創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Thiⁿ-tē kah i it-chhè só͘-ū ê í-keng chō oân-sêng.
2:2 Tī tē-chhit ji̍t, Siōng-tè oân-sêng I só͘ chhòng-chō ê kang, chiū tī tē-chhit ji̍t, hioh I it-chhè só͘ chò ê kang.
2:3 Siōng-tè tī tē-chhit ji̍t sù-hok, tēng chò sèng-ji̍t, in-ūi tī chit ji̍t, Siōng-tè thêng I it-chhè chhòng-chō ê kang, chiū an-hioh.
2:4 Thiⁿ-tē chhòng-chō ê lâi-le̍k, tī Siōng-chú — Siōng-tè chō tē kah thiⁿ ê ji̍t, chhin-chhiūⁿ ē-té:
2:5 E-tiân Hn̂g
Soaⁿ-iá it-chhè ê chháu-ba̍k iáu-bōe ū tī tē-.ni̍h, soaⁿ-iá it-chhè ê chhài-se iáu-bōe seng-tióng, in-ūi Siōng-chú — Siōng-tè bô lo̍h hō͘ tī tē-.ni̍h, mā bô lâng thang chèng-choh hit-ê thó͘-tē.
2:6 Chóng-.sī, ū bū tùi tē khí, chu-jūn choân tē-bīn.
2:7 Siōng-chú — Siōng-tè ēng tē-chiūⁿ ê thô͘-soa hún chhiau-chò lâng （ Chù, Tī Hi-bú-lâi bûn, " Lâng " Kah " Tē " Ū kiōng-tông ê jī-kin; " Lâng " Kah lâng-miâ " A-tám " mā sī kāng chi̍t-ê jī-kin. ）, pûn oa̍h ê khùi ji̍p-khì i ê phīⁿ-khang, lâng chiū chiâⁿ-chò ū lêng-hûn ê oa̍h-miā.
2:8 Siōng-chú — Siōng-tè tī tang-hong, tī E-tiân, an-tì chi̍t-ê hn̂g, kā só͘ chō ê lâng hē tī hia.
2:9 Siōng-chú — Siōng-tè hō͘ ta̍k chióng ê chhiū tùi tē-.ni̍h hoat khí-.lâi, hó khòaⁿ mā hó chia̍h. Τī hn̂g ê tiong-kan, koh ū oa̍h-miā ê chhiū kah hun-pia̍t siān-ok ê chhiū.
2:10 E-tiân ū hô lâu chhut-.lâi, koàn-ak hit-ê hn̂g, tùi hia hun-khui chò sì tiâu.
2:11 Thâu chi̍t tiâu miâ kiò-chò Pi-sióng, to̍h-sī se̍h-lâu tī Ha-bí-la̍h choân tē ê, tī hia ū chhut kim.
2:12 hit ūi ê kim sī chin hó, mā chhut chin-chu phek-ge̍k.
2:13 Tē-jī tiâu miâ kiò-chò Gi-hóng, to̍h-sī se̍h-lâu tī Kú-si̍t choân tē ê.
2:14 Tē-saⁿ tiâu miâ kiò-chò Ti-gu-lí-su, to̍h-sī lâu tī A-siul ê tang pêng ê. Tē-sì tiâu to̍h-sī Iu-hu-la-té.
2:15 Siōng-chú — Siōng-tè kā hit-ê lâng hē tī E-tiân hn̂g, lâi chèng-choh kah kò͘-siú.
2:16 Siōng-chú — Siōng-tè hoan-hù hit-ê lâng kóng, " Hn̂g lāi ta̍k chióng chhiū ê kóe-chí, lóng thang sûi-ì lâi chia̍h.
2:17 Chóng-.sī, hun-pia̍t siān-ok ê chhiū, i ê kóe-chí m̄ thang chia̍h, in-ūi chia̍h ê ji̍t, lí it-tēng ē sí. "
2:18 Siōng-chú — Siōng-tè kóng, " Lâng toaⁿ-sin kakī tòa m̄-hó, Góa beh kā i chō chi̍t-ê pang-chān ê, lâi kah i phit-phòe. "
2:19 Siōng-chú — Siōng-tè ēng thô͘ chò soaⁿ-iá ta̍k chióng ê cháu-siù, í-ki̍p khong-tiong ta̍k chióng ê poe-chiáu, koh chhōa hiahê oa̍h-mi̍h lâi-kàu hit-ê lâng ê bīn-chêng, khòaⁿ i beh chheng in siáⁿ-mi̍h miâ. Kiàn-nā i só͘ chheng ta̍k chióng oa̍h-mi̍h ê, chiū chò hit-ê oa̍h-mi̍h ê miâ.
2:20 Hitê lâng chiū kā it-chhè ê chengseⁿ, khong-tiong ê poe-chiáu kah soaⁿ-iá it-chhè ê cháu-siù lóng hō-miâ; chóng-.sī, chhōe bô chi̍t-ê thang chò hit-ê lâng ê pang-chān, lâi kah i phit-phòe.
2:21 Siōng-chú — Siōng-tè hō͘ hit-ê lâng khùn tāng-bîn, i chiū khùn; chiū the̍h i ê chi̍t ki hia̍p-kut, koh ēng bah kā i pau khí-.lâi.
2:22 Siōng-chú — Siōng-tè chiū kā tùi hit-ê lâng só͘ the̍h chhut-.lâi ê hia̍p-kut, chō-sêng chi̍t-ê chabó͘ lâng, koh kā i chhōa-lâi kìⁿ hit-ê lâng.
2:23 Hitê lâng kóng, " Taⁿ chit-ê sī góa kut lāi ê kut, bah lāi ê bah; góa beh kā i kiò-chò chabó͘ lâng, in-ūi i sī tùi chapo͘ lâng the̍h chhut-.lâi ê.
2:24 Só͘-í, lâng beh lī-khui i ê pē-bú kah i ê bó͘ kiat-liân, in chiū chiâⁿ-chò chi̍t thé.
2:25 Ang-bó͘ nn̄g lâng lóng kāng-khoán thǹgpaktheh, mā bô kám-kak kiàn-siàu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。