申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 Lî-hun kah Chài-hun ê Kui-tēng
" Lâng nā chhōa bó͘, jiân-āu khòaⁿ i ê bó͘ bô kah-ì, in-ūi i chai i ū bô ha̍p-gî ê tāichì, chiū thang siá lî-hun-su hō͘ i, kau i ê chhiú, chhe i lī-khui i ê ke.
24:2 Cha-bó͘ lâng lī-khui i ê ke liáu-āu, thang khì kè pa̍t lâng.
24:3 Nā-sī āu-lâi ê tiōng-hu oàn-hūn i, mā siá lî-hun-su kau i ê chhiú, kiò i lī-khui i ê ke, á-.sī i āu-lâi ê tiōng-hu chhōa i chò bó͘ chiū sí,
24:4 hit-ê í-chêng ê tiōng-hu koh kiò i tńg-.khì ê, bē tàng tī i òe lahsap í-āu koh chhōa i chò bó͘, in-ūi che sī Siōng-chú só͘ thó-ià ê; m̄ thang hō͘ Siōng-chú — lí ê Siōng-tè só͘ siúⁿ-sù hō͘ lí chò sán-gia̍p ê tē lâi hoān chōe. "
24:5 Kî-tha ê Kui-tēng
" Sin chhōa bó͘ ê lâng m̄ thang khì kau-chiàn, mā m̄ thang kau-tài i pān-lí siáⁿ-mi̍h sū; thang hō͘ i tī chhù lāi chheng-êng chi̍t nî, thang hō͘ i só͘ chhōa ê bó͘ hoaⁿ-hí.
24:6 " M̄-thang ēng lâng ê chio̍h-bō á-.sī chio̍h-bō ê téng-tún chò chún-tǹg, in-ūi che sī ēng lâng ê sèⁿ-miā chò chún-tǹg.
24:7 " Nā tú tio̍h lâng koái I-su-la-el tiong chi̍t-ê hiaⁿ-tī, kā i khoán-thāi chò lô͘-lē á-.sī kā i bē hō͘ lâng, hit-ê koái-kùn chiū tio̍h hō͘ sí. Αń-ne, chiū ē-tàng tùi lín tiong-kan tû-khì hit-ê pháiⁿ.
24:8 " Thái-ko ê pháiⁿ chèng-thâu, lí tio̍h chin sè-jī, chè-si Lē-bī lâng it-chhè só͘ kà-sī lín ê, tio̍h chiàu ánne lâi kiâⁿ. Góa só͘ bēng-lēng in ê, lín tio̍h chip-siú lâi kiâⁿ.
24:9 Chá-chêng chhut Ai-gi̍p ê sî, Siōng-chú — lí ê Siōng-tè tī lō͘-.ni̍h tùi Mi-lí-ám só͘ kiâⁿ ê tāichì, lí tio̍h ē kì-tit.
24:10 " Lí bô-lūn ēng siáⁿ-mi̍h chioh chhù-piⁿ, m̄ thang ji̍p-khì i ê chhù the̍h chún-tǹg.
24:11 Lí tio̍h khiā tī gōa-bīn, thèng-hāu kā lí chioh ê lâng the̍h chún-tǹg chhut-lâi hō͘ lí.
24:12 Hitê lâng nā-sī sànchhiah, lí m̄ thang lâu i ê chún-tǹg kòe-mê.
24:13 Ji̍t-lo̍h ê sî, it-tēng tio̍h kā hit-ê chún-tǹg hêng i, hō͘ i thang ēng i ê saⁿ kah teh khùn, i chiū ē kā lí chiok-hok; che tī Siōng-chú — lí ê Siōng-tè ê bīn-chêng, ē sǹg-chò sī lí ê gī.
24:14 " Khùn-khó͘ sànchhiah ê chhiàⁿ-kang lâng, bô-lūn sī lí ê hiaⁿ-tī á-.sī chhut-gōa lâng tòa tī lí ê tē, tī lí ê siâⁿ mn̂g lāi ê, lí m̄ thang kā i khi-hū.
24:15 I ê kang-chîⁿ lí hit ji̍t tio̍h hō͘ i, m̄ thang thèng-hāu kàu ji̍t lo̍h liáu-āu, in-ūi i sànchhiah, khòa-sim tī hit-ê kang-chîⁿ; khióng-kiaⁿ i in-ūi lí lâi tùi Siōng-chú tōa-siaⁿ hoah, lí chiū ū chōe.
24:16 " M̄-thang in-ūi kiáⁿ lâi hō͘ lāu-pē sí, mā m̄ thang in-ūi lāu-pē lâi hō͘ kiáⁿ sí, ta̍k lâng lóng tio̍h ūi tio̍h kakī ê chōe lâi sí.
24:17 " Lí sím-phòaⁿ ê sî, m̄ thang oan-óng chhut-gōa lâng kah ko͘-jî, mā m̄ thang the̍h kóaⁿ-hū ê saⁿ-khò͘ chò chún-tǹg.
24:18 Lí tio̍h ē kì-tit lí tī Ai-gi̍p bat chò lô͘-lē, Siōng-chú — lí ê Siōng-tè kiù-sio̍k lí tùi hia chhut-.lâi, só͘-í, góa bēng-lēng lí tio̍h ánne kiâⁿ.
24:19 " Lí tī chhân-.ni̍h siu-koah ngó͘-kok, nā bē kì-tit chi̍t-sok tī chhân-.ni̍h, m̄ thang koh oat-khì the̍h, tio̍h lâu hō͘ chhut-gōa lâng kah ko͘-jî, kóaⁿ-hū, ánne Siōng-chú — lí ê Siōng-tè ē tī lí ê chhiú só͘ chò it-chhè ê tāichì, kā lí sù-hok.
24:20 Lí phah lí ê kaⁿ-ná chhiū í-āu m̄ thang koh sûn hiahê chhiū-ki, tio̍h lâu hō͘ chhut-gōa lâng kah ko͘-jî, kóaⁿ-hū.
24:21 Lí bán lí ê phû-tô, só͘ chhun lo̍h-.lâi ê m̄ thang koh bán, tio̍h lâu hō͘ chhut-gōa lâng kah ko͘-jî, kóaⁿ-hū.
24:22 Lí mā tio̍h ē kì-tit lí tī Ai-gi̍p tē bat chò lô͘-lē, só͘-í, góa bēng-lēng lí tio̍h ánne kiâⁿ. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。