申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Mô͘-se Khǹg I-su-la-el Lâng Tio̍h Sūn-ho̍k
" I-su-la-el lâng, taⁿ góa só͘ kà-sī lín ê lu̍t-lē kah hoat-tō͘, lín tio̍h thiaⁿ lâi chun-thàn, thang hō͘ lín oa̍h-.leh, ji̍p-khì tit tio̍h Siōng-chú — lín ê chó͘-sian ê Siōng-tè só͘ beh siúⁿ-sù hō͘ lín ê tē.
4:2 Góa só͘ bēng-lēng lín ê ōe, lín m̄ thang ke-thiⁿ, mā m̄ thang kā i kiám-chió, thang hō͘ lín chip-siú Siōng-chú — lín ê Siōng-tè ê kài-bēng, to̍h-sī góa só͘ bēng-lēng lín ê.
4:3 Siōng-chú in-ūi Ba-al-pau-al ê tāichì só͘ kiâⁿ ê, lín chhin-ba̍k khòaⁿ-.tio̍h. In-ūi kiàn-nā chun-thàn Ba-al-pau-al ê lâng, Siōng-chú — lí ê Siōng-tè lóng ē tùi lín tiong-kan kā in tû-bia̍t.
4:4 To̍k-to̍k lín kah Siōng-chú — lín ê Siōng-tè kiat-liân ê, kin-á-ji̍t lóng oa̍h-.leh.
4:5 " Lí khòaⁿ, góa mā bat ēng lu̍t-lē kah hoat-tō͘ kà-sī lín, chiàu Siōng-chú — góa ê Siōng-tè só͘ bēng-lēng góa ê, hō͘ lín chun-thàn tī lín só͘ beh ji̍p-khì sêng-chiap ê tē.
4:6 Só͘-í, lín tio̍h chip-siú lâi kiâⁿ; che to̍h-sī lín tī lia̍t kok ê bīn-chêng ê tì-hūi kah chhong-bêng. In chi̍t-ē thiaⁿ tio̍h che it-chhè ê lu̍t-lē, ē kóng, ' Chit-ê tōa kok chin-chiàⁿ sī ū tì-hūi koh chhong-bêng ê jîn-bîn. '
4:7 " Tó chi̍t-ê tōa kok ū sîn-bêng kah i chhin-kīn, chhin-chhiūⁿ Siōng-chú — lán ê Siōng-tè, tī lán kiàn-nā kiû-kiò I ê sî ē kah lán chhin-kīn?
4:8 Koh ū siáⁿ-mi̍h tōa kok ū lu̍t-lē kah hoat-tō͘, chhin-chhiūⁿ góa kin-á-ji̍t tī lín ê bīn-chêng só͘ thoân it-chhè ê lu̍t-hoat hiahni̍h kong-gī?
4:9 " Só͘-í, lín tio̍h kakī kín-sīn, mā tio̍h kín-sīn pó-siú lí ê sim, bián-tit lí bē kì-tit chhin-ba̍k só͘ khòaⁿ-.tio̍h ê tāichì, koh bián-tit chiahê tāichì tī lí oa̍h-.leh ê sî lī-khui lí ê sim, mā tio̍h ēng chit-ê lâi kà-sī lín hiahê kiáⁿ kah hiahê sun.
4:10 Lí tī Hô-lep soaⁿ khiā tī Siōng-chú — lí ê Siōng-tè ê bīn-chêng, hit ji̍t Siōng-chú tùi góa kóng, ' Lí kā Góa chio-chi̍p jîn-bîn, Góa beh hō͘ in thiaⁿ tio̍h Góa ê ōe, hō͘ in oa̍h tī sè-kan ê ji̍t, thang ha̍k-si̍p kèng-ùi Góa, koh thang kà-sī in ê kiáⁿ-jî. '
4:11 " Hit sî, lín kīn óa-.lâi, khiā tī soaⁿ-kha, soaⁿ-.ni̍h ū hóe-iām chhèng kàu thiⁿ-téng, mā ū ba̍t hûn o͘-o͘ àm-àm.
