約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Io-siú-ah Khián-sàng Tang pêng Chi-cho̍k ê Lâng Tńg-khì Kò͘-hiong
Hit sî, Io-siú-ah kiò Lū-biān lâng, Ga̍t lâng kah Má-ná-se pòaⁿ chi-cho̍k ê lâng lâi,
22:2 tùi in kóng, " Siōng-tè ê lô͘-po̍k Mô͘-se só͘ bēng-lēng lín ê, lín lóng chun-siú, góa só͘ bēng-lēng lín ê, lín mā lóng chun-thàn.
22:3 Lín chiah chē ji̍t lóng bô lī-khui lín ê hiaⁿ-tī, it-ti̍t kàu kin-á-ji̍t, lín mā ū siú Siōng-chú — lín ê Siōng-tè só͘ bēng-lēng lín tio̍h siú ê.
22:4 Taⁿ Siōng-chú — lín ê Siōng-tè chiàu I só͘ èng-ín ê, hō͘ lín hiaⁿ-tī tit tio̍h pêng-an, taⁿ lín thang tò tńg-khì lín ê pò͘-pêⁿ, kàu Siōng-tè ê lô͘-po̍k Mô͘-se tī Iol-tàn hô hit pêng só͘ sù hō͘ lín chò sán-gia̍p ê tē.
22:5 Chóng-.sī, lín pek-chhiat tio̍h kín-sīn, chun-thàn Siōng-tè ê lô͘-po̍k Mô͘-se só͘ bēng-lēng lín ê kài-bēng lu̍t-hoat, thiàⁿ Siōng-chú — lín ê Siōng-tè, kiâⁿ I it-chhè ê tō-lō͘, siú I ê kài-bēng kah I kiat-liân, chīn-sim chīn-sèng ho̍k-sāi I. "
22:6 Chiū ánne, Io-siú-ah kā in chiok-hok, chhe in khì, in chiū tńg-khì in ê pò͘-pêⁿ.
22:7 Má-ná-se pòaⁿ chi-cho̍k, Mô͘-se í-keng tī Ba-siáng pun gia̍p hō͘ in; iáu pòaⁿ chi-cho̍k Io-siú-ah tī Iol-tàn hô hit pêng sai pêng, tī in hiaⁿ-tī tiong-kan pun gia̍p hō͘ in. Io-siú-ah chhe in tńg-khì pò͘-pêⁿ ê sî, kā in chiok-hok,
22:8 koh kā in hoan-hù kóng, " Lín tio̍h tòa chin chē châi-bu̍t, chin chē chengseⁿ kah gîn, kim, tâng, thih kah chin chē saⁿ-khò͘, tńg-khì lín ê pò͘-pêⁿ, kā lín só͘ chhiúⁿ tùi-te̍k ê chiàn-lī-phín kah lín ê hiaⁿ-tī chò-hóe pun.
22:9 Chiū ánne, Lū-biān lâng, Ga̍t lâng, Má-ná-se pòaⁿ chi-cho̍k ê lâng, tùi Ka-nân tē ê Sī-lô chhut-hoat, lī-khui I-su-la-el lâng, beh tńg-khì in tit tio̍h Gi-lia̍t tē, to̍h-sī chiàu Siōng-chú thok Mô͘-se só͘ bēng-lēng ê, tit tio̍h chò sán-gia̍p ê tē.
22:10 Iol-tàn Hô piⁿ ê Chè-tôaⁿ
Lū-biān lâng, Ga̍t lâng kah Má-ná-se pòaⁿ chi-cho̍k, kàu Iol-tàn hô piⁿ it-tài ê Ka-nân tē, chiū tī kīn Iol-tàn hô hia, khí chi̍t chō tôaⁿ, hit-ê tôaⁿ khí liáu chin tōa.
22:11 I-su-la-el lâng thiaⁿ tio̍h kóng, " Lí khòaⁿ, Lū-biān lâng, Ga̍t lâng kah Má-ná-se pòaⁿ chi-cho̍k ū tī Ka-nân tē ê thâu-chêng khí chi̍t chō tôaⁿ, Iol-tàn hô ê piⁿ-á, I-su-la-el lâng kòe-.khì ê só͘-chāi. "
22:12 I-su-la-el lâng thiaⁿ-.tio̍h, I-su-la-el choân hōe-chiòng lóng chū-chi̍p tī Sī-lô, beh chiūⁿ-khì kah in kau-chiàn.
