申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
25:1 " Lâng nā ū oan-ke lâi tùi-chí, koaⁿ-hú kā i phòaⁿ-toàn, chiū tio̍h tēng gī lâng chò gī, tēng pháiⁿ lâng chò pháiⁿ.
25:2 Pháiⁿ lâng nā eng-kai siū phah, sím-phòaⁿ-koaⁿ tio̍h hō͘ i phak tī tē-.ni̍h, tī i ê bīn-chêng, chiàu i ê chōe, chiàu siàu-gia̍h kā i phah.
25:3 Kan-taⁿ thang kā i phah sì-cha̍p ē, m̄ thang chhiau-kòe sò͘-gia̍h; nā chhiau-kòe sò͘-gia̍h, kā i phah khah chē ē, lí ê hiaⁿ-tī to̍h-sī kā lí bú-jio̍k.
25:4 " Gû teh lún ngó͘-kok, m̄ thang kā i ê chhùi lom-.leh. "
25:5 Ūi Sí-khì ê Hiaⁿ-tī Thoân-chong Chiap-tāi
" Hiaⁿ-tī chò-hóe tòa, kî-tiong nā chi̍t-ê sí-khì bô kiáⁿ, sí-lâng ê bó͘ m̄ thang kè gōa-lâng, i tiōng-hu ê sió-tī tio̍h ji̍p-khì i hia, chhōa i chò bó͘, lâi chīn sió-chek ê pún-hūn.
25:6 I só͘ seⁿ ê tōa-kiáⁿ, tio̍h sòa-chiap sí-.khì ê a-hiaⁿ ê miâ-hūn, bián-tit i ê miâ tī I-su-la-el tiong siau-bia̍t.
25:7 Hitê lâng nā m̄ goān-ì chhōa i ê hiaⁿ-só, i ê hiaⁿ-só chiū tio̍h kàu siâⁿ mn̂g ê tiúⁿ-ló hia, kóng, ' Góa ê tiōng-hu ê sió-tī m̄-khéng tī I-su-la-el tiong kā i ê a-hiaⁿ thoân chi̍t-ê miâ-jī, bô beh tùi góa chīn sió-chek ê pún-hūn. '
25:8 I siâⁿ lāi ê tiúⁿ-ló chiū tio̍h kiò i lâi, kā i kóng, i nā chip-ì kóng, ' Góa bô beh chhōa i',
25:9 i ê hiaⁿ-só chiū tio̍h tī tiúⁿ-ló ê bīn-chêng lâi kìⁿ i, thǹg hit-ê lâng kha-.ni̍h ê ê, phùi nōa tī i ê bīn, kóng, ' Kiàn-nā bô beh ūi tio̍h a-hiaⁿ kiàn-li̍p i ê ke ê, tio̍h ánne kā i khoán-thāi. '
25:10 Τī I-su-la-el tiong, i ê miâ ē hông kiò-chò ' thǹg-ê ê lâng ê ke'. "
25:11 Kî-tha ê Kui-tēng
" Nā ū nn̄g lâng sio-phah, kî-tiong chi̍t-ê lâng ê bó͘ kīn óa-.lâi, beh kiù i ê tiōng-hu thoat-lī kā i phah-ê lâng ê chhiú, chhun chhiú lia̍h-tiâu hit-ê lâng ê ē-sin,
25:12 chiū tio̍h chám-tn̄g hit-ê chabó͘ lâng ê chhiú, ba̍k-chiu m̄ thang khó-liân i.
25:13 " Lí ê tē-á lāi m̄ thang ū nn̄g chióng ê chhìn-á-chí, chi̍t lia̍p tōa, chi̍t lia̍p sè.
25:14 Chhù lāi m̄ thang ū nn̄g khoán ê chin kah táu, chi̍t-ê tōa, chi̍t-ê sè.
25:15 Τio̍h ēng chún-chún kong-pêⁿ ê chhìn-á-chí, chún-chún kong-pêⁿ ê chin kah táu, thang hō͘ lí tī Siōng-chú — lí ê Siōng-tè só͘ siúⁿ-sù ê tē chia̍h tn̂g hòe-siū.
25:16 In-ūi kiàn-nā kiâⁿ chiahê tāichì kah kiâⁿ put-gī ê, lóng sī Siōng-chú — lí ê Siōng-tè só͘ thó-ià ê. "
25:17 Siau-bia̍t A-má-le̍k Lâng ê Bēng-lēng
" Lí tio̍h ē kì-tit lín chhut Ai-gi̍p ê sî, A-má-le̍k lâng tī lō͘-.ni̍h só͘ khoán-thāi lí ê.
25:18 I tī lō͘-.ni̍h tú tio̍h lí, tng lí khùn-khó͘ ià-siān ê sî, i ū án-chóaⁿ phah lí ê āu-tūi, to̍h-sī tī lí āu-bīn hiahê loán-jio̍k ê, i mā bô kiaⁿ-ùi Siōng-chú.
25:19 Só͘-í, kàu Siōng-chú — lí ê Siōng-tè kiù lí thoat-lī sì-kho͘-ûi só͘-ū ê tùi-te̍k, tī Siōng-chú — lí ê Siōng-tè só͘ siúⁿ-sù hō͘ lí chò sán-gia̍p ê tē, tit tio̍h pêng-an. Hit sî, lí tio̍h kā A-má-le̍k ê miâ-jī, tùi thian-hā chhat-siau, m̄ thang bē kì-.tit! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。