創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
25:1 A-bu-la-hàm ê Lēng-gōa Chi̍t Pún Ka-phó͘
( LTS 1: 32-33)
A-bu-la-hàm koh chhōa chi̍t-ê bó͘, miâ kiò-chò Ke-tú-la̍h.
25:2 Ke-tú-la̍h kā i seⁿ Chim-lân, Iok-siang, Me-tán, Mí-tiân, I-si-ba̍k, Siú-oa.
25:3 Iok-siang-seⁿ Sí-bah kah Tí-tàn. Tí-tàn ê kiáⁿ-sun sī A-su-lī cho̍k, Le-to-sih cho̍k kah Le-u-mih cho̍k.
25:4 Mí-tiân ê kiáⁿ sī E-hoah, E-hut, Hap-lo̍k, A-mí-tah, El-tah; chiahê lóng sī Ke-tú-la̍h ê kiáⁿ.
25:5 A-bu-la-hàm kā it-chhè só͘-ū ê hō͘ Í-sak.
25:6 A-bu-la-hàm kā châi-bu̍t pun hō͘ i chiahê sè-î ê kiáⁿ, thàn i pún-sin iáu oa̍h-.leh ê sî, chhe in lī-khui i ê kiáⁿ Í-sak khì tang pêng ê tē.
25:7 A-bu-la-hàm ê Sí-bông kah Bâi-chòng
A-bu-la-hàm it-seng ê nî-ji̍t sī chi̍t-pah chhit-cha̍p-gō͘ hòe.
25:8 A-bu-la-hàm chia̍h tn̂g hòe-siū, chiâⁿ-chò lāu lâng, nî-hòe boán-chiok, tn̄g-khùi chiū sí-bông.
25:9 I ê kiáⁿ Í-sak kah I-si-ma-el kā i bâi-chòng tī Mak-pe-la̍h ê hia̍t, chit-ê hia̍t tī Mam-lē ê thâu-chêng, Hiat lâng Cho-hal ê kiáⁿ E-hu-lóng ê chhân tiong,
25:10 Chiū-sī A-bu-la-hàm tùi Hiat lâng só͘ bé ê hit khu chhân. A-bu-la-hàm kah i ê bó͘ Sa-la̍h lóng bâi-chòng tī hia.
25:11 A-bu-la-hàm sí liáu-āu, Siōng-chú sù-hok hō͘ i ê kiáⁿ Í-sak; Í-sak óa tī óa-kīn Pí-jíⁿ-la̍h-hái ê só͘-chāi.
25:12 I-si-ma-el ê Ka-phó͘
( LTS 1: 28-31)
A-bu-la-hàm ê kiáⁿ I-si-ma-el ê sè-hē kì tī ē-té: I-si-ma-el to̍h-sī Sa-la̍h ê lú-pī Ai-gi̍p lâng Ha-gal tùi A-bu-la-hàm só͘ seⁿ ê.
25:13 I-si-ma-el chiahê kiáⁿ ê miâ, chiàu i ê miâ-jī sè-hē kì tī ē-té: I-si-ma-el ê tōa-kiáⁿ sī Ne-bá-iot, koh ū Ke-tal, At-bi-el, Mib-sám,
25:14 Mi-si-má, Tu-mah, Mak-sá,
25:15 Ha-ta̍t, Thê-má, E-tol, Na-hui-sih, Ke-tí-mah;
25:16 Chiahê to̍h-sī I-si-ma-el ê kiáⁿ ê miâ. Chiàu in ê hiong-chhoan iâⁿ-chē, in chò cha̍p-jī cho̍k ê cho̍k-tiúⁿ.
25:17 I-si-ma-el it-seng ê hòe-siū sī chi̍t-pah saⁿ-cha̍p-chhit, khùi tn̄g, chiū sí-bông.
25:18 I ê kiáⁿ-sun tòa tī Ha-bí-la̍h kàu Ai-gi̍p thâu-chêng ê Siu-i, sī beh khì A-siul ê lō͘ tiong; in tòa tī in chèng hiaⁿ-tī ê thâu-chêng.
