士師記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Gî-tióng
I-su-la-el lâng koh kiâⁿ Siōng-chú só͘ khòaⁿ-chò pháiⁿ ê tāichì, Siōng-chú chiū kā in kau tī Mí-tiân ê chhiú tiong, keng-kòe chhit nî.
6:2 Mí-tiân ê chhiú ap-chè I-su-la-el lâng, i-su-la-el lâng ūi tio̍h Mí-tiân lâng ê iân-kò͘, chiū ūi kakī tī soaⁿ-.ni̍h khui hia̍t kah tōng, kah hiám-iàu ê só͘-chāi.
6:3 I-su-la-el lâng iā chéng liáu-āu, Mí-tiân lâng, A-má-le̍k lâng kah tang-hong ê lâng, lóng khí-lâi kā in kong-kek.
6:4 Chat-iâⁿ tī in ê tùi-bīn, phah-pháiⁿ hit só͘-chāi ê lông-sán-bu̍t, kàu Ga-jah, bô lâu chia̍h-mi̍h hō͘ I-su-la-el lâng, iûⁿ kah gû kah lî mā bô.
6:5 In-ūi in tòa chengseⁿ kah pò͘-pêⁿ khí-.lâi, chhin-chhiūⁿ chháu-meh hiah chē lâi, lâng kah lo̍k-tô sǹg bē liáu, in ji̍p-lâi chit-ê só͘-chāi beh kā i phah-pháiⁿ.
6:6 I-su-la-el lâng in-ūi Mí-tiân lâng ê iân-kò͘, khùn-khó͘ kàu-ke̍k, I-su-la-el lâng chiū kiû-kiò Siōng-chú.
6:7 I-su-la-el lâng in-ūi Mí-tiân lâng ê iân-kò͘ kiû-kiò Siōng-chú ê sî,
6:8 Siōng-chú chiū chhe sian-ti kàu I-su-la-el lâng hia, tùi in kóng, " Siōng-chú — I-su-la-el ê Siōng-tè ánne kóng, ' Góa bat chhōa lín tùi Ai-gi̍p chhut-.lâi, tùi chò lô͘-lē ê ke chhut-.lâi,
6:9 Góa mā kiù lín thoat-lī Ai-gi̍p lâng ê chhiú, mā thoat-lī it-chhè ap-chè lín ê lâng ê chhiú, tùi lín ê bīn-chêng kā in kóaⁿ chhut-.khì, kā in ê tē hō͘ lín.
6:10 Góa mā tùi lín kóng, Góa sī Siōng-chú — lín ê Siōng-tè, lín tòa A-mô͘-lī lâng ê tē, m̄-bián kiaⁿ in ê sîn-bêng. Chóng-.sī, lín m̄-thiaⁿ Góa ê ōe. '"
6:11 Siōng-chú ê sù-chiá kàu O͘-hu-lah, chē tī A-bi-e-chel cho̍k ê lâng Io-a-si ê siōng chhiū kha. Io-a-si ê kiáⁿ Gî-tióng tī chiú-khut hia teh phah-be̍h, bô ài hō͘ Mí-tiân lâng khòaⁿ-.tio̍h.
6:12 Siōng-chú ê sù-chiá tùi Gî-tióng hián-hiān, tùi i kóng, " Tōa khùi-la̍t ê ióng-sū, Siōng-chú kah lí tông-chāi. "
6:13 Gî-tióng tùi i kóng, " Góa ê chú ah, nā Siōng-chú kah goán tông-chāi, goán án-chóaⁿ tú tio̍h che it-chhè ê tāichì? Goán ê chó͘-sian só͘ kā goán kóng Siōng-chú hiahê kî-sū tī tó-ūi? In kóng, ' I kám bô chhōa goán tùi Ai-gi̍p chhut-.lâi? ' Taⁿ Siōng-chú pàng-sak goán, kā goán kau tī Mí-tiân lâng ê chhiú tiong. "
6:14 Siōng-chú khòaⁿ Gî-tióng, kā i kóng, " Τio̍h ēng lí chit-ê la̍t khì, lâi kiù I-su-la-el chhut Mí-tiân lâng ê chhiú, Góa kám bô chhe lí khì? "
6:15 Gî-tióng kā I kóng, " Chú ah, góa beh ēng siáⁿ-mi̍h kiù I-su-la-el? Lí khòaⁿ, góa ê ke sī Má-ná-se tiong siōng sànchhiah ê, tī góa lāu-pē ê ke, góa sī siōng sè-hàn ê. "
6:16 Siōng-chú tùi i kóng, " Góa ē kah lí tông-chāi, lí ē phah Mí-tiân lâng, chhin-chhiūⁿ teh phah chi̍t-ê lâng. "
6:17 I ìn Siōng-chú kóng, " Góa nā tī Lí ê bīn-chêng tit tio̍h un-tián, kiû Lí hō͘ góa chi̍t-ê tiāu-thâu thang chai kah góa teh kóng ōe ê to̍h-sī Lí.
