申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Tī Khòng-iá Liû-lōng
" Jiân-āu, lán oa̍t tò tńg-khì chhut-hoat, tùi Âng-hái ê lō͘ khì khòng-iá, sī chiàu Siōng-chú só͘ kā góa kóng ê. Lán tī Se-il soaⁿ se̍h chin chē ji̍t.
2:2 " Siōng-chú hoan-hù góa kóng,
2:3 ' Lín se̍h chit-ê soaⁿ chin kú à, lín tio̍h oa̍t tńg-khì ǹg pak pêng khì.
2:4 Lí tio̍h hoan-hù jîn-bîn kóng, ' E-sáu ê kiáⁿ-sun lín ê hiaⁿ-tī tòa tī Se-il, lín tio̍h keng-kòe in ê kéng-kài, in ē kiaⁿ lín, só͘-í, lín tio̍h put-chí kín-sīn.
2:5 M̄-thang kah in cheng-chiàn, in ê tē góa liân chi̍t kha-jiah ê ūi to bô beh hō͘ lín, in-ūi góa í-keng kā Se-il soaⁿ hō͘ E-sáu chò sán-gia̍p.
2:6 Lín tio̍h ēng gîn tùi in bé bí-niûⁿ lâi chia̍h, mā tio̍h ēng gîn tùi in bé chúi lâi lim.
2:7 " In-ūi Siōng-chú — lí ê Siōng-tè tī lí ê chhiú só͘ chò it-chhè ê kang, kā lí sù-hok. Lí kiâⁿ chit-ê tōa ê khòng-iá, I lóng chai. Chit sì-cha̍p nî tiong-kan, Siōng-chú — lí ê Siōng-tè kah lí tông-chāi, lí lóng bô khiàm-khoeh pòaⁿ-hāng. '
2:8 " Chiū ánne, lán lī-khui lán ê hiaⁿ-tī E-sáu hiahê tòa tī Se-il ê kiáⁿ-sun, tùi A-la̍h-bah ê lō͘ keng-kòe E-lot kah E-chióng-ge-bel. Lán chiū oa̍t tńg-khì keng-kòe Mô͘-ap khòng-iá ê hit tiâu lō͘.
2:9 Siōng-chú tùi góa kóng, ' M̄-thang kiáu-jiáu Mô͘-ap lâng, mā m̄ thang kah in kau-chiàn. In ê tē Góa lóng bô beh hō͘ lí chò sán-gia̍p, in-ūi Góa í-keng kā Al hō͘ Ló-toh ê kiáⁿ-sun chò sán-gia̍p. '
2:10 "（ Chá-chêng ū E-mih lâng tòa tī hia, jîn-bîn chē, tōa koh lò, chhin-chhiūⁿ A-lap lâng.
2:11 In mā hō͘ lâng sǹg-chò Le-hoa-im lâng kah A-lap lâng sio-siâng; chóng-.sī, Mô͘-ap lâng kā i chheng-chò E-mih lâng.
2:12 Chá-chêng, Hô-lī lâng mā tòa tī Se-il, chóng-.sī, E-sáu ê kiáⁿ-sun sòa-chiap i, in tī in ê bīn-chêng kā in châu-bia̍t, lâi tòa tī in ê só͘-chāi, chhin-chhiūⁿ I-su-la-el tī Siōng-chú siúⁿ-sù hō͘ in chò sán-gia̍p ê tē só͘ kiâⁿ ê. )
2:13 " Taⁿ lín tio̍h khí-lâi kòe Sat-lia̍t khe! Chiū ánne, lán kòe Sat-lia̍t khe.
2:14 Tùi lán lī-khui Ka-té-si Bal-né-ah kàu kòe Sat-lia̍t khe ê ji̍t, chóng-kiōng saⁿ-cha̍p peh nî, kàu hit tāi ê bú-sū lóng sí-bông tī kun-iâⁿ tiong, chiàu Siōng-chú tùi in só͘ chiùchōa-.ê.
2:15 Koh ū Siōng-chú ê chhiú kā in kong-kek, tùi kun-iâⁿ tiong kā in châu-bia̍t, ti̍t-kàu in lóng sí-bông.
2:16 " Bú-sū tùi jîn-bîn tiong lóng hông châu-bia̍t sí-bông í-āu,
2:17 Siōng-chú hoan-hù góa kóng,
2:18 ' Lí kin-á-ji̍t tio̍h tùi Mô͘-ap ê kéng-kài Al keng-kòe,
2:19 kiâⁿ kīn Am-móng lâng ê tùi-bīn, m̄ thang kiáu-jiáu in, mā m̄ thang kah in cheng-chiàn, in-ūi Am-móng lâng ê tē Góa bô hō͘ lín chò sán-gia̍p, Góa í-keng ū siúⁿ-sù Ló-toh ê kiáⁿ-sun chò sán-gia̍p. '
2:20 "（Hitê tē mā sǹg-chò sī Le-hoa-im lâng ê tē, chá-chêng Le-hoa-im lâng tòa tī hia, Am-móng lâng chheng in chò Sàn-sòng-bêng.
