申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
32:1 Chiahê thiⁿ ah, tio̍h àⁿ hīⁿ-khang, góa beh kóng-ōe; goān tē mā tio̍h thiaⁿ góa ê chhùi só͘ kóng ê.
32:2 Góa ê kà-sī ē chhin-chhiūⁿ hō͘ kàng-lo̍h, góa ê ōe chhin-chhiūⁿ lō͘-chúi teh tih; chhin-chhiūⁿ iù mî-mî ê hō͘ lo̍h tī iù-iù ê chháu, chhin-chhiūⁿ tōa hō͘ lo̍h tī chhài-se.
32:3 In-ūi góa beh soan-pò͘ Siōng-chú ê miâ; lín tio̍h chun lán ê Siōng-chú chò tōa.
32:4 Chò chio̍h-pôaⁿ ê, I só͘ chò ê sī oân-choân, I ê lō͘ lóng sī kong-pêⁿ; sī chin-si̍t ê Siōng-chú, lóng bô put-gī, I sī kong-gī, koh chèng-ti̍t.
32:5 Chit-ê koai-phiah oan-khiau ê sè-tāi kakī pāi-hoāi; m̄-sī I ê kiáⁿ, sī in ê pē-pēng.
32:6 Gû-gōng bû-ti ê jîn-bîn, lín kám ánne pò-tap Siōng-chú? I kám m̄-sī lí ê lāu-pē, bé lí ê? I ū chhòng-chō lí, kiàn-li̍p lí.
32:7 Tio̍h ē kì-tit kó͘-chá ê ji̍t, siàu-liām le̍k-tāi ê nî; mn̄g lí ê lāu-pē, i ē kā lí chí-sī, mn̄g lí ê sī-tōa, in ē kā lí kóng.
32:8 Chì-koân-.ê pun gia̍p hō͘ lia̍t pang, hun-khui sè-kan lâng ê sî, chiū tiāⁿ tio̍h jîn-bîn ê kài-hān, chiàu I-su-la-el lâng ê sò͘-gia̍h.
32:9 Siōng-chú ê hūn-gia̍h sī I ê chú-bîn; I só͘ tit tio̍h ê sán-gia̍p sī Iâ-kop.
32:10 I tú tio̍h i tī pha-hng ê tē, tī iá-siù háu ê hong-hùi khòng-iá, chiū kā i ûi khí-.lâi, khòaⁿ-kò͘ i, pó-hō͘ i chhin-chhiūⁿ ba̍k-chiu-jîn.
32:11 Koh chhin-chhiūⁿ eng-chiáu lā i ê siū, tī eng-á ê téng-bīn ia̍t i ê si̍t, thí-khui si̍t-kó͘ lâi sîn i, kā i chài tī i ê si̍t-kó͘.
32:12 Chí-ū Siōng-chú chhōa i, bô pa̍t-ê sîn-bêng kah i tông-chāi.
32:13 Chiū hō͘ i khiā tī tē-chiūⁿ koân ê só͘-chāi, tit tio̍h chia̍h chhân-.ni̍h ê lông-sán-bu̍t; koh hō͘ i tùi chio̍h-pôaⁿ suh bi̍t, tùi hóe-chio̍h suh iû;
32:14 mā chia̍h gû-leng-iû kah iûⁿ-leng, pûi ê iûⁿ-á-kiáⁿ, Ba-siáng só͘ chhut ê mî-iûⁿ-káng kah soaⁿ-iûⁿ, kah siōng hó ê sió-be̍h, mā lim phû-tô-chiap ê chiú.
32:15 E-siu-lûn pûi chiū ah-pà, lí í-keng pûi, koh tōa-lia̍p, bah chin phauh; i chiū lī-khui chhòng-chō i ê Siōng-chú, khòaⁿ-khin chín-kiù i ê chio̍h-pôaⁿ.
32:16 In ēng pa̍t-ê sîn-bêng kek I chi̍t-tò͘, ēng khó-ò͘ⁿ ê jiá I siū-khì.
32:17 In chè-hiàn siâ-kúi, m̄-sī chin ê Siōng-tè, to̍h-sī in pêng-sî só͘ m̄ bat ê sîn-bêng, sī sin ê, kīn-lâi chiah ū ê, sī lí ê chó͘-sian só͘ bô kiaⁿ-ùi ê.