6:18 Chhiáⁿ Lí m̄ thang lī-khui chia, thèng-hāu góa koh lâi lí chia, tòa góa ê lé-mi̍h hē tī Lí ê bīn-chêng. " Siōng-chú kóng, " Góa ē thèng-hāu lí koh lâi. "
6:19 Gî-tióng khì chún-pī chi̍t chiah soaⁿ-iûⁿ-á, ēng chi̍t e-hoat ê mī-hún chò bô-kàⁿ piáⁿ, bah hē tī kheng-.ni̍h, thng té tī ô͘-.ni̍h, tòa kàu siōng chhiū kha, hiàn hō͘ Siōng-chú.
6:20 Siōng-chú ê sù-chiá hoan-hù i kóng, " Bah kah bô-kàⁿ piáⁿ hē tī chit-ê chio̍h-pôaⁿ téng, thng tò chhut-.lâi. " Gî-tióng chiū chiàu ánne kiâⁿ.
6:21 Siōng-chú ê sù-chiá chhun-chhut chhiú-.ni̍h só͘ gia̍h ê koái-á bóe, lâi tuh tio̍h bah kah bô-kàⁿ piáⁿ, chiū ū hóe tùi chio̍h-pôaⁿ chhut-.lâi, choân-pō͘ ê bah kah bô-kàⁿ piáⁿ sio khí-.lâi. Siōng-chú ê sù-chiá chiū lī-khui khì, bô koh-chài khòaⁿ-.tio̍h.
6:22 Gî-tióng khòaⁿ-chhut i sī Siōng-chú ê sù-chiá, chiū kóng, " Hāiⁿ-ah! Chì-koân Siōng-chú ah, in-ūi góa tng-bīn khòaⁿ tio̍h Siōng-chú ê sù-chiá. "
6:23 Siōng-chú tùi i kóng, " An lí ê sim, m̄-bián kiaⁿ, lí bē tì-kàu sí. "
6:24 Gî-tióng chiū tī hia kā Siōng-chú khí chi̍t chō tôaⁿ, hō-miâ kiò-chò ' I-é-ho-bah-sia-lóm'. （Chit-ê tôaⁿ tī A-bi-e-chel cho̍k ê O͘-hu-lah, kàu kin-á-ji̍t iáu tī-.leh. ）
6:25 Hit mê, Siōng-chú hoan-hù Gî-tióng kóng, " Lí khan lín lāu-pē ê gû-á lâi, to̍h-sī chhit nî ê tē-jī chiah gû, mā tio̍h thiah-húi lín lāu-pē só͘-ū Ba-al ê tôaⁿ, kā tôaⁿ piⁿ ê A-si-lah chhò tiāu,
6:26 tī chit-ê soaⁿ-chē, chiàu ha̍p-gî ê hong-hoat, ūi Siōng-chú — lí ê Siōng-tè khí chi̍t chō tôaⁿ, ēng tē-jī chiah gû hiàn chò sio-chè, ēng lí só͘ beh chhò ê A-si-lah chò chhâ. "
6:27 Gî-tióng chiū tùi i ê lô͘-po̍k tiong chhōa cha̍p-ê lâng, chiàu Siōng-chú hoan-hù i ê khì kiâⁿ. I in-ūi kiaⁿ lāu-pē ê ke kah siâⁿ lāi ê lâng, ji̍t-sî m̄-káⁿ chò chit-ê tāichì, chiū tī àm-sî khì chò.
