民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
28:1 Múi-kang Tio̍h Hiàn ê Chè
( CAG 29: 38-46)
Siōng-chú hoan-hù Mô͘-se kóng,
28:2 " Lí tio̍h bēng-lēng I-su-la-el lâng kóng, ' Góa ê lé-mi̍h, to̍h-sī hiàn hō͘ Góa chò phang-phang chiahê hóe-chè ê chia̍h-mi̍h, lín tio̍h chiàu ji̍t-kî kín-sīn hiàn hō͘ Góa. '
28:3 " Koh tio̍h kā in kóng, ' Lín tio̍h hiàn hō͘ Siōng-chú ê hóe-chè, to̍h-sī bô khoat-tiám bī-móa-nî ê iûⁿ-káng-á, ta̍k ji̍t nn̄g chiah, chò kú-tn̂g hiàn ê sio-chè.
28:4 Chá-khí sî tio̍h hiàn iûⁿ-á chi̍t chiah, hông-hun ê sî tio̍h hiàn iûⁿ-á chi̍t chiah.
28:5 Koh tio̍h hiàn iù mī-hún cha̍p-hūn chi-it e-hoat kah tiâu-hô kheh hó ê iû sì-hūn chi-it hin chò sò͘-chè.
28:6 Che sī tī Si-nái soaⁿ só͘ tiāⁿ tio̍h chò tiāⁿtiāⁿ hiàn ê sio-chè, to̍h-sī hiàn hō͘ Siōng-chú chò phang-phang ê hóe-chè.
28:7 Ūi tio̍h chit chi̍t chiah iûⁿ-á, tio̍h sòa hiàn koàn-tiān ê chiú, sì-hūn chi-it hin; tī sèng-só͘ tiong, lí tio̍h kā kāu ê chiú hiàn hō͘ Siōng-chú chò koàn-tiān.
28:8 Ê-hng sî, tio̍h hiàn tē-jī chiah iûⁿ-á, chhin-chhiūⁿ chá-khí sî ê sò͘-chè, mā chhin-chhiūⁿ i ê koàn-tiān, hiàn i hō͘ Siōng-chú chò phang-phang ê hóe-chè. '"
28:9 An-hioh-ji̍t Hiàn ê Chè
" Koh tī An-hioh-ji̍t tio̍h hiàn nn̄g chiah bô khoat-tiám bī-móa-nî ê iûⁿ-káng-á, mā ēng tiâu-hô iû ê iù mī-hún gō͘-hūn chi-it e-hoat, chò sò͘-chè kah i ê koàn-tiān.
28:10 Che sī ta̍k-ê An-hioh-ji̍t ê sio-chè, hit-ê tiāⁿtiāⁿ hiàn ê sio-chè kah i ê koàn-tiān í-gōa. "
28:11 Chhe-it Hiàn ê Chè
" Ta̍k goe̍h ê chhe-it, lín tio̍h hiàn sio-chè hō͘ Siōng-chú, to̍h-sī gû-káng-á nn̄g chiah, mî-iûⁿ-káng chi̍t chiah, bô khoat-tiám bī-móa-nî ê iûⁿ-káng-á chhit chiah.
28:12 Ūi ta̍k chiah gû-káng-á, tio̍h ēng tiâu-hô iû ê iù mī-hún cha̍p-hūn chi saⁿ e-hoat, chò sò͘-chè; ūi hit chiah iûⁿ-káng, mā tio̍h ēng tiâu-hô iû ê iù mī-hún gō͘-hūn chi-it e-hoat, chò sò͘-chè.
28:13 Ūi tio̍h ta̍k chiah iûⁿ-á tio̍h ēng tiâu-hô iû ê iù mī-hún cha̍p-hūn chi-it e-hoat, chò sò͘-chè kah phang-phang ê sio-chè; sī hiàn hō͘ Siōng-chú ê hóe-chè.
28:14 Koàn-tiān tio̍h ēng chiú, ūi tio̍h chi̍t chiah gû-káng-á ēng pòaⁿ hin, ūi tio̍h chi̍t chiah iûⁿ-káng ēng saⁿ-hūn chi-it hin, ūi tio̍h chi̍t chiah iûⁿ-á chiū ēng sì-hūn chi-it hin; che sī ta̍k goe̍h ê sio-chè, chi̍t nî ê tiong-kan, ta̍k goe̍h tio̍h ánne.
