創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 So͘-tóm ê Chōe-ok
Ji̍t àm liáu-āu, hit nn̄g-ê sù-chiá lâi-kàu So͘-tóm. Ló-toh chē tī So͘-tóm ê siâⁿ mn̂g-.ni̍h, Ló-toh khòaⁿ tio̍h in, chiū khí-lâi kā in gêng-chiap, bīn ǹg tē kiok-kiong,
19:2 Kóng, " Góa ê Chú, chhiáⁿ oat-lâi lô͘-po̍k ê chhù hioh mê, sé kha; bîn-á chá-khí khí-.lâi, chiah kiâⁿ lín ê lō͘. " In kóng, " M̄-bián, goán beh tī tōa ke-lō͘ kòe-mê. "
19:3 Ló-toh pek-chhiat chhiáⁿ in, in chiah oa̍t-tńg sin, oat ji̍p-khì i ê chhù; Ló-toh ūi in chún-pī iàn-se̍k, piak bô-kàⁿ piáⁿ, in chiū chia̍h.
19:4 In iáu-bōe khì khùn, siâⁿ lāi ê lâng, to̍h-sī So͘-tóm lâng, tùi siàu-liân kàu nî lāu, sì-bīn lâi ûi i ê chhù;
19:5 kiò Ló-toh kóng, " Kin-àm kàu lí chia ê lâng tī tó-ūi? Hō͘ in chhut-.lâi, thang chiàu goán só͘ ài-chò ê. "
19:6 Ló-toh chhut-khì kàu mn̂g gōa kûn-chiòng hia, chiū kā mn̂g koaiⁿ khí-.lâi,
19:7 kóng, " Hiaⁿ-tī, chhiáⁿ lín m̄ thang chò chit khoán pháiⁿ tāichì.
19:8 Lí khòaⁿ, góa ū nn̄g-ê chabó͘ kiáⁿ iáu-sī chāi-sek-lí; chhiáⁿ iông-ín góa chhōa in chhut-.lâi, chhut-chāi lín só͘ ài lâi kiâⁿ; to̍k-to̍k chit nn̄g-ê lâng, í-keng kàu góa ê chhù, lín m̄ thang tùi in chò siáⁿ-mi̍h. "
19:9 Chèng lâng kóng, " Lí thè-.khì! " Koh kóng, " Chit-ê lâng kià-kha tī chia, sòa beh kā goán koán-hat? Taⁿ goán beh hāi lí pí hāi in khah siong-tiōng. " Chiū e-kheh Ló-toh, chìn-chêng beh kong-phòa i ê mn̂g.
19:10 Chóng-.sī, hit nn̄g-ê lâng chhun chhiú, khan Ló-toh ji̍p-khì chhù lāi, kā mn̂g koaiⁿ khí-.lâi.
19:11 In koh hō͘ mn̂g gōa ê lâng, tùi sè kàu tōa, ba̍k-chiu hîn-hîn, lóng khòaⁿ bē tio̍h; chhōe kàu siān, mā chhōe bô mn̂g.
19:12 Ló-toh Lī-khui So͘-tóm
Hit nn̄g lâng tùi Ló-toh kóng, " Lí tī chia iáu ū siáⁿ lâng? Lí ê kiáⁿ-sài, á-.sī kiáⁿ, á-.sī chabó͘ kiáⁿ, í-ki̍p siâⁿ lāi it-chhè sio̍k lí ê lâng, lí tio̍h hō͘ in lóng lī-khui chit só͘-chāi,
19:13 Goán beh châu-bia̍t chit-ê só͘-chāi, in-ūi chit-ê siâⁿ hoān chōe ê siaⁿ tī Siōng-chú ê bīn-chêng chin tōa, Siōng-chú chhe goán lâi beh kā chit-ê siâⁿ châu-bia̍t. "
19:14 Ló-toh chhut-.khì, tùi chhōa i ê chabó͘ kiáⁿ ê kiáⁿ-sài kóng, " Lín khí-.lâi, lī-khui chia, in-ūi Siōng-chú beh bia̍t-bông chit-ê siâⁿ. " I ê kiáⁿ-sài lia̍h-chò i sī teh kóng chhiò.
19:15 Thiⁿ-kng, sù-chiá chhui-pek Ló-toh kóng, " Khí-.lâi! Chhōa lí ê bó͘, í-ki̍p lí tī chia nn̄g-ê chabó͘ kiáⁿ chhut-.khì. Nā bô, khióng-kiaⁿ in ē kah chit-ê siâⁿ ê chōe-ok chò-hóe siū bia̍t-bông. "
19:16 Ló-toh iân-chhiân bô hêng-tōng. Hit nn̄g-ê lâng, in-ūi Siōng-chú liân-bín Ló-toh, chiū khan i ê chhiú kah i ê bó͘ ê chhiú kah i nn̄g-ê chabó͘ kiáⁿ ê chhiú, kā in chhōa chhut-.khì, an-tì tī siâⁿ gōa.
19:17 Chhōa in chhut-khì liáu-āu, kî-tiong chi̍t-ê sù-chiá kóng, " Lí tio̍h tô-miā, m̄ thang oa̍t thâu khòaⁿ, mā m̄ thang tòa tī pêng-goân, tio̍h cháu-khì soaⁿ-.ni̍h. Nā bô, khióng-kiaⁿ lín ē siū bia̍t-bông. "
19:18 Ló-toh tùi in kóng, " Góa ê chú ah, m̄ thang ánne chò.
