約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
13:1 Iáu-bōe Chiàm-niá ê Thó͘-tē
Io-siú-ah nî lāu, ū hòe à, Siōng-chú tùi i kóng, " Lí nî lāu, ū hòe à, eng-kai cheng-ho̍k ê tē, iáu ū chin chē,
13:2 só͘ chhun lo̍h-.lâi ê tē, to̍h-sī Hui-lī-sū lâng ê choân kéng kah Ge-siul lâng ê choân tē.
13:3 Τùi Ai-gi̍p thâu-chêng ê Si-ho͘l, ǹg pak kàu Ek-lóng ê tē-kài, che chiū sǹg-chò Ka-nân lâng ê tē. Hui-lī-sū lâng gō͘-ê siú-léng, to̍h-sī Ga-jah lâng, A-si-to͘t lâng, A-si-ke-lông lâng, Ga̍t lâng, Ek-lóng lâng, koh ū lâm-hong A-ōe lâng.
13:4 Ka-nân lâng ê choân tē, Si-tòng lâng ê Bí-a-la̍h, kàu A-hek, it-ti̍t kàu A-mô͘-lī lâng ê kau-kài.
13:5 Koh ū Ge-bal lâng ê tē kah ǹg ji̍t chhut choân-pō͘ ê Le-ba-nòng, tùi Hel-móng soaⁿ-kha ê Pa-lek-ka-tek, kàu Ha-mat ê lō͘-kháu.
13:6 Τòa soaⁿ-tē só͘-ū ê jîn-bîn, tùi Le-ba-nòng kàu Bí-su-lī-hut-má-im, Si-tòng ê kûn-chiòng, góa beh tī I-su-la-el lâng ê bīn-chêng kā in kóaⁿ chhut-.khì. Lí thang chiàu góa só͘ bēng-lēng lí ê, pun hiahê tē hō͘ I-su-la-el lâng chò sán-gia̍p.
13:7 Taⁿ lí tio̍h kā chit-ê tē pun hō͘ káu chi-cho̍k kah Má-ná-se pòaⁿ chi-cho̍k chò sán-gia̍p. "
13:8 Iol-tàn Hô Tang pêng Thó͘-tē ê Hun-phòe
Lū-biān kah Ga̍t nn̄g chi-cho̍k, í-ki̍p Má-ná-se iáu pòaⁿ chi-cho̍k, chò-hóe tit tio̍h Mô͘-se só͘ siúⁿ-sù ê sán-gia̍p, tī Iol-tàn hô tang pêng hit pêng, to̍h-sī chiàu Siōng-tè ê lô͘-po̍k Mô͘-se só͘ hō͘ in ê;
13:9 sī tùi Al-nông soaⁿ-kok piⁿ ê A-ló-el kah soaⁿ-kok tiong ê siâⁿ, í-ki̍p Me-tí-ba ê choân pêng-goân, it-ti̍t kàu Ti-bóng,
13:10 kah tiàm tī He-si-bóng chò ông, A-mô͘-lī lâng ê ông Si-hông chiahê siâⁿ, kàu Am-móng lâng ê kau-kài;
13:11 koh ū Gi-lia̍t tē, Ge-siul lâng kah Má-kah lâng ê tē-kài, í-ki̍p choân-pō͘ ê Hel-móng soaⁿ, choân-pō͘ ê Ba-siáng, kàu Sal-kah;
13:12 koh ū Ba-siáng ông O͘-k ê choân kok, i tī A-su-tha-lo͘t kah E-tu-lé chò ông （ I sī Le-hoa-im cho̍k só͘ chhun lo̍h-.lâi ê）. In-ūi chiahê lóng sī Mô͘-se só͘ phah ê, só͘ kóaⁿ chhut-.khì ê.
13:13 Chóng-.sī, I-su-la-el lâng bô kóaⁿ Ge-siul lâng kah Má-kah lâng; kàu kin-á-ji̍t Ge-siul kah Má-kah iû-goân tiàm tī I-su-la-el lâng ê tiong-kan.
13:14 To̍k-to̍k bô pun gia̍p hō͘ Lē-bī ê chi-cho̍k. Siōng-chú — I-su-la-el ê Siōng-tè ēng sio-chè ê chè-mi̍h chò in ê sán-gia̍p, chiàu Siōng-chú só͘ tùi i kóng ê.
13:15 Lū-biān Chi-cho̍k Pun tio̍h ê Thó͘-tē
Mô͘-se pun hō͘ Lū-biān chi-cho̍k ê, chiàu in ê chong-cho̍k.
