申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 I-su-la-el Lâng M̄ Sūn-ho̍k Siōng-tè
" I-su-la-el lâng, lí tio̍h thiaⁿ! Lí kin-á-ji̍t beh kòe Iol-tàn hô, ji̍p-khì sêng-chiap hiahê pí lí khah tōa koh khah béng ê kok, tit tio̍h khoah-tōa koh kian-kò͘ kàu tú thiⁿ ê siâⁿ.
9:2 Hitê jîn-bîn tōa koh lò, sī A-lap ê cho̍k, lín só͘ chai ê, mā bat thiaⁿ tio̍h ū lâng teh kí in kóng, ' Siáⁿ lâng tī A-lap cho̍k ê bīn-chêng khiā ē tiâu? '
9:3 Kin-á-ji̍t lí tio̍h chai, Siōng-chú — lí ê Siōng-tè chò lí ê thâu-chêng kòe-.khì, chhin-chhiūⁿ lia̍t-lia̍t ê hóe, I ē kā in bia̍t-bông, hō͘ in tī lín ê bīn-chêng tōa-tōa thâi-su. Lín tio̍h kā in kóaⁿ chhut-.khì, hō͘ in kóaⁿ-kín bia̍t-bông, chiàu Siōng-chú só͘ tùi lín kóng ê.
9:4 " Siōng-chú — lí ê Siōng-tè tùi lí ê bīn-chêng kā in kóaⁿ chhut-khì liáu-āu, lí sim-lāi m̄ thang siūⁿ kóng, ' Siōng-chú chhōa góa ji̍p-lâi sêng-chiap chit-ê tē, sī in-ūi góa ê gī-hêng. ' Kî-si̍t Siōng-chú sī ūi tio̍h hiahê kok ê pháiⁿ, chiah tùi lí ê bīn-chêng kā in kóaⁿ chhut-.khì.
9:5 Lí ji̍p-khì sêng-chiap in ê tē, pēng m̄-sī in-ūi lí ê gī-hêng, mā m̄-sī in-ūi lí ê sim chèng-ti̍t, to̍h-sī in-ūi chiahê kok ê pháiⁿ, Siōng-chú — lí ê Siōng-tè chiah tùi lí ê bīn-chêng kā in kóaⁿ chhut-.khì, koh in-ūi Siōng-chú beh kian-kò͘ I tùi lí ê chó͘-sian A-bu-la-hàm, Í-sak, Iâ-kop só͘ chiùchōa ê ōe.
9:6 " Lí tio̍h chai, Siōng-chú — lí ê Siōng-tè ēng súi ê tē siúⁿ-sù hō͘ lín chò sán-gia̍p, m̄-sī in-ūi lí ê gī-hêng, in-ūi lí sī ām-kún ngē ê jîn-bîn. "
9:7 Pài Kim-gû Pōe-ge̍k Siōng-chú
" Lí tio̍h ē kì-tit, m̄ thang bē kì-.tit, lí tī khòng-iá jiá tio̍h Siōng-chú — lí ê Siōng-tè ê siū-khì. Tùi lín chhut Ai-gi̍p tē hit ji̍t kàu lín lâi-kàu chit-ê só͘-chāi, lín tiāⁿtiāⁿ pōe-ge̍k Siōng-chú.
9:8 Lín tī Hô-lep soaⁿ koh jiá Siōng-chú siū-khì, tì-sú Siōng-chú tùi lín siū-khì, beh kā lín bia̍t-bông.
9:9 Hit tong-sî, góa chiūⁿ soaⁿ, beh niá-siū chio̍h-pi, to̍h-sī Siōng-chú kah lín li̍p-iok ê pi. Hit sî, góa tiàm tī soaⁿ-.ni̍h sì-cha̍p kang sì-cha̍p mê, bô chia̍h piáⁿ mā bô lim chúi.
9:10 Siōng-chú ēng nn̄g tè chio̍h-pi kau-tài góa, sī Siōng-chú ēng chéng-thâu-á siá ê. Hit téng-bīn só͘ siá ê, sī chiàu Siōng-chú tī tāi-hōe ê ji̍t, tī soaⁿ téng, tī hóe tiong, tùi lín só͘ kóng it-chhè ê ōe.
9:11 Sì-cha̍p kang sì-cha̍p mê liáu-āu, Siōng-chú kā hit nn̄g tè chio̍h-pi, to̍h-sī iok-pi, kau-tài góa.
9:12 " Siōng-chú tùi góa kóng, ' Lí khí-.lâi, kóaⁿ-kín tùi chia lo̍h-.khì, in-ūi lí ê jîn-bîn, lí tùi Ai-gi̍p chhōa chhut-.lâi ê, í-keng pāi-hoāi kakī, in khoài-khoài phian-oai góa só͘ bēng-lēng ê lō͘, in-ūi in ūi kakī chù chi̍t sian ngó͘-siōng. '
9:13 " Siōng-chú koh hoan-hù góa kóng, ' Góa khòaⁿ chiahê jîn-bîn, lí khòaⁿ, sī ām-kún ngē ê jîn-bîn.