28:15 Koh tio̍h ēng chi̍t chiah soaⁿ-iûⁿ-káng chò sio̍k-chōe-chè, hiàn hō͘ Siōng-chú; tio̍h tī tiāⁿtiāⁿ hiàn ê sio-chè kah i ê koàn-tiān í-gōa lâi hiàn hō͘ Siōng-chú."
28:16 Tû-kàⁿ-cheh Hiàn ê Chè
( LBK 23: 5-14)
" Chiaⁿ-goe̍h cha̍p-sì sī Siōng-chú ê Pôaⁿ-kòe-cheh.
28:17 Chit goe̍h ê cha̍p-gō͘ sī cheh-iân, tio̍h chia̍h bô-kàⁿ piáⁿ chhit kang.
28:18 Tī i ê thâu chi̍t ji̍t tio̍h ū sèng-hōe, lóng m̄ thang chò lô-tōng ê kang.
28:19 Lí tio̍h hiàn hóe-chè chò sio-chè hō͘ Siōng-chú, to̍h-sī gû-káng-á nn̄g chiah, mî-iûⁿ-káng chi̍t chiah, bī-móa-nî ê iûⁿ-káng-á chhit chiah; lín lóng tio̍h ēng bô khoat-tiám ê.
28:20 In ê sò͘-chè, ēng tiâu-hô iû ê iù mī-hún, ūi tio̍h chi̍t chiah gû-káng hiàn cha̍p-hūn chi saⁿ e-hoat, ūi tio̍h chi̍t chiah iûⁿ-káng hiàn gō͘-hūn chi-it e-hoat.
28:21 Ūi tio̍h hit chhit chiah iûⁿ-á, ta̍k chiah tio̍h hiàn cha̍p-hūn chi-it e-hoat.
28:22 Koh hiàn chi̍t chiah soaⁿ-iûⁿ-káng chò sio̍k-chōe-chè, kā lín sio̍k-chōe.
28:23 Lín hiàn chiahê, tio̍h tī chá-khí sî ê sio-chè, to̍h-sī tiāⁿtiāⁿ hiàn ê sio-chè í-gōa.
28:24 Liân-liân chhit kang, ta̍k ji̍t chiàu chit-ê lē, ēng phang-phang ê hóe-chè ê chia̍h-mi̍h, hiàn hō͘ Siōng-chú; tio̍h tī tiāⁿtiāⁿ hiàn ê sio-chè kah i ê koàn-tiān í-gōa lâi hiàn.
28:25 Tē-chhit kang, lín tio̍h ū sèng-hōe, lóng m̄ thang chò siáⁿ-mi̍h lô-tōng ê kang."
28:26 Siu-koah-cheh Hiàn ê Chè
( LBK 23:15-22)
" Chhit-ê chhit ji̍t cheh, khí-thâu se̍k ê lông-sán-bu̍t, lín hiàn sin ê sò͘-chè hō͘ Siōng-chú ê ji̍t, tio̍h ū sèng-hōe, lóng m̄ thang chò lô-tōng ê kang.
28:27 Lín tio̍h hiàn phang-phang ê sio-chè hō͘ Siōng-chú, to̍h-sī gû-káng-á nn̄g chiah, mî-iûⁿ-káng-á chi̍t chiah, bī-móa-nî ê iûⁿ-káng-á chhit chiah.
28:28 In ê sò͘-chè, ēng tiâu-hô iû ê iù mī-hún, ūi tio̍h chi̍t chiah gû-káng hiàn cha̍p-hūn chi saⁿ e-hoat, ūi tio̍h chi̍t chiah iûⁿ-káng hiàn gō͘-hūn chi-it e-hoat.
28:29 Ūi tio̍h hit chhit chiah iûⁿ-á, ta̍k chiah tio̍h hiàn cha̍p-hūn chi-it e-hoat.
28:30 Koh hiàn chi̍t chiah soaⁿ-iûⁿ-káng, kā lín sio̍k-chōe.
28:31 Lín tio̍h hiàn chiahê kah i ê koàn-tiān, tī tiāⁿtiāⁿ hiàn ê sio-chè kah i ê sò͘-chè í-gōa, lín lóng tio̍h ēng bô khoat-tiám ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。