創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
17:1 Li̍p-iok ê Kì-hō — Kat-lé
A-bú-lâm káu-cha̍p-káu hòe ê sî, Siōng-chú tùi A-bú-lâm hián-hiān, kā i kóng, " Góa sī choân-lêng Siōng-tè, lí tī Góa ê bīn-chêng hêng-ûi tio̍h oân-choân,
17:2 Góa chiū beh kah lí li̍p Góa ê iok, hō͘ lí ê kiáⁿ-sun hui-siông chē. "
17:3 A-bú-lâm chiū phak-lo̍h tī tē-.ni̍h; Siōng-tè koh kah i kóng-ōe, kóng,
17:4 " Góa kah lí li̍p Góa ê iok, lí ē chò chin chē kok ê pē.
17:5 Tùi taⁿ í-āu, lí ê miâ bô koh kiò-chò A-bú-lâm, sī beh kiò-chò A-bu-la-hàm, in-ūi Góa í-keng li̍p lí chò chin chē kok ê pē.
17:6 Góa beh hō͘ lí ê kiáⁿ-sun hui-siông chē; kok-tō͘ ē tùi lí lâi li̍p, kun-ông ē tùi lí lâi chhut.
17:7 " Góa beh kah lí, í-ki̍p lí le̍k-tāi ê kiáⁿ-sun, siat-li̍p Góa ê iok chò éng-oán ê iok; Góa beh chò lí kah lí ê kiáⁿ-sun ê Siōng-tè.
17:8 Góa ē kā lí hiān-chāi chhut-gōa kià-kha ê tē, to̍h-sī Ka-nân choân tē, siúⁿ-sù hō͘ lí kah lí ê kiáⁿ-sun, chò éng-oán ê sán-gia̍p; Góa mā beh chò in ê Siōng-tè. "
17:9 Siōng-tè koh tùi A-bu-la-hàm kóng, " Lí kah lí ê kiáⁿ-sun, tio̍h le̍k-tāi chun-siú Góa ê iok.
17:10 Lín tiong-kan só͘-ū ê chapo͘ ê, lóng tio̍h siū kat-lé; che to̍h-sī Góa kah lí í-ki̍p lí ê kiáⁿ-sun só͘ li̍p ê iok, sī lín só͘ tio̍h chun-siú ê.
17:11 Lín tio̍h koah lín iông-bu̍t ê phôe, che sī beh chò Góa kah lín só͘ li̍p ê iok ê kì-hō.
17:12 Lín le̍k-tāi ê chapo͘ ê, bô-lūn chhù lāi seⁿ ê, á-.sī lí ê kiáⁿ-sun í-gōa ēng gîn tùi gōa-bīn ê lâng bé-.lâi ê, chhut-sì liáu-āu tē-peh ji̍t, lóng tio̍h siū kat-lé.
17:13 Lí chhù lāi seⁿ ê kah lí ēng gîn bé-.lâi ê, lóng it-tēng tio̍h siū kat-lé. Án-ne, Góa ê iok beh hē tī lín ê sin chiūⁿ, chò éng-oán ê iok.
17:14 Bô siū kat-lé ê chapo͘ ê, i seng-khu kì-jiân bô siū kat-lé, sī ûi-pōe góa ê iok, it-tēng tio̍h tùi jîn-bîn ê tiong-kan tû-.khì. "
17:15 Siōng-tè koh tùi A-bu-la-hàm kóng, " Lí ê bó͘ Sa-lái, m̄ thang koh kā i kiò-chò Sa-lái, i ê miâ beh kái kiò-chò Sa-la̍h.
17:16 Góa ē sù-hok hō͘ i, Góa mā ē hō͘ lí tùi i tit tio̍h chi̍t-ê kiáⁿ. Góa ē sù-hok hō͘ i, i mā ē chò lia̍t kok ê lāu-bú; ē ū pang-kok ê ông tùi i chhut. "
17:17 A-bu-la-hàm chiū phak teh chhiò, sim-lāi siūⁿ kóng, " Chi̍t pah hòe ê lâng kám iáu ē seⁿ kiáⁿ? Sa-la̍h í-keng káu-cha̍p hòe ā, kám iáu ē seⁿ kiáⁿ? "
17:18 A-bu-la-hàm tùi Siōng-tè kóng, " Tān-goān I-si-ma-el oa̍h tī Lí ê bīn-chêng. "
17:19 Siōng-tè kóng, " M̄-sī lah, lí ê bó͘ Sa-la̍h ē kā lí seⁿ chi̍t-ê kiáⁿ, lí ē kā i hō-miâ kiò-chò Í-sak. Góa ē kah i siat-li̍p Góa ê iok, chò i ê kiáⁿ-sun éng-oán ê iok.
17:20 Koan-hē I-si-ma-el, Góa mā ū thiaⁿ lí kiû; lí khòaⁿ! Góa í-keng kā i sù-hok, beh hō͘ i heng-ōng, ke-thiⁿ hui-siông chē. I ē seⁿ cha̍p-jī-ê cho̍k-tiúⁿ, Góa mā beh hō͘ i chiâⁿ-chò tōa kok.
17:21 Kàu mê-nî ê chit sî, Sa-la̍h ē kā lí seⁿ Í-sak, Góa ē kah i siat-li̍p Góa ê iok. "
17:22 Siōng-tè kah A-bu-la-hàm kóng soah, chiū lī-khui i, chiūⁿ thiⁿ khì.
17:23 Tú-tú hit ji̍t, A-bu-la-hàm chiàu Siōng-tè só͘ kā i kóng ê, kā i ê kiáⁿ I-si-ma-el kah A-bu-la-hàm chhù lāi it-chhè ê chapo͘ lâng, bô-lūn tī chhù lāi seⁿ ê, á-.sī ēng i ê gîn bé-.lâi ê lóng kiâⁿ kat-lé.
17:24 A-bu-la-hàm siū kat-lé ê sî, káu-cha̍p-káu hòe.
17:25 I ê kiáⁿ I-si-ma-el siū kat-lé ê sî, cha̍p-saⁿ hòe.
17:26 Tú-tú hit ji̍t, A-bu-la-hàm kah i ê kiáⁿ I-si-ma-el tâng-siū kat-lé.
17:27 Chhù lāi só͘-ū ê lâng, bô-lūn tī chhù lāi seⁿ ê, á-.sī ēng gîn tùi gōa-bīn ê lâng bé-.lâi ê, lóng kah i tâng-chê siū kat-lé.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。