約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 Io-siú-ah tī Sī-khiàm Ǹg Bîn-chiòng Kóng-ōe
Io-siú-ah chū-chi̍p I-su-la-el chèng chi-cho̍k lâi-kàu Sī-khiàm, tiàu I-su-la-el ê tiúⁿ-ló kah in ê cho̍k-tiúⁿ, sím-phòaⁿ-koaⁿ, í-ki̍p koaⁿ-tiúⁿ lâi, in chiū khiā tī Siōng-chú ê bīn-chêng.
24:2 Io-siú-ah kā chèng lâng kóng, " Siōng-chú — I-su-la-el ê Siōng-tè ánne kóng: Chāi-chá lín ê chó͘-sian, to̍h-sī A-bu-la-hàm ê lāu-pē, na-kho͘l ê lāu-pē Tha-la̍h, tòa tī tōa hô hit pêng, ho̍k-sāi pa̍t-ê sîn-bêng.
24:3 Góa tùi tōa hô hit pêng kā lín ê chó͘-sian A-bu-la-hàm chhú-lâi, chhōa i piàn kiâⁿ Ka-nân choân tē, koh hō͘ i ê kiáⁿ-sun chin chē, kā Í-sak siúⁿ-sù hō͘ i chò kiáⁿ;
24:4 koh kā Iâ-kop kah E-sáu siúⁿ-sù hō͘ Í-sak chò kiáⁿ, kā Se-il soaⁿ siúⁿ-sù hō͘ E-sáu chò sán-gia̍p, āu-lâi Iâ-kop kah i ê kiáⁿ-sun lo̍h-khì Ai-gi̍p.
24:5 Góa chhe Mô͘-se kah A-lông, Góa mā kàng chai-hō tī Ai-gi̍p, chiàu Góa tī hit tiong-kan só͘ kiâⁿ ê, jiân-āu chhōa lín chhut Ai-gi̍p.
24:6 Góa chhōa lín ê chó͘-sian chhut Ai-gi̍p, lín chiū kàu hái-hōaⁿ, Ai-gi̍p lâng tòa in ê chhia kah bé-peng lâi jiok lín ê chó͘-sian ti̍t-kàu Âng-hái.
24:7 In kiû-kiò Siōng-chú, I chiū ēng o͘-àm hē tī lín kah Ai-gi̍p lâng ê tiong-kan, koh hō͘ hái lâi kā in im-sí. Lín lóng ū chhin-ba̍k khòaⁿ tio̍h Góa tī Ai-gi̍p só͘ kiâⁿ ê tāichì. " Lín tòa tī khòng-iá chin chē ji̍t.
24:8 Góa chhōa lín khì-kàu tòa tī Iol-tàn hô hit pêng ê A-mô͘-lī lâng ê tē. In kah lín kau-chiàn, Góa kā in kau tī lín ê chhiú tiong, lín chiū tit tio̍h in ê tē; Góa tī lín ê bīn-chêng kā in châu-bia̍t.
24:9 Hit sî, Mô͘-ap ông Chip-pol ê kiáⁿ Ba-al khí-lâi kah I-su-la-el kau-chiàn, in chhe lâng khì kiò Boh-ol ê kiáⁿ Pa-lân lâi kā lín chiù-chó͘.
24:10 Góa m̄-thiaⁿ Pa-lân ê ōe, só͘-í, I liân-liân kā lín chiok-hok. Án-ne, Góa chiū kiù lín thoat-lī i ê chhiú.
24:11 " Lín kòe Iol-tàn hô, lâi-kàu I-é-lī-kho siâⁿ; I-é-lī-kho siâⁿ lâng, A-mô͘-lī lâng, Pe-lí-ji lâng, Ka-nân lâng, Hiat lâng, Gi-ga-sih lâng, Hi-bī lâng, I-é-bú-suh lâng, lóng kah lín kau-chiàn; Góa kā in kau tī lín ê chhiú tiong.
24:12 Góa chhe tōa-chiah phang tī lín ê thâu-chêng poe, kā A-mô͘-lī lâng ê nn̄g-ê ông, tùi lín ê bīn-chêng kóaⁿ chhut-.khì, m̄-sī ēng lí ê to, mā m̄-sī ēng lí ê kiong.
24:13 Góa siúⁿ-sù hō͘ lín ê thó͘-tē m̄-sī lín só͘ lô-khó͘ ê kiat-kó, á siúⁿ-sù hō͘ lín siâⁿ m̄-sī lín só͘ khí-chō ê, lín chiū tòa tī hit tiong-kan, koh ū m̄-sī lín só͘ chai-chèng ê phû-tô hn̂g, kaⁿ-ná hn̂g, lín khiok tit tio̍h lâi chia̍h hiahê kóe-chí.
24:14 " Taⁿ lín tio̍h kèng-ùi Siōng-tè, sêng-sim si̍t-ì ho̍k-sāi I, kā lín chó͘-sian tī tōa hô hit pêng kah tī Ai-gi̍p só͘ ho̍k-sāi ê sîn-bêng tû-.khì, lâi ho̍k-sāi Siōng-chú.
