士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 I-é-hú-thah
Gi-lia̍t lâng I-é-hú-thah sī chi̍t-ê tōa koân-lêng ê ióng-sū, sī ki-lí ê kiáⁿ, I-é-hú-thah sī Gi-lia̍t só͘ seⁿ ê.
11:2 Gi-lia̍t ê bó͘ mā kā i seⁿ kúi-nā-ê kiáⁿ, i ê bó͘ só͘ seⁿ ê kiáⁿ í-keng tōa-hàn, chiū kā I-é-hú-thah kóaⁿ chhut-.khì, kā i kóng, " Lí m̄ thang tī goán lāu-pē ê ke sêng-chiap sán-gia̍p, in-ūi lí sī pa̍t-ê chabó͘ lâng ê kiáⁿ. "
11:3 I-é-hú-thah chiū cháu, siám-phiah i ê hiaⁿ-tī, khì tòa tī Tô-pek ê tē, ū húi-lūi chū-chi̍p tī I-é-hú-thah hia, tòe i chhut-ji̍p.
11:4 Kòe ū hiah-.kú, Am-móng lâng kah I-su-la-el kau-chiàn.
11:5 Am-móng lâng kah I-su-la-el kau-chiàn ê sî, Gi-lia̍t ê tiúⁿ-ló khì beh chio I-é-hú-thah tùi Tô-pek ê tē lâi;
11:6 tùi I-é-hú-thah kóng, " Chhiáⁿ lí lâi chò goán ê goân-sòe, goán chiū thang kah Am-móng lâng kau-chiàn. "
11:7 I-é-hú-thah ìn Gi-lia̍t ê tiúⁿ-ló kóng, " Í-chêng lín kám m̄-sī oàn-hūn góa, kā góa kóaⁿ-chhut lāu-pē ê ke? Taⁿ lín tú tio̍h hoān-lān, ná ē lâi góa chia? "
11:8 Gi-lia̍t ê tiúⁿ-ló ìn I-é-hú-thah kóng, " Goán taⁿ só͘-í kui-ǹg lí, sī ài lí kah goán khì kah Am-móng lâng kau-chiàn, lí thang chò goán ê thâu, lâi koán-hat tòa tī Gi-lia̍t só͘-ū ê jîn-bîn. "
11:9 I-é-hú-thah tùi Gi-lia̍t ê tiúⁿ-ló kóng, " Lín chhōa góa tò tńg-khì kah Am-móng lâng kau-chiàn, Siōng-chú kā in kau tī góa ê bīn-chêng, góa kám chin-chiàⁿ ē-tàng chò lín ê thâu-lâng? "
11:10 Gi-lia̍t ê tiúⁿ-ló ìn I-é-hú-thah kóng, " Siōng-chú tī lán tiong-kan chò kiàn-chèng, goán it-tēng beh chiàu lí ê ōe kiâⁿ. "
11:11 I-é-hú-thah chiū kah Gi-lia̍t ê tiúⁿ-ló tò tńg-.khì, jîn-bîn chiū li̍p i chò thâu-lâng, chò goân-sòe. I-é-hú-thah tī Mi-su-peh kā kakī it-chhè ê ōe, pâi-lia̍t tī Siōng-chú ê bīn-chêng.
11:12 I-é-hú-thah chhe hiahê sù-chiá khì kìⁿ Am-móng lâng ê ông kóng, " Lí kah góa ū siáⁿ-mi̍h khan-liân, kèng-jiân lâi góa chia kong-kek góa ê tē? "
11:13 Am-móng lâng ê ông ìn I-é-hú-thah ê sù-chiá kóng, " In-ūi I-su-la-el lâng tùi Ai-gi̍p khí-.lâi ê sî, chiàm góa ê tē, tùi Al-nông kàu Iá-bo̍k, it-ti̍t kàu Iol-tàn. Τaⁿ lín tio̍h hó-hó-á kā chiahê tē hêng góa! "
11:14 I-é-hú-thah koh chhe sù-chiá khì kìⁿ Am-móng lâng ê ông, kā i kóng,
11:15 " I-é-hú-thah ánne kóng: I-su-la-el lâng pēng bô chiàm Mô͘-ap tē kah Am-móng lâng ê tē.
