申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 Tô-siám ê Siâⁿ ê Kui-tēng
( BSK 35: 9-28; ISA 20: 1-9)
" Siōng-chú — lí ê Siōng-tè chiong-lâi ē chián-tû hiahê kok, to̍h-sī Siōng-chú — lí ê Siōng-tè kā in ê tē siúⁿ-sù hō͘ lí ê, lí khì sêng-chiap in, lâi tòa in ê siâⁿ kah in ê chhù.
19:2 Hit sî, lí chiū tio̍h tī Siōng-chú — lí ê Siōng-tè siúⁿ-sù hō͘ lí chò sán-gia̍p ê tē, kā i hun-pia̍t saⁿ-ê siâⁿ.
19:3 Tio̍h kā Siōng-chú — lí ê Siōng-tè só͘ siúⁿ-sù hō͘ lí lâi sêng-chiap kài lāi ê tē, hun-chò saⁿ khu, koh kā i khui lō͘, hō͘ hiahê thâi lâng ê lóng thang cháu-khì hia.
19:4 " Thâi-sí-lâng ê cháu-khì hia, chiū thang tit tio̍h oa̍h, hit-ê lē to̍h-sī ánne: kiàn-nā pêng-sî bô kiat-oàn in-ūi sit-gō͘ lâi thâi-sí i ê chhù-piⁿ,
19:5 to̍h-sī chhin-chhiūⁿ lâng kah i ê chhù-piⁿ khì chhiū-nâ beh chhò chhiū-ba̍k, chhiú gia̍h pó͘-thâu chi̍t ē chhò, beh chhò hit-ê chhiū, pó͘-thâu bah lut-khì, siong tio̍h i ê chhù-piⁿ lâi tì-sú sí, chit-ê lâng tio̍h cháu kàu hiahê siâⁿ ê chi̍t-ê, chiū thang oa̍h lo̍h-.khì.
19:6 Bián-tit pò-siû ê, tng i sim-hóe iáu teh to̍h ê sî, jiok thâi lâng ê lâng, in-ūi lō͘ chin hn̄g jiok tio̍h chiū kā i thâi-sí; kî-si̍t i bô eng-kai sí, in-ūi pêng-sî i pēng bô oàn-hūn hit-ê hō͘ i thâi-sí ê lâng.
19:7 Só͘-í, góa bēng-lēng lí kóng, tio̍h kā i hun-pia̍t saⁿ-ê siâⁿ.
19:8 " Siōng-chú — lí ê Siōng-tè nā chiàu I tùi lí ê chó͘-sian só͘ chiùchōa ê, khui-khoah lí ê kéng-kài, kā só͘ èng-ín siúⁿ-sù hō͘ lí ê chó͘-sian ê choân tē hō͘ lí.
19:9 Góa kin-á-ji̍t só͘ bēng-lēng lí it-chhè ê kài-bēng, lí nā chip-siú lâi chiàu ánne kiâⁿ, thiàⁿ Siōng-chú — lí ê Siōng-tè, tiāⁿtiāⁿ kiâⁿ I hiahê tō-lō͘, chiū tī chit saⁿ-ê siâⁿ í-gōa, tio̍h koh ūi kakī ke siat saⁿ-ê siâⁿ.
19:10 Bián-tit bô chōe ê hoeh lâu tī Siōng-chú — lí ê Siōng-tè só͘ siúⁿ-sù hō͘ lí chò sán-gia̍p ê tē, tì-sú lâu hoeh ê chōe kui tī lí.
19:11 " Chóng-.sī, lâng nā oàn-hūn i ê chhù-piⁿ, bih khí-lâi kā i phah, kā i siong-hāi kàu sí, chiū ē-tàng cháu kàu hiahê siâⁿ ê chi̍t-ê.
19:12 I ê siâⁿ ê tiúⁿ-ló chiū tio̍h chhe lâng, tùi hia kā i tòa chhut-.lâi, kau tī pò-siû ê lâng ê chhiú, hō͘ i sí.
19:13 Lí ê ba̍k-chiu m̄ thang khó-liân i, tī I-su-la-el tiong tio̍h tû-khì bô chōe ê hoeh, hō͘ lí thang tit tio̍h hok-khì. "
19:14 Kū Tē-kài ê Kui-tēng
" Tī Siōng-chú — lí ê Siōng-tè só͘ siúⁿ-sù hō͘ lí sêng-chiap ê tē, m̄ thang î-sóa chhù-piⁿ ê kài-chí, hit-ê sī chêng ê lâng só͘ chhāi tī lí sòa-chiap ê sán-gia̍p ê lāi-bīn ê. "
19:15 Chèng-jîn ê Kui-tēng
" Kan-ta chi̍t-ê lâng bē tàng khí-lâi kiàn-chèng ū lâng siáⁿ-mi̍h pháiⁿ, siáⁿ-mi̍h chōe, to̍h-sī i khòaⁿ tio̍h só͘ hoān ê chōe, it-tēng tio̍h pîn nn̄g-ê kiàn-chèng-jîn ê chhùi á-.sī saⁿ-ê kiàn-chèng-jîn ê chhùi, chiah thang tēng i ê àn.
19:16 Nā ū lāmsám kiàn-chèng ê khí-lâi kong-kek bó͘ lâng, kiàn-chèng i kiâⁿ pháiⁿ,
19:17 chit nn̄g-ê sio-chèⁿ ê lâng chiū tio̍h khiā tī Siōng-chú ê bīn-chêng kah tong-sî ê chè-si í-ki̍p sím-phòaⁿ-koaⁿ ê bīn-chêng.
19:18 Sím-phòaⁿ-koaⁿ tio̍h siông-sè cha-mn̄g, lí khòaⁿ, nā chò kiàn-chèng ê lâng kó-jiân sī ké kiàn-chèng, ēng ké kiàn-chèng beh hāi i ê hiaⁿ-tī,
19:19 lín chiū tio̍h kā i khoán-thāi, chhin-chhiūⁿ i siūⁿ beh kā i khoán-thāi ê hiaⁿ-tī ê. Αń-ne chiū ē-tàng tùi lín tiong-kan tû-khì hit-ê pháiⁿ.
19:20 Kî-tha ê lâng thiaⁿ tio̍h lóng ē kiaⁿ, tī lín tiong-kan chiū bô koh kiâⁿ chit khoán pháiⁿ.
19:21 Lí ê ba̍k-chiu m̄ thang khó-liân i, tio̍h ēng miā pôe miā, ba̍k-chiu pôe ba̍k-chiu, chhùi-khí pôe chhùi-khí, chhiú pôe chhiú, kha pôe kha. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。