民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 Koan-hē Hiàn-chè ê Kui-tēng
Siōng-chú hoan-hù Mô͘-se kóng,
15:2 " Lí tio̍h hoan-hù I-su-la-el lâng, kā in kóng: Lín nā kàu Góa só͘ siúⁿ-sù hō͘ lín tòa ê tē,
15:3 nā ài tùi gû-kûn á-.sī iûⁿ-kûn hiàn hō͘ Siōng-chú chò hóe-chè, to̍h-sī sio-chè á-.sī pa̍t chióng ê chè, beh siā goān á-.sī chò hoaⁿ-hí hiàn ê chè, á-.sī kàu tiāⁿ tio̍h ê cheh-kî, chò phang-phang ê chè hiàn hō͘ Siōng-chú.
15:4 Hitê hiàn lé-mi̍h ê, ta̍k chiah iûⁿ-á tio̍h phòe iù ê mī-hún cha̍p-hūn chi-it e-hoat kah iû sì-hūn chi-it hin, tiâu-hô chò sò͘-chè.
15:5 Chiú mā tio̍h sì-hūn chi-it hin lâi chò koàn-tiān, bô-lūn sio-chè á-.sī pa̍t chióng chè, lóng tio̍h ánne lâi hiàn hō͘ Siōng-chú.
15:6 Ūi tio̍h mî-iûⁿ-káng, lí tio̍h chún-pī iù ê mī-hún gō͘-hūn chi-it e-hoat kah iû saⁿ-hūn chi-it hin, tiâu-hô chò sò͘-chè.
15:7 Koh ēng chiú saⁿ-hūn chi-it hin chò koàn-tiān chè, chò phang-phang ê chè lâi hiàn hō͘ Siōng-chú.
15:8 Lí nā chún-pī gû-káng-á chò sio-chè á-.sī pa̍t chióng ê chè lâi siā goān, á-.sī chò siā-un-chè lâi hiàn hō͘ Siōng-chú,
15:9 to̍h-sī ēng iù ê mī-hún cha̍p-hūn chi saⁿ e-hoat kah iû pòaⁿ hin, tiâu-hô chò sò͘-chè, kah gû-káng-á chò-hóe hiàn.
15:10 Koh ēng chiú pòaⁿ hin chò koàn-tiān ê chè, hiàn hō͘ Siōng-chú chò phang-phang ê hóe-chè.
15:11 " Á-sī ūi tio̍h chi̍t chiah gû-káng, á-.sī chi̍t chiah mî-iûⁿ-káng, á-.sī chi̍t chiah mî-iûⁿ-á, á-.sī soaⁿ-iûⁿ-á, lóng tio̍h ánne chò.
15:12 Chiàu lín só͘ chún-pī ê sò͘-gia̍h, chiàu ta̍k chiah ê gia̍h-sò͘, lóng tio̍h ánne chò.
15:13 Kiàn-nā pún-tē-lâng kā phang-phang ê hóe-chè hiàn hō͘ Siōng-chú, lóng tio̍h chiàu ánne chò chiahê tāichì.
15:14 Nā ū chhut-gōa lâng tī lín tiong-kan, á-.sī ta̍k sè-tāi ū lâng tòa tī lín tiong-kan, beh hiàn phang-phang ê hóe-chè hō͘ Siōng-chú, lín ánne kiâⁿ, in mā tio̍h chiàu ánne kiâⁿ.
15:15 KÓng tio̍h hōe-chiòng, lín kah tòa tī lín tiong-kan ê chhut-gōa lâng, lóng kâng sio-siâng ê lē, tī Siōng-chú ê bīn-chêng chò lín ta̍k sè-tāi éng-oán ê lē; lín ánne chò, chhut-gōa lâng mā tio̍h chiàu ánne chò.
15:16 Lín kah chhut-gōa lâng tī lín tiong-kan ê, tio̍h chiàu kâng sio-siâng ê lē, sio-siâng ê hoat-tō͘. "
15:17 Siōng-chú hoan-hù Mô͘-se kóng,
15:18 " Lí tio̍h hoan-hù I-su-la-el lâng, kā in kóng: Lín kàu Góa só͘ chhōa lín ji̍p-khì hit-ê tē.
15:19 Chia̍h hit só͘-chāi ê bí-niûⁿ, chiū tio̍h hiàn kí-chè hō͘ Siōng-chú.
15:20 Lín tio̍h ēng khí-thâu se̍k ê mī-hún chò piáⁿ, hiàn chò kí-chè; lín kí-khí, chhin-chhiūⁿ kí-khí tiūⁿ-tiâⁿ ê ngó͘-kok sio-siâng.
15:21 Lín ta̍k sè-tāi tio̍h ēng lín khí-thâu se̍k ê mī-hún lâi chò kí-chè, hiàn hō͘ Siōng-chú.
15:22 Bô-ì-tiong Hoān-chōe ê Hiàn-chè Kui-tēng
" Lín ū chhò-gō͘ ê sî, bô siú Siōng-chú só͘ hoan-hù Mô͘-se chiahê it-chhè ê bēng-lēng,
15:23 to̍h-sī Siōng-chú thok Mô͘-se it-chhè só͘ bēng-lēng lín ê, tùi Siōng-chú bēng-lēng lín ê ji̍t, kàu tī lín ê ta̍k sè-tāi.
