士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 A-mí-me-le̍k
Ia-lu-ba-al ê kiáⁿ A-mí-me-le̍k lâi-kàu Sī-khiàm, kìⁿ i ê chèng bó-kū, tùi in kah i gōa-kong choân ke ê lâng kóng,
9:2 " Chhiáⁿ lín kóng hō͘ Sī-khiàm ê kûn-chiòng thiaⁿ, khòaⁿ sī Ia-lu-ba-al ê chèng kiáⁿ chhit cha̍p lâng koán lín, á-.sī chi̍t-ê lâng koán lín, tó chi̍t hāng khah hó? Lín mā tio̍h siàu-liām góa sī lín ê kut-jio̍k. "
9:3 I hiahê bó-kū chiū kā só͘-ū ê ōe, thè i kóng hō͘ Sī-khiàm ê lâng thiaⁿ, in ê sim chiū kui-ǹg A-mí-me-le̍k, in-ūi kóng, " I sī lán ê hiaⁿ-tī. "
9:4 Chiū tùi Pa-le̍k-pí-lī-thó͘ ê chhù the̍h chhit-cha̍p-ê gîn-á hō͘ A-mí-me-le̍k, i chiū ēng hiahê chîⁿ lâi chhiàⁿ chiahê bô hē-lo̍h ê húi-lūi, hiahê lâng chiū lâi tòe i.
9:5 I khì O͘-hu-lah lâi-kàu i ê lāu-pē ê ke, kā Ia-lu-ba-al ê kiáⁿ, to̍h-sī i ê hiaⁿ-tī chhit cha̍p lâng, lóng tī chi̍t tè chio̍h-pôaⁿ téng kā in thâi-sí, chí ū Ia-lu-ba-al ê soah-bóe kiáⁿ Iô-thàm lâu-.leh, in-ūi i ū cháu-khì bih.
9:6 Sī-khiàm lâng kah Mi-lō͘ ê ke lóng chū-chi̍p, khì siat-li̍p A-mí-me-le̍k chò ông, tī Sī-khiàm chhāi thiāu ê siōng chhiū kha.
9:7 Ū lâng kā Iô-thàm kóng chit-ê tāichì, i chiū khì khiā tī Ki-lī-sim soaⁿ téng, tōa-siaⁿ hoah, kā in kóng, " Sī-khiàm lâng, lín tio̍h thiaⁿ góa ê ōe, hō͘ Siōng-chú mā thiaⁿ lín.
9:8 Bat ū chi̍t pái, chiahê chhiū lóng khì, beh siat-li̍p chi̍t châng chhiū chò in ê ông, chiū khì tùi kaⁿ-ná chhiū kóng, ' Chhiáⁿ lí chò goán ê ông. '
9:9 Kaⁿ-ná chhiū ìn kóng, ' Góa kám thang pàng-sak góa ê iû, to̍h-sī lâng só͘ ēng lâi chun-tiōng Siōng-chú kah lâng ê, khì tī chèng chhiū ê téng-bīn iô? '
9:10 Chiahê chhiū tùi bû-hoa-kó chhiū kóng, ' Lí lâi, lâi chò goán ê ông. '
9:11 Bû-hoa-kó chhiū ìn kóng, ' Góa kám thang pàng-sak góa ê tiⁿ koh hó ê kóe-chí, khì tī chèng chhiū ê téng-bīn iô? '
9:12 Chiahê chhiū tùi phû-tô chhiū kóng, ' Lí lâi, lâi chò goán ê ông. '
9:13 Phû-tô-chhiū ìn kóng, ' Góa kám thang pàng-sak góa ê sin chiú, to̍h-sī hō͘ Siōng-chú kah lâng hoaⁿ-hí ê, khì tī chèng chhiū ê téng-bīn iô? '
9:14 Chiahê chhiū tùi chhì-á kóng, ' Lí lâi, lâi chò goán ê ông. '
9:15 Chhì-á ìn hiahê chhiū kóng, ' Lín nā si̍t-chāi siat-li̍p góa chò lín ê ông, chiū tio̍h tī góa ê ìm-ńg ē siám-bih; nā m̄, goān hóe tùi chhì-á chhut, sio-bia̍t Le-ba-nòng ê pek-hiuⁿ chhiū. '
9:16 " Taⁿ lín siat-li̍p A-mí-me-le̍k chò ông, nā chiàu sêng-si̍t kong-gī lâi kiâⁿ, koh hó khoán-thāi Ia-lu-ba-al kah i ê ke, chiàu i ê chhiú só͘ lô-khó͘ ê lâi kā i pò-tap.