32:18 Seⁿ lí ê chio̍h-pôaⁿ, lí bô siàu-liām I, seⁿ lí ê Siōng-chú, lí bē kì-tit I.
32:19 Siōng-chú khòaⁿ tio̍h chiū oàn-hūn, in-ūi I ê kiáⁿ-jî kek I ê iân-kò͘, chiū kóng,
32:20 Góa beh tùi in ng Góa ê bīn, khòaⁿ in kiat-kio̍k án-chóaⁿ. In sī koai-phiah ê cho̍k-lūi, bô sìn-si̍t ê kiáⁿ-jî.
32:21 In ēng hit-ê m̄-sī Siōng-chú ê kek Góa ê chi̍t-tò͘, ēng in ê hi-ké ê mi̍h jiá Góa siū-khì. Góa chiū ēng m̄-sī chò jîn-bîn ê kek in ê chi̍t-tò͘, ēng gû-gōng ê jîn-bîn jiá in ê siū-khì.
32:22 In-ūi tī Góa ê siū-khì tiong ū hóe to̍h khí-.lâi, sio kàu im-kan ke̍k chhim ê só͘-chāi, mā sio tē kah tē ê chhut-sán, mā khí hóe sio chiahê soaⁿ ê tē-ki.
32:23 Góa beh chek-chū chai-hō tī in ê téng-bīn, ēng Góa só͘-ū ê chìⁿ lâi siā in.
32:24 In ē in-ūi iau-gō lâi siau-sán, hō͘ iām-joa̍h kah to̍k-chèng thun-bia̍t. Góa ē hō͘ in tú tio̍h iá-siù ê chhùi-khí, kah chôa ê to̍k.
32:25 Gōa-bīn ū to-kiàm, lāi-bīn ū kiaⁿ-hiâⁿ, hō͘ lâng sí-bông, hō͘ siàu-liân ê chapo͘ lâng kah chāi-sek-lí, chia̍h leng ê kah pe̍h thâu-mn̂g ê lâng, lóng bia̍t-bông.
32:26 Góa kóng, Góa beh hō͘ in sì-sòaⁿ tī hn̄g-hn̄g, tī lâng ê tiong-kan tû in ê miâ-jī.
32:27 Chóng-.sī, Góa kiaⁿ tùi-te̍k kek Góa, khióng-kiaⁿ in ê tùi-te̍k gō͘-hōe, khióng-kiaⁿ in ē kóng: sī goán ê chhiú gia̍h koân, m̄-sī Siōng-chú kiâⁿ chiahê tāichì.
32:28 In-ūi in sī bē hiáu-tit siūⁿ ê jîn-bîn, tī sim-lāi bô chhong-bêng.
32:29 Goān in ū tì-hūi, ē bêng-pe̍k chit-ê, ē siūⁿ in ê kiat-kio̍k.
32:30 Nā m̄-sī in ê chio̍h-pôaⁿ bē in, nā m̄-sī Siōng-chú kā in kau hō͘ lâng, cháiⁿ-iūⁿ tùi-te̍k chi̍t-ê ē kóaⁿ in chi̍t-chheng? Nn̄g-ê ē hō͘ in chi̍t-bān-ê tô-cháu?
32:31 In ê chio̍h-pôaⁿ bô chhin-chhiūⁿ lán ê chio̍h-pôaⁿ, liân lán ê tùi-te̍k mā ánne phêng-toàn.
32:32 In ê phû-tô chhiū sī tùi So͘-tóm ê phû-tô chhiū thoân ê, mā tùi Am-mo͘-la̍h ê hn̂g chhut ê; in ê phû-tô sī to̍k ê phû-tô, kui pha lóng sī khó͘ ê.
32:33 In ê chiú sī liông ê to̍k, sī ok-chôa chân-hāi ê to̍k.
32:34 Che kám m̄-sī chek-chū tī góa chia, hong ba̍t tī góa pó-pòe ê khò͘-pâng?
32:35 Sin-oan pò-èng chāi tī Góa, tī in ê kha ta̍h-tian ê sî, in-ūi in tú tio̍h chai-hō ê ji̍t teh beh kàu, só͘ beh tú-.tio̍h ê tāichì ē chin kín kàu.
