約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 Má-ná-se Pòaⁿ Chi-cho̍k
Che sī Má-ná-se ê chi-cho̍k liam-khau só͘ tit tio̍h ê sán-gia̍p, in-ūi i sī Iô-sé-huh ê tōa-kiáⁿ. Koan-hē Ma-kil sī Má-ná-se ê tōa-kiáⁿ, Gi-lia̍t ê lāu-pē, in-ūi i sī ióng-sū, chiū tit tio̍h Gi-lia̍t kah Ba-siáng.
17:2 Má-ná-se kî-tha ê kiáⁿ-sun, chiàu in ê chong-cho̍k, liam-khau pun tē, to̍h-sī A-bi-e-chel ê kiáⁿ-sun, He-le̍k ê kiáⁿ-sun, A-su-li-el ê kiáⁿ-sun, Sī-khiàm ê kiáⁿ-sun, He-hoel ê kiáⁿ-sun, Se-mi-tah ê kiáⁿ-sun; chiahê chiàu in ê chong-cho̍k, lóng sī Iô-sé-huh ê kiáⁿ Má-ná-se ê chapo͘ teng.
17:3 Má-ná-se ê goân-sun, Ma-kil ê kan-á-sun, Gi-lia̍t ê sun, He-hoel ê kiáⁿ, Che-lo-hu-hat bô kiáⁿ, chí ū chabó͘ kiáⁿ. I ê chabó͘ kiáⁿ miâ kiò-chò Mah-la̍h, nó͘-ah, Hog-lah, Mil-kah, Til-chah.
17:4 In lâi-kàu chè-si Ê-lī-a-chal kah Nùn ê kiáⁿ Io-siú-ah kah chèng siú-léng ê bīn-chêng, kóng, " Siōng-chú bat bēng-lēng Mô͘-se, tī goán hiaⁿ-tī tiong pun gia̍p hō͘ goán. " I chiū chiàu Siōng-chú só͘ bēng-lēng ê, tī in lāu-pē ê hiaⁿ-tī tiong, pun gia̍p hō͘ in.
17:5 Tī Iol-tàn hô hit pêng, Gi-lia̍t kah Ba-siáng tē í-gōa, Má-ná-se koh liam-khau tit tio̍h cha̍p hūn ê tē.
17:6 In-ūi Má-ná-se hiahê chabó͘ sun, tī Má-ná-se ê kiáⁿ-sun tiong tit tio̍h gia̍p. Gi-lia̍t tē sī sio̍k Má-ná-se kî-tha ê kiáⁿ-sun.
17:7 Má-ná-se ê tē-kài, tùi A-sel khí, kàu Sī-khiàm ê thâu-chêng ê Bi̍t-bí-tha, hit-ê kài ǹg chiàⁿ chhiú pêng, kàu Ún-tha-phó͘-a tòa ê jîn-bîn hia.
17:8 Tap-pú-ah ê tē kui Má-ná-se, to̍k-to̍k Má-ná-se ê kau-kài ê Tap-pú-ah kui E-hu-laim ê kiáⁿ-sun.
17:9 I ê kài lo̍h-khì kàu Ka-ná hô, tī hô ê lâm pêng, tī Má-ná-se hiahê siâⁿ ê tiong-kan, chiahê siâⁿ sī sio̍k E-hu-laim. Má-ná-se ê tē-kài sī tī hô ê pak pêng, thàng-kàu hái ûi-chí.
17:10 Lâm sio̍k E-hu-laim, pak sio̍k Má-ná-se, ēng hái chò i ê kài; pak pêng kàu A-sel, tang pêng kàu It-sa-kal.
17:11 Má-ná-se tī It-sa-kal kah A-sel ê kéng lāi, ū Biat-siang kah i ê chng-thâu, Ip-le-àm kah i ê chng-thâu, Tô-jíⁿ tòa ê jîn-bîn kah i ê chng-thâu, koh ū saⁿ só͘-chāi ê soaⁿ-tē, to̍h-sī Ian-tol kah i ê chng-thâu, Tha-nak tòa ê jîn-bîn kah i ê chng-thâu, Me-gi-tóng tòa ê jîn-bîn kah i ê chng-thâu.
17:12 Chóng-.sī, Má-ná-se ê kiáⁿ-sun bē tàng kā hiahê siâⁿ ê jîn-bîn kóaⁿ chhut-.khì, Ka-nân lâng chiū koat-ì beh tòa tī hit-ê tē.
17:13 Kàu I-su-la-el lâng kiông-sēng ê sî, chiū hō͘ Ka-nân lâng chò khó͘-kang, bô choân-pō͘ kā in kóaⁿ chhut-.khì.
17:14 E-hu-laim kah Má-ná-se Iau-kiû koh khah Chē Thó͘-tē
Iô-sé-huh ê kiáⁿ-sun tùi Io-siú-ah kóng, " Siōng-chú pêng-sî sù-hok goán, goán chiū chiâⁿ-chò tōa cho̍k, lí án-chóaⁿ kantaⁿ ēng chi̍t khau ê hūn-gia̍h hō͘ goán chò sán-gia̍p? "
17:15 Io-siú-ah tùi in kóng, " Lín nā kó-jiân chiâⁿ-chò tōa cho̍k, E-hu-laim tē tùi lín lâi kóng sī khah e̍h-sè, lí chiū thang chiūⁿ-khì chhiū-nâ, tī Pe-lí-ji lâng kah Le-hoa-im lâng ê tē, tī hia ūi kakī lâi khai-khún. "
17:16 Iô-sé-huh ê kiáⁿ-sun kóng, " Hitê tē bô kàu-gia̍h iông-ín goán, koh-chài tòa tī pêng-goân ê Ka-nân lâng, to̍h-sī tòa tī Biat-siang kah i ê chng-thâu kah tòa E-chu-le-el pêng-goân ê lâng lóng ū thih-chhia.
17:17 Io-siú-ah tùi Iô-sé-huh ê ke, to̍h-sī E-hu-laim kah Má-ná-se ê lâng, kóng, " Lí sī tōa cho̍k koh kiông-sēng, m̄ nā chi̍t khau ê hūn-gia̍h,
17:18 Soaⁿ-tē mā beh kui lí, sûi-jiân sī chhiū-nâ, lí mā thang kā i chhò; i ê ke̍k-thâu mā beh sio̍k lí. Ka-nân lâng sûi-jiân ū thih-chhia koh kiông-sēng, lí mā ē-tàng kā in kóaⁿ chhut-.khì. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。