2:21 Hiahê jîn-bîn chē, tōa koh lò, chhin-chhiūⁿ A-lap lâng, chóng-.sī, Siōng-chú tī Am-móng lâng ê bīn-chêng kā in châu-bia̍t, in chiū tit tio̍h in ê tē, sòa-chiap tòa tī hia.
2:22 Chhin-chhiūⁿ I ūi hiahê E-sáu tòa tī Se-il ê kiáⁿ-sun, tī in ê bīn-chêng kā Hô-lī lâng siau-bia̍t, in chiū sòa-chiap tī hia tòa in ê tē kàu kin-á-ji̍t.
2:23 Koh ū A-ōe lâng tòa tī chng-thâu sòa-kàu Ga-jah ê, tùi Ka-húi-thok chhut-.lâi ê Ka-húi-thok kā in siau-bia̍t, lâi tòa tī in ê só͘-chāi. ）
2:24 " Taⁿ lín tio̍h khí-.lâi, chhut-hoat kòe-khì Al-nông ê soaⁿ-kok; lí khòaⁿ, góa í-keng kā A-mô͘-lī lâng He-si-bóng ông Si-hông kah i ê tē, kau tī lí ê chhiú-thâu, lí tio̍h tāng chhiú lâi tit tio̍h i ê tē, khì kah i kau-chiàn.
2:25 Tùi kin-á-ji̍t khí, góa beh hō͘ thiⁿ-ē bān-bîn, thiaⁿ tio̍h lí ê miâ-siaⁿ ê, kiaⁿ lín, lún lín, koh in-ūi lí lâi thòng-khó͘ kah phi̍h-phi̍h chhoah.
2:26 I-su-la-el Lâng Phah-iâⁿ He-si-bóng Ông
( BSK 21: 21-30)
" Góa chiū tùi Ki-tí-bo̍k ê khòng-iá, chhe sù-chiá khì kìⁿ He-si-bóng ông Si-hông, ēng hô-pêng ê ōe kóng,
2:27 ' Kiû lí iông-ín góa tùi lí ê tē keng-kòe, góa ē kiâⁿ tōa lō͘, bô phian chó, bô phian iū.
2:28 Lí the̍h góa ê gîn, bē bí-niûⁿ hō͘ góa chia̍h, the̍h góa ê gîn, bē chúi hō͘ góa lim, chí-iàu chún góa kiâⁿ lō͘ kòe-.khì.
2:29 Chhin-chhiūⁿ tòa tī Se-il ê E-sáu ê kiáⁿ-sun kah tòa tī Al ê Mô͘-ap lâng khoán-thāi góa sio-siâng, thèng-hāu góa kòe Iol-tàn hô, ji̍p-khì Siōng-chú — goán ê Siōng-tè só͘ siúⁿ-sù hō͘ goán ê tē. '
2:30 " Chóng-.sī, He-si-bóng ông Si-hông m̄-khéng hō͘ lán tùi i hia keng-kòe, in-ūi Siōng-chú — lí ê Siōng-tè hō͘ i ê sèng-chêng kò͘-chi̍p koh sim ngē, sī ūi tio̍h beh kā i kau-hù tī lí ê chhiú, chhin-chhiūⁿ kin-á-ji̍t ánne.
2:31 " Siōng-chú kā góa kóng, ' Lí khòaⁿ, tùi chit sî khí, Góa beh kā Si-hông kah i ê tē, kau-hù tī lí ê bīn-chêng, lí taⁿ ē tit tio̍h i ê tē chò sán-gia̍p. '
2:32 Hit sî, Si-hông kah i ê jîn-bîn chhut-lâi kā lán tí-te̍k, tī Ia-hat kau-chiàn.
2:33 Siōng-chú — lán ê Siōng-tè kā i kau-hù lán, lán chiū phah-sí i kah i ê kiáⁿ, í-ki̍p i ê jîn-bîn.
2:34 " Hit tong-sî, lán cheng-ho̍k i só͘-ū ê siâⁿ, châu-bia̍t ū lâng tòa ê siâⁿ, liân chabó͘ lâng kah gín'á, bô lâu kah chi̍t-ê.
2:35 Chóng-.sī, chengseⁿ kah só͘ chhiúⁿ-lâi ta̍k-ê siâⁿ ê chiàn-lī-phín, lóng chhú-lâi chò kakī ê lō͘-ēng.
2:36 Tùi Al-nông soaⁿ-kok piⁿ ê A-ló-el, í-ki̍p soaⁿ-kok tiong ê siâⁿ kàu tī Gi-lia̍t, bô kah chi̍t-ê siâⁿ sī kian-kò͘, hō͘ lán kā i cheng-ho̍k bô tio̍h, in-ūi Siōng-chú — lán ê Siōng-tè lóng kā in kau-hù hō͘ lán.
2:37 Chí-ū Am-móng lâng ê tē, Iá-bo̍k hô piⁿ ê tē kah soaⁿ-tē chiahê siâⁿ, kah Siōng-chú — lán ê Siōng-tè só͘ kìm-chí lán khì ê tē, lí lóng bô óa-kīn i. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。