4:12 Siōng-chú tùi hóe-iām tiong kah lín kóng-ōe, lín thiaⁿ tio̍h kóng-ōe ê siaⁿ, bô khòaⁿ tio̍h siáⁿ-mi̍h iáⁿ-siōng, chí ū siaⁿ niā-niā.
4:13 I kā só͘ bēng-lēng lín tio̍h chun-siú ê iok chí-sī lín, to̍h-sī cha̍p-tiâu-kài, mā kā i siá tī nn̄g tè chio̍h-pi.
4:14 Hit sî, Siōng-chú koh bēng-lēng góa, tio̍h kā lu̍t-lē kah hoat-tō͘ kà-sī lín, hō͘ lín tī só͘ beh kòe-.khì lâi tit tio̍h chò sán-gia̍p ê tē thang chun-thàn lâi kiâⁿ. "
4:15 Kéng-kò Jîn-bîn M̄-thang Pài Ngó͘-siōng
" Só͘-í, lín tio̍h kakī te̍k-pia̍t kín-sīn, in-ūi Siōng-chú tī Hô-lep soaⁿ tùi hóe tiong kah lín kóng-ōe hit ji̍t, lín bô khòaⁿ tio̍h siáⁿ-mi̍h hêng-siōng.
4:16 Khióng-kiaⁿ lín pāi-hoāi kakī, ūi kakī tiau-khek ngó͘-siōng, hóng siáⁿ-mi̍h hêng-chōng, bô-lūn sī lâm á-.sī lí ê hêng-siōng,
4:17 á-.sī tē-chiūⁿ cháu-siù ê siōng,
4:18 á-.sī khong-tiong poe-chiáu ê siōng, á-.sī tē-chiūⁿ teh sô ê mi̍h ê siōng, á-.sī tē-hā chúi tiong hî-lūi ê siōng.
4:19 Koh khióng-kiaⁿ lí gia̍h thâu ǹg thiⁿ khòaⁿ Siōng-chú — lí ê Siōng-tè só͘ hun-phài hō͘ thiⁿ-ē bān-kok ê ji̍t, goe̍h, chheⁿ, to̍h-sī thiⁿ-téng ê bān-siōng, lí chiū siū ín-iú, khì kèng-pài ho̍k-sāi in.
4:20 Chóng-.sī, Siōng-chú tòa lín chhut Ai-gi̍p, thoat-lī chù-thih ê lô͘, beh chò I kakī sán-gia̍p ê chú-bîn, chhin-chhiūⁿ kin-á-ji̍t ê khoán-sit.
4:21 Siōng-chú koh in-ūi lín ê iân-kò͘ tùi góa siū-khì, chiùchōa m̄ hō͘ góa kòe Iol-tàn hô, mā m̄ hō͘ góa ji̍p-khì Siōng-chú — lí ê Siōng-tè só͘ beh siúⁿ-sù hō͘ lí chò sán-gia̍p ê súi tē.
4:22 Góa tio̍h sí tī chit-ê tē, góa bē tàng kòe Iol-tàn hô; chóng-.sī, lín ē-tàng kòe-khì tit tio̍h hit-ê hó ê tē.
4:23 Lín tio̍h kakī kín-sīn, khióng-kiaⁿ lín bē kì-tit Siōng-chú — lín ê Siōng-tè kah lín só͘ li̍p ê iok, ūi kakī hóng-chō siáⁿ-mi̍h mi̍h lâi tiau-khek ngó͘-siōng, to̍h-sī Siōng-chú — lí ê Siōng-tè só͘ kìm-chí ê.
4:24 In-ūi Siōng-chú — lí ê Siōng-tè to̍h-sī lia̍t-lia̍t ê hóe, choa̍t-tùi m̄ iông-ín ū pa̍t-ê sîn-bêng.
