約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 Iol-tàn Hô Sai-pêng Thó͘-tē ê Hun-phòe
I-su-la-el lâng tī Ka-nân tē só͘ tit tio̍h ê sán-gia̍p, to̍h-sī chè-si Ê-lī-a-chal kah Nùn ê kiáⁿ Io-siú-ah kah I-su-la-el ta̍k chi-cho̍k ê cho̍k-tiúⁿ, só͘ pun hō͘ in ê, lóng kì tī ē-té:
14:2 Sī chiàu Siōng-chú thok Mô͘-se só͘ bēng-lēng ê, liam-khau pun hō͘ káu chi-cho̍k koh pòaⁿ chi-cho̍k.
14:3 In-ūi Mô͘-se tī Iol-tàn hô hit pêng, í-keng pun gia̍p hō͘ nn̄g-ê chi-cho̍k koh pòaⁿ chi-cho̍k, to̍k-to̍k tī in tiong-kan bô pun gia̍p hō͘ Lē-bī lâng.
14:4 In-ūi Iô-sé-huh ê kiáⁿ-sun sī nn̄g chi-cho̍k, to̍h-sī Má-ná-se kah E-hu-laim, chóng-.sī, bô kā tē pun hō͘ Lē-bī lâng chò sán-gia̍p, chí ū hō͘ in siâⁿ thang tòa kah siâⁿ ê kau-iá thang chò chengseⁿ kah châi-bu̍t ê lō͘-ēng.
14:5 I-su-la-el lâng chiàu Siōng-chú só͘ bēng-lēng Mô͘-se ê khì kiâⁿ, lâi pun hit-ê tē.
14:6 Ka-le̍p Pun tio̍h He-bú-lông
Hit sî, Iô-tah lâng tī Gil-gal kìⁿ Io-siú-ah, ū Ki-nî-sé cho̍k E-hun-neh ê kiáⁿ Ka-le̍p, kā i kóng, " Chá tī Ka-té-si Bal-né-ah, Siōng-chú tùi I ê lô͘-po̍k Mô͘-se só͘ kóng, koan-hē lí góa ê tāichì, lí lóng chai.
14:7 Siōng-tè ê lô͘-po̍k Mô͘-se tùi Ka-té-si Bal-né-ah chhe góa lâi thau-khòaⁿ chit-ê tē, hit sî góa tú-á sì-cha̍p hòe, góa chīn góa ê sim kā i hôe-hok.
14:8 Chóng-.sī kah góa chiūⁿ-khì hiahê hiaⁿ-tī hō͘ jîn-bîn ê sim sit-chì; to̍k-to̍k góa choan-sim tòe Siōng-chú — góa ê Siōng-tè.
14:9 Hit ji̍t, Mô͘-se chiùchōa kóng, ' Lí ê kha só͘ ta̍h ê tē, tiāⁿ tio̍h ē kui lí kah lí ê kiáⁿ-sun, éng-oán chò sán-gia̍p, in-ūi lí choan-sim kin-tòe Siōng-chú — góa ê Siōng-tè.'
14:10 " Lí khòaⁿ, Siōng-chú chiàu I só͘ kóng ê, hō͘ góa oa̍h-.leh í-keng sì-cha̍p-gō͘ nî, to̍h-sī tùi I-su-la-el lâng kiâⁿ tī khòng-iá, Siōng-chú kā Mô͘-se kóng chiahê ōe ê sî. Lí khòaⁿ, taⁿ góa peh cha̍p-gō͘ hòe à,
14:11 góa iáu koh ióng-kiāⁿ, kah Mô͘-se chhe góa khì hit ji̍t sio-siâng, bô-lūn sī cheng-chiàn, á-.sī chhut-ji̍p, góa ê khùi-la̍t hit sî án-chóaⁿ, chitmá góa ê khùi-la̍t mā sī iû-goân ánne.
14:12 Kiû lí kā Siōng-chú hit ji̍t só͘ kóng ê soaⁿ-tē hō͘ góa, in-ūi hit ji̍t lí mā ū thiaⁿ-.tio̍h, tī hia ū A-lap cho̍k ê lâng, i ê siâⁿ khoah-tōa koh kian-kò͘. Nā Siōng-chú kah góa tông-chāi, góa chiū ē kā in kóaⁿ chhut-.khì, chiàu Siōng-chú só͘ kóng ê. "
14:13 Io-siú-ah chiū kā i chiok-hok, ēng He-bú-lông hō͘ E-hun-neh ê kiáⁿ Ka-le̍p chò sán-gia̍p.
14:14 Só͘-í, He-bú-lông chiâⁿ-chò Ki-nî-sé cho̍k E-hun-neh ê kiáⁿ Ka-le̍p ê sán-gia̍p, it-ti̍t kàu kin-á-ji̍t, in-ūi i choan-sim kin-tòe Siōng-chú — I-su-la-el ê Siōng-tè.
14:15 （ He-bú-lông í-chêng kiò-chò Ki-lia̍t-a-ba, chit-ê Al-bah sī A-lap cho̍k tiong tē-it tōa ê lâng. ） Chiū ánne, kok lāi thài-pêng, bô koh ū kau-chiàn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。