15:24 Nā ū chhò-gō͘ kiâⁿ, hōe-chiòng mā m̄-chai, āu-lâi hōe-chiòng tio̍h hiàn chi̍t chiah gû-káng-á chò sio-chè, mā chiàu hoat-tō͘ ēng i ê sò͘-chè kah koàn-tiān ê chè, chò-hóe chò phang-phang ê chè hiàn hō͘ Siōng-chú, koh tio̍h hiàn chi̍t chiah soaⁿ-iûⁿ-káng chò sio̍k-chōe ê chè.
15:25 Chè-si tio̍h ūi I-su-la-el lâng ê hōe-chiòng sio̍k-chōe, in chiū tit tio̍h sià-bián, in-ūi che sī chhò-gō͘, in mā in-ūi in ê chhò-gō͘, tòa in ê lé-mi̍h, to̍h-sī hiàn hō͘ Siōng-chú ê hóe-chè kah sio̍k-chōe-chè, lóng tòa kàu Siōng-chú ê bīn-chêng.
15:26 I-su-la-el lâng ê hōe-chiòng kah kià-kha tī in tiong-kan ê chhut-gōa lâng, chiū ē tit tio̍h sià-bián, in-ūi chit-ê chōe sī jîn-bîn chhò-gō͘ só͘ hoān ê.
15:27 " Nā ū chi̍t-ê lâng chhò-gō͘ hoān chōe, i chiū tio̍h hiàn bī-móa-nî ê soaⁿ-iûⁿ-bó chò sio̍k-chōe-chè.
15:28 Hitê lâng tī i chhò-gō͘ hoān chōe ê sî, chè-si tio̍h tī Siōng-chú ê bīn-chêng kā i sio̍k-chōe, i chiū ē tit tio̍h sià-bián.
15:29 I-su-la-el tiong ê pún-tē-lâng kah kià-kha tī in tiong-kan ê chhut-gōa lâng, nā chò m̄ tio̍h tāichì, tio̍h chiàu kāng chi̍t-ê lē.
15:30 " Chóng-.sī, hit-ê ngē-ngē beh chò hit-ê tāichì ê lâng, bô-lūn sī pún-tē-lâng á-.sī kià-kha ê, i siat-to̍k Siōng-chú, tio̍h tùi i ê jîn-bîn tiong kā i chián-tû.
15:31 In-ūi i biáu-sī Siōng-chú ê ōe, pōe-ge̍k I ê bēng-lēng, hit-ê lâng tio̍h choân-pō͘ chián-tû, i ê chōe-kò tio̍h kui tī i kakī."
15:32 Ûi-hoān An-hioh-ji̍t ê Lâng
I-su-la-el lâng tī khòng-iá ê sî, tú tio̍h chi̍t-ê lâng tī An-hioh-ji̍t khioh chhâ.
15:33 Hiahê tú tio̍h hit-ê khioh chhâ ê lâng, chhōa i kàu Mô͘-se kah A-lông kah hōe-chiòng hia.
15:34 In chiū kā i koaiⁿ-kìm, in-ūi iáu-bōe chí-bêng tio̍h án-chóaⁿ kā i pān.
15:35 Siōng-chú tùi Mô͘-se kóng, " Hitê lâng it-tēng tio̍h hō͘ i sí, hōe-chiòng tio̍h tī iâⁿ gōa ēng chio̍h-thâu kā i tìm-sí.
15:36 Hōe-chiòng chhōa hit-ê lâng chhut-khì iâⁿ gōa, ēng chio̍h-thâu kā i tìm kàu sí, sī chiàu Siōng-chú só͘ bēng-lēng Mô͘-se ê.
15:37 Saⁿ-á Chò Chhiu ê Kui-tēng
Siōng-chú hoan-hù Mô͘-se kóng,
15:38 " Lí tio̍h hoan-hù I-su-la-el lâng, kā in kóng: Hō͘ in tāi-tāi tī saⁿ-á piⁿ chò chhiu, koh tī ē-té piⁿ ê chhiu téng, tiò chi̍t tiâu nâ-sek ê iù-tòa.
15:39 Beh kā lín chò chhiu hō͘ lín khòaⁿ-.tio̍h, thang ē kì-tit Siōng-chú ê bēng-lēng lâi chun-hêng, bián-tit lín hòng-chhiòng kakī ê sim-ì, kakī ê ba̍k-chiu, lâi kiâⁿ kan-îm, chhin-chhiūⁿ lín pêng-sî só͘ kiâⁿ ê sio-siâng,
15:40 hō͘ lín ē kì-tit lâi kiâⁿ Góa it-chhè ê bēng-lēng, chiâⁿ-chò sèng kui lín ê Siōng-tè.
15:41 " Góa sī Siōng-chú — lín ê Siōng-tè, chhōa lín chhut Ai-gi̍p tē, beh chò lín ê Siōng-tè. Góa sī Siōng-chú — lín ê Siōng-tè. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。