創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 A-bu-la-hàm hòe-siū tn̂g, nî lāu, Siōng-chú tī it-chhè ê tāichì lóng sù-hok hō͘ A-bu-la-hàm.
24:2 A-bu-la-hàm tùi i chhù lāi koán-lí choân-pō͘ sán-gia̍p ê lāu lô͘-po̍k kóng, " Chhiáⁿ kā lí ê chhiú hē tī góa ê tōa-thúi ē,
24:3 góa beh kiò lí kí Siōng-chú, to̍h-sī thiⁿ ê Siōng-tè kah tē ê Siōng-tè lâi chiùchōa. Góa tòa tī Ka-nân lâng ê tiong-kan, lí m̄ thang kā góa ê kiáⁿ chhōa in ê chabó͘ kiáⁿ lâi chò bó͘.
24:4 Lí tio̍h khì góa ê pún-tē pún cho̍k, kā góa ê kiáⁿ Í-sak chhōa chi̍t-ê bó͘. "
24:5 Lô͘-po̍k ìn i kóng, " Siat-sú chabó͘ gín'á m̄-khéng tòe góa lâi chit só͘-chāi, góa kám tio̍h kā lí ê kiáⁿ tòa tńg-khì lí só͘ tùi hia chhut-.lâi ê só͘-chāi? "
24:6 A-bu-la-hàm kā i kóng, " Lí tio̍h kín-sīn, m̄ thang chhōa góa ê kiáⁿ tńg-khì hia.
24:7 Thiⁿ ê Siōng-tè bat chhōa góa lī-khui lāu-pē ê ke kah góa pún cho̍k ê tē. I tùi góa kóng ōe, mā tùi góa chiùchōa kóng, ' Góa beh kā chit-ê tē siúⁿ-sù hō͘ lí ê kiáⁿ-sun. ' I ē chhe I ê sù-chiá tī lí ê bīn-chêng, lí chiū thang tùi hia kā góa ê kiáⁿ chhōa chi̍t-ê bó͘.
24:8 Siat-sú chabó͘ gín'á m̄-khéng tòe lí lâi, góa kah lí chiù ê chōa chiū kah lí bô koan-hē; chóng-.sī, m̄ thang chhōa góa ê kiáⁿ tńg-khì hia. "
24:9 Lô͘-po̍k chiū kā i ê chhiú hē tī chú-lâng A-bu-la-hàm ê tōa-thúi hā, ūi tio̍h chit-ê tāichì tùi i chiùchōa.
24:10 Hitê lô͘-po̍k tùi i chú-lâng ê lo̍k-tô tiong, chhú cha̍p chiah lo̍k-tô, koh tòa i chú-lâng ta̍k chióng ê châi-pó, chhut-hoat khì Mê-só͘-po-ta-miah, lâi-kàu Na-kho͘l ê siâⁿ.
24:11 Ji̍t beh àm, chèng chabó͘ gín'á chhut-lâi chhiūⁿ chúi; i chiū hō͘ lo̍k-tô kūi tī siâⁿ gōa ê chéⁿ piⁿ.
24:12 I kóng, " Góa ê chú-lâng A-bu-la-hàm ê Siōng-tè — Siōng-chú ah, kiû Lí si un hō͘ góa ê chú-lâng A-bu-la-hàm, hō͘ góa kin-á-ji̍t ū hó ki-hōe.
24:13 Góa taⁿ khiā tī chéⁿ piⁿ, siâⁿ lāi lâng ê chabó͘ gín'á teh chhut-lâi chhiūⁿ chúi.
24:14 Góa beh tùi chi̍t-ê chabó͘ gín'á kóng, ' Chhiáⁿ pàng-lo̍h lí ê chúi-pân, hō͘ góa lim chúi. ' I nā kóng, ' Chhiáⁿ lim, góa mā beh hō͘ lí ê lo̍k-tô lim. ' Goān hit-ê chabó͘ gín'á sī Lí só͘ tiāⁿ tio̍h beh hō͘ Lí ê lô͘-po̍k Í-sak chò bó͘ ê. Án-ne, góa chiū chai Lí si un hō͘ góa ê chú-lâng. "
24:15 Ōe kóng iáu-bōe soah, Li-bé-kah keng-kah-thâu phāiⁿ chúi-pân chhut-.lâi. I sī Be-thu-el seⁿ ê, Be-thu-el sī A-bu-la-hàm ê sió-tī Na-kho͘l ê bó͘ Mil-kah ê kiáⁿ.