11:16 I-su-la-el lâng tùi Ai-gi̍p chhut-.lâi, keng-kòe khòng-iá kàu Âng-hái, lâi-kàu Ka-té-si,
11:17 hit sî, I-su-la-el chiū chhe sù-chiá khì kìⁿ E-tóm ông kóng, ' Kiû lí chún goán keng-kòe lí ê tē. ' Chóng-.sī, E-tóm ông m̄-thiaⁿ i ê ōe. Koh chhe sù-chiá khì kìⁿ Mô͘-ap ông, i mā m̄-chún, I-su-la-el lâng chiū tòa tī Ka-té-si.
11:18 In koh keng-kòe khòng-iá, se̍h E-tóm tē kah Mô͘-ap tē, tùi Mô͘-ap tē ê tang pêng kòe-.lâi, tī Al-nông hit pêng chat iâⁿ, mā bô ji̍p-khì Mô͘-ap ê kéng lāi, in-ūi Al-nông hô sī Mô͘-ap ê kau-kài.
11:19 I-su-la-el chhe lâng khì kìⁿ A-mô͘-lī ông Si-hông, to̍h-sī He-si-bóng ê ông, I-su-la-el tùi i kóng, ' Kiû lí chún goán kòe lí ê tē, khì goán kakī ê só͘-chāi. '
11:20 Chóng-.sī, Si-hông m̄ siong-sìn I-su-la-el, m̄ hō͘ in keng-kòe i ê kéng-kài, Si-hông chiū chū-chi̍p i ê jîn-bîn, tī Ia-hat chat iâⁿ kah I-su-la-el lâng kau-chiàn.
11:21 " Siōng-chú — I-su-la-el ê Siōng-tè kā Si-hông kah i ê jîn-bîn, kau tī I-su-la-el lâng ê chhiú tiong, in chiū kā in phah. Chiū ánne, I-su-la-el tit tio̍h tòa hit só͘-chāi ê A-mô͘-lī lâng ê choân tē.
11:22 In tit tio̍h A-mô͘-lī lâng ê choân kéng-kài, tùi Al-nông kàu Iá-bo̍k, tùi khòng-iá kàu Iol-tàn.
11:23 " Siōng-chú — I-su-la-el ê Siōng-tè tī I ê chú-bîn — I-su-la-el lâng ê bīn-chêng, kóaⁿ-chhut A-mô͘-lī lâng, kám kóng lí mā beh tit tio̍h in ê tē?
11:24 Lí ê sîn-bêng Ke-mô͘-sih só͘ siúⁿ-sù hō͘ lí tit tio̍h ê, lí kám bô tit tio̍h i lâi chò sán-gia̍p? Siōng-chú — goán ê Siōng-tè kiàn-nā tùi goán ê bīn-chêng só͘ kóaⁿ-chhut ê, goán chiū ē tit tio̍h i.
11:25 Lí kám ē iâⁿ-kòe Mô͘-ap ông Chip-pol ê kiáⁿ Ba-al? I kám bat kah I-su-la-el lâng kè-kàu? Kám bat kah in kau-chiàn?
11:26 I-su-la-el lâng tòa tī He-si-bóng kah i ê chng-thâu, A-ló-el kah i ê chng-thâu, í-ki̍p Al-nông hô piⁿ hiahê siâⁿ, í-keng ū saⁿ pah nî, lín tī hit sî án-chóaⁿ bô kā in cheng-ho̍k tò tńg-.lâi?
11:27 Góa bô tek-chōe lí, lí tian-tò kah góa kau-chiàn, si̍t-chāi bô lí. Goān sím-phòaⁿ ê Siōng-chú, kin-á-ji̍t tī I-su-la-el kah Am-móng ê tiong-kan lâi phòaⁿ-toàn. "
11:28 Chóng-.sī, Am-móng lâng ê ông m̄-khéng thiaⁿ I-é-hú-thah chhe lâng tùi i kóng ê ōe.
