申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 Sêng-siū Hó Thó͘-tē
" Góa kin-á-ji̍t só͘ bēng-lēng lí it-chhè ê kài-bēng, lín tio̍h chip-siú lâi chiàu ánne kiâⁿ, hō͘ lín thang oa̍h lo̍h-.khì, lâng-gia̍h ke-thiⁿ chin chē, thang ji̍p-khì tit tio̍h Siōng-chú tùi lín ê chó͘-sian só͘ chiùchōa èng-ín ê tē.
8:2 Lí mā tio̍h ē kì-tit Siōng-chú — lí ê Siōng-tè chit sì-cha̍p nî chhōa lí tī khòng-iá ê lō͘, sī beh hō͘ lí khiam-pi lâi chhì-giām lí, beh chai lí ê sim-lāi án-chóaⁿ siūⁿ, khéng chun-siú I ê kài-bēng á-bô.
8:3 I hō͘ lí khiam-pi, hō͘ lí iau-gō, ēng lí só͘ m̄ bat, lí ê chó͘-sian mā m̄ bat ê má-ná iúⁿ-chhī lí, hō͘ lí thang chai lâng m̄-sī kantaⁿ óa-khò piáⁿ lâi oa̍h, lâng sī óa-khò Siōng-chú ê chhùi só͘ kóng it-chhè ê ōe lâi oa̍h.
8:4 Chit sì-cha̍p nî, lí ê saⁿ-khò͘ bô phòa, lí ê kha mā bô phòng-phā.
8:5 Lí ê sim tio̍h chai, Siōng-chú — lí ê Siōng-tè kàu-tok lí, chhin-chhiūⁿ lâng teh kàu-tok i ê kiáⁿ.
8:6 Lí koh tio̍h chip-siú Siōng-chú — lí ê Siōng-tè ê kài-bēng, lâi kiâⁿ I ê tō-lō͘, lâi kèng-ùi I.
8:7 In-ūi Siōng-chú — lí ê Siōng-tè chhōa lí ji̍p hit-ê súi ê tē, hit-ê tē ū khe, ū chúi-chôaⁿ, ū chhim-ian, tùi soaⁿ-kok kah soaⁿ téng lâu chhut-.lâi.
8:8 Sī chhut sió-be̍h, tōa-be̍h, phû-tô chhiū, bû-hoa-kó chhiū kah sia̍h-liû chhiū ê tē, mā sī chhut kaⁿ-ná chhiū kah bi̍t ê tē.
8:9 Lí tī hit só͘-chāi chia̍h-mi̍h chhiong-chiok, tī hia lí mā bô khiàm kah pòaⁿ-hāng. Hit só͘-chāi ê chio̍h-thâu sī thih, tī i ê soaⁿ thang ku̍t tâng.
8:10 Lí ē chia̍h kàu pá, chiū ūi tio̍h I só͘ siúⁿ-sù hō͘ lí ê súi tē, lâi oló Siōng-chú — lí ê Siōng-tè.
8:11 Kéng-kò Jîn-bîn M̄-thang Bē Kì-tit Siōng-chú
" Lí tio̍h kín-sīn, bián-tit lí bē kì-tit Siōng-chú — lí ê Siōng-tè, bô chun-siú I ê kài-bēng, hoat-tō͘ kah lu̍t-lē, to̍h-sī góa kin-á-ji̍t só͘ bēng-lēng lí ê;
8:12 khióng-kiaⁿ lí í-keng chia̍h pá, í-keng khí súi ê chhù lâi tòa,
8:13 Lí ê gû-iûⁿ ke-thiⁿ, lí ê kim-gîn ke-thiⁿ, lí só͘-ū ê lóng ke-thiⁿ,
8:14 Hit sî, lí ê sim kiau-ngō͘, ē bē kì-tit Siōng-chú — lí ê Siōng-tè, to̍h-sī chhōa lí tùi Ai-gi̍p tē — chò lô͘-lē ê ke chhut-.lâi ê.
8:15 I chhōa lí keng-kòe hit-ê tōa koh thang kiaⁿ ê khòng-iá, hia ū hóe-chôa kah giat-á-thâng, ta-sò koh bô chúi ê tē. I bat ūi tio̍h lí hō͘ chúi tùi tēng ê chio̍h-pôaⁿ lâu chhut-.lâi.
8:16 Koh tī khòng-iá, ēng lí ê chó͘-sian só͘ m̄ bat ê má-ná kā lí iúⁿ-chhī, sī beh hō͘ lí khiam-pi, chhì-giām lí, hō͘ lí kàu bóe tit tio̍h hok-khì;
8:17 khióng-kiaⁿ lí sim-lāi siūⁿ kóng, ' Tit tio̍h chit-ê tōa ê ki-gia̍p, sī tùi góa kakī ê khùi-la̍t kah góa ê chhiú ê lêng-le̍k. '
8:18 Chóng-.sī, lí tio̍h ē kì-tit Siōng-chú — lí ê Siōng-tè, in-ūi lí tit tio̍h tōa ki-gia̍p ê khùi-la̍t sī I hō͘ lí ê, sī beh lâi oân-sêng I só͘ tùi lí ê chó͘-sian chiùchōa ê iok, chhin-chhiūⁿ kin-á-ji̍t ê khoán-sit.
8:19 Chiong-lâi, lí nā bē kì-tit Siōng-chú — lí ê Siōng-tè, khì chun-thàn pa̍t-ê sîn-bêng, koh kā i ho̍k-sāi, kā i kèng-pài, góa kin-á-ji̍t giâm-giâm kā lín kéng-kài, lín it-tēng ē bia̍t-bông!
8:20 Siōng-chú tī lín ê bīn-chêng só͘ bia̍t-bông hiahê kok, lín mā ē kāng-khoán ánne bia̍t-bông, in-ūi lín m̄ chun-thàn Siōng-chú — lín ê Siōng-tè ê ōe."
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。