9:17 In-ūi góa ê lāu-pē bat piàⁿ-miā ūi lín kau-chiàn, kiù lín thoat-lī Mí-tiân lâng ê chhiú.
9:18 Lín kin-á-ji̍t khí-lâi kong-kek góa lāu-pē ê ke, tī chi̍t tè chio̍h-pôaⁿ téng thâi-sí i ê kiáⁿ chhit cha̍p lâng, koh siat-li̍p i ê lú-pī ê kiáⁿ A-mí-me-le̍k chò Sī-khiàm lâng ê ông, in-ūi i sī lín ê hiaⁿ-tī.
9:19 Lín kin-á-ji̍t nā chiàu sêng-si̍t kong-gī khoán-thāi Ia-lu-ba-al kah i ê ke, lín chiū thang tùi A-mí-me-le̍k lâi hoaⁿ-hí, i mā thang tùi lín lâi hoaⁿ-hí;
9:20 nā bô, goān hóe tùi A-mí-me-le̍k chhut, sio Sī-khiàm lâng kah Mi-lō͘ ê ke, koh goān hóe tùi Sī-khiàm lâng kah Mi-lō͘ ê ke chhut, sio A-mí-me-le̍k. "
9:21 Iô-thàm in-ūi kiaⁿ i ê hiaⁿ-tī chiū tô-cháu, cháu-khì bih tī Boh-ol, tī hia tòa.
9:22 A-mí-me-le̍k koán I-su-la-el saⁿ nî.
9:23 Siōng-chú chhe pháiⁿ sîn tī A-mí-me-le̍k kah Sī-khiàm lâng ê tiong-kan, Sī-khiàm lâng chiū ēng kúi-chà khoán-thāi A-mí-me-le̍k,
9:24 lâi pò-èng Ia-lu-ba-al chhit-cha̍p-ê kiáⁿ só͘ siū ê chân-hāi, mā hō͘ in ê hoeh kui tī kā in thâi-sí ê lâng, to̍h-sī in ê hiaⁿ-tī A-mí-me-le̍k, mā kui tī Sī-khiàm lâng, to̍h-sī pang-chān i ê chhiú lâi thâi-sí i ê hiaⁿ-tī ê lâng.
9:25 Sī-khiàm lâng tī soaⁿ téng siat bâi-ho̍k lâi tng-tán i. Kiàn-nā tùi hit tiâu lō͘ keng-kòe ê lâng, in chiū kā i chhiúⁿ. Ū lâng chiū kā chit-ê tāichì khì pò-kò A-mí-me-le̍k.
9:26 E-biat ê kiáⁿ Ka-le̍p kah i ê hiaⁿ-tī lâi-kàu Sī-khiàm, Sī-khiàm lâng lóng sìn-khò i.
9:27 In chhut-khì hn̂g-.ni̍h, siu phû-tô lâi ta̍h chiú, siat iàn-se̍k, ji̍p-khì in ê sîn-bêng ê biō lim-chia̍h, chiù-chó͘ A-mí-me-le̍k.
9:28 E-biat ê kiáⁿ Ka-le̍p kóng, " A-mí-me-le̍k sī siáⁿ lâng, Sī-khiàm sī siáⁿ lâng, tio̍h hō͘ lán kā i ho̍k-sāi? I kám m̄-sī Ia-lu-ba-al ê kiáⁿ? I ê kun-tiúⁿ kám m̄-sī Che-bul? Lín tio̍h ho̍k-sāi Sī-khiàm ê lāu-pē Ha-mo͘l ê lâng, lán án-chóaⁿ tio̍h kā i ho̍k-sāi?