9:14 Lí chhut-chāi góa, góa beh kā in siau-bia̍t, tùi thian-hā chhat-siau in ê miâ, góa beh hō͘ lí chiâⁿ-chò chi̍t kok pí in khah kiông khah tōa. '
9:15 Góa chiū oa̍t tńg-sin lo̍h soaⁿ, soaⁿ hō͘ hóe sio- to̍h, nn̄g tè iok-pi tī góa ê nn̄g ki chhiú-.ni̍h.
9:16 Góa chi̍t ē khòaⁿ, lín í-keng tek-chōe Siōng-chú — lín ê Siōng-tè, ūi kakī chù chi̍t chiah gû-á, chin kín to̍h oai-chhoa̍h Siōng-chú só͘ bēng-lēng lín ê lō͘.
9:17 Góa kā hit nn̄g tè pi tùi góa ê siang chhiú hiat lo̍h-.khì, phah-tn̄g tī lín ê ba̍k-chiu chêng.
9:18 Góa phak tī Siōng-chú ê bīn-chêng, chhin-chhiūⁿ í-chêng ê khoán, sì-cha̍p kang sì-cha̍p mê, bô chia̍h piáⁿ mā bô lim chúi, in-ūi lín só͘ hoān it-chhè ê chōe, kiâⁿ Siōng-chú khòaⁿ-chò sī pháiⁿ ê tāichì, jiá I siū-khì.
9:19 Hit sî, Siōng-chú tōa m̄-kam-goān, tùi lín siū-khì, góa chiū chin kiaⁿ, in-ūi I siū-khì beh kā lín siau-bia̍t; chóng-.sī, hit pái Siōng-chú ū koh-thiaⁿ góa.
9:20 Siōng-chú mā siū-khì A-lông, beh kā i bia̍t-tiāu, siâng hit sî, góa mā thè A-lông kî-tó.
9:21 Hit sî, góa ēng lín hoān chōe ê mi̍h, to̍h-sī lín só͘ chù ê gû-á, ēng hóe sio-tiāu, koh kā i géng kah iù-iù, iù kah chhin-chhiūⁿ thô͘-soa hún, góa kā chit-ê thô͘-soa hún iā tī tùi soaⁿ téng lâu lo̍h-.lâi ê khe.
9:22 " Lín mā tī Tha-bé-la̍h, tī Mak-sá, tī Ki-bú-lo̍t-hat-ta-bah, koh kek-khí Siōng-chú ê siū-khì.
9:23 Siōng-chú chhe lín lī-khui Ka-té-si Bal-né-ah, kóng, ' Lín chiūⁿ-khì sêng-chiap góa só͘ siúⁿ-sù hō͘ lín ê tē. ' Hit sî, lín ûi-pōe Siōng-chú — lín ê Siōng-tè ê kài-bēng, m̄-sìn I, mā m̄-thiaⁿ I ê ōe.
9:24 Tùi góa bat lín ê hit ji̍t khí, lín to̍h tiāⁿtiāⁿ pōe-ge̍k Siōng-chú.
9:25 " Góa in-ūi Siōng-chú kóng beh kā lín siau-bia̍t, chiū phak tī Siōng-chú ê bīn-chêng phak-teh sì-cha̍p kang sì-cha̍p mê.
9:26 Góa tùi Siōng-chú kî-tó kóng, ' Chì-koân Siōng-chú ah, kiû Lí m̄ thang bia̍t-bông Lí ê chú-bîn. I ê sán-gia̍p, to̍h-sī Lí ēng tōa khùi-la̍t sio̍k-hôe ê, ēng tōa koân-lêng ê chhiú chhōa chhut Ai-gi̍p ê.
9:27 Kiû Lí tio̍h ē kì-tit Lí ê lô͘-po̍k A-bu-la-hàm, Í-sak, Iâ-kop, m̄ thang kì-liām chiahê jîn-bîn ê ngē-sim kah in ê pháiⁿ, in ê chōe,
9:28 Khióng-kiaⁿ Lí chhōa goán chhut-lâi hit só͘-chāi ê lâng ē kóng, Siōng-chú in-ūi bē tàng chhōa in ji̍p-khì I só͘ èng-ín in ê tē, koh oàn-hūn in, só͘-í, chhōa in chhut-.khì, beh tī khòng-iá kā in bia̍t-bông.
9:29 M̄ koh, in sī Lí ê chú-bîn, Lí ê sán-gia̍p, sī Lí ēng Lí ê tōa koân-lêng, ēng Lí chhun chhut-.lâi ê chhiú, só͘ chhōa chhut-.lâi ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。