民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
20:1 Ka-té-si Sū-kiāⁿ
( CAG 17: 1-7)
Chiaⁿ-goe̍h kan, I-su-la-el choân hōe-chiòng lâi-kàu Chîn ê khòng-iá, jîn-bîn chiū tòa tī Ka-té-si. Mi-lí-ám sí tī hia, chiū bâi-chòng tī hia.
20:2 Hōe-chiòng bô chúi thang lim, in chiū chū-chi̍p óa-lâi kong-kek Mô͘-se kah A-lông.
20:3 Jîn-bîn chiū kah Mô͘-se kè-kàu, kóng, " Chêng goán ê hiaⁿ-tī sí tī Siōng-chú ê bīn-chêng, goán put-jû hit sî sòa sí.
20:4 Lín ná ē chhōa Siōng-chú ê hōe-chiòng kàu chit-ê khòng-iá, hō͘ goán kah goán ê chengseⁿ sí tī chia?
20:5 Lín ná ē hō͘ goán chhut Ai-gi̍p, chhōa goán kàu chit-ê pháiⁿ só͘-chāi? Bô só͘-chāi thang iā chéng, mā bô bû-hoa-kó, bô phû-tô, bô sia̍h-liû, koh bô chúi thang lim.
20:6 Mô͘-se kah A-lông lī-khui hōe-chiòng lâi-kàu hōe-bō͘ mn̂g-kháu, phak tī tē-.ni̍h; Siōng-chú ê êng-kng tùi in hián-hiān.
20:7 Siōng-chú hoan-hù Mô͘-se kóng,
20:8 " Lí tio̍h gia̍h koái-á, lí kah lí ê a-hiaⁿ A-lông chio-chi̍p hōe-chiòng; tī in ê ba̍k-chiu chêng, lín bēng-lēng chio̍h-pôaⁿ chhut chúi, lí ūi tio̍h jîn-bîn hō͘ chúi tùi chio̍h-pôaⁿ chhut-.lâi, hō͘ hōe-chiòng kah in ê chengseⁿ ū chúi thang lim. "
20:9 Mô͘-se chun-thàn bēng-lēng, tī Siōng-chú ê bīn-chêng gia̍h koái-á.
20:10 Mô͘-se kah A-lông chio-chi̍p hōe-chiòng lâi-kàu chio̍h-pôaⁿ chêng, Mô͘-se tùi in kóng, " Lín chiahê pōe-ge̍k ê lâng tio̍h thiaⁿ! Goán tio̍h hō͘ chúi tùi chit-ê chio̍h-pôaⁿ lâu chhut-lâi hō͘ lín lim, sī-.bô? "
20:11 Mô͘-se kā chhiú gia̍h khí-.lâi, ēng koái-á phah chio̍h-pôaⁿ nn̄g ē, chiū ū chin chē chúi lâu chhut-.lâi, hōe-chiòng kah in ê chengseⁿ lóng lim chúi.
20:12 Siōng-chú chiū tùi Mô͘-se kah A-lông kóng, " In-ūi lín m̄-sìn Góa, bô tī I-su-la-el lâng ê ba̍k-chiu chêng chun-kèng Góa chò sèng, só͘-í, lín bē tàng chhōa chiahê hōe-chiòng ji̍p-khì Góa só͘ sù hō͘ in ê tē. "
20:13 Chiahê chúi miâ kiò-chò Me-lí-bah ê chúi, sī in-ūi I-su-la-el lâng kah Siōng-chú kè-kàu, Siōng-chú chiū tùi in hián-bêng kakī chò sèng.
20:14 E-tóm Ông M̄-chún I-su-la-el Lâng Thong-kòe
Mô͘-se tùi Ka-té-si chhe-phài sù-chiá khì kìⁿ E-tóm ông, kóng, " Lí ê hiaⁿ-tī I-su-la-el ánne kóng, ' Lí chai goán só͘ tú tio̍h it-chhè ê kan-khó͘,
20:15 goán ê chó͘-sian lo̍h-khì Ai-gi̍p, goán tòa tī Ai-gi̍p chin kú; Ai-gi̍p lâng pháiⁿ khoán-thāi goán kah goán ê chó͘-sian.
20:16 Goán ai-kiû Siōng-chú ê sî, I thiaⁿ goán ê siaⁿ, chhe-khián sù-chiá chhōa goán chhut Ai-gi̍p, taⁿ goán tī lí ke̍k piⁿ-á ê siâⁿ Ka-té-si.
20:17 Kiû lí iông-ín goán keng-kòe lí ê tē, goán bô beh tùi chhân-hn̂g kah phû-tô hn̂g keng-kòe, mā bô lim chiahê chéⁿ ê chúi, to̍k-to̍k kiâⁿ tōa lō͘, bô phian chó phian iū, ti̍t-ti̍t keng-kòe lí ê tē-kài. '"
20:18 E-tóm ông kóng, " Lí m̄ thang tùi góa chia keng-kòe, bián-tit góa gia̍h to chhut-lâi tí-te̍k lí. "
20:19 I-su-la-el lâng kā i kóng, " Goán beh tùi tōa lō͘ kiâⁿ-.khì; siat-sú goán kah chengseⁿ lim lí ê chúi, goán ē hêng lí kè-chîⁿ; chún góa kiâⁿ kòe-.khì, mài chhap pa̍t hāng. "
20:20 E-tóm ông koh kóng, " Lí m̄ thang keng-kòe. " E-tóm ông chiū chhōa chin chē lâng chhut-.lâi, ēng giám-ngē ê chhiú kā i tí-te̍k.
20:21 Án-ne, E-tóm m̄-chún I-su-la-el lâng tùi i ê tē-kài keng-kòe; I-su-la-el chiū oa̍t-tńg lī-khui i.
20:22 A-lông ê Sí-bông
In tùi Ka-té-si chhut-hoat, I-su-la-el ê choân hōe-chiòng lâi-kàu Hol soaⁿ.
20:23 Siōng-chú tī óa-kīn E-tóm pian-kài ê Hol soaⁿ, hoan-hù Mô͘-se kah A-lông kóng:
20:24 A-lông teh beh sí-bông, in-ūi i bē tàng ji̍p-khì Góa siúⁿ-sù I-su-la-el lâng ê tē, in-ūi tī Me-lí-bah ê chúi lín ûi-pōe Góa ê bēng-lēng.
20:25 Lí chhōa A-lông kah i ê kiáⁿ Ê-lī-a-chal chiūⁿ-khì Hol soaⁿ,
20:26 thǹg A-lông ê saⁿ, kā i ê kiáⁿ Ê-lī-a-chal chhēng; A-lông ē sí tī hia, tńg-khì chó͘-ke. "
20:27 Mô͘-se chiàu Siōng-chú só͘ bēng-lēng ê khì kiâⁿ, in saⁿ lâng tng hōe-chiòng ê ba̍k-chiu chêng chiūⁿ-khì Hol soaⁿ.
20:28 Mô͘-se thǹg A-lông ê saⁿ, kā i ê kiáⁿ Ê-lī-a-chal chhēng, A-lông tī hia sí tī soaⁿ téng. Jiân-āu Mô͘-se kah Ê-lī-a-chal lo̍h soaⁿ.
20:29 Hōe-chiòng khòaⁿ tio̍h A-lông í-keng sí, chiū ūi A-lông thî-khàu saⁿ-cha̍p kang; I-su-la-el choân ke mā lóng ánne.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。