民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 An-tì Chhit Chóaⁿ Teng
Siōng-chú hoan-hù Mô͘-se kóng,
8:2 " Lí hoan-hù A-lông kā i kóng, lí tiám teng ê sî, chhit chóaⁿ teng lóng tio̍h tī teng-tâi chêng chiò-kng. "
8:3 A-lông chiàu ánne kiâⁿ, tiám teng chiò-kng tī teng-tâi chêng, sī chiàu Siōng-chú bēng-lēng Mô͘-se ê.
8:4 Chit-ê teng-tâi ê chò-hoat, sī ēng kim phah-ê, liân i ê chō kah i ê hoe lóng sī phah-ê. Mô͘-se chè-chō teng-tâi, sī chiàu Siōng-chú só͘ chí-sī ê khoán-sit.
8:5 Lē-bī Lâng ê Kiat-chēng kah Hōng-hiàn
Siōng-chú hoan-hù Mô͘-se kóng,
8:6 " Lí tio̍h tùi I-su-la-el lâng ê tiong-kan kéng-chhut Lē-bī lâng, hō͘ in chheng-khì.
8:7 Hō͘ in chheng-khì tio̍h ánne kiâⁿ, ēng tû-khì chōe ê chúi hiù tī in seng-khu, koh kah in ēng thì thâu to thì choân seng-khu, sé saⁿ-khò͘, chheng-khì pún-sin.
8:8 Āu-lâi, in tio̍h chhú chi̍t chiah gû-káng-á kah i ê sò͘-chè, to̍h-sī tiâu-hô iû ê iù mī-hún; lí tio̍h lēng-gōa chhú chi̍t chiah gû-káng-á chò sio̍k-chōe-chè.
8:9 Lí tio̍h chhōa Lē-bī lâng kàu hōe-bō͘ chêng, chū-chi̍p I-su-la-el cho̍k ê choân hōe-chiòng.
8:10 Koh chhōa Lē-bī lâng kàu Siōng-chú ê bīn-chêng, I-su-la-el lâng tio̍h tī Lē-bī lâng ê téng-bīn hōaⁿ-chhiú.
8:11 A-lông tio̍h hiàn Lē-bī lâng tī Siōng-chú ê bīn-chêng, chò I-su-la-el lâng ê iô-chè, hō͘ in thang chò ho̍k-sāi Siōng-chú ê kang.
8:12 Lē-bī lâng tio̍h tī hiahê gû-káng-á ê thâu-khak téng hōaⁿ-chhiú; lí tio̍h hiàn chi̍t chiah chò sio̍k-chōe-chè, koh hiàn chi̍t chiah chò sio-chè hō͘ Siōng-chú, lâi kā Lē-bī lâng sio̍k-chōe.
8:13 " Lí tio̍h hō͘ Lē-bī lâng khiā tī A-lông kah i ê kiáⁿ ê bīn-chêng, hiàn in chò iô-chè hō͘ Siōng-chú.
8:14 Án-ne, lí tio̍h tùi I-su-la-el lâng hun-pia̍t Lē-bī lâng, Lē-bī lâng chiū beh kui tī Góa.
8:15 Chit sî liáu-āu, Lē-bī lâng tio̍h ji̍p-khì chò hōe-bō͘ ê kang; lí tio̍h hō͘ in chheng-khì, hiàn in chò iô-chè,
8:16 in-ūi in sī tùi I-su-la-el tiong oân-choân kui góa ê, góa kéng-soán in lâi sio̍k tī góa, lâi thè it-chhè thâu-the ê, to̍h-sī I-su-la-el lâng ê thâu-chiūⁿ ê.
8:17 In-ūi I-su-la-el tiong it-chhè thâu-chiūⁿ seⁿ ê, á-.sī lâng, á-.sī chengseⁿ, lóng sī Góa ê. Góa tī Ai-gi̍p tē phah-sí it-chhè thâu-chiūⁿ seⁿ ê hit ji̍t, í-keng kā in hun-pia̍t chò sèng kui tī Góa.
8:18 Góa kéng-soán Lē-bī lâng, lâi thè I-su-la-el lâng it-chhè thâu-chiūⁿ seⁿ ê.
8:19 Góa tùi I-su-la-el lâng tiong kéng-soán Lē-bī lâng, siúⁿ-sù A-lông kah i ê kiáⁿ-sun, thang thè I-su-la-el lâng chò hōe-bō͘ ê chhe-ēng, koh ūi I-su-la-el lâng sio̍k-chōe; bián-tit I-su-la-el lâng óa-kīn sèng-só͘ ê sî, ū chai-hō lîm-kàu I-su-la-el lâng ê tiong-kan.
8:20 Mô͘-se kah A-lông í-ki̍p I-su-la-el choân hōe-chiòng, chiū tùi Lē-bī lâng ánne kiâⁿ; kiàn-nā Siōng-chú lūn-khí Lē-bī lâng só͘ bēng-lēng Mô͘-se ê, I-su-la-el lâng chiū tùi in ánne kiâⁿ.
8:21 Chiū ánne, Lē-bī lâng chheng-khì kakī, tû-khì chōe, sé in ê saⁿ-khò͘; A-lông kā in hiàn chò iô-chè tī Siōng-chú ê bīn-chêng, A-lông koh ūi in sio̍k-chōe lâi hō͘ in chheng-khì.
8:22 Jiân-āu Lē-bī lâng ji̍p-.khì, tī A-lông kah i ê kiáⁿ ê bīn-chêng, tī hōe-bō͘ tiong chò in ê kang. Siōng-chú lūn Lē-bī lâng lâi bēng-lēng Mô͘-se ê, I-su-la-el lâng chiū ánne tùi in kiâⁿ.
8:23 Siōng-chú hoan-hù Mô͘-se kóng,
8:24 " Lūn Lē-bī lâng sī ánne, tùi jī-cha̍p gō͘ hòe í-siōng, in tio̍h lâi hōe-bō͘ chò chhe-ēng.
8:25 Kàu gō͘-cha̍p hòe chiū thêng kang, bô koh chò chhe-ēng;
8:26 chóng-.sī, tio̍h tī hōe-bō͘ kah in ê hiaⁿ-tī chò-hóe sū-hāu, siú só͘ kau-tài ê, bô koh chò-kang; koan-hē só͘ kau-tài Lē-bī lâng ê, lí tio̍h tùi in ánne kiâⁿ. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。