24:15 Nā-sī lín lia̍h ho̍k-sāi Siōng-chú chò m̄-hó, kin-á-ji̍t lín tio̍h kéng-soán lín só͘ beh ho̍k-sāi ê, khòaⁿ sī lín chó͘-sian tī tōa hô hit pêng só͘ ho̍k-sāi hiahê sîn-bêng, á-.sī lín só͘ tòa in ê tē ê A-mô͘-lī lâng hiahê sîn-bêng? Kóng tio̍h góa kah góa ê ke, goán choa̍t-tùi beh ho̍k-sāi Siōng-chú. "
24:16 Jîn-bîn ìn kóng, " Goán choa̍t-tùi bô ì-sù beh khì-sak Siōng-chú khì ho̍k-sāi pa̍t-ê sîn-bêng,
24:17 in-ūi Siōng-chú — goán ê Siōng-tè bat chhōa goán kah goán ê chó͘-sian tùi Ai-gi̍p tē chò lô͘-lē ê ke chhut-.lâi, tī goán ê ba̍k-chiu chêng kiâⁿ hiahê tōa ê sîn-jiah, tī goán só͘ kiâⁿ it-chhè ê lō͘, só͘ keng-kòe ê ta̍k kok, lóng ū kā goán pó-hō͘.
24:18 Siōng-chú mā tī goán ê bīn-chêng kā só͘-ū ê jîn-bîn kóaⁿ chhut-.khì, kóaⁿ-chhut tòa tī chit só͘-chāi ê A-mô͘-lī lâng, só͘-í, goán mā beh ho̍k-sāi Siōng-chú, in-ūi I sī goán ê Siōng-tè. "
24:19 Io-siú-ah tùi jîn-bîn kóng, " Lín bē tàng ho̍k-sāi Siōng-chú, in-ūi I sī sèng ê Siōng-tè, choa̍t-tùi bô iông-ín ēng pa̍t-ê sîn-bêng kah I phit-phòe, bô beh sià-bián lín ê kòe-sit, lín ê chōe-ok.
24:20 Lín nā lī-khui Siōng-chú khì ho̍k-sāi gōa-pang ê sîn-bêng, Siōng-chú tī kàng hok-khì hō͘ lín liáu-āu, beh oa̍t tńg-sin lâi kàng chai-hō hō͘ lín, kā lín bia̍t-bông. "
24:21 Jîn-bîn ìn Io-siú-ah kóng, " Bô lah; goán tiāⁿ tio̍h beh ho̍k-sāi Siōng-chú. "
24:22 Io-siú-ah tùi jîn-bîn kóng, " Lín kéng Siōng-chú lâi kā I ho̍k-sāi, lín kakī chò lín ê kiàn-chèng. " In ìn kóng, " Hó, goán lâi chò kiàn-chèng. "
24:23 Io-siú-ah kóng, " Lín taⁿ tio̍h tû-khì lín tiong-kan só͘-ū gōa-pang ê sîn-bêng, hō͘ lín choan-sim kui-ǹg Siōng-chú — I-su-la-el ê Siōng-tè. "
24:24 Jîn-bîn ìn Io-siú-ah kóng, " Goán beh ho̍k-sāi Siōng-chú — goán ê Siōng-tè, chun-thàn I ê ōe. "
24:25 Hit ji̍t, Io-siú-ah chiū kah jîn-bîn li̍p-iok, tī Sī-khiàm kā in siat-li̍p lu̍t-lē kah hoat-tō͘.
24:26 Io-siú-ah kā chiahê ōe lóng siá tī Siōng-tè lu̍t-hoat ê chheh, koh tī hia khiā chi̍t tè tōa chio̍h-thâu, to̍h-sī tī Siōng-chú sèng-só͘ ê piⁿ-á ê siōng chhiū kha.
24:27 Io-siú-ah tùi chèng lâng kóng, " Lí khòaⁿ, chit-ê chio̍h-thâu beh chò lán ê kiàn-chèng, in-ūi i ū thiaⁿ tio̍h Siōng-chú só͘ hoan-hù lán it-chhè ê ōe, só͘-í, beh tùi lín chò kiàn-chèng, khióng-kiaⁿ lín ē pōe-ge̍k lín ê Siōng-tè. "
24:28 Io-siú-ah chiū chhe jîn-bîn chhut-.khì, ta̍k lâng chiū tńg-khì i só͘ tit tio̍h ê tē hia.
24:29 Io-siú-ah kah Ê-lī-a-chal mā Sí-bông
Chiahê tāichì í-āu, Siōng-tè ê lô͘-po̍k, Nùn ê kiáⁿ Io-siú-ah, chi̍t-pah cha̍p hòe chiū sí.
24:30 In chiū kā i bâi-chòng tī i ê sán-gia̍p ê kéng-kài lāi, to̍h-sī tī E-hu-laim soaⁿ-tē ê Têng-ná-se-la̍h, tī Ga-sih soaⁿ ê pak pêng.
24:31 Io-siú-ah tī-.leh ê ji̍t kah Io-siú-ah sí liáu-āu, hiahê chai-iáⁿ Siōng-chú ūi I-su-la-el lâng só͘ kiâⁿ chiahê tāichì ê tiúⁿ-ló iáu tī-.leh ê sî, I-su-la-el lâng lóng ho̍k-sāi Siōng-chú.
24:32 I-su-la-el lâng tùi Ai-gi̍p só͘ tòa-lâi Iô-sé-huh ê kut-thâu, in kā i bâi-chòng tī Sī-khiàm, to̍h-sī Iâ-kop chá-chêng ēng chi̍t-pah gîn tùi Sī-khiàm ê lāu-pē Ha-mo͘l hiahê kiáⁿ só͘ bé-.lâi ê tē, chiū chò Iô-sé-huh kiáⁿ-sun ê sán-gia̍p.
24:33 A-lông ê kiáⁿ Ê-lī-a-chal mā sí, in chiū kā i bâi-chòng tī i ê kiáⁿ Hui-ne-hah só͘ tit tio̍h ê soaⁿ-lūn-á, to̍h-sī tī E-hu-laim ê soaⁿ-tē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。