19:19 Lí khòaⁿ! Lí ê lô͘-po̍k í-keng tī Lí ê bīn-chêng tit tio̍h un-tián, Lí mā tùi góa hián-chhut ke̍k tōa ê jîn-chû, kiù góa ê sèⁿ-miā. Góa bē tàng cháu kàu soaⁿ-.ni̍h, khióng-kiaⁿ chit-ê chai-hō ē lîm-kàu góa, góa chiū sí.
19:20 Lí khòaⁿ! Chit-ê siâⁿ kīn-kīn, góa thang tô-cháu khì hia, jî-chhiáⁿ chit-ê siâⁿ mā sī sè-.ê. Chhiáⁿ iông-ín góa tô-siám tī hia, lâi pó-choân góa ê oa̍h-miā; chit-ê siâⁿ kám m̄-sī sè-.ê? "
19:21 Siōng-chú tùi i kóng, " Chit-ê tāichì, góa mā ín-chún lí; lí só͘ kóng ê siâⁿ, góa bô beh kā i chhia-tó.
19:22 Lí tio̍h kóaⁿ-kín chàu khì hia, in-ūi lí iáu-bōe kàu hia, Góa bē tàng chò siáⁿ-mi̍h. " In-ūi ánne, hit-ê siâⁿ miâ kiò-chò Cho-al.
19:23 So͘-tóm kah Am-mo͘-la̍h ê Boa̍t-ji̍t
Ló-toh lâi-kàu Cho-al, ji̍t-thâu í-keng chhut-.lâi.
19:24 Hit sî, Siōng-chú kā liû-hông kah hóe, tùi thiⁿ-téng, tùi Siōng-chú hia, kàng-lo̍h tī So͘-tóm kah Am-mo͘-la̍h,
19:25 Kā hiahê siâⁿ kah choân pêng-goân, í-ki̍p siâⁿ lāi só͘-ū ê jîn-bîn, liân tē-bīn chiūⁿ seng-tióng ê lóng húi-hoāi.
19:26 Ló-toh ê bó͘ tī āu-bīn, chi̍t ē oa̍t thâu khòaⁿ, chiū piàn-chò chi̍t ki iâm thiāu.
19:27 A-bu-la-hàm thàu-chá khí-.lâi, kàu i chêng-ji̍t khiā tī Siōng-chú ê bīn-chêng hit só͘-chāi,
19:28 I ǹg So͘-tóm kah Am-mo͘-la̍h, í-ki̍p pêng-goân ê choân tē khòaⁿ-.khì, khòaⁿ tio̍h hit só͘-chāi hóe-ian chhèng koân, chhin-chhiūⁿ hóe-lô͘ ê ian.
19:29 Tng Siōng-tè châu-bia̍t pêng-goân chiahê siâⁿ ê sî, Siōng-tè siàu-liām A-bu-la-hàm; tútú tī chhia-tó Ló-toh só͘ tòa ê siâⁿ ê sî, chiū kā Ló-toh tùi chhia-tó ê tiong-kan kiù chhut-.khì.
19:30 Mô͘-ap Lâng kah Am-móng Lâng ê Chó͘-sian
Ló-toh tiàm tī Cho-al ū kiaⁿ-hiâⁿ, chiū kah i nn̄g-ê chabó͘ kiáⁿ tùi Cho-al chiūⁿ-khì tiàm tī soaⁿ-.ni̍h; i kah nn̄g-ê chabó͘ kiáⁿ tiàm tī chi̍t-ê tōng lāi.
19:31 Tōa chabó͘ kiáⁿ tùi sè-hàn chabó͘ kiáⁿ kóng, " Lán ê lāu-pē lāu ā, tē-chiūⁿ koh bô lâng kah lán chò phit-phòe, lâi kiâⁿ jîn-tō.
19:32 Lâi, lán thang hō͘ lāu-pē lim chiú, kah i chò-hóe khùn; ánne, lán hó thang tùi i liû-chûn kiáⁿ-sun. "
19:33 Hit mê, in hō͘ lāu-pē lim chiú, tōa chabó͘ kiáⁿ chiū ji̍p-khì kah lāu-pē chò-hóe khùn; i tang-sî khì khùn, tang-sî khí-.lâi, lāu-pē lóng m̄-chai.
19:34 Keh tńg kang, tōa chabó͘ kiáⁿ kā sè chabó͘ kiáⁿ kóng, " Góa chā-mê kah lāu-pē chò-hóe khùn, kin-àm lán koh hō͘ i lim chiú, lí thang ji̍p-khì kah i chò-hóe khùn. Án-ne, lán hó thang tùi lāu-pē liû-chûn kiáⁿ-sun. "
19:35 Hit mê, in koh hō͘ lāu-pē lim chiú, sè chabó͘ kiáⁿ ji̍p-khì kah i khùn; i tang-sî khì khùn, tang-sî khí-.lâi, lāu-pē mā lóng m̄-chai.
19:36 Án-ne, Ló-toh nn̄g-ê chabó͘ kiáⁿ lóng tùi in lāu-pē lâi hoâi-īn.
19:37 Tōa-ê seⁿ kiáⁿ, kā i hō-miâ kiò-chò Mô͘-ap, to̍h-sī hiān-kim Mô͘-ap lâng ê chó͘-sian.
19:38 Sè-hàn ê mā seⁿ kiáⁿ, kā i hō-miâ kiò-chò Biān-am-mih, to̍h-sī hiān-kim Am-móng lâng ê chó͘-sian.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。