11:29 Siōng-chú ê Sèng Sîn lîm-kàu I-é-hú-thah, i chiū keng-kòe Gi-lia̍t kah Má-ná-se, koh keng-kòe kàu Gi-lia̍t ê Mi-su-peh, koh tùi Gi-lia̍t ê Mi-su-peh keng-kòe, lâi-kàu Am-móng lâng hia.
11:30 I-é-hú-thah chiū tùi Siōng-chú hē goān, kóng, " Lí nā kā Am-móng lâng kau tī góa ê chhiú tiong,
11:31 hō͘ góa tùi Am-móng lâng hia pêng-an tńg-.lâi ê sî, kiàn-nā tùi góa ê chhù ê mn̂g chhut-lâi gêng-chiap góa ê, beh kui tī Siōng-chú, góa beh hiàn i chò sio-chè. "
11:32 Chiū ánne, I-é-hú-thah khì Am-móng lâng hia kah in kau-chiàn, Siōng-chú kā in kau tī i ê chhiú tiong,
11:33 i chiū kā in phah, tōa-tōa kā in thâi-sí, tùi A-ló-el kàu Bí-le̍k, it-ti̍t kàu A-pī-le̍k-ki-la̍h-bêng, kiōng jī-cha̍p-ê siâⁿ. Án-ne, Am-móng lâng chiū khut-ho̍k tī I-su-la-el lâng.
11:34 I-é-hú-thah ê Cha-bó͘ kiáⁿ
I-é-hú-thah tńg-lâi Mi-su-peh lâi-kàu kakī ê chhù, hit sî i ê chabó͘ kiáⁿ gia̍h lin-long-kó͘ thiàu-bú, chhut-lâi kā i gêng-chiap, chit-ê sī i to̍k-seⁿ ê, í-gōa bô kiáⁿ, bô chabó͘ kiáⁿ.
11:35 I-é-hú-thah khòaⁿ tio̍h i, chiū thiah-li̍h saⁿ kóng, " Ai-ah, góa ê chabó͘ kiáⁿ, lí hō͘ góa chin chhám, lí mā sī hō͘ góa chin tōa kan-lân, in-ūi góa í-keng tùi Siōng-chú khui chhùi, bē tàng siu tò tńg-.lâi. "
11:36 I ìn kóng, " Góa ê a-pa, lí í-keng tùi Siōng-chú khui chhùi, chiū tio̍h chiàu lí ê chhùi só͘ kóng-chhut ê lâi tùi góa chò, in-ūi Siōng-chú í-keng ūi tio̍h lí pò-siû lí ê tùi-te̍k Am-móng lâng. "
11:37 Koh tùi i ê lāu-pē kóng, " Ū chi̍t kiāⁿ tāichì kiû lí ín-chún, iông-ín góa nn̄g goe̍h-ji̍t, hō͘ góa kah góa ê tâng-phōaⁿ khì soaⁿ-.ni̍h, thang ūi tio̍h góa chi̍t-sì-lâng chò chāi-sek-lí lâi thî-khàu. "
11:38 I kóng, " Chò lí khì. " Chiū chhe i khì nn̄g goe̍h-ji̍t, i kah tâng-phōaⁿ khì, tī soaⁿ-.ni̍h ūi tio̍h i chi̍t-sì-lâng chò chāi-sek-lí thî-khàu.
11:39 Nn̄g goe̍h-ji̍t í-keng móa, i tńg-lâi-kàu lāu-pē hia, lāu-pē chiū chiàu i só͘ hē ê goān kā i khoán-thāi. I lóng bô chhin-kīn chapo͘ lâng.
11:40 Āu-lâi, I-su-la-el tiong ū chit-ê lē, I-su-la-el chiahê chabó͘ gín'á ta̍k nî khì tui-tō Gi-lia̍t lâng I-é-hú-thah ê chabó͘ kiáⁿ, múi nî sì ji̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。