25:19 E-sáu kah Iâ-kop ê Chhut-sì
A-bu-la-hàm ê kiáⁿ Í-sak ê sè-hē kì tī ē-té: A-bu-la-hàm seⁿ Í-sak.
25:20 Í-sak chhōa Li-bé-kah chò bó͘ ê sî, tú-á sì-cha̍p hòe. I sī Pa-tàn-a-lâm tē ê A-lâm lâng Be-thu-el ê chabó͘ kiáⁿ, A-lâm lâng La̍h-ban ê sió-mōe.
25:21 Í-sak in-ūi i ê bó͘ bô seⁿ kiáⁿ, chiū thè i kî-kiû Siōng-chú; Siōng-chú ín-chún i só͘ kiû, i ê bó͘ Li-bé-kah chiū hoâi-īn.
25:22 Gín-á tī i ê pak-lāi sio kheh, i chiū kóng, " Nā-sī ánne, góa ná ē tú tio̍h chit khoán tāichì? " I chiū khì mn̄g Siōng-chú.
25:23 Siōng-chú kā i kóng, " Nn̄g-kok tī lí pak-tó͘ lāi, nn̄g cho̍k beh tùi lí ê seng-khu chhut. Chit cho̍k ē khah kiông hit cho̍k, sī-tōa ê beh ho̍k-sāi sī-sè ê. "
25:24 Seng-sán ê ji̍t-kî kàu, kó-jiân pak-tó͘ lāi sī siang-seⁿ ê.
25:25 Thâu chi̍t-ê chhut-.lâi ê, seng-khu âng-âng, choân seng-khu chhin-chhiūⁿ phôe-á saⁿ, só͘-í chiū kā i hō-miâ kiò-chò E-sáu.
25:26 I ê sió-tī tòe-āu koh chhut-.lâi, i ê chhiú khîⁿ-tiâu E-sáu ê kha-āu-teⁿ, só͘-í chiū kā i hō-miâ kiò-chò Iâ-kop. Nn̄g-ê kiáⁿ chhut-sì ê sî, Í-sak tú-á la̍k-cha̍p hòe.
25:27 E-sáu Chhut-bē Tōa-kiáⁿ ê Bêng-hūn
Nn̄g-ê gín'á chiām-chiām tōa-hàn, E-sáu gâu phah-la̍h, tiāⁿtiāⁿ tī soaⁿ-iá; Iâ-kop chò lâng tiām-chēng, tiāⁿtiāⁿ tòa tī pò͘-pêⁿ lāi.
25:28 Í-sak thiàⁿ E-sáu, in-ūi tiāⁿtiāⁿ chia̍h i ê iá-bī; Li-bé-kah thiàⁿ Iâ-kop.
25:29 Ū chi̍t ji̍t, Iâ-kop chú thng, E-sáu tùi soaⁿ-iá tńg-.lâi, ià-siān kàu-ke̍k.
25:30 E-sáu tùi Iâ-kop kóng, " Góa chin ià-siān, kiû lí kā chit-ê âng-ê thng hō͘ góa chia̍h. " In-ūi ánne, E-sáu mā miâ kiò-chò E-tóm （ Chù, " E-tóm " Ū " Âng "ê ì-sù. ）.
25:31 Iâ-kop kóng, " Lí kin-á-ji̍t tio̍h kā tōa-kiáⁿ ê miâ-hūn bē hō͘ góa. "
25:32 E-sáu kóng, " Góa to beh sí à, chit-ê tōa-kiáⁿ ê miâ-hūn, tùi góa ū siáⁿ lī-ek? "
25:33 Iâ-kop kóng, " Kin-á-ji̍t lí tio̍h tùi góa chiùchōa. " E-sáu chiū tùi i chiùchōa, kā tōa-kiáⁿ ê miâ-hūn bē hō͘ Iâ-kop.
25:34 Iâ-kop chiū kā piáⁿ kah âng-tāu-thng hō͘ E-sáu. I chiū lim-chia̍h, jiân-āu khí-lâi chò i khì. Che to̍h-sī E-sáu khòaⁿ-khin tōa-kiáⁿ ê miâ-hūn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。