24:16 Hitê chabó͘ gín'á bīn-māu hui-siông súi, iáu-sī chāi-sek-lí, mā m̄ bat ū lâng chhin-kīn i. I lo̍h-khì chéⁿ piⁿ, chhiūⁿ móa i ê pân chiū khí-.lâi.
24:17 Lô͘-po̍k cháu chìn-chêng kā i gêng-chiap, kóng, " Kiû lí kā pân lāi ê chúi tām-po̍h-á hō͘ góa lim. "
24:18 Cha-bó͘ gín'á kóng, " Góa ê chú, chhiáⁿ lim. " Chiū kóaⁿ-kín kā chúi-pân pàng lo̍h-.lâi, the̍h tī chhiú-.ni̍h, hō͘ i lim.
24:19 Hō͘ i lim liáu-āu, i koh kóng, " Góa mā beh kā lí ê lo̍k-tô chhiūⁿ chúi, hō͘ in lim kàu-gia̍h. "
24:20 I chiū kóaⁿ-kín kā pân lāi ê chúi piàⁿ tī chô-.ni̍h, koh cháu-khì chéⁿ-.ni̍h chhiūⁿ chúi, hō͘ i só͘-ū ê lo̍k-tô lim chúi.
24:21 Hitê lâng chù-ba̍k kā i khòaⁿ, tiām-tiām bô kóng-ōe, ài beh chai Siōng-chú ū siúⁿ-sù i sūn-sī ê lō͘ á-bô.
24:22 Lo̍k-tô lim liáu-āu, hit-ê lâng chiū the̍h chi̍t-ê kim-khoân, tāng pòaⁿ si-khel, nn̄g-ê kim chhiú-khoân, tāng cha̍p si-khel hō͘ hit-ê chabó͘ gín'á.
24:23 Hitê lâng kóng, " Lí sī siáⁿ lâng ê chabó͘ kiáⁿ? Chhiáⁿ kā góa kóng, lín lāu-pē ê ke ū só͘-chāi thang hō͘ goán hioh á-bô? "
24:24 Li-bé-kah chiū kā i kóng, " Góa sī Mil-kah tùi Na-kho͘l só͘ seⁿ ê kiáⁿ, Be-thu-el ê chabó͘ kiáⁿ. "
24:25 Koh tùi i kóng, " Goán ū chháu-liāu bí-niûⁿ chhiong-chiok, mā ū só͘-chāi thang hō͘ lí hioh. "
24:26 Hitê lâng chiū àⁿ thâu kèng-pài Siōng-chú, kóng,
24:27 " Tio̍h oló góa ê Chú, A-bu-la-hàm ê Siōng-tè — Siōng-chú, I ēng chû-ài sêng-si̍t khoán-thāi góa ê chú-lâng, lóng bô thêng-chí. Koan-hē góa, Siōng-chú tī lō͘-chiūⁿ ín-chhōa góa kàu góa ê chú-lâng hiaⁿ-tī ê ke. "
24:28 Cha-bó͘ gín'á cháu tńg-.khì, chiàu chiahê ē kā in lāu-bú choân ke ê lâng kóng.
24:29 Li-bé-kah ū chi̍t-ê a-hiaⁿ, miâ kiò-chò La̍h-ban, i chhut-khì chéⁿ piⁿ, lâi kìⁿ hit-ê lâng.
24:30 I khòaⁿ tio̍h hit-ê kim-khoân, koh khòaⁿ tio̍h chhiú-khoân tī in sió-mōe ê chhiú, mā thiaⁿ tio̍h in sió-mōe Li-bé-kah ê ōe, kóng, " Hitê lâng tùi góa kóng ánne, ánne. " I chiū khì hit-ê lâng hia, khòaⁿ tio̍h hit-ê lâng iáu khiā tī lo̍k-tô piⁿ, óa-kīn chúi-chéⁿ.
24:31 Chiū kā i kóng, " Lí chit-ê tit tio̍h Siōng-chú sù-hok ê, chhiáⁿ ji̍p-.lâi. Lí án-chóaⁿ khiā tī gōa-bīn? Góa í-keng kā chhù kah lo̍k-tô ê só͘-chāi chún-pī hó-sè. "
24:32 Hitê lâng chiū ji̍p-khì i ê chhù, i chiū tháu lo̍k-tô só͘ chài ê, koh ēng chháu-niû chhī lo̍k-tô, phâng chúi hō͘ hit-ê lâng kah kin-tòe ê lâng sé kha.
24:33 Jiân-āu kā chia̍h-mi̍h pâi tī i ê bīn-chêng, beh hō͘ i chia̍h. Chóng-.sī, i kóng, " Góa bô beh chia̍h, tio̍h thèng-hāu góa kóng bêng góa ê sù-bēng. " La̍h-ban kóng, " Chhiáⁿ lí kóng. "
24:34 I chiū kóng, " Góa sī A-bu-la-hàm ê lô͘-po̍k.
24:35 Siōng-chú tōa-tōa sù-hok hō͘ góa ê chú-lâng, hō͘ i heng-ōng, koh hō͘ i iûⁿ, gû, gîn, kim, lô͘-po̍k, lú-pī, lo̍k-tô kah lî.
24:36 Góa ê chú-lâng ê bó͘ Sa-la̍h, nî lāu ê sî, kā góa ê chú-lâng seⁿ chi̍t-ê kiáⁿ; góa ê chú-lâng mā kā it-chhè só͘-ū ê hō͘ chit-ê kiáⁿ.
24:37 Góa ê chú-lâng kah góa chiùchōa kóng, ' Góa tòa Ka-nân lâng ê só͘-chāi, lí m̄ thang kā góa ê kiáⁿ chhōa in ê chabó͘ kiáⁿ chò bó͘.
24:38 Lí tio̍h khì góa ê lāu-pē ê ke, góa ê pún cho̍k hia, kā góa ê kiáⁿ chhōa chi̍t-ê bó͘. '
24:39 Góa tùi góa ê chú-lâng kóng, ' Khióng-kiaⁿ chabó͘ gín'á m̄-khéng tòe góa lâi. '
24:40 I chiū kā góa kóng, ' Góa só͘ ho̍k-sāi ê Siōng-chú ē chhe I ê sù-chiá kah lí chò-hóe khì, hō͘ lí ū sūn-sī ê lō͘, lí chiū thang tùi góa ê chong-cho̍k, góa ê pē ê ke, kā góa ê kiáⁿ chhōa chi̍t-ê bó͘.
24:41 Chí-iàu lí khì-kàu góa ê pún cho̍k hia, chiū sǹg lí í-keng si̍t-hêng lí ê chiùchōa; in nā m̄ hō͘ lí, góa kah lí chiù ê chōa, mā kah lí bô koan-hē. '
24:42 Kin-á-ji̍t, góa lâi-kàu chéⁿ piⁿ, kóng, ' Góa ê chú-lâng A-bu-la-hàm ê Siōng-tè — Siōng-chú ah, Lí nā khéng, kiû Lí hō͘ góa só͘ kiâⁿ ê lō͘ sūn-sī. '
24:43 Góa taⁿ khiā tī chúi-chéⁿ piⁿ, tùi chi̍t-ê chhut-lâi chhiūⁿ chúi ê chabó͘ gín'á kóng, ' Chhiáⁿ lí kā lí pân-.ni̍h ê chúi tām-po̍h-á hō͘ góa lim;
24:44 i nā kóng, chò lí lim, góa mā beh ūi lí ê lo̍k-tô chhiūⁿ chúi, goān hit-ê chabó͘ gín'á chò Siōng-chú só͘ tiāⁿ tio̍h beh hō͘ góa ê chú-lâng ê kiáⁿ chò bó͘ ê.
24:45 Góa sim-lāi ê ōe kóng iáu-bōe liáu, Li-bé-kah chiū chhut-.lâi, keng-kah-thâu téng phāiⁿ chúi-pân, lo̍h-khì chéⁿ piⁿ chhiūⁿ chúi. Góa chiū kā i kóng, ' Chhiáⁿ lí hō͘ góa lim. '
24:46 I chiū kóaⁿ-kín tùi keng-kah-thâu téng pàng-lo̍h chúi-pân, kóng, " Chhiáⁿ lim, góa mā beh hō͘ lí ê lo̍k-tô lim. ' Góa chiū lim, i mā hō͘ góa ê lo̍k-tô lim.
24:47 Góa koh mn̄g i kóng, ' Lí sī siáⁿ lâng ê chabó͘ kiáⁿ? ' I ìn kóng, ' Góa sī Mil-kah tùi Na-kho͘l só͘ seⁿ ê kiáⁿ — Be-thu-el ê chabó͘ kiáⁿ. ' Góa chiū kā kim-khoân khòa tī i ê phīⁿ, kā chhiú-khoân khòa tī i ê chhiú.
24:48 Góa chiū àⁿ thâu pài Siōng-chú, oló góa ê chú A-bu-la-hàm ê Siōng-tè — Siōng-chú, in-ūi I chhōa góa kiâⁿ tú-hó ê lō͘, hō͘ góa tit tio̍h góa ê chú ê sió-tī ê chabó͘ sun, lâi hō͘ i ê kiáⁿ chò bó͘.
24:49 Taⁿ lín nā beh ēng chû-ài kah sêng-si̍t khoán-thāi góa ê chú-lâng, chiū kā góa tap-èng; nā m̄, mā kā góa kóng, hō͘ góa thang chai tio̍h ǹg-chó á-.sī ǹg-iū. "
24:50 La̍h-ban kah Be-thu-el ìn kóng, " Tāi-chì chhut tī Siōng-chú, goán bē tàng tùi lí kóng hó á-.sī m̄-hó.
24:51 Lí khòaⁿ, Li-bé-kah tī lí ê bīn-chêng, lí thang kā i chhōa-.khì, chiàu Siōng-chú só͘ kóng ê, hō͘ lí ê chú-lâng ê kiáⁿ chò bó͘. "
24:52 A-bu-la-hàm ê lô͘-po̍k thiaⁿ tio̍h in chiahê ōe, chiū ǹg Siōng-chú phak tī tē-.ni̍h.
24:53 Hit sî, lô͘-po̍k the̍h-chhut gîn-khì, kim-khì kah saⁿ-khò͘ sàng Li-bé-kah, koh kā pó-bu̍t sàng i ê a-hiaⁿ kah lāu-bú.
24:54 Lô͘-po̍k kah tòe i ê lâng lim-chia̍h, hioh mê. Thàu-chá-khí-.lâi, chiū kóng, " Chhiáⁿ chhe góa tńg-khì góa ê chú-lâng hia. "
24:55 Li-bé-kah ê a-hiaⁿ kah lāu-bú kóng, " Chhiáⁿ iông-ín chabó͘ gín'á kah goán koh tòa kúi kang, siāng chió cha̍p kang, jiân-āu i to̍h thang khì. "
24:56 M̄ koh, po̍k-jîn kóng, " M̄-thang chó͘-tòng góa, Siōng-chú í-keng hō͘ góa sūn-sī ê lō͘. Chhiáⁿ chhe góa-.khì, hō͘ góa tńg-khì góa ê chú-lâng hia. "
24:57 In kóng, " Goán kiò chabó͘ gín'á lâi, thàm i ê ōe-ì. "
24:58 In chiū kiò Li-bé-kah lâi, mn̄g i kóng, " Lí beh kah chit-ê lâng khì bô? " I kóng, " Góa beh khì. "
24:59 In chiū chhe sió-mōe Li-bé-kah kah i ê leng-bú kah A-bu-la-hàm ê lô͘-po̍k, í-ki̍p tòe i ê lâng khì.
24:60 In chiū kā Li-bé-kah chiok-hok, tùi i kóng, " Goán sió-mōe, goān lí chò chheng-bān lâng ê lāu-bú, goān lí ê kiáⁿ-sun tit tio̍h tùi-te̍k ê siâⁿ mn̂g. "
24:61 Li-bé-kah kah i ê lú-pī khí-.lâi, khiâ lo̍k-tô tòe hit-ê lâng; lô͘-po̍k chiū chhōa Li-bé-kah-khì.
24:62 Í-sak tòa tī Lâm-tē, hit sî í-keng tùi Pí-jíⁿ-la̍h-hái-lâi ê lō͘ lâi.
24:63 Ji̍t beh àm, Í-sak chhut-lâi tī chhân-.ni̍h, tiām-tiām teh siūⁿ. I gia̍h thâu chi̍t ē khòaⁿ, khòaⁿ tio̍h lo̍k-tô lâi.
24:64 Li-bé-kah khòaⁿ tio̍h Í-sak, chiū tùi lo̍k-tô téng lo̍h-.lâi.
24:65 Mn̄g hit-ê lô͘-po̍k kóng, " Tī chhân-.ni̍h kiâⁿ lâi gêng-chiap lán ê sī siáⁿ lâng? " Lô͘-po̍k kóng, " Sī góa ê chú-lâng. " Li-bé-kah chiū the̍h phè lâi tà bīn.
24:66 Lô͘-po̍k kā só͘ hoat-seng it-chhè ê tāichì kā Í-sak kóng.
24:67 Í-sak chiū khan Li-bé-kah ji̍p-khì i ê lāu-bú Sa-la̍h ê pò͘-pêⁿ, chhōa i chò bó͘, koh chin thiàⁿ i. Í-sak tùi lāu-bú sí-āu, kàu chit sî chiah tit tio̍h an-ùi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。