú, i ê lāu-bú ēng nn̄g-pah gîn hō͘ chù-chō ê lâng, i chiū ēng hit-ê chò tiau-khek ê ngó͘-siōng, chù ê ngó͘-siōng, kā i hē tī Mi-ka ê chhù.
17:5 Chit-ê Mi-ka ū sîn-bêng ê chhù, koh chè-chō chè-si ho̍k kah chhù lāi hiahê ngó͘-siōng, kiâⁿ siat-li̍p ê lé, hun-pia̍t i chi̍t-ê kiáⁿ chò i ê chè-si.
17:6 Hit sî, I-su-la-el tiong bô ông, ta̍k lâng lóng chiàu i kakī só͘ khòaⁿ-chò tio̍h ê lâi kiâⁿ.
17:7 Iô-tah Bia̍t-lé-hèm ū chi̍t-ê siàu-liân lâng, sio̍k Iô-tah cho̍k ê Lē-bī lâng, i tī hia kià-kha.
17:8 Chit-ê lâng lī-khui Iô-tah Bia̍t-lé-hèm, beh chhōe chi̍t-ê thang tòa ê só͘-chāi. Kiâⁿ- lō͘ ê sî, lâi-kàu E-hu-laim ê soaⁿ-tē, Mi-ka ê chhù.
17:9 Mi-ka mn̄g i kóng, " Lí tùi tó-ūi lâi? " I ìn kóng, " Góa sī Iô-tah Bia̍t-lé-hèm ê Lē-bī lâng, beh chhōe chi̍t-ê thang tòa ê só͘-chāi. "
17:10 Mi-ka kā i kóng, " Lí lâi kah góa tòa, chò góa ê lāu-pē, chò góa ê chè-si. Góa ta̍k nî hō͘ lí cha̍p-ê gîn-á, chi̍t hù saⁿ-khò͘ kah lí ê ji̍t-si̍t. " Lē-bī lâng chiū ji̍p-.khì.
17:11 Lē-bī lâng kam-goān kah hit-ê lâng chò-hóe tòa, Mi-ka khòaⁿ chit-ê siàu-liân lâng chhin-chhiūⁿ kakī ê kiáⁿ.
17:12 Mi-ka kā Lē-bī lâng kiâⁿ siat-li̍p ê lé, siàu-liân lâng chiū chò i ê chè-si, lâi tòa tī i ê chhù.
17:13 Mi-ka kóng, " Taⁿ góa chai Siōng-chú beh hó khoán-thāi góa, in-ūi góa ū chi̍t-ê Lē-bī lâng chò chè-si. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。