4:25 " Āu-lâi, lín chin kú tòa tī hit-ê tē lâi seⁿ kiáⁿ thoân-sun, chiū tiau-khek ngó͘-siōng, hóng-chō siáⁿ-mi̍h mi̍h ê siōng, phah-pháiⁿ lí ê sim-su, kiâⁿ Siōng-chú — lí ê Siōng-tè ba̍k-chiu tiong khòaⁿ-chò sī pháiⁿ ê tāichì, jiá I siū-khì.
4:26 Góa chiū kin-á-ji̍t kiò thiⁿ kiò tē lâi kiàn-chèng, lín ē tī kòe Iol-tàn hô tit tio̍h chò sán-gia̍p ê tē, chin kín to̍h siau-bia̍t liáu-liáu! Lín ê ji̍t-chí bē tàng tī hit só͘-chāi tit tio̍h kú-tn̂g, ē choân-pō͘ tû-bia̍t.
4:27 Siōng-chú ē hō͘ lín sì-sòaⁿ tī lia̍t pang, tī Siōng-chú só͘ chhōa lín kàu hiahê kok, lín chhun lo̍h-.lâi ê lâng-gia̍h bô chē.
4:28 Tī hia lín ē ho̍k-sāi lâng ê chhiú só͘ chō ê sîn-bêng, to̍h-sī chhâ-ê á-.sī chio̍h ê, bē tàng khòaⁿ, bē tàng thiaⁿ, bē tàng chia̍h, bē tàng phīⁿ ê.
4:29 Chóng-.sī, lín tī hia nā beh cháu-chhōe Siōng-chú — lí ê Siōng-tè, nā ēng chīn-sim chīn-sèng chhōe I, chiū ē tú-.tio̍h.
4:30 Ji̍t-āu lín tú tio̍h khó͘-lān, só͘ kóng chiahê tāichì lîm-kàu lí, lí ē kui-ǹg Siōng-chú — lí ê Siōng-tè, lâi thiaⁿ I ê ōe.
4:31 In-ūi Siōng-chú — lí ê Siōng-tè sī liân-bín ê Siōng-tè, I bô beh pàng-sak lí, bô beh châu-bia̍t lí, mā bô bē kì-tit I kah lí ê chó͘-sian só͘ chiùchōa ê iok.
4:32 " Chhiáⁿ-mn̄g tī lí chhut-sì í-chêng kàu taⁿ, tùi Siōng-chú chhòng-chō lâng tī sè-kan hit ji̍t í-lâi, tùi thiⁿ ê chit pêng kàu thiⁿ ê hit pêng, kám ū chhin-chhiūⁿ hit khoán ê tōa sū? Kám bat thiaⁿ tio̍h ū ánne?
4:33 Bat ū siáⁿ-mi̍h lâng thiaⁿ-kòe Siōng-tè tùi hóe tiong kóng-ōe ê siaⁿ, chhin-chhiūⁿ lí ū thiaⁿ-.tio̍h, mā iáu oa̍h-.leh?
4:34 Á-sī bat ū siáⁿ-mi̍h sîn-bêng chhì-kòe ánne chò, ēng chhì-liān, sîn-jiah, kî-sū, kau-chiàn kah tōa koân-lêng ê chhiú, chhun-chhut ê chhiú-kut kah tōa koh thang kiaⁿ ê tāichì, ūi kakī tùi pa̍t kok tiong chhú chi̍t kok, chhin-chhiūⁿ Siōng-chú — lín ê Siōng-tè tī Ai-gi̍p tī lín ê ba̍k-chiu chêng, ūi lín só͘ kiâⁿ it-chhè ê tāichì?
4:35 " Ēng che hián-hiān tī lí, hō͘ lí chai Siōng-chú I sī Siōng-tè, I í-gōa bô ū pa̍t-ê.
4:36 I tùi thiⁿ hō͘ lí thiaⁿ tio̍h I ê siaⁿ, ūi tio̍h beh kà-sī lí, koh tī tē-bīn chiūⁿ hō͘ lí khòaⁿ tio̍h I ê tōa-hóe, koh hō͘ lí thiaⁿ tio̍h I ê ōe tùi hóe tiong chhut-.lâi.
