士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Gî-tióng Phah-iâⁿ Mí-tiân Lâng
Ia-lu-ba-al to̍h-sī Gî-tióng, i kah só͘-ū tòe i ê lâng chá-chá khí-.lâi, tī Ha-lot chúi-chôaⁿ piⁿ chat iâⁿ. Mí-tiân iâⁿ tī in pak pêng ê soaⁿ-kok, óa-kīn Mó͘-leh soaⁿ.
7:2 Siōng-chú tùi Gî-tióng kóng, " Góa ēng Mí-tiân kau tī jîn-bîn ê chhiú, m̄ koh, tòe lí ê lâng siuⁿ chē, khióng-kiaⁿ I-su-la-el lâng tùi Góa lâi kakī khoa-kháu, kóng, ' Sī góa kakī ê chhiú kiù góa. '
7:3 Taⁿ lí tio̍h soan-pò͘ hō͘ jîn-bîn thiaⁿ, kiàn-nā kiaⁿ-hiâⁿ lún-neh ê lâng, thang lī-khui Gi-lia̍t soaⁿ tò tńg-.khì. Chiū ánne, jîn-bîn tiong ū nn̄g-bān nn̄g-chheng lâng tò tńg-.khì, iáu ū chhun chi̍t bān lâng.
7:4 Siōng-chú tùi Gî-tióng kóng, " Lâng iáu koh siuⁿ chē, lí tio̍h chhōa in lo̍h-khì kàu chúi piⁿ, Góa ē tī hia kā in chhì-thàm. Kiàn-nā Góa kí siáⁿ lâng tùi lí kóng, ' Chit-ê lâng thang kah lí khì', hit-ê lâng chiū thang kah lí khì; Góa kí siáⁿ lâng kā lí kóng, ' Chit-ê lâng m̄ thang kah lí khì. ' Hitê lâng chiū m̄ thang khì. "
7:5 Gî-tióng chiū chhōa jîn-bîn lo̍h-khì kàu chúi piⁿ, Siōng-chú tùi Gî-tióng kóng, " Kiàn-nā ēng chi̍h nà chúi, chhin-chhiūⁿ káu teh nà, hit-ê lâng tio̍h hō͘ i lēng-gōa khiā-.leh; kiàn-nā kūi lo̍h-khì lim chúi ê, mā tio̍h hō͘ i lēng-gōa khiā-.leh. "
7:6 Ēng chhiú óa chhùi lâi nà chúi ê ū saⁿ-pah lâng, kî-tha hiahê jîn-bîn lóng kūi lo̍h-khì lim chúi.
7:7 Siōng-chú kā Gî-tióng kóng, " Góa beh ēng chiahê nà chúi ê saⁿ-pah lâng kiù lín, kā Mí-tiân lâng kau tī lí ê chhiú tiong, chèng lâng lóng thang tò tńg-khì i ê só͘-chāi. "
7:8 Jîn-bîn chhiú-.ni̍h chiū tòa kan-niûⁿ kah in ê sàu-kak; Gî-tióng chhe I-su-la-el jîn-bîn ta̍k lâng tńg-khì in ê pò͘-pêⁿ, chí ū lâu chit saⁿ pah lâng. Mí-tiân ê iâⁿ chat tī i ē-bīn ê soaⁿ-kok.
7:9 Siâng hit mê, Siōng-chú kā Gî-tióng kóng, " Khí-.lâi, lo̍h-khì kàu hit-ê iâⁿ-pâng, in-ūi Góa í-keng kā i kau tī lí ê chhiú tiong.
7:10 Lí nā m̄-káⁿ lo̍h-.khì, lí kah lí ê lô͘-po̍k Phó͘-la̍h tio̍h lo̍h-khì hit-ê iâⁿ-pâng.
7:11 Lí ē thiaⁿ tio̍h in só͘ kóng ê, jiân-āu lí chiū ū tám-liōng lo̍h-khì kàu iâⁿ-pâng." Gî-tióng chiū kah i ê lô͘-po̍k Phó͘-la̍h lo̍h-khì kàu iâⁿ-pâng, tòa kun-khì ê lâng ê piⁿ-á.
7:12 Mí-tiân lâng, A-má-le̍k lâng kah tang-hong ê kûn-chiòng, lóng tó tī soaⁿ-kok, chhin-chhiūⁿ chháu-meh hiah chē. In ê lo̍k-tô sǹg bē liáu, chē kah chhin-chhiūⁿ hái-hōaⁿ ê soa.
