申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 An-hioh-nî ê Kui-tēng
( LBK 25: 1-7)
" Ta̍k pái kàu chhit nî ê lō͘-bóe, lí tio̍h kiâⁿ tháu-pàng.
15:2 Tháu-pàng ê lē, to̍h-sī ánne: só͘-ū chè-chú chioh chhù-piⁿ ê, tio̍h tháu-pàng, m̄ thang tùi lí ê chhù-piⁿ kah hiaⁿ-tī tui-thó, in-ūi Siōng-chú ê tháu-pàng í-keng soan-pò͘ à.
15:3 M̄ koh, gōa-kok lâng lí thang kā i tui-thó só͘-khiàm ê, to̍k-to̍k lí ê mi̍h chioh hō͘ lí ê hiaⁿ-tī ê, lí ê chhiú tio̍h kā i tháu-pàng.
15:4 " Lí nā chù-ì thiaⁿ Siōng-chú — lí ê Siōng-tè ê ōe, chip-siú lâi kiâⁿ góa kin-á-ji̍t só͘ bēng-lēng lí che it-chhè ê kài-bēng, chiū ē tī lín tiong-kan bô sànchhiah lâng,
15:5 In-ūi tī Siōng-chú — lí ê Siōng-tè só͘ siúⁿ-sù hō͘ lí chò sán-gia̍p ê tē, Siōng-chú ē tōa-tōa kā lí sù-hok.
15:6 In-ūi Siōng-chú — lí ê Siōng-tè ē chiàu I só͘ èng-ín ê kā lí sù-hok. Lí ē chioh hō͘ chin chē kok, lí mā m̄-bián chioh; lí ē koán-hat chin chē kok, in mā bē kā lí koán-hat.
15:7 " Tī Siōng-chú — lí ê Siōng-tè só͘ siúⁿ-sù hō͘ lí ê tē, nā tī lí chi̍t-ê siâⁿ mn̂g lāi, lí ê hiaⁿ-tī tiong, ū chi̍t-ê sànchhiah lâng kah lí tī-.leh, chiū m̄ thang tùi lí sànchhiah ê hiaⁿ-tī ngē lí ê sim, kiu lí ê chhiú.
15:8 It-tēng tio̍h tùi i khui lí ê chhiú, chiàu i só͘ su-iàu ê chioh hō͘ i, pó͘ i ê bô kàu.
15:9 Lí tio̍h kakī kín-sīn, khióng-kiaⁿ lí sim-lāi ū pháiⁿ liām-thâu, kóng, ' Tē-chhit nî, tháu-pàng ê nî teh beh kàu, lí chiū gîn lí sànchhiah ê hiaⁿ-tī, lóng m̄ hō͘ i, tì-sú i ūi tio̍h lí kiû-kiò Siōng-chú, lí chiū ū chōe.
15:10 Lí it-tēng tio̍h hō͘ i, hō͘ i ê sî, sim-lāi m̄ thang hoân-ló, in-ūi tùi chit-ê tāichì, Siōng-chú — lí ê Siōng-tè ē tī lí só͘ kiâⁿ ê it-chhè kah lí ê chhiú só͘ chò ê, kā lí sù-hok.
15:11 In-ūi tī hit só͘-chāi, sànchhiah lâng éng-éng bē tn̄g; só͘-í, góa bēng-lēng lí kóng, ' Tī lí ê kéng lāi, it-tēng tio̍h tùi lí ê hiaⁿ-tī, sànchhiah ê, khiàm-khoeh-.ê, lâi khui lí ê chhiú. '"
15:12 Tùi-thāi Lô͘-po̍k ê Kui-tēng
( LBK 25: 1-7)
" Lí ê hiaⁿ-tī tiong, nā ū chi̍t-ê Hi-bú-lâi ê chapo͘ lâng, á-.sī Hi-bú-lâi ê chabó͘ lâng bē hō͘ lí, ho̍k-sāi lí la̍k nî, kàu tē-chhit nî, chiū tháu-pàng hō͘ i khì chū-iû.
15:13 Lí tháu-pàng hō͘ i khì chū-iû ê sî, m̄ thang hō͘ i khang-chhiú khì,
15:14 Tio̍h tùi lí ê iûⁿ-kûn, tiūⁿ-tiâⁿ, chiú-khut tiong, the̍h chin chē lâi hō͘ i; chiàu Siōng-chú — lí ê Siōng-tè só͘ sù-hok lí ê lâi hō͘ i.
15:15 Tio̍h ē kì-tit lí tī Ai-gi̍p tē chò lô͘-lē, Siōng-chú — lí ê Siōng-tè kiù-sio̍k lí; in-ūi ánne, góa kin-á-ji̍t bēng-lēng lí chit-ê tāichì.
15:16 " I nā tùi lí kóng, ' Góa bô beh lī-khui lí. " In-ūi i thiàⁿ lí kah lí ê ka-koàn, koh in-ūi tòa tī lí hia khiā chin hó,
15:17 lí tio̍h ēng chǹg-á tùi mn̂g-.ni̍h kǹg i ê hīⁿ-á, i chiū éng-oán chò lí ê lô͘-po̍k. Lí khoán-thāi lí ê lú-pī mā sī ánne.
15:18 Lí tháu-pàng hō͘ i khì chū-iû ê sî, m̄ thang lia̍h-chò khek-khui, in-ūi i ho̍k-sāi lí la̍k nî, pí chhiàⁿ-kang ê têng-pōe kè-ta̍t. Siōng-chú — lí ê Siōng-tè ē tī lí só͘ chò it-chhè ê tāichì kā lí sù-hok. "
15:19 Thâu-chúi Seⁿ Iûⁿ-kûn ê Kui-tēng
" Kiàn-nā gû-kûn, iûⁿ-kûn, thâu-chúi seⁿ ê, kang ê, lí tio̍h hun-pia̍t chò sèng, kui hō͘ Siōng-chú — lí ê Siōng-tè. Gû-kûn thâu-chúi seⁿ ê m̄ thang hō͘ i chò-kang; iûⁿ-kûn thâu-chúi seⁿ ê m̄ thang chián i ê mn̂g.
15:20 Lí kah lí ê ka-koàn, ta̍k nî tio̍h tī Siōng-chú — lí ê Siōng-tè ê bīn-chêng chia̍h, to̍h-sī tī Siōng-chú só͘ beh kéng-soán ê só͘-chāi.
15:21 Nā ū phòa-siùⁿ ê, á-.sī pái-kha, á-.sī chheⁿmê, bô-lūn ū siáⁿ-mi̍h pháiⁿ ê phòa-siùⁿ, lóng m̄ thang chò chè-mi̍h hiàn hō͘ Siōng-chú — lí ê Siōng-tè;
15:22 thang tī lí ê mn̂g lāi chia̍h; chheng-khì kah bô chheng-khì ê lâng lóng thang chia̍h, chhin-chhiūⁿ teh chia̍h lêng-iûⁿ kah lo̍k;
15:23 to̍k-to̍k m̄ thang chia̍h i ê hoeh; tio̍h piàⁿ tī tē-.ni̍h kah piàⁿ chúi sio-siâng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。