22:13 I-su-la-el lâng chhe chè-si Ê-lī-a-chal ê kiáⁿ Hui-ne-hah khì Gi-lia̍t tē kìⁿ Lū-biān lâng, Ga̍t lâng kah Má-ná-se pòaⁿ chi-cho̍k;
22:14 koh chhe cha̍p-ê siú-léng kah i khì, to̍h-sī I-su-la-el ta̍k chi-cho̍k ta̍k cho̍k chi̍t-ê siú-léng, ta̍k lâng tī I-su-la-el kun-tūi tiong chò cho̍k-tiúⁿ.
22:15 In kàu Gi-lia̍t tē, kìⁿ tio̍h Lū-biān lâng, Ga̍t lâng kah Má-ná-se pòaⁿ chi-cho̍k, tùi in kóng,
22:16 " Siōng-chú ê choân hōe-chiòng ánne kóng, lín pōe-ge̍k I-su-la-el ê Siōng-tè, kin-á-ji̍t oa̍t tńg-sin bô koh tòe Siōng-chú, ūi kakī khí chi̍t chō tôaⁿ, tì-sú kin-á-ji̍t pōe-ge̍k Siōng-chú, hoān tio̍h che tàu-té sī siáⁿ-mi̍h chōe?
22:17 Chá-chêng tùi Boh-ol ê chōe, lán kám iáu lia̍h-chò sī sió-khóa? Sûi-jiân un-e̍k lîm-kàu Siōng-chú ê hōe-chiòng, kàu kin-á-ji̍t lán iáu-bōe chheng-khì.
22:18 Lín kin-á-ji̍t kèng-jiân oa̍t tńg-sin bô koh tòe Siōng-chú! Lín kin-á-ji̍t pōe-ge̍k Siōng-chú, bîn-á-chài I ē tùi I-su-la-el ê choân hōe-chiòng siū-khì.
22:19 Lín só͘ tit tio̍h chò sán-gia̍p ê tē, nā bô chheng-khì, chiū thang kòe-lâi Siōng-chú ê tē ê sán-gia̍p, to̍h-sī Siōng-chú hōe-bō͘ só͘ tiàm ê só͘-chāi, tī goán tiong-kan tit tio̍h gia̍p. Chóng-.sī, m̄ thang pōe-ge̍k Siōng-chú, mā m̄ thang pōe-ge̍k goán, m̄ thang tī Siōng-chú — lán ê Siōng-tè ê tôaⁿ í-gōa, ūi kakī koh khí tôaⁿ.
22:20 Chá-chêng Cha-la̍h ê kan-á-sun A-kan, kám bô tī hit-ê eng-kai hiàn ê mi̍h hoān chōe, chiū ū siū-khì lîm-kàu tī I-su-la-el ê choân hōe-chiòng? Hitê lâng tī i só͘ hoān ê chōe, m̄ nā i kakī chi̍t-ê lâng sí. "
22:21 Chiū ánne, Lū-biān lâng, Ga̍t lâng kah Má-ná-se pòaⁿ chi-cho̍k ìn I-su-la-el kun-tūi ê thâu-lâng kóng,
22:22 " Choân-lêng ê Siōng-tè — Siōng-chú! Choân-lêng ê Siōng-tè — Siōng-chú! I chai, I-su-la-el mā ē chai, goán nā ū pōe-ge̍k ê ì-sù á-.sī pōe-ge̍k Siōng-chú, ( kin-á-ji̍t bô kiù goán ),
22:23 ūi kakī khí tôaⁿ, beh oa̍t tńg-sin bô koh tòe Siōng-chú, á-.sī beh tī hit téng-bīn hiàn sio-chè, sò͘-chè kah siā-un-chè, Siōng-chú ē kā chōe kui hō͘ i.
22:24 Goán chò chit-ê tāichì sī ūi tio̍h thê-hông chiah thiau-kang chò, sī khióng-kiaⁿ āu-ji̍t lín ê kiáⁿ-sun ē tùi goán ê kiáⁿ-sun kóng, ' Lín kah Siōng-chú — I-su-la-el ê Siōng-tè ū siáⁿ-mi̍h koan-hē?