13:16 In ê kéng-kài sī Al-nông soaⁿ-kok piⁿ ê A-ló-el kah soaⁿ-kok tiong ê siâⁿ, óa-kīn Me-tí-ba ê choân-pō͘ pêng-goân;
13:17 He-si-bóng kah i pêng-goân hiahê siâⁿ, to̍h-sī Ti-bóng, Pa-boa̍t-pa-le̍k, Pek-pa-le̍k-bián,
13:18 Ia-hat, Ke-ti-mo͘t, Me-hoa-at,
13:19 Ki-lia̍t-tháim, Si-bú-mah kah soaⁿ-kok tiong ê soaⁿ Sè-lia̍t-hap-sa-hat,
13:20 Pek-pì-jíⁿ, Pi-su-gah ê soaⁿ-phiâⁿ, Pek-iâ-se-boa̍t;
13:21 koh ū pêng-goân hiahê siâⁿ, tī He-si-bóng chò ông ê A-mô͘-lī lâng ê ông Si-hông ê choân kok. Mô͘-se phah i kah Mí-tiân hiahê siú-léng, to̍h-sī Í-bī, Le-kém, Chu-ul, Hu-ul, Lī-pa; chiahê lóng sī tiàm tī hit só͘-chāi chò siú-léng, sio̍k tī Si-hông ê.
13:22 I-su-la-el lâng thâi hiahê lâng ê sî, mā ēng to thâi Boh-ol ê kiáⁿ — su̍t-sū Pa-lân.
13:23 Lū-biān lâng ê kéng-kài, i ê sán-gia̍p tī Iol-tàn hô kah hô piⁿ ê tē. Che sī Lū-biān lâng ê sán-gia̍p, chiàu in ê chong-cho̍k, chiahê siâⁿ, chiahê chng-thâu.
13:24 Ga̍t Chi-cho̍k Pun tio̍h ê Thó͘-tē
Mô͘-se pun hō͘ Ga̍t lâng, chiàu Ga̍t chi-cho̍k ê chong-cho̍k.
13:25 In ê kéng-kài sī Ia-chel kah Gi-lia̍t só͘-ū ê siâⁿ kah Am-móng lâng chi̍t-pòaⁿ ê tē, kàu Lap-bah thâu-chêng ê A-ló-el;
13:26 Tùi He-si-bóng kàu La-mat Mit-peh kah Be-to-niúm, koh tùi Ma-há-niam, kàu Te-bil ê kéng-kài,
13:27 kah soaⁿ-kok tiong ê Pek-a-lân, Pek-lêng-la̍h, Su-kot kah Sat-hun, to̍h-sī He-si-bóng ông Si-hông kok lāi só͘ chhun lo̍h-.lâi ê tē, í-ki̍p Iol-tàn hô kah hô piⁿ ê tē, it-ti̍t kàu Kin-né-lo̍t hái ê ke̍k-thâu, tī Iol-tàn hô hit pêng ê tang pêng.
13:28 Che sī Ga̍t lâng chiàu i ê chong-cho̍k só͘ tit tio̍h chò sán-gia̍p chiahê siâⁿ kah chng-thâu.
13:29 Má-ná-se Pòaⁿ Chi-cho̍k Pun tio̍h ê Thó͘-tē
Mô͘-se pun hō͘ Má-ná-se pòaⁿ chi-cho̍k ê, sī chiàu Má-ná-se lâng pòaⁿ chi-cho̍k ê chong-cho̍k.
13:30 In ê kéng-kài sī tùi Ma-há-niam khí, pau-hâm Ba-siáng choân tē, to̍h-sī Ba-siáng ông O͘-k ê choân kok kah tī Ba-siáng Ia-il só͘-ū ê siâⁿ, chóng-kiōng la̍k-cha̍p-ê siâⁿ.
13:31 Gi-lia̍t ê chi̍t-pòaⁿ kah A-si-tha-lot, E-tu-lé, sī sio̍k Ba-siáng ông O͘-k ê kok ê siâⁿ, sī hō͘ Má-ná-se ê kiáⁿ Ma-kil, to̍h-sī Ma-kil ê kiáⁿ-sun ê chi̍t-pòaⁿ, chiàu i ê chong-cho̍k.
13:32 Téng-bīn sī Mô͘-se tī Iol-tàn hô hit pêng tang pêng, I-é-lī-kho siâⁿ tùi-bīn Mô͘-ap ê pêng-goân, só͘ pun ê sán-gia̍p.
13:33 To̍k-to̍k Lē-bī chi-cho̍k, Mô͘-se bô pun gia̍p hō͘ in. Siōng-chú — I-su-la-el ê Siōng-tè sī chò in ê sán-gia̍p, chiàu I só͘ kā in kóng ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。