4:37 In-ūi I thiàⁿ lí ê chó͘-sian, só͘-í, kéng-soán in ê kiáⁿ-sun, ēng tōa koân-lêng chhin-sin chhōa lí chhut Ai-gi̍p,
4:38 Beh tùi lí ê bīn-chêng kóaⁿ-chhut pí lí khah tōa koh khah béng ê jîn-bîn, beh chhōa lí ji̍p-.khì, ēng in ê tē siúⁿ-sù hō͘ lín chò sán-gia̍p, chhin-chhiūⁿ kin-á-ji̍t sio-siâng.
4:39 Só͘-í, kin-á-ji̍t lí tio̍h chai, sim mā tio̍h siūⁿ, thiⁿ-téng tē-hā chí ū Siōng-chú, I sī Siōng-tè, í-gōa bô pa̍t-ê.
4:40 Só͘-í, lí tio̍h chun-siú I ê lu̍t-lē kài-bēng, to̍h-sī góa kin-á-ji̍t só͘ bēng-lēng lí ê, hō͘ lí kah lí ê kiáⁿ-sun thang tit tio̍h hok-khì, koh ke-thiⁿ lí ê ji̍t-chí kú-tn̂g, tī Siōng-chú — lí ê Siōng-tè só͘ siúⁿ-sù hō͘ lí ê tē, ti̍t-kàu éng-oán. "
4:41 Iol-tàn Hô Tang hōaⁿ Tô-siám ê Siâⁿ
" Hit sî, Mô͘-se tī Iol-tàn hô gōa, ǹg ji̍t chhut ê só͘-chāi hun-pia̍t saⁿ-ê siâⁿ,
4:42 hō͘ thâi-sí-lâng ê lâng, to̍h-sī pêng-sî bô kiat-oàn, sit-gō͘ thâi-sí i ê chhù-piⁿ ê, thang tô-cháu khì hia, nā í-keng cháu ji̍p-khì chiahê siâⁿ ê lâng, chiū ē-tàng tit tio̍h oa̍h,
4:43 to̍h-sī khòng-iá pêng-goân ê Be-chek, ūi tio̍h Lū-biān lâng Siat ê; Gi-lia̍t ê Lah-boa̍t, ūi tio̍h Ga̍t lâng Siat ê; Ba-siáng ê Ko-lân, ūi tio̍h Má-ná-se lâng Siat ê. "
4:44 Pâi-lia̍t ê Lu̍t-hoat
Chit-ê sī Mô͘-se tī I-su-la-el lâng ê bīn-chêng só͘ pâi-lia̍t ê lu̍t-hoat,
4:45 Chiahê sī Mô͘-se tī I-su-la-el lâng chhut Ai-gi̍p liáu-āu, só͘ thoân hō͘ in ê chèng-kì, lu̍t-lē kah hoat-tō͘.
4:46 Tī Iol-tàn hô gōa, Pek-pí-jíⁿ tùi-bīn ê soaⁿ-kok tiong, tī He-si-bóng tòa A-mô͘-lī ông Si-hông ê tē, to̍h-sī Mô͘-se kah I-su-la-el lâng chhut Ai-gi̍p liáu-āu só͘ phah-pāi ê.
4:47 In tit tio̍h i ê tē kah Ba-siáng ông O͘-k ê tē, to̍h-sī nn̄g-ê A-mô͘-lī ông, tī Iol-tàn hô gōa, ǹg ji̍t chhut ê só͘-chāi.
4:48 Τùi Al-nông soaⁿ-kok piⁿ ê A-ló-el, it-ti̍t kàu Se-hûn soaⁿ, to̍h-sī Hel-móng soaⁿ,
4:49 í-ki̍p Iol-tàn hô gōa, tang pêng A-la̍h-bah ê choân tē, it-ti̍t kàu A-la̍h-bah ê hái, óa-kīn Pi-su-gah ê soaⁿ-kha.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。