創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 Siōng-tè kah A-bú-lâm Li̍p-iok
Chiahê tāichì liáu-āu, Siōng-chú ê ōe tī ī-siōng tiong lîm-kàu A-bú-lâm, kóng, " A-bú-lâm, lí m̄-bián kiaⁿ, Góa sī lí ê tîn-pâi, sī lí ke̍k tōa ê pò-siúⁿ. "
15:2 A-bú-lâm kóng, " Chì-koân Siōng-chú ah, Lí beh hō͘ góa siáⁿ-mi̍h? Góa kàu taⁿ bô kiáⁿ, beh sêng-chiap góa ê ka-gia̍p ê to̍h-sī Ta-má-su-ko lâng E-lí-e-chel. "
15:3 A-bú-lâm koh kóng, " Lí bô hō͘ góa ū kiáⁿ-sun, hit-ê chhut-sì tī góa chhù lāi ê lô͘-po̍k beh chò góa ê hō͘-sû. "
15:4 Siōng-chú koh lîm-kàu, kā i kóng, " Chit-ê lâng m̄-sī beh chò lí ê hō͘-sû; tùi lí pún-sin chhut ê chiah sī lí ê hō͘-sû. "
15:5 Siōng-chú chiū chhōa i chhut-khì gōa-bīn, kóng, " Lí khòaⁿ thiⁿ, sǹg hiahê chheⁿ, lí sǹg ē liáu á-bē? " Koh tùi i kóng, " Lí ê kiáⁿ-sun mā ē chhin-chhiūⁿ ánne. "
15:6 A-bú-lâm siong-sìn Siōng-chú ê ōe, Siōng-chú chiū kā i sǹg-chò sī gī lâng.
15:7 Siōng-chú koh tùi i kóng, " Góa sī Siōng-chú, bat chhōa lí chhut Kal-tí-ah ê El siâⁿ, sī ūi tio̍h beh kā chit-ê tē hō͘ lí chò sán-gia̍p. "
15:8 A-bú-lâm kóng, " Chì-koân Siōng-chú ah, góa ná ē chai góa ē tit tio̍h chit-ê tē chò sán-gia̍p? "
15:9 Siōng-chú kā i kóng, " Lí kā Góa chhú chi̍t chiah saⁿ hòe tōa bó ê gû, chi̍t chiah saⁿ hòe tōa bó ê soaⁿ-iûⁿ, chi̍t chiah saⁿ hòe tōa kang ê mî-iûⁿ, chi̍t chiah pan-kah, chi̍t chiah hún-chiáu. "
15:10 A-bú-lâm chiū the̍h chiahê mi̍h lâi, ta̍k chióng tùi-tiong phòa-khui chò nn̄g pêng, chit pêng kah hit pêng pâi sio-tùi, chí ū chiáu bô phòa-khui.
15:11 Ū eng-chiáu lo̍h-lâi tī sí ê chengseⁿ ê téng-bīn, A-bú-lâm chiū kā i kóaⁿ-cháu.
15:12 Ji̍t beh lo̍h ê sî, A-bú-lâm khùn tāng-bîn; hut-jiân ū chin o͘-àm ê tōa kiaⁿ-hiâⁿ lîm-kàu i.
15:13 Siōng-chú tùi A-bú-lâm kóng, " Lí it-tēng tio̍h chai, lí ê kiáⁿ-sun ē chhut-gōa tī pa̍t lâng ê tē, koh ho̍k-sāi hit só͘-chāi ê lâng; hit só͘-chāi ê lâng ē kā in khó͘-to̍k sì-pah nî.
15:14 In só͘ beh ho̍k-sāi ê kok, Góa ē kā in hêng-hoa̍t, āu-lâi in ē tòa chin chē châi-bu̍t tùi hia chhut-.lâi.
15:15 Lí ē an-jiân sí-bông, chia̍h tn̂g hòe-siū, hō͘ lâng bâi-chòng.
15:16 Kàu tē-sì tāi, in ē tńg-lâi chia, in-ūi A-mô͘-lī cho̍k ê chōe iáu-bōe koàn-boán. "
15:17 Ji̍t-lo̍h thiⁿ àm, ū chhut ian ê lô͘ kah teh-to̍h ê hóe-pé, tùi hiahê phòa pêng ê bah keng-kòe.
15:18 Tng hit ji̍t, Siōng-chú kah A-bú-lâm li̍p-iok, kóng, " Góa ū kā chit-ê tē, tùi Ai-gi̍p ê hô kàu hit-ê tōa hô, to̍h-sī Iu-hu-la-té hô, hō͘ lí ê kiáⁿ-sun;
15:19 to̍h-sī Ke-nî, Ki-nî-sé, Kat-mô͘-nî,
15:20 Hiat, Pe-lí-ji, Le-hoa-im,
15:21 A-mô͘-lī, Ka-nân, Gi-ga-sih, I-é-bú-suh, chiahê cho̍k ê tē. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。