9:29 Goān chiahê jîn-bîn kui tī góa ê chhiú-hā, góa chiū tû A-mí-me-le̍k. " I chiū kā A-mí-me-le̍k kóng, " Ke-thiⁿ lí ê kun-peng chhut-.lâi. "
9:30 Siâⁿ-siú Che-bul thiaⁿ tio̍h E-biat ê kiáⁿ Ka-le̍p ê ōe, chiū siū-khì,
9:31 thau-thau-á chhe lâng khì kìⁿ A-mí-me-le̍k, kóng, " E-biat ê kiáⁿ Ka-le̍p kah i ê hiaⁿ-tī lâi-kàu Sī-khiàm, iú-he̍k siâⁿ lāi ê jîn-bîn lâi kong-kek lí.
9:32 Só͘-í, lí kah tòe lí ê lâng tio̍h thàu-mê khí-.lâi, bâi-ho̍k tī chhân-.ni̍h.
9:33 Chá-khí sî, ji̍t tú-á chhut, lí tio̍h chá-chá khí-.lâi, chhiong óa-khì kong siâⁿ. Ka-le̍p kah tòe i ê lâng chhut-lâi kong-kek lí ê sî, lí chiū thang siòng ki-hōe lâi tùi-hù in. "
9:34 A-mí-me-le̍k kah tòe i ê kûn-chiòng thàu-mê khí-.lâi, hun-chò sì tūi, ǹg Sī-khiàm khì bâi-ho̍k.
9:35 E-biat ê kiáⁿ Ka-le̍p chhut-.khì, khiā tī siâⁿ mn̂g-kháu. A-mí-me-le̍k kah tòe ê lâng tùi bâi-ho̍k ê só͘-chāi khí-.lâi.
9:36 Ka-le̍p khòaⁿ tio̍h hiahê lâng, chiū tùi Che-bul kóng, " Lí khòaⁿ, ū lâng tùi soaⁿ téng lo̍h-.lâi. " Che-bul kóng, " Lí khòaⁿ tio̍h soaⁿ ê iáⁿ, lia̍h-chò sī lâng. "
9:37 Ka-le̍p koh kóng, " Lí khòaⁿ, ū lâng tùi koân tē lo̍h-.lâi, koh ū chi̍t tūi tùi Bí-ok-nî-nî siōng chhiū ê lō͘ khí-.lâi. "
9:38 Che-bul tùi i kóng, " Lí bat kóng, A-mí-me-le̍k sī siáⁿ lâng, hō͘ lán kā i ho̍k-sāi, lí kóng chiahê ōe ê chhùi tī tó-ūi? Che kám m̄-sī lí só͘ biáu-sī ê jîn-bîn? Lí taⁿ tio̍h chhut-khì kah in kau-chiàn. "
9:39 Ka-le̍p chiū tùi Sī-khiàm lâng ê thâu-chêng chhut-khì kah A-mí-me-le̍k kau-chiàn.
9:40 A-mí-me-le̍k jiok i, i tī i ê bīn-chêng tô-cháu, ū chin chē lâng tio̍h-siong tó-.leh, it-ti̍t kàu siâⁿ mn̂g-kháu.
9:41 A-mí-me-le̍k tòa tī A-ló͘-má. Che-bul kóaⁿ Ka-le̍p kah i ê hiaⁿ-tī, m̄-chún in tòa tī Sī-khiàm.
9:42 Keh tńg kang, jîn-bîn chhut-khì kàu chhân-.ni̍h, ū lâng kā A-mí-me-le̍k kóng;
9:43 i chiū kā i ê lâng hun-chò saⁿ tūi, bâi-ho̍k tī chhân-.ni̍h, khòaⁿ tio̍h Sī-khiàm lâng tùi siâⁿ-.ni̍h chhut-.lâi, chiū khí-lâi kā in kong-kek, kā in thâi.