6:28 Siâⁿ lāi ê lâng thàu-chá khí-.lâi, khòaⁿ tio̍h Ba-al ê tôaⁿ thiah-húi, tôaⁿ piⁿ ê A-si-lah chhò tiāu, tē-jī chiah gû hiàn tī só͘ khí ê tôaⁿ.
6:29 In chò-hóe kóng, " Siáⁿ lâng chò chit-ê tāichì? " In cha-mn̄g liáu-āu, chiū kóng, " Che sī Io-a-si ê kiáⁿ Gî-tióng só͘ chò ê. "
6:30 Siâⁿ lāi ê lâng tùi Io-a-si kóng, " Lia̍h lí ê kiáⁿ chhut-.lâi, thang hō͘ i sí, in-ūi i thiah-húi Ba-al ê tôaⁿ, chhò tôaⁿ piⁿ ê A-si-lah. "
6:31 Io-a-si kā só͘-ū khiā-teh kong-kek i ê lâng kóng, " Lín beh ūi Ba-al cheng-piān? Lín beh kiù i? Nā ū lâng ūi i cheng-piān, thàn-chá-khí tio̍h hō͘ i sí! Ba-al Nā-sī sîn-bêng, chiah hō͘ i ūi kakī cheng-piān, in-ūi lâng thiah-húi i ê tôaⁿ. "
6:32 Tùi hit ji̍t khí, kiò i ê miâ Ia-lu-ba-al, sī kóng, " Ba-al tio̍h kah i cheng-piān, in-ūi i húi-hoāi i ê tôaⁿ. "
6:33 Hit sî, Mí-tiân lâng, A-má-le̍k lâng kah tang-hong ê jîn-bîn, lóng chū-chi̍p kòe hô, tī E-chu-le-el ê soaⁿ-kok chat iâⁿ.
6:34 Siōng-chú ê Sèng Sîn lîm-kàu Gî-tióng, i chiū pûn sàu-kak; A-bi-e-chel cho̍k lóng chū-chi̍p lâi kin-tòe i.
6:35 I chhe lâng piàn kiâⁿ Má-ná-se, Má-ná-se lâng mā chū-chi̍p lâi tòe i. I koh chhe lâng khì kìⁿ A-sel lâng, Che-bú-lông lâng kah Ná-hu-tha-lím lâng, in mā lóng khí-lâi kah in liân-ha̍p.
6:36 Gî-tióng tùi Siōng-chú kóng, " Lí nā chiàu Lí só͘ kóng ê, beh ēng góa ê chhiú lâi kiù I-su-la-el,
6:37 góa chiū ēng kui niá ê iûⁿ-mn̂g hē tī tiūⁿ-tiâⁿ, nā kantaⁿ iûⁿ-mn̂g ū lō͘-chúi, thô͘-kha lóng ta-ta, góa chiū chai Lí ē chiàu Lí só͘ kóng ê, ēng góa ê chhiú kiù I-su-la-el. "
6:38 Chiū kó-jiân ánne, keh tńg kang, Gî-tióng chá-chá khí-.lâi, chūn iûⁿ-mn̂g, tùi iûⁿ-mn̂g ká chhut lō͘-chúi chi̍t óaⁿ móa-móa.
6:39 Gî-tióng koh tùi Siōng-chú kóng, " Kiû Lí m̄ thang tùi góa siū-khì, góa koh kóng chi̍t pái niā-niā, kiû Lí chún góa koh chi̍t pái ēng iûⁿ-mn̂g chhì-khòaⁿ māi, taⁿ to̍k-to̍k hō͘ iûⁿ-mn̂g ta-ta, thô͘-kha lóng ū lō͘-chúi. "
6:40 Chit mê Siōng-chú mā ánne kiâⁿ, to̍k-to̍k iûⁿ-mn̂g ta-ta, thô͘-kha lóng ū lō͘-chúi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。