約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 Kî-tha Thó͘-tē ê Hun-phòe
I-su-la-el lâng ê choân hōe-chiòng lóng chū-chi̍p tī Sī-lô, tah hōe-bō͘ tī hia, in-ūi in í-keng cheng-ho̍k hi̍t tē-hng.
18:2 I-su-la-el lâng tiong, iáu ū chhit chi-cho̍k bē tàng tit tio̍h in ê sán-gia̍p.
18:3 Io-siú-ah tùi I-su-la-el lâng kóng, " Siōng-chú — lín chó͘-sian ê Siōng-tè só͘ siúⁿ-sù hō͘ lín ê tē, lín iân-chhiân m̄-khì chhú, beh kàu tang-sî?
18:4 Lín ta̍k chi-cho̍k tio̍h kéng saⁿ-ê lâng, góa beh chhe in khì, in chiū chhut-hoat piàn kiâⁿ hit-ê tē, chiàu in ê hūn-gia̍h ōe-tô͘, chiū tńg-lâi góa chia.
18:5 In tio̍h kā tē hun-chò chhit hūn, Iô-tah iû-goân tī lâm-hong, tòa tī i ê kéng lāi; Iô-sé-huh ke iû-goân tī pak-hong, tòa tī i ê kéng lāi.
18:6 Lín tio̍h kā tē hun-chò chhit hūn, ōe-tô͘ the̍h-lâi góa chia. Góa chiū ē tī Siōng-chú — lán ê Siōng-tè ê bīn-chêng kā lín liam-khau.
18:7 To̍k-to̍k Lē-bī lâng tī lín tiong-kan bô hūn, in-ūi Siōng-chú chè-si ê chit to̍h-sī in ê sán-gia̍p. Ga̍t, Lū-biān kah Má-ná-se pòaⁿ chi-cho̍k, í-keng tī Iol-tàn hô hit pêng tang pêng tit tio̍h tē chò sán-gia̍p, to̍h-sī Siōng-tè ê lô͘-po̍k Mô͘-se só͘ hō͘ in ê. "
18:8 Hiahê lâng chhut-hoat khì, Io-siú-ah bēng-lēng hiahê khì beh ōe tē-tô͘ ê lâng, kóng, " Lín khì piàn kiâⁿ hit-ê tē, ōe-tô͘ tò tńg-lâi góa chia. Góa beh tī Sī-lô chia, Siōng-chú ê bīn-chêng, kā lín liam-khau. "
18:9 In chiū khì, piàn kiâⁿ hit-ê tē, chiàu in ê siâⁿ ōe chò chhit hūn, kì tī chheh-.ni̍h, tò-tńg kàu Sī-lô ê iâⁿ tiong, kìⁿ Io-siú-ah.
18:10 Io-siú-ah chiū tī Sī-lô Siōng-chú ê bīn-chêng, kā in liam-khau. Io-siú-ah tī hia pun tē hō͘ I-su-la-el lâng, chiàu in ê chong-cho̍k.
18:11 Biān-iá-mín Chi-cho̍k Pun tio̍h ê Thó͘-tē
Kā Biān-iá-mín ê chi-cho̍k liam-khau, chiàu in ê chong-cho̍k só͘ tit tio̍h ê tē, hit-ê kài sī tī Iô-tah ê kiáⁿ-sun, Iô-sé-huh ê kiáⁿ-sun ê tiong-kan.
18:12 In pak pêng ê kài, sī tùi Iol-tàn hô khí; i ê kài it-ti̍t khì-kàu I-é-lī-kho siâⁿ piⁿ-á ê pak pêng, koh-chài khì, pôaⁿ-kòe soaⁿ, ǹg sai pêng khì, ti̍t-ti̍t kàu Bia̍t-a-biân ê khòng-iá.
18:13 Hitê kài tùi hia khì-kàu Lù-chuh, kàu Lù-chuh lâm pêng ê piⁿ-á ( Lù-chuh to̍h-sī Be-thel ), i ê kài koh lo̍h-khì kàu A-tha-lio̍k-a-ta̍t, óa-kīn ē-bīn ê Bia̍t-ho-lông lâm pêng ê soaⁿ;
18:14 i ê kài tùi sai pêng oat lo̍h lâm, tùi Pak-hô-lûn thâu-chêng lâm pêng ê soaⁿ, it-ti̍t kàu Iô-tah lâng ê siâⁿ Ki-lia̍t-pa-le̍k( Chiū-sī Ki-lia̍t-iâ-lîm ), che sī in sai pêng ê kài.
18:15 Lâm-pêng sī tùi Ki-lia̍t-iâ-lîm ê ke̍k-thâu khí, i ê kài tùi sai pêng khai-sí, it-ti̍t kàu Nî-hut-to-a ê chúi-chôaⁿ;
18:16 i ê kài koh lo̍h-khì kàu Biān-hin-nóm soaⁿ-kok tùi-bīn ê soaⁿ piⁿ, to̍h-sī Le-hoa-im soaⁿ-kok pak pêng ê soaⁿ, koh lo̍h-khì kàu Hin-nóm soaⁿ-kok, kàu I-é-bú-suh ê lâm pêng, koh lo̍h-khì kàu Ian-lo-gel;
18:17 koh tùi pak pêng chhut-.khì, kàu Ún-sī-le̍k, chhut-khì kàu A-to͘-bêng soaⁿ-phiâⁿ tùi-bīn ê Ki-lī-lio̍k, koh lo̍h-khì kàu Lū-biān ê kiáⁿ Pho-hán ê chio̍h-pôaⁿ.
18:18 Koh khì A-la̍h-bah tùi-bīn pak pêng ê piⁿ-á, lo̍h-khì kàu A-la̍h-bah;
18:19 i ê kài kàu Pek-hat-la̍h pak pêng ê piⁿ-á, chit-ê kài ti̍t-ti̍t kàu Iâm-hái pak pêng ê hái-oan, to̍h-sī Iol-tàn hô lâm pêng ê hô kháu, che sī i lâm pêng ê kài.
18:20 Tang pêng ê kài kàu Iol-tàn hô. Che sī Biān-iá-mín lâng ê sán-gia̍p, chiàu in ê chong-cho̍k, in sì-kho͘-ûi ê kau-kài.
18:21 Biān-iá-mín ê chi-cho̍k chiàu in ê chong-cho̍k só͘ tit tio̍h ê siâⁿ, to̍h-sī I-é-lī-kho siâⁿ, Pek-hat-la̍h, I-be̍k-ki-sek,
18:22 Bia̍t-a-la̍h-bah, Che-má-láim, Be-thel,
18:23 Am-móng, Ba-la̍h, O͘-hu-lah,
18:24 Ke-phal-am-mô͘-nî, Gô-hut-nî, Ge-bah, kiōng cha̍p-jī chō siâⁿ kah i ê chng-thâu.
18:25 Koh ū Gi-bóng, La̍h-má, Pí-lo̍k,
18:26 Mi-su-peh, Ke-hui-la̍h, Mo-chah,
18:27 Lī-kian, Tha-lī-pì-le̍k, Tha-la̍h-la̍h,
18:28 Ché-la̍h, Í-lī-hut, I-é-bú-suh （ Chiū-sī Ê-lú-sa-lèm ）, Gi-be-at, Gi-lia̍t, kiōng cha̍p-sì chō siâⁿ kah i ê chng-thâu. Che sī Biān-iá-mín lâng só͘ tit tio̍h ê sán-gia̍p, chiàu in ê chong-cho̍k.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。