7:13 Gî-tióng kàu-ūi liáu-āu, ū lâng ēng bāng kā i ê tâng-phōaⁿ kóng, " Góa bāng-kìⁿ chi̍t-ê bāng, lí khòaⁿ, ū chi̍t-ê tōa-be̍h piáⁿ kō ji̍p-khì Mí-tiân ê iâⁿ, kàu chi̍t-ê pò͘-pêⁿ, chhiong hō͘ i tò, hō͘ pò͘-pêⁿ péng liàn-tńg, tó kah pêⁿ-tē. "
7:14 I ê tâng-phōaⁿ ìn kóng, " Che m̄-sī pa̍t hāng, to̍h-sī I-su-la-el lâng, Io-a-si ê kiáⁿ Gî-tióng ê to; Siōng-tè í-keng kā Mí-tiân kah i ê kun-tūi kau tī i ê chhiú tiong. "
7:15 Gî-tióng thiaⁿ tio̍h chit-ê bāng ê ōe kah i ê kái-soeh, chiū kèng-pài Siōng-chú, tò tńg-lâi-kàu I-su-la-el ê iâⁿ tiong, kóng, " Khí-.lâi, in-ūi Siōng-chú í-keng kā Mí-tiân ê kun-tūi kau tī lín ê chhiú à. "
7:16 I chiū kā saⁿ pah lâng hun-chò saⁿ tūi, ēng sàu-kak kah khang àng kau tī ta̍k lâng ê chhiú, àng lāi lóng khǹg hóe-pé,
7:17 kā in kóng, " Lín tio̍h khòaⁿ góa ê iūⁿ lâi chò, góa kàu hit-ê iâⁿ-pâng piⁿ, góa só͘ chò ê, lín mā tio̍h ánne chò.
7:18 Góa kah hiahê kah góa tông-chāi ê lâng pûn sàu-kak ê sî, lín mā tio̍h tī iâⁿ ê sì-kho͘-ûi pûn sàu-kak, kóng, ' Ūi tio̍h Siōng-chú, mā ūi tio̍h Gî-tióng. '"
7:19 Gî-tióng kah tòe i ê chi̍t pah lâng, tī saⁿ keⁿ thâu, lâi-kàu iâⁿ piⁿ. Hit sî, chiú-keⁿ ê tú-á ōaⁿ pan, in chiū pûn sàu-kak, kòng-phòa chhiú-.ni̍h ê àng.
7:20 Saⁿ tūi ê lâng chiū lóng pûn sàu-kak, kòng-phòa àng, tò chhiú gia̍h hóe-pé, chiàⁿ chhiú gia̍h sàu-kak, lâi pûn, lâi hoah, " Siōng-chú kah Gî-tióng ê to. "
7:21 In tī iâⁿ ê sì-kho͘-ûi ta̍k-ê khiā kakī ê ūi, choân-iâⁿ ê lâng lóng cháu, hoah-hiàm hō͘ in tô-cháu.
7:22 Pûn saⁿ pah ki sàu-kak ê sî, Siōng-chú hō͘ choân-iâⁿ ê lâng ta̍k-ê ēng to sio-thâi, kun-tūi cháu kàu Che-lī-la̍h ê Pek-hap-sī-tha, koh kàu A-bel-me-ho-lah ê kài, kīn tī Tha-pa.
7:23 I-su-la-el lâng chiū tùi Ná-hu-tha-lím, A-sel kah Má-ná-se chū-chi̍p, lâi jiok Mí-tiân lâng.
7:24 Gî-tióng chhe lâng piàn kiâⁿ E-hu-laim ê soaⁿ-tē, kóng, " Lín lo̍h-lâi kong-kek Mí-tiân, thàn in iáu-bōe kàu, pé-siú hiahê tō͘-thâu, it-ti̍t kàu Pek-pa-la̍h, to̍h-sī Iol-tàn." Chiū ánne, E-hu-laim ê kûn-chiòng chū-chi̍p, pé-siú hiahê tō͘-thâu, it-ti̍t kàu Pek-pa-la̍h, to̍h-sī Iol-tàn,
7:25 mā lia̍h tio̍h Mí-tiân ê nn̄g-ê siú-léng, Gô-li̍p kah Se-i-pek; tī Gô-li̍p ê chio̍h-pôaⁿ thâi-sí Gô-li̍p, tī Se-i-pek ê chiú-khut hia thâi-sí Se-i-pek, koh jiok Mí-tiân lâng, tòa Gô-li̍p kah Se-i-pek ê thâu-khak kàu Iol-tàn hô hit pêng, Gî-tióng hia.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。