9:44 A-mí-me-le̍k kah tòe i hit chi̍t tūi chhiong chìn-chêng, khiā tī siâⁿ mn̂g-kháu; lēng-gōa hit nn̄g tūi ti̍t-ti̍t chhiong kàu chhân-.ni̍h hiahê lâng, lâi kā in thâi.
9:45 A-mí-me-le̍k kui ji̍t kong-kek siâⁿ, cheng-ho̍k hit-ê siâⁿ, thâi-sí hit lāi-bīn ê jîn-bîn, thiah-húi hit-ê siâⁿ, ēng iâm kā i iā.
9:46 Tòa tī Sī-khiàm tâi ê lâng thiaⁿ-.tio̍h, chiū siám ji̍p-khì Pa-le̍k-pí-lī-thó͘ ê chhù ê siâⁿ-pó.
9:47 Ū lâng kā A-mí-me-le̍k kóng, " Sī-khiàm tâi ê lâng lóng chū-chi̍p tī chi̍t-ê só͘-chāi. "
9:48 A-mí-me-le̍k kah tòe i ê lâng, chiū lóng chiūⁿ-khì Sal-mòng soaⁿ. A-mí-me-le̍k chhiú the̍h pó͘-thâu, chhò chi̍t châng chhiū-ki, giâ tī keng-kah-thâu téng, tùi tòe i ê lâng kóng, " Lín khòaⁿ góa só͘ kiâⁿ ê, mā tio̍h kóaⁿ-kín o̍h góa lâi kiâⁿ. "
9:49 Chèng lâng chiū ta̍k-ê chhò chi̍t ki, lâi tòe A-mí-me-le̍k, kā chhiū-ki thia̍p tī siâⁿ-pó, tī hiahê lâng ê téng-bīn pàng hóe sio siâⁿ-pó, tì-sú Sī-khiàm tâi ê lâng lóng sí, lâm-lí chha-put-to ū chi̍t chheng lâng.
9:50 A-mí-me-le̍k khì-kàu Thê-pī-su, tī Thê-pī-su chat iâⁿ, lâi kā i cheng-ho̍k.
9:51 Siâⁿ lāi ū kian-kò͘ ê tâi, siâⁿ lāi ê kûn-chiòng, bô-lūn lâm-lí lóng cháu-khì hia, koaiⁿ mn̂g, chiūⁿ tâi téng.
9:52 A-mí-me-le̍k lâi-kàu hit-ê tâi beh kā i kong-kek, óa-kīn tâi mn̂g, beh ēng hóe kā i sio.
9:53 Ū chi̍t-ê chabó͘ lâng kā chi̍t tè téng-tún ê bō-chio̍h, tìm tio̍h A-mí-me-le̍k ê thâu-khak, phah-phòa i ê thâu-khak-óaⁿ.
9:54 I chiū kóaⁿ-kín kiò gia̍h i ê kun-khì ê siàu-liân lâng lâi, kā i kóng, " Poe̍h lí ê to thâi góa, bián-tit lâng kóng góa, i sī chabó͘ lâng só͘ thâi ê. " Siàu-liân lâng chiū kā i chha̍k lo̍h-.khì, i chiū sí.
9:55 I-su-la-el lâng khòaⁿ tio̍h A-mí-me-le̍k í-keng sí, ta̍k-ê chiū tńg-khì i kakī ê só͘-chāi.
9:56 Án-ne, Siōng-tè pò-èng A-mí-me-le̍k ǹg i ê lāu-pē só͘ kiâⁿ ê pháiⁿ tāi, to̍h-sī thâi-sí i ê hiaⁿ-tī chhit cha̍p lâng.
9:57 Sī-khiàm lâng it-chhè ê pháiⁿ, Siōng-chú mā lóng pò-èng tī in ê thâu-khak téng; Ia-lu-ba-al ê kiáⁿ Iô-thàm ê chiù-chó͘ kui tī in ê téng-bīn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。