32:36 Siōng-chú khòaⁿ tio̍h I ê chú-bîn khùi-la̍t í-keng sí-.khì, hiahê khu-sok ê, chū-iû ê, lóng bô lâu kah pòaⁿ-ê, chiū beh thè in sin-oan, in-ūi I ê lô͘-po̍k lâi hō͘-hóe.
32:37 I ē kóng, In ê sîn-bêng, in só͘ óa-khò ê chio̍h-pôaⁿ,
32:38 Chiū-sī chia̍h in chè-sū ê iû, Lim in koàn-tiān ê chiú ê, taⁿ tī tó-ūi? Thang hō͘ in khí-lâi pang-chān lín, pó-hō͘ lín.
32:39 Lín taⁿ tio̍h khòaⁿ, Góa, Góa to̍h-sī; Góa í-gōa bô ū Siōng-tè. Góa hō͘ lâng sí, Góa hō͘ lâng oa̍h; Góa kā i sún-siong, Góa kā i i-tī, bô chi̍t-ê ē tùi Góa ê chhiú kiù chhut.
32:40 Góa gia̍h-khí chhiú ǹg thiⁿ kóng, Góa kí Góa ê éng-oán oa̍h-miā lâi kóng:
32:41 Góa nā bôa Góa kng nà-nà ê to, Góa nā chip-hêng sím-phòaⁿ, chiū beh hêng-hoa̍t Góa ê tùi-te̍k, pò-èng oàn-hūn Góa ê lâng.
32:42 Góa beh hō͘ Góa ê chìⁿ lim hoeh kàu chùi, Góa ê to beh chia̍h bah, to̍h-sī siū thâi siū lia̍h ê lâng ê hoeh, tùi-te̍k siú-léng ê thâu ê bah.
32:43 Lia̍t kok, lóng tio̍h kah I ê chú-bîn chò-hóe hoaⁿ-hí; in-ūi I ē ūi I ê lô͘-po̍k ê hoeh sin-oan, pò-èng i ê tùi-te̍k, beh sio̍k i ê tē kah i ê jîn-bîn ê chōe.
32:44 Mô͘-se lâi, ēng chit-ê koa it-chhè ê ōe liām hō͘ jîn-bîn thiaⁿ, Nùn ê kiáⁿ Io-siú-ah mā kah i tī-.leh.
32:45 Mô͘-se ê Ûi-giân
Mô͘-se tùi I-su-la-el ê kûn-chiòng kóng chiahê ōe liáu-āu, chiū kā in kóng,
32:46 " Góa kin-á-ji̍t só͘ tùi lín kiàn-chèng it-chhè ê ōe, lín tio̍h khǹg tī sim-.ni̍h, mā tio̍h hoan-hù lín ê kiáⁿ-sun chip-siú lâi kiâⁿ chit-ê lu̍t-hoat só͘-ū ê ōe.
32:47 In-ūi che tùi lín lâi kóng m̄-sī khang-khang ê tāichì, sī lín ê oa̍h-miā, mā ē in-ūi chit-ê tāichì, lín ê ji̍t-chí tit tio̍h kú-tn̂g, tī lín kòe Iol-tàn hô beh ji̍p-khì sêng-chiap ê tē."
32:48 Tong-ji̍t, Siōng-chú hoan-hù Mô͘-se kóng,
32:49 " Lí khì A-bá-lîm soaⁿ, Ne-bó ê soaⁿ-thâu kah I-é-lī-kho siâⁿ tùi-bīn ê Mô͘-ap tē, khòaⁿ Góa siúⁿ-sù I-su-la-el lâng chò sán-gia̍p ê Ka-nân tē.
32:50 Lí ē sí tī lí só͘ khì ê soaⁿ lāi, chhin-chhiūⁿ lí ê a-hiaⁿ A-lông sí tī Hol soaⁿ.
32:51 In-ūi lín tī Chîn ê khòng-iá, Ka-té-si ê Me-lí-bah ê chúi piⁿ, tī I-su-la-el lâng tiong tek-chōe Góa, in-ūi tī I-su-la-el lâng tiong bô chun Góa chò sèng.
32:52 Lí thang tùi-bīn khòaⁿ hit-ê tē, chóng-.sī, bē tàng ji̍p-khì kàu Góa só͘ siúⁿ-sù I-su-la-el lâng ê tē. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。