士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 To͘-la̍h
A-mí-me-le̍k liáu-āu, ū It-sa-kal lâng, Tó-to ê sun, Phu-oah ê kiáⁿ To͘-la̍h khí-.lâi, chín-kiù I-su-la-el lâng, i tòa tī E-hu-laim soaⁿ-tē ê Sa-bi̍t.
10:2 I chò I-su-la-el ê sū-su jī-cha̍p saⁿ nî, chiū sí, bâi-chòng tī Sa-bi̍t.
10:3 Ia-il
To͘-la̍h liáu-āu, ū Gi-lia̍t lâng Ia-il khí-.lâi, chò I-su-la-el ê sū-su jī-cha̍p jī nî.
10:4 I ū saⁿ-cha̍p-ê kiáⁿ, khiâ saⁿ-cha̍p chiah ê lî-á, in ū saⁿ-cha̍p chō siâⁿ, miâ kiò-chò Ha-bo̍͘t-ia-il, kàu kin-á-ji̍t, lóng sī tī Gi-lia̍t tē.
10:5 Ia-il sí, chiū bâi-chòng tī Ka-bûn.
10:6 I-su-la-el lâng koh kiâⁿ Siōng-chú só͘ khòaⁿ-chò pháiⁿ ê tāichì, khì ho̍k-sāi chiahê Ba-al kah A-si-tha-lot, í-ki̍p A-lâm ê sîn-bêng, Si-tòng hiahê sîn-bêng, Mô͘-ap ê sîn-bêng, Am-móng lâng ê sîn-bêng, Hui-lī-sū lâng ê sîn-bêng, khì-sak Siōng-chú bô koh ho̍k-sāi I.
10:7 Siōng-chú siū-khì I-su-la-el lâng, kā in bē hō͘ Hui-lī-sū lâng ê chhiú tiong kah Am-móng lâng ê chhiú tiong.
10:8 In tùi hit nî khí, jiáu-loān ap-chè I-su-la-el lâng cha̍p-peh nî, to̍h-sī tī Iol-tàn hô hit pêng, chèng I-su-la-el lâng tòa tī A-mô͘-lī lâng ê tē, to̍h-sī tī Gi-lia̍t ê.
10:9 Am-móng lâng koh kòe Iol-tàn hô, khì kong-kek Iô-tah, Biān-iá-mín, E-hu-laim cho̍k, I-su-la-el lâng chiū siū tio̍h hui-siông ê pek-hāi.
10:10 I-su-la-el lâng ai-kiû Siōng-chú, kóng, " Goán tek-chōe Lí, in-ūi ū khì-sak goán ê Siōng-tè, khì ho̍k-sāi chiahê Ba-al. "
10:11 Siōng-chú tùi I-su-la-el lâng kóng, " Góa kám bô kiù lín thoat-lī Ai-gi̍p lâng, A-mô͘-lī lâng, Am-móng lâng kah Hui-lī-sū lâng?
10:12 Si-tòng lâng, A-má-le̍k lâng kah Ma-óng lâng mā lóng kā lín ap-chè; lín tùi Góa ai-kiû, Góa mā chín-kiù lín lâi thoat-lī in ê chhiú.
10:13 Lín kèng-jiân pàng-sak Góa, khì ho̍k-sāi pa̍t-ê sîn-bêng, só͘-í, Góa bô koh kiù lín.
10:14 Lín khì ai-kiû lín só͘ kéng ê sîn-bêng, lín tú tio̍h hoān-lān ê sî, thang hō͘ in kā lín kiù! "
10:15 I-su-la-el lâng tùi Siōng-chú kóng, " Goán hoān chōe à, chhut-chāi Lí ê ì-sù khoán-thāi goán, to̍k-to̍k kiû Lí kin-á-ji̍t kiù goán. "
10:16 In chiū tùi in tiong-kan tû-khì gōa-pang ê sîn-bêng, lâi ho̍k-sāi Siōng-chú. Siōng-chú ê sim in-ūi I-su-la-el lâng ê kan-khó͘, chiū iu-būn.
10:17 Hit tong-sî, Am-móng lâng chū-chi̍p óa-.lâi, chat iâⁿ tī Gi-lia̍t. I-su-la-el lâng mā chū-chi̍p óa-.lâi, chat iâⁿ tī Mi-su-peh.
10:18 Gi-lia̍t ê jîn-bîn kah chèng siú-léng, tāi-ke chò-hóe gī-lūn kóng, " Siáⁿ lâng ē tāi-seng khì kong-kek Am-móng lâng? Hitê lâng beh chò Gi-lia̍t chèng lâng ê thâu-lâng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。