22:25 Lū-biān lâng kah Ga̍t lâng, Siōng-chú tī lín kah goán ê tiong-kan siat chit-ê Iol-tàn hô chò kài-hān, taⁿ lín bô hūn tī Siōng-chú. ' Án-ne, lín ê kiáⁿ-sun chiū ē hō͘ goán ê kiáⁿ-sun bô koh kèng-ùi Siōng-chú.
22:26 Só͘-í, goán chò-hóe kóng, ' Taⁿ lán tio̍h ūi kakī khí chi̍t chō tôaⁿ, m̄-sī ūi tio̍h sio-chè, mā m̄-sī ūi tio̍h pa̍t chióng ê chè,
22:27 to̍h-sī ūi tio̍h lín kah goán ê tiong-kan, í-ki̍p lín kah goán āu-tāi ê tiong-kan chò chèng-kì, hō͘ goán thang tī Siōng-chú ê bīn-chêng, ēng goán ê sio-chè, siā-un-chè kah pa̍t chióng chè lâi ho̍k-sāi I, bián-tit lín ê kiáⁿ-sun āu-ji̍t tùi goán ê kiáⁿ-sun kóng, ' Lín tī Siōng-chú lāi-bīn bô hūn. '
22:28 Só͘-í, goán kóng, ' Pa̍t-ji̍t in nā tùi goán á-.sī goán ê āu-tāi ánne kóng, goán thang ìn kóng: Lín thang khòaⁿ Siōng-chú ê tôaⁿ ê khoán-sit, to̍h-sī goán ê chó͘-sian chá-chêng só͘ khí ê, m̄-sī ūi tio̍h sio-chè kah pa̍t chióng ê chè, to̍h-sī ūi tio̍h beh chò lín kah goán tiong-kan ê chèng-kì. '
22:29 Goán tī Siōng-chú — lán ê Siōng-tè ê hōe-bō͘ chêng í-gōa, lēng-gōa koh khí chi̍t chō tôaⁿ, ūi tio̍h sio-chè, sò͘-chè kah pa̍t chióng ê chè, lâi pōe-ge̍k Siōng-chú, kin-á-ji̍t oa̍t tńg-sin bô koh tòe Siōng-chú, goán choa̍t-tùi bô chit khoán ì-sù. "
22:30 Chè-si Hui-ne-hah kah hōe tiong hiahê siú-léng, í-ki̍p kah i chò-hóe lâi-kàu I-su-la-el tiong ê kun-tūi ê thâu-lâng, to̍h-sī kah i chò-hóe lâi ê, thiaⁿ tio̍h Lū-biān lâng, Ga̍t lâng kah Má-ná-se lâng só͘ kóng ê ōe, chiū lóng lia̍h-chò sī hó.
22:31 Chè-si Ê-lī-a-chal ê kiáⁿ Hui-ne-hah tùi Lū-biān lâng, Ga̍t lâng kah Má-ná-se lâng kóng, " Kin-á-ji̍t, goán chai Siōng-chú tī lán ê tiong-kan, in-ūi lín bô hoān tio̍h chit-ê chōe lâi tek-chōe Siōng-chú. Τaⁿ lín ū kiù I-su-la-el lâng thoat-lī Siōng-chú ê chhiú. "
22:32 Chè-si Ê-lī-a-chal ê kiáⁿ Hui-ne-hah kah hiahê siú-léng, lī-pia̍t Lū-biān lâng, Ga̍t lâng, tùi Gi-lia̍t tē tńg-khì Ka-nân tē, kàu I-su-la-el lâng hia, kā in hôe-hok.
22:33 I-su-la-el lâng lia̍h chit-ê tāichì chò hó, chiū ánne, I-su-la-el lâng oló Siōng-chú, bô koh thê-khí beh chiūⁿ-khì kah Lū-biān lâng, Ga̍t lâng kau-chiàn, lâi húi-hoāi in só͘ tòa ê tē.
22:34 Lū-biān lâng kah Ga̍t lâng kā hit-ê tôaⁿ kiò-chò chèng-kì, in-ūi kóng, chit-ê tôaⁿ tī lán tiong-kan chèng-bêng Siōng-chú sī Siōng-tè.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。