申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Bē-tàng Chham-ú Siōng-chú Chū-hōe ê Kui-tēng
" Kiàn-nā gōa-sīn siū-siong ê á-.sī siū iam-koah ê, m̄ thang ji̍p-khì Siōng-chú ê hōe-bō͘.
23:2 " Su-thong lâi seⁿ ê kiáⁿ m̄ thang ji̍p-khì Siōng-chú ê hōe-bō͘, sīm-chì kàu i ê cha̍p tāi, mā m̄ thang khì Siōng-chú ê hōe-bō͘.
23:3 " Am-móng lâng á-.sī Mô͘-ap lâng, m̄ thang ji̍p-khì Siōng-chú ê hōe-bō͘, sīm-chì kàu in ê cha̍p tāi, éng-oán bē tàng ji̍p-khì Siōng-chú ê hōe-bō͘.
23:4 In-ūi lín chhut Ai-gi̍p ê sî, in bô ēng chia̍h-mi̍h kah chúi tī lō͘-.ni̍h kā lín gêng-chiap, koh in-ūi in kah lín tùi-te̍k, chhiàⁿ Mê-só͘-po-ta-miah ê Pì-toat lâng, Boh-ol ê kiáⁿ Pa-lân, lâi kā lín chiù-chó͘.
23:5 Chóng-.sī, Siōng-chú — lí ê Siōng-tè m̄-thiaⁿ Pa-lân, Siōng-chú — lí ê Siōng-tè hō͘ hit-ê chiù-chó͘ piàn-chò chiok-hok, in-ūi Siōng-chú — lí ê Siōng-tè thiàⁿ lí.
23:6 Lí chi̍t-sì-lâng kàu éng-oán m̄ thang kah in tô͘-bô͘ pêng-an kah hok-khì.
23:7 " M̄-thang oàn-hūn E-tóm lâng, in-ūi i sī lí ê hiaⁿ-tī. M̄-thang oàn-hūn Ai-gi̍p lâng, in-ūi lín bat chhut-gōa tī hia.
23:8 In só͘ seⁿ ê kiáⁿ-sun kàu tē-saⁿ tāi chiah thang ji̍p-khì Siōng-chú ê hōe-bō͘. "
23:9 " Lí ê kun-tūi chhut-khì kong-kek lí ê tùi-te̍k, tī iâⁿ-pâng tio̍h kakī kìm-kài it-chhè ê pháiⁿ tāi.
23:10 Lín tiong-kan nā ū lâng, tī àm-sî só͘ tú-.tio̍h ê lâi bak bô chheng-khì, i chiū tio̍h chhut-khì iâⁿ gōa, m̄ thang ji̍p-khì iâⁿ lāi.
23:11 Kàu beh àm ê sî, i tio̍h ēng chúi sé, kàu ji̍t lo̍h chiah thang ji̍p-khì iâⁿ lāi.
23:12 " Lí tī iâⁿ gōa kéng-soán chi̍t ūi thang chhut-khì kàu gōa-bīn tāi-piān ê só͘-chāi.
23:13 Τī lí ê khì-kū lāi tio̍h ū thuh-á, lí tī gōa-bīn tāi-piān ê sî, tio̍h ēng i ku̍t thô͘, chiah oa̍t tńg-sin lâi khàm lí só͘ pàng ê.
23:14 In-ūi Siōng-chú — lí ê Siōng-tè sì-kè kiâⁿ tī lí ê iâⁿ lāi, beh kā lí chín-kiù, kā lí ê tùi-te̍k kau hō͘ lí, só͘-í, lí ê iâⁿ-pâng eng-kai tio̍h ū sèng-kiat, bián-tit I khòaⁿ tio̍h lí tiong-kan ū ù-òe chiū lī-khui lí. "
23:15 Kî-tha Kok Chióng ê Kui-tēng
" Nā ū lô͘-po̍k thoat-lī i ê chú-lâng, cháu kàu lí hia, lí m̄ thang kā i kau hō͘ i ê chú-lâng.
23:16 I beh kah lí tòa, tī i só͘ kéng-soán lí chi̍t-ê siâⁿ mn̂g lāi ê só͘-chāi lâi tòa tī lí ê tiong-kan, to̍h-sī i só͘ hoaⁿ-hí ê, lí m̄ thang kā i khi-hū.
23:17 I-su-la-el ê lú-jîn tiong-kan m̄ thang ū ki-lí; I-su-la-el ê lâm-jîn tiong-kan m̄ thang ū lâm-sèng biō-chhiong.
23:18 Chhiong-ki só͘ tit tio̍h ê chêⁿ-á-.sī lâm-sèng biō-chhiong ê kang-chîⁿ, lí m̄ thang tòa ji̍p-khì Siōng-chú — lí ê Siōng-tè ê tiān lâi siā goān, in-ūi chit nn̄g hāng lóng sī Siōng-chú — lí ê Siōng-tè só͘ thó-ià ê.
23:19 " Lí ê hiaⁿ-tī á-.sī tùi lí chioh chîⁿ á-.sī chioh chia̍h-mi̍h, chioh kiàn-nā ē seⁿ lī-sek ê mi̍h, lí lóng m̄ thang the̍h i ê lī-sek.
23:20 Lí chioh gōa-cho̍k ê lâng, thang the̍h i ê lī-sek, chóng-.sī, chioh lí ê hiaⁿ-tī chiū m̄ thang the̍h i ê lī-sek; thang hō͘ Siōng-chú — lí ê Siōng-tè tī lí só͘ khì beh tit tio̍h chò sán-gia̍p ê tē, tī lí ê chhiú só͘ chò it-chhè ê tāichì, kā lí sù-hok.
23:21 " Lí tùi Siōng-chú — lí ê Siōng-tè hē goān, m̄ thang iân-chhiân lí ê siā goān, in-ūi Siōng-chú — lí ê Siōng-tè it-tēng ē tùi lí thó, lí nā bô siā chiū ū chōe.
23:22 Lí nā bô hē goān, chiū bô chōe.
23:23 Kiàn-nā tùi lí ê chhùi só͘ chhut ê, chiàu lí í-keng hē goān tī Siōng-chú — lí ê Siōng-tè lâi kam-sim hiàn ê, to̍h-sī lí ê chhùi só͘ tap-èng, lí tio̍h chip-siú lâi chiàu ánne kiâⁿ.
23:24 " Lí ji̍p lí ê chhù-piⁿ ê phû-tô hn̂g, thang chhut-chāi lí chia̍h phû-tô kàu pá, chóng-.sī, m̄ thang té tī lí ê khì-kū lāi.
23:25 Lí nā ji̍p lí ê chhù-piⁿ iáu-bōe koah ê ngó͘-kok tiong, thang ēng chhiú tiah i ê sūi, chóng-.sī, m̄ thang ēng liâm-á koah lí ê chhù-piⁿ ê ngó͘-kok. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。