約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Chhú Chio̍h Chò Kì-liām
Jîn-bîn choân-pō͘ kòe Iol-tàn hô liáu-āu, Siōng-chú chiū hoan-hù Io-siú-ah, kóng,
4:2 " Tio̍h tùi jîn-bîn tiong kéng-soán cha̍p-jī-ê lâng, múi chi-cho̍k chi̍t-ê lâng,
4:3 bēng-lēng in kóng, ' Lín tùi hia, tùi Iol-tàn hô tiong, chè-si ê kha tiāⁿtiāⁿ khiā ê só͘-chāi, chhú cha̍p-jī tè chio̍h-thâu, tòa-lâi kah lín chò-hóe kòe-.khì, hē tī lín kim-mê beh hioh-khùn ê só͘-chāi. '"
4:4 Io-siú-ah chiū chiàu i tùi I-su-la-el lâng tiong só͘ chún-pī ê hit cha̍p-jī-ê lâng, múi chi-cho̍k chi̍t-ê lâng, lóng kiò in lâi.
4:5 Io-siú-ah chiū kā in kóng, " Lín kòe-khì tī Siōng-chú — lín ê Siōng-tè iok-kūi ê thâu-chêng, kàu Iol-tàn hô tiong, chiàu I-su-la-el lâng chi-cho̍k ê sò͘-gia̍h, ta̍k lâng chhú chi̍t tè chio̍h-thâu giâ tī keng-kah-thâu.
4:6 Lín thang ēng chit-ê tī lín tiong-kan chò chèng-kì. Ji̍t-āu lín ê kiáⁿ-sun nā mn̄g lín kóng, ' Chiahê chio̍h-thâu, tùi lín lâi kóng ū siáⁿ-mi̍h ì-gī? '
4:7 Lín chiū thang tùi in kóng, ' Sī in-ūi í-chêng Iol-tàn hô ê chúi, tī Siōng-chú ê iok-kūi chêng chia̍t-tn̄g; iok-kūi kòe Iol-tàn hô ê sî, Iol-tàn hô ê chúi chia̍t-tn̄g. Chiahê chio̍h-thâu beh chiâⁿ-chò I-su-la-el lâng éng-oán ê kì-liām. '"
4:8 I-su-la-el lâng chiàu Io-siú-ah só͘ bēng-lēng ê lâi kiâⁿ, chiàu I-su-la-el lâng chi-cho̍k ê sò͘-gia̍h, tùi Iol-tàn hô tiong chhú cha̍p-jī tè chio̍h-thâu, lóng chiàu Siōng-chú tùi Io-siú-ah só͘ kóng ê. In chiū tòa hiahê chio̍h-thâu kòe-.khì, kàu in hioh-khùn ê só͘-chāi, chiū hē tī hia.
4:9 Io-siú-ah lēng-gōa ēng cha̍p-jī tè chio̍h-thâu khiā tī Iol-tàn hô tiong, to̍h-sī tī kng iok-kūi ê chè-si kha khiā-.leh ê só͘-chāi; kàu kin-á-ji̍t, hiahê chio̍h iáu koh tī hia.
4:10 Kng iok-kūi ê chè-si khiā tī Iol-tàn hô tiong, thèng-hāu Siōng-chú bēng-lēng Io-siú-ah tùi jîn-bîn kóng ê tāichì chò liáu-āu, sī chiàu Mô͘-se só͘ bēng-lēng Io-siú-ah it-chhè ê ōe, jîn-bîn chiū kóaⁿ-kín kòe-.khì.
4:11 Só͘-ū ê jîn-bîn choân-pō͘ kòe-.khì, Siōng-chú ê iok-kūi kah chè-si chiū tī jîn-bîn ê bīn-chêng kòe-.khì.
4:12 Lū-biān lâng, Ga̍t lâng, Má-ná-se pòaⁿ chi-cho̍k ê lâng, lóng chiàu Mô͘-se só͘ tùi in kóng ê, tòa kun-khì tī I-su-la-el lâng ê thâu-chêng kòe-.khì.
4:13 Chha-put-to ū sì-bān lâng lóng chún-pī kau-chiàn, tī Siōng-chú ê bīn-chêng kòe-.khì, kàu I-é-lī-kho siâⁿ ê pêng-goân, chún-pī hó-sè teh beh kau-chiàn.
4:14 Tng hit ji̍t, Siōng-chú hō͘ Io-siú-ah tī I-su-la-el jîn-bîn ê ba̍k-chiu chêng chò tōa. Τī i it-seng ê ji̍t-chí, jîn-bîn kèng-ùi i, chhin-chhiūⁿ chá-chêng kèng-ùi Mô͘-se.
4:15 Siōng-chú hoan-hù Io-siú-ah kóng,
4:16 " Lí tio̍h bēng-lēng kng hoat-kūi ê chè-si, tùi Iol-tàn hô khí-.lâi. "
4:17 Io-siú-ah chiū bēng-lēng chè-si kóng, " Lín tùi Iol-tàn hô khí-.lâi. "
4:18 Kng Siōng-chú iok-kūi ê chè-si tùi Iol-tàn hô khí-.lâi, chè-si ê kha-chiúⁿ tútú ta̍h tio̍h ta tē ê sî, Iol-tàn hô ê chúi chiū lâu kàu goân ūi, chiàu-goân lâi tiòng móa siang pêng ê hōaⁿ.
4:19 Chiaⁿ-goe̍h chhe-cha̍p, jîn-bîn tùi Iol-tàn hô khí-.lâi, chiū chat iâⁿ tī Gil-gal, tī I-é-lī-kho siâⁿ tang pêng ê kéng-kài.
4:20 In tùi Iol-tàn hô só͘ chhú hit cha̍p-jī tè chio̍h-thâu, Io-siú-ah chiū kā in chhāi tī Gil-gal,
4:21 jiân-āu tùi I-su-la-el lâng kóng, " Ji̍t-āu lín ê kiáⁿ-sun nā mn̄g in ê lāu-pē kóng,
4:22 ' Chiahê chio̍h-thâu ū siáⁿ-mi̍h ì-gī? ' Hit sî, lín tio̍h pò lín ê kiáⁿ chai, kóng, ' I-su-la-el lâng bat kiâⁿ ta tē, kòe chit-ê Iol-tàn hô;
4:23 in-ūi Siōng-chú — lín ê Siōng-tè tī lín ê thâu-chêng hō͘ Iol-tàn hô ê chúi ta-.khì, thèng-hāu lín kòe-.lâi, chhin-chhiūⁿ Siōng-chú — lín ê Siōng-tè í-chêng tī Âng-hái só͘ chò ê, to̍h-sī hō͘ chúi tī lán ê thâu-chêng ta-.khì, thèng-hāu lán kòe-.lâi.
4:24 Án-ne beh hō͘ tē-chiūⁿ ê bān-bîn lóng chai Siōng-chú ê chhiú ū tōa lêng-le̍k, mā beh hō͘ lín éng-oán kèng-ùi Siōng-